ORANG ke pechayaka ajar Triniti ngumbai Petara nya tiga iku petara dalam seiku petara—Apai, Anak Enggau Roh Kudus. Sida dikumbai sama enggau pangan diri, pemadu bekuasa, lalu nadai pun. Nitihka ajar Triniti, Apai nya Petara, Anak nya Petara, lalu Roh Kudus mega Petara. Tang, Petara ti bendar semina seiku aja.

 Mayuh orang pechayaka Triniti ngaku sida enda ulih nerangka ajar tu. Taja pia, sida agi ngumbai nya ajar ari Bup Kudus. Tang, leka jaku “Triniti” nadai kala ayan ba Bup Kudus. Kati ajar Triniti tu amat bisi ba Bup Kudus? Kena nyaut tu, aram kitai beratika siti ayat Bup Kudus ke selalu dikena nyukung ajar Triniti.

John 1:1 (BKB) madah: ‘Ba pun iya kelia, Jaku endang udah bisi. Jaku nya enggau Petara, lalu Jaku nya endang Petara.’ Ba bab ti sama, rasul John enggau terang nunjukka “Jaku” nya Jesus. (John 1:14) Laban Jaku dikumbai Petara, nya alai sekeda orang ngumbai Anak enggau Apai nya Petara ti sama.

Kingatka, ayat asal Bup Kudus tu ditulis ngena jaku Gerika. Udah nya, orang ke nyalin Bup Kudus ngalihka teks Gerika ngagai bansa jaku bukai. Taja pia, sekeda orang ke nyalin Bup Kudus enda ngena ‘Jaku nya endang Petara.’ Nama kebuah enda? Laban, nitihka penemu sida pasal jaku Gerika ti dikena nulis Bup Kudus, sida ngumbai ‘Jaku nya endang Petara’ patut disalin enggau chara bukai. Baka ni? Chunto: “Jaku nya baka Petara.” (A New Translation of the Bible) “Jaku nya enggau Petara, lalu bisi pemanah ti sama.” (The Translator’s New Testament) Nitihka dua salin tu, “Jaku” ukai Petara ti Pemadu Bekuasa. Ketegal penuduk iya ti tinggi entara semua utai ti digaga Jehovah, Jaku dikumbai “petara.” Reti “petara” ditu “iya ti bekuasa.”

Mayuh orang enda nemu Bup Kudus dalam jaku Gerika. Nyadi, baka ni nuan ulih nemu reti utai ti dipadah rasul John? Pikirka chunto tu: Seiku cikgu nerang siti subjek ngagai nembiak iya. Udah nya, sida bisi penemu ti enda sebaka pasal utai ti diterangka cikgu nya. Baka ni sida ulih mutarka pekara tu? Sida ulih nanya cikgu nya  baru ngambika bulih penerang mayuh agi. Kelimpah ari nya, ngulihka penemu ti betul ari endur bukai ulih nulung sida meretika subjek nya enggau manah agi. Baka nya mega, kena meretika ayat ba John 1:1, nuan ulih meda Injil John ke nerang mayuh agi pasal penuduk Jesus. Ngulihka penemu mayuh agi pasal subjek tu deka nulung nuan bulih penemu ti betul.

Peratika nama ditulis John ba bab 1, ayat 18: ‘Nadai orang udah kala meda Petara [Pemadu Bekuasa].’ Tang, mensia kala meda Jesus, Anak Iya. John madah: “Jaku nya [Jesus] nyadi mensia, lalu diau begulai enggau kitai, lalu kami udah meda mulia Iya.” (John 1:14, BKB) Baka ni Anak ulih nyadi Petara ti Pemadu Bekuasa? John mega madah, Jaku nya ‘enggau Petara.’ Tu nunjukka Jesus nya ukai Petara. Nya alai, iya ulih enggau Petara, amat enda? Pia mega, baka ke ditulis ba John 17:3, Jesus enggau terang madahka bida antara iya enggau Apai iya ti di serega. Iya ngumbai Apai iya ‘Petara ti bendar.’ Ba pengujung Injil iya, John nyimpulka: “Utai tu ditulis ngambika kita arapka Jesus nya Kristus, Anak Petara.” (John 20:31) Peratika Jesus dikumbai Anak Petara, ukai Petara. Ngulihka penemu mayuh agi ari Injil John nulung kitai nemu reti ayat ba John 1:1. Jesus, Jaku nya, dikumbai ‘petara’ laban iya bisi penuduk ti tinggi, tang enda sama enggau Petara ti Pemadu Bekuasa.

Pikirka baru pasal chunto cikgu enggau nembiak iya. Sekeda nembiak iya agi bebagi ati, taja pan udah ninga penerang ti mayuh agi ari cikgu sida. Nama patut digaga sida? Sida ulih ngiga cikgu bukai, ngambika nerang ngagai sida pasal subjek ti sama. Enti cikgu kedua nya nentuka utai ti diterangka cikgu keterubah nya betul, nembiak tentu enda agi bebagi ati. Baka nya mega, enti nuan enda entu meretika pasal utai ti ditulis John ba  Bup Kudus pasal kaul entara Jesus enggau Petara ti Pemadu Bekuasa, nuan ulih meda nama utai ti ditulis penulis Bup Kudus bukai. Chunto, peratika nama utai ti ditulis Matthew. Pasal pengujung dunya tu, iya nulis utai ti disebut Jesus: “Tang nadai orang nemu hari tauka jam utai tu deka nyadi. Melikat ke di serega enda nemu, lalu Anak Mensia pen enda mega nemu. Semina Apai aja nemu.” (Matthew 24:36) Baka ni ayat tu nentuka Jesus nya ukai Petara ti Pemadu Bekuasa?

Jesus madah Apai nemu mayuh agi ari Anak. Enti Jesus nya Petara ti Pemadu Bekuasa, iya tentu bisi penemu ti sama baka Apai iya. Nya alai, Anak enggau Apai enda sama. Tang, sekeda orang deka madah: ‘Jesus bejaku baka tu maya iya nyadi mensia.’ Enti pia, baka ni enggau roh kudus? Enti roh kudus sama baka Petara, nama kebuah Jesus enda madah roh kudus nemu utai ti ditemu Apai?

Enti nuan terus belajarka Bup Kudus, nuan deka tetemuka mayuh agi ayat ari Bup Kudus ti nentuka pemendar pasal Apai, Anak enggau roh kudus.—Masmur 90:2; Kereja Rasul 7:55; Kolosi 1:15.