BUP Pemandang bisi ngena leka jaku sempama. Chunto, iya madah pasal seiku indu sundal ke bisi nama “Babilon ti Besai” ditulis ba kening iya. Indu sundal nya duduk ba mayuh “mensia” enggau “bansa.” (Pemandang 17:1, 5, 15) Nadai orang indu ti amat ulih ngereja tu. Nya alai, Babilon ti Besai semina tanda aja. Nyadi, nama reti indu sundal ke dipadah ba ayat tu?

Ba Pemandang 17:18, indu nya disempamaka baka “nengeri ti besai ti merintah bala raja di dunya tu.” Leka jaku “nengeri” nunjukka siti gerempung mensia. Laban “nengeri ti besai” nya udah merintah “bala raja di dunya  tu,” indu ke benama Babilon ti Besai nya tentu siti gerempung ti bekuasa. Nyadi, Babilon ti Besai nya gerempung semua pengarap pelesu ba dunya tu. Aram kitai meda sekeda ayat ari bup Pemandang ti nyukung pekara tu.

Siti gerempung ulih dikumbai politik, pengawa bedagang, tauka pengarap. Indu ke benama Babilon ti Besai nya ukai gerempung politik laban Jaku Petara madah “bala raja di dunya tu,” tauka pengawa politik ba dunya tu, “bambai” enggau iya. Pengawa bambai nunjukka iya bisi kaul enggau bala pemerintah ba dunya tu. Nya kebuah, iya dikumbai “indu sundal ti tebilang.”—Pemandang 17:1, 2; James 4:4.

Babilon ti Besai ukai gerempung pengawa bedagang laban “bala sedagar dunya” ke ngambarka pengawa bedagang, deka ngulit maya iya dipunaska. Pia mega, Bup Kudus madah bala raja enggau bala sedagar meda Babilon ti Besai ari “jauh.” (Pemandang 18:3, 9, 10, 15-17) Nya alai, kitai ulih nyimpulka Babilon ti Besai ukai gerempung politik tauka gerempung pengawa bedagang, tang gerempung pengarap.

Babilon ti Besai endang gerempung pengarap laban Bup Kudus madah iya nipu semua bansa ngena “kereja keramat” iya. (Pemandang 18:23) Laban semua pengawa keramat iya datai ari bala antu, nya alai, Bup Kudus ngumbai Babilon ti Besai “endur alai antu diau.” (Pemandang 18:2; Ulang Adat 18:10-12) Bup Kudus mega madah gerempung tu bebendar ngelaban pengarap ti bendar, merinsa “sida nabi” enggau ‘nembiak Petara.’ (Pemandang 18:24) Babilon ti Besai begedi amat ke pengarap ti bendar nyentukka iya sanggup merinsa sereta munuh orang ti “taluk ke Jesus.” (Pemandang 17:6) Nya alai, indu ke benama Babilon ti Besai enggau terang ngambarka gerempung pengarap pelesu ba dunya tu. Tu nyengkaum semua pengarap ti nulak Petara Jehovah.