1. Baka ni kitai deka bulih penguntung enti kitai nyembah Petara enggau chara ti betul?

PETARA JEHOVAH ibuh bendar ke kitai, lalu deka kitai bulih penguntung ari iring Iya. Enti kitai nyembah Iya enggau chara ti betul, kitai deka gaga ati lalu ulih nyeliahka mayuh penanggul ba pengidup. Kitai mega deka bulih berekat enggau tulung ari Iya. (Isaiah 48:17) Taja pia, beratus pengarap ngumbai diri ngajar pemendar pasal Petara. Tang, ajar sida jauh ari utai ti bendar pasal Petara enggau utai ti dikedeka Iya ari kitai.

2. Baka ni nuan ulih nemu chara ti betul nyembah Jehovah, lalu nama chunto ke ulih nulung nuan nemu pasal tu?

² Baka ni nuan ulih nemu chara ti betul nyembah Jehovah? Nuan enda ibuh belajar enggau mandingka utai ti diajar mayuh pengarap. Nuan semina belajar nama utai ti bendar diajar Bup Kudus pasal pengarap ti bendar. Chunto: Enti nuan diberi pengawa nentuka ni bagi duit pelesu, baka ni nuan nentuka iya? Kati nuan deka ngingatka semua tanda ba duit pelesu? Enda. Nuan tentu deka mansik duit ke amat. Udah nuan ngelala baka ni duit ke amat, nya baru nuan ulih ngelala duit ke pelesu. Pia mega, enti kitai ngelala ni bagi pengarap ti bendar, kitai mega ulih ngelala pengarap ti pelesu.

3. Nitih ku Jesus, nama patut digaga kitai enti deka pengarap kitai diterima Petara?

 ³ Kitai patut nyembah Jehovah enggau chara ti diterima Iya. Mayuh orang pechaya semua pengarap ngerinduka ati Petara. Tang, Bup Kudus enda ngajar baka nya. Enda chukup enti kitai ngumbai diri orang Kristian aja. Jesus madah: ‘Ukai semua orang ke ngangauka aku “Tuan, Tuan” deka tama ngagai Perintah serega, tang semina orang ke ngereja peneka Apai aku ti di serega.’ Nya alai, kitai patut belajar nama utai dikedeka Petara ari kitai, lalu ngereja iya ngambika pengarap kitai diterima Petara. Jesus ngumbai orang ke enda ngereja peneka Petara “ngereja penyai.” (Matthew 7:21-23) Baka duit pelesu, pengarap pelesu nadai guna. Iya mega ulih ngemedis.

4. Nama reti jaku Jesus pasal dua iti jalai, lalu kini tuju jalai nya?

⁴ Jehovah meri genap iku orang ba dunya tu peluang bulih pengidup belama iya. Taja pia, kitai patut nyembah Petara enggau chara ti betul, lalu idup nitihka chara ti diterima Iya ngambika bulih pengidup belama iya ba dunya Paradais. Tang, mayuh orang nulak chara nya. Nya alai, Jesus madah: “Tama nengah pintu ti sempit, laban pintu ti besai enggau jalai ti luas nuju ngagai pengerusak, lalu mayuh orang nengah jalai nya. Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.” (Matthew 7:13, 14) Pengarap ti bendar nuju ngagai pengidup belama iya. Pengarap ti pelesu nuju ngagai pengerusak. Jehovah enggai mensia dipunaska, nya kebuah Iya meri orang peluang belajar pasal Iya. (2 Peter 3:9) Iya ke amat, chara kitai nyembah Petara nentuka kitai idup tauka mati.

5. Baka ni kitai ulih ngelala orang ke nitihka pengarap ti bendar?

⁵ Baka ni “jalai . . . nuju ngagai pengidup” ulih ditemu?  Jesus madahka pengarap ti bendar ulih ditemu ari chara pengidup orang ke nitihka ajar nya. “Kita deka ngelala sida ari buah sida,” ku Jesus. “Semua kayu ti galak mansutka buah ti manah.” (Matthew 7:16, 17) Nyadi, orang ke nitihka pengarap ti bendar deka dikelala ari utai ti dipechaya enggau ulah sida. Taja pan sida enda sempurna, lalu bisi ngaga penyalah, sida enggau naka ulih ngereja peneka Petara. Aram kitai beratika enam iti tanda kena ngelala orang ke nitihka pengarap ti bendar.

6, 7. Nama runding nembiak Petara pasal Bup Kudus, lalu baka ni Jesus nyadi teladan ba pekara tu?

⁶ Ajar nembiak Petara nitihka Bup Kudus. Bup Kudus madah: ‘Semua Bup Kudus endang bepun ari Petara magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus, ngambika semua nembiak Petara chukup disikap ngereja genap macham pengawa ti badas.’ (2 Timoti 3:16, 17) Rasul Paul nulis ngagai bala ke sama pengarap: ‘Lebuh kita nerima jaku Petara ti didinga kita ari kami suba, kita nerima iya ukai baka ke nerima jaku mensia, tang nerima jaku Petara.’ (1 Tesalonika 2:13) Nya alai, utai ti dipechaya enggau pengawa sida enda nitihka penemu mensia tauka adat asal, tang nitihka Jaku Petara, Bup Kudus.

⁷ Jesus nyadi teladan ti manah ngajar nitihka Jaku Petara. Dalam sampi iya ngagai Apai ti di serega, iya madah: “Jaku Nuan nya pemendar.” (John 17:17) Jesus pechayaka Jaku Petara, lalu semua utai ti diajar iya sejalai enggau Bup Kudus. Baka ni kitai nemu? Sebedau Jesus nyebut ayat ba Bup Kudus, iya selalu madah: “Udah ditulis.” (Matthew 4:4, 7, 10) Pia mega, nembiak Petara kemaya hari tu enda ngajar penemu diri empu. Sida pechaya Bup Kudus nya Jaku Petara, lalu ajar sida nitihka Bup Kudus.

8. Sembah ngagai Jehovah nyengkaum nama?

 ⁸ Sida ke nitih pengarap ti bendar semina nyembah Jehovah enggau madahka nama Iya. Jesus madah: ‘Sembah Jehovah Petara nuan, lalu betuaika Iya siku aja!’ (Matthew 4:10) Nya alai, nembiak Petara semina nyembah Jehovah seiku aja. Sembah tu nyengkaum nulung orang nemu nama Petara ti bendar, lalu baka ni Iya nya. Masmur 83:18 madah: “Awakka sida nemu Nuan siku aja ti TUHAN [Jehovah, NW], Raja ti Pemadu Tinggi ke serata dunya.” Jesus nyadi teladan nulung orang bukai ngelala Petara. Dalam sampi iya madah: “Aku udah madahka nama Nuan ngagai orang ke udah diberi Nuan ngagai Aku ari dunya tu.” (John 17:6) Pia mega, orang Kristian ke bendar kemaya hari tu ngajar orang pasal nama Petara, tuju Iya enggau pemanah Iya.

9, 10. Baka ni orang Kristian ke bendar ngayanka pengerindu sida ngagai pangan diri?

⁹ Nembiak Petara ngayanka pengerindu ti bendar ngagai pangan diri. Ku Jesus: ‘Enti kita rinduka pangan diri, nya baru semua orang deka nemu kita murid aku.’ (John 13:35) Orang Kristian menya bisi pengerindu ti bendar ngagai pangan diri. Pengerindu ti bendar tu enda ngira bansa, menua enggau chara pengidup, lalu ngempungka orang enggau pangan diri. (Kolosi 3:14) Pengarap pelesu nadai pengerindu baka tu. Baka ni kitai nemu? Sida bebunuh pangan diri ketegal enda sebaka bansa enggau menua. Tang, orang Kristian ke bendar enda baka nya. Bup Kudus madah: ‘Baka tu ku jalai kita ngelala sapa ke anak Petara, enggau sapa ke anak Sitan: barang sapa enda diau lurus, ukai anak Petara. Orang ke enda rinduka menyadi diri, ukai anak Petara. . . . Rinduka pangan diri. Kitai enda tau baka Kain ke endang enggi Sitan, lalu iya munuh menyadi iya Abel.’—1 John 3:10-12; 4:20, 21.

 ¹⁰ Endang amat, pengerindu ti bendar ukai semina enda munuh orang bukai. Orang Kristian ke bendar ngena awak, tulang, enggau reta tengkira nulung sereta meransang pangan diri. (Hebrew 10:24, 25) Sida betulung maya tusah, lalu lurus ati begulai enggau pangan diri. Sida amat nitihka ajar Bup Kudus ke ngasuh ngereja “pengawa ti badas ngagai semua orang.”—Galatia 6:10.

11. Nama kebuah kitai patut nerima Jesus Kristus nyadi pengelepas ke disediaka Petara?

¹¹ Orang Kristian ke bendar nerima Jesus Kristus nyadi pengelepas ke disediaka Petara. Bup Kudus madah: “Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai.” (Kereja Rasul 4:12) Baka ke dipelajar ba Pelajar 5, Jesus nyerahka nyawa diri nyadi tebus ke mensia ti ngasi. (Matthew 20:28) Nambahka nya, Jesus dipilih Petara nyadi Raja ba Perintah ti di serega, lalu iya deka merintah serata dunya tu. Petara deka kitai ngasika Jesus, lalu nitihka ajar iya enti kitai deka idup belama iya. Nya alai, Bup Kudus madah: “Barang sapa arapka Anak, bulih pengidup ti meruan belama iya. Barang sapa enda ngasika Anak, nadai bulih pengidup.”—John 3:36.

12. Nama reti nadai kaul enggau dunya tu?

¹² Orang Kristian ke bendar nadai kaul enggau dunya tu. Maya dipechara ba mua Pilate, gabenor bansa Rome, Jesus madah: ‘Perintah aku ukai ari dunya tu.’ (John 18:36) Enda ngira dini menua endur sida diau, bala murid Jesus ke bendar tunduk ngagai Perintah iya ti di serega. Sida nadai kaul enggau politik sereta penyarut ba dunya tu. Taja pia, nembiak Jehovah enda nagang orang enggau gerempung politik, megai pengawa ti bekaul enggau politik, tauka ngundi. Taja pan orang Kristian ke bendar nadai kaul enggau politik, sida nitihka undang-undang perintah. Nama kebuah? Laban Jaku Petara ngasuh sida  “nunduk” ngagai “perintah ti megai menua.” (Rome 13:1) Tang, maya atur perintah enda sejalai enggau utai ti dikedeka Petara, orang Kristian ke bendar nitihka teladan bala rasul ke madah: ‘Kami enda tau enda ngasika Petara, ukai ngasika mensia.’—Kereja Rasul 5:29; Mark 12:17.

13. Nama runding bala murid Jesus ke bendar pasal Perintah Petara, lalu nama digaga sida?

¹³ Bala murid Jesus ke bendar madahka semina Perintah  Petara aja ti meri peluang ngagai mensia. Jesus madahka: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14) Bala murid Jesus ke bendar madahka semina Perintah Petara aja ti ulih mutarka penusah mensia, ukai pemerintah mensia. (Masmur 146:3) Jesus ngajar kitai besampi ke perintah ti sempurna nya maya iya madah: “Datai meh Perintah Nuan. Nyadi meh peneka Nuan di dunya enggau di serega.” (Matthew 6:10) Jaku Petara madah Perintah ti di serega “deka ngerusak semua perintah bukai, lalu udah nya iya deka meruan belama iya.”—Daniel 2:44.

14. Ni bagi pengarap ke bisi semua tanda pengarap ti bendar?

¹⁴ Nya alai, tanya diri empu: ‘Ni bagi pengarap ti ngajar nitihka Bup Kudus, lalu madah pasal nama Jehovah? Ni bagi gerempung ti bisi pengerindu ti bendar, manggaika pengarap ba Jesus, nadai kaul enggau dunya tu, lalu madahka semina Perintah Petara aja ti meri peluang ngagai mensia? Ari semua pengarap ba dunya tu, ni bagi pengarap ke bisi semua utai tu?’ Semua utai tu nunjuk ngagai Saksi-Saksi Jehovah.—Isaiah 43:10-12.

15. Nama agi utai ti dikedeka Petara kelimpah ari arapka Iya bisi?

¹⁵ Arapka Petara aja enda chukup enti deka ngerinduka ati Iya. Laban Bup Kudus madah, bala antu pan arapka Petara bisi. (James 2:19) Tang, sida enda ngereja peneka Petara. Nya alai, sida enda diterima Iya. Kitai ukai semina arapka Petara bisi, tang kitai mega patut ngereja peneka Iya ngambika diterima Iya. Kitai mega patut pansut ari pengarap pelesu, lalu bepegai ba pengarap ti bendar.

16. Nama patut digaga kitai pasal utai ti bekaul enggau pengarap pelesu?

¹⁶ Paul madahka kitai patut nadai kaul enggau pengarap  pelesu. Iya nulis: “‘Pansut kita ari sida, lalu seraraka diri ari sida,’ ku Jehovah bejaku, ‘lalu anang negu utai ti enda tuchi; nya baru Aku deka nerima kita.’” (2 Korint 6:17; Isaiah 52:11) Nya alai, orang Kristian ke bendar nyeliahka sebarang utai ti bekaul enggau pengarap pelesu.

17, 18. Nama reti “Babilon ti Besai,” lalu nama kebuah patut “pansut ari iya” enggau jampat?

¹⁷ Bup Kudus nunjukka semua pengarap pelesu datai ari “Babilon ti Besai.” * (Pemandang 17:5) Nama tu ngingatka kitai pasal nengeri Babilon kelia menya, iya ke ngepun pengarap pelesu udah Bah Besai maya Noah menya. Mayuh ajar enggau pengawa pengarap pelesu ke diatu datai ari Babilon kelia menya. Chunto, orang Babilon nyembah triniti. Kemaya hari tu, Triniti nyadi ke batang ajar ba mayuh pengarap. Tang, Bup Kudus ngajar enggau terang semina seiku aja Petara ti bendar, Jehovah, lalu Jesus Kristus nya Anak Iya. (John 17:3) Orang Babilon mega pechaya mensia bisi semengat ke agi idup pengudah mensia mati, lalu semengat nya ulih diperinsa ba siti endur. Kemaya hari tu, mayuh pengarap agi ngajar pasal semengat ke enda nemu mati tauka semengat ke ulih diperinsa ba api neraka.

¹⁸ Sembah orang Babilon kelia menya ngerembai ke serata dunya tu. Nya alai, Babilon ti Besai kemaya hari tu ulih dikumbai semua gerempung pengarap pelesu ba serata dunya tu. Petara udah madah semua gerempung pengarap pelesu tu deka dipunaska enggau ngenyit. (Pemandang 18:8) Nya kebuah, kitai patut nyeraraka diri ari semua kaul enggau Babilon ti Besai. Petara Jehovah deka nuan “pansut ari iya” enggau jampat kala ke agi bisi awak.—Pemandang 18:4.

19. Nama deka diulih nuan enti nyembah Jehovah?

 ¹⁹ Sekeda orang engka enggai begulai enggau nuan ketegal nuan udah badu ngereja pengawa ti bekaul enggau pengarap pelesu. Enti nuan nyembah Jehovah enggau nembiak Iya, nuan deka bulih mayuh agi berekat ari ke udah dilengkaka nuan. Baka bala murid Jesus menya ke udah ninggalka sekeda utai ketegal nitihka iya, nuan mega deka bulih mayuh bala menyadi ke sama pengarap. Nuan deka nyadi seiku ari bejuta orang Kristian ke bendar ba serata dunya tu. Sida iya baka diri sebilik, lalu ngayanka pengerindu ti bendar ngagai nuan. Lalu nuan deka bulih peluang idup belama iya ba “dunya ti deka datai.” (Mark 10:28-30) Dudi ari ila, sida ke ninggalka nuan ketegal utai ti dipechayaka nuan deka belajarka Bup Kudus, lalu nyadi orang ke nyembah Jehovah.

20. Nama peluang manah ti nganti orang ke nitih pengarap ti bendar?

²⁰ Bup Kudus ngajar enda lama agi Petara deka ngemunaska dunya ti jai tu, lalu deka nganti iya enggau dunya baru ti bisi pengelurus ba baruh Perintah Iya. (2 Peter 3:9, 13) Naka meh pemanah dunya nya! Semina bisi siti aja pengarap enggau sembah ti bendar maya nya. Nya alai, gaga meh pemutus ti manah, lalu begulai enggau orang Kristian ke bendar diatu.