BAKA ni nuan ngambarka Hari Pechara? Mayuh orang ngumbai genap iku mensia deka dibai, lalu diakim ba mua Petara. Sekeda deka bulih berekat niki ke serega, lalu iya ke bukai deka diperinsa ba api neraka belama iya. Tang, Bup Kudus enda ngambarka utai baka nya. Bup Kudus nerangka Hari Pechara ukai maya ti ngasuh kitai irau ati. Tang, nya maya Petara deka mensia nyadi sempurna baka ke dikedeka Iya ari pun.

Ba Pemandang 20:11, 12, rasul John nerangka pasal Hari Pechara: “Aku tepedaka siti kerusi diraja ti besai sereta burak, enggau siku orang ke duduk ba kerusi diraja nya. Dunya enggau langit rari ari Iya, lalu nadai ditemu agi. Aku lalu tepedaka orang ke udah mati, ke besai enggau ke mit, bediri di mua kerusi diraja nya, lalu mayuh bengkah bup dibuka. Siti agi bup dibuka, iya nya bup pengidup. Lalu orang ke udah mati diakim nitihka utai ti udah dikereja sida, munyi ti ditulis dalam bup nya.”

Petara Jehovah nya Hakim bala mensia ti pemadu tinggi. Taja pia, Iya meri pengawa ngakim ngagai pengari Iya. Nitihka Kereja Rasul 17:31, rasul Paul madah Petara “udah  ngeletak siti hari alai Iya deka ngakim semua dunya ngena pengelurus, ulih orang siku ke udah dipilih Iya.” Sapa dipilih Iya nyadi Hakim? Jesus Kristus ti udah diangkatka ari mati. (John 5:22) Kemaya Hari Pechara berengkah? Berapa lama timpuh iya?

Bup Pemandang madahka Hari Pechara berengkah pengudah perang Armagedon, maya dunya Sitan dipunaska. * (Pemandang 16:14, 16; 19:19–20:3) Udah Armagedon, Sitan enggau bala antu iya deka dikurung ba lubang ti pemadu dalam pengelama seribu taun. Dalam timpuh nya, 144,000 iku orang deka sama “merintah enggau Kristus seribu taun.” (Pemandang 14:1-3; 20:1-4; Rome 8:17) Nya alai, Hari Pechara ukai nyadi dalam timpuh sehari aja, tang seribu taun.

Dalam timpuh seribu taun, Jesus Kristus deka “ngakim orang ke idup enggau orang ke mati.” (2 Timoti 4:1) “Orang ke idup” nya orang “mayuh” ke selamat maya Armagedon. (Pemandang 7:9-17) Rasul John mega meda “orang ke mati . . . bediri di mua kerusi diraja” maya diakim. Baka ke disemaya Jesus, ‘orang ke udah mati deka ninga nyawa iya [Kristus] lalu deka pansut ari kubur.’ Orang ke mati deka diidupka baru. (John 5:28, 29; Kereja Rasul 24:15) Baka ni semua sida deka diakim?

Nitihka genera rasul John, “mayuh bengkah bup dibuka,” lalu “orang ke udah mati diakim nitihka utai ti udah dikereja sida.” Kati bup tu nyimpan pengawa ti udah digaga orang? Ukai, pengawa ngakim enda bepanggai ba utai ti dikereja orang sebedau sida mati. Baka ni kitai nemu? Bup Kudus madah: “Barang sapa mati, dilepaska ari dosa.” (Rome 6:7) Orang mati ke diidupka baru beresi ari dosa. Bup tu ngayanka utai bukai ti dikedeka Petara. Ngambika ulih idup belama iya, orang ke selamat maya Armagedon  enggau orang mati ke diidupka baru, patut ngasika pesan Petara. Tu nyengkaum pesan baru ari Jehovah maya timpuh seribu taun. Nya alai, genap iku orang deka diakim nitihka utai ti digaga sida maya Hari Pechara.

Maya Hari Pechara bebiliun iku mensia deka bisi peluang belajarka peneka Petara, lalu ngereja iya. Reti iya, pengawa ngajar Bup Kudus deka dipejalaika ba serata dunya tu. Amat, “semua sida deka nemu utai ti dikumbai atur ti lurus.” (Isaiah 26:9) Taja pia, ukai semua deka ngereja peneka Petara. Isaiah 26:10 madah: “Taja pen Nuan nelap enggau orang ke jai, tang sida nadai kala belajar ngereja utai ti ngena. Indah di menua ti diuan orang ke lurus tu deh sida mengkang ngereja utai ti salah. Sida enggai ngaku pemesai kuasa Nuan.” Orang ke jai tu deka dipunaska maya Hari Pechara.—Isaiah 65:20.

Ba ujung Hari Pechara, mensia ke selamat deka nyadi sempurna. Maya Hari Pechara, mensia deka nyadi sempurna baka ke dikedeka Petara ari pun. (1 Korint 15:24-28) Udah nya, penguji ti penudi datai. Sitan deka dilepaska ari endur iya dikurung, lalu diteju nesatka mensia sekali da agi. (Pemandang 20:3, 7-10) Orang ke nulak Sitan deka nerima utai ti disemaya ari Bup Kudus: “Orang ke lurus deka bempu menua tu lalu diau ditu belama iya.” (Masmur 37:29) Ya, Hari Pechara deka ngemai berekat ngagai semua mensia ke tetap ati!