1. Nama sampi ti tebilang ke deka dipelajarka kitai ba pelajar tu?

BEJUTA iku mensia ba dunya tu nemu pasal sampi Apai Kami. Sampi ti tebilang tu chunto sampi ke diberi Jesus Kristus empu. Sampi tu beguna bendar. Enggau beratika tiga peminta keterubah ba sampi tu, nuan deka nemu mayuh agi pasal ajar Bup Kudus ti bendar.

2. Nama tiga peminta ti diajar Jesus dalam sampi iya?

² Ba pun sampi tu, Jesus ngajar peninga iya: “Nya alai, baka tu ku chara kita patut besampi: ‘Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.’” (Matthew 6:9-13) Nama reti tiga peminta tu?

3. Nama utai ti patut ditemu kitai pasal Perintah Petara?

³ Kitai udah belajar mayuh pasal nama Petara, Jehovah. Kitai mega udah belajar pasal peneka Petara—nama utai ti udah digaga enggau deka digaga Iya ngagai mensia. Tang, nama kebuah Jesus ngasuh kitai besampi: “Datai meh Perintah Nuan”? Nama reti Perintah Petara? Baka ni penatai Perintah tu ulih nguduska nama Petara? Lalu baka ni Perintah tu ulih ngenataika peneka Petara?

4. Nama reti Perintah Petara, lalu sapa Raja iya?

⁴ Perintah Petara nya siti perintah ti didirika Petara Jehovah. Iya mega milih seiku Raja. Sapa Raja ba Perintah Petara tu? Jesus Kristus. Jesus nya Raja ti besai agi ari semua pemerintah mensia ba dunya tu, lalu iya dikumbai, ‘Raja ti siku aja, ke ari atas semua raja, enggau Tuan ari atas semua tuan.’ (1 Timoti 6:15) Jesus bisi kuasa kena ngereja mayuh agi pemanah ari semua pemerintah mensia ba dunya tu.

5. Dini endur Perintah Petara, lalu nama deka diperintah iya?

⁵ Ari ni Perintah Petara merintah? Dini endur Jesus? Nuan tentu ingat, Jesus udah mati ba tiang, lalu udah nya diangkatka idup baru. Pengudah 40 hari, Jesus niki ke serega. (Kereja Rasul 2:33) Nya alai, Perintah Petara di serega. Bup Kudus madah, “Perintah Iya di serega.” (2 Timoti 4:18) Taja pan Perintah Petara di serega, iya deka merintah atas dunya tu.—Pemandang 11:15.

6, 7. Nama kebuah Jesus nya Raja ti nadai banding?

⁶ Nama kebuah Jesus nya Raja ti nadai banding? Laban iya enda ulih mati. Enda baka raja mensia, Bup Kudus madah, ‘semina iya [Jesus] siku aja ke enda nemu mati, ke diau dalam penampak ti enda ulih digagai mensia.’ (1 Timoti 6:16) Reti iya, semua pemanah ti digaga Jesus deka meruan belama iya. Lalu iya deka ngaga mayuh utai manah ke rayat iya.

⁷ Peratika jaku Bup Kudus tu pasal Jesus: ‘Roh Jehovah deka meri iya penemu-dalam, penemu enggau pengelandik kena merintah bala nembiak iya. Iya deka nemu peneka Jehovah, lalu deka ngemesaika Jehovah, sereta deka lantang ati nangika Iya. Iya enda ngakim beduduk ba utai ti dipeda iya, tauka ba utai ti ditusui orang ngagai iya. Iya deka ngakim orang ke seranta  ngena atur ti lurus, lalu nyaga hak orang ke nadai daya.’ (Isaiah 11:2-4) Jaku tu nunjukka Jesus nya Raja ti lurus ati enggau sinu ke semua mensia di dunya tu. Deka nuan bisi seiku Raja ti baka Jesus?

8. Sapa deka enggau Jesus merintah?

⁸ Siti agi pemendar pasal Perintah Petara: Jesus enda merintah kediri. Bisi orang enggau iya merintah. Chunto, rasul Paul madahka Timoti: “Enti kitai tan, kitai deka mega merintah enggau iya.” (2 Timoti 2:12) Paul, Timoti, enggau orang Kristian ke ngasi udah dipilih Petara ngambika merintah enggau Jesus di serega. Berapa iku orang deka bisi peluang ti manah tu?

9. Berapa iku orang deka merintah enggau Jesus, lalu kemaya Petara berengkah milih sida iya?

⁹ Ba Pelajar 7 bup tu, maya rasul John nerima genera, iya meda “Anak Domba [Jesus Kristus] bediri ba Bukit Sion [Penuduk Raja ba serega]. Lalu sama bediri enggau Iya mega 144,000 iku orang ke bisi nama Anak Domba enggau nama Apai Iya ditulis ba kening sida.” Sapa 144,000 tu? John madahka kitai: ‘Sida nya meh orang ke nitihka Anak Domba ngagai sebarang endur iya bejalai. Sida udah ditebus ari semua bansa mensia nyadi orang ke terubah-rubah iya diserahka ngagai Petara enggau ngagai Anak Domba.’ (Pemandang 14:1, 4) Ya, sida iya murid Jesus ke ngasi, lalu dipilih merintah enggau Jesus di serega. Pengudah mati, sida diangkatka idup di serega. Sida deka merintah atas dunya enggau Jesus. (Pemandang 5:10) Berengkah ari taun 33 M., Petara milih orang Kristian ke ngasi kena ngenyukupka penyampau 144,000 tu.

10. Nama kebuah atur ti disediaka Petara ngambika Jesus enggau 144,000 nyadi pemerintah mensia, nunjukka pengerindu Iya?

¹⁰ Atur ti disediaka Petara ngambika Jesus enggau  144,000 nyadi pemerintah mensia, nunjukka pengerindu Iya. Nama kebuah? Laban Jesus kala nyadi mensia enggau ngasaika pemerinsa. Paul madah, Jesus nya “ukai enda nemu sinu ati ke pengelemi kitai. Iya udah diuji ngena semua macham chara baka kitai empu, tang iya enda bedosa.” (Hebrew 4:15; 5:8) Sida ke sama merintah enggau Jesus mega kala ngasaika pemerinsa nyadi mensia. Sida kala ngasaika mayuh macham penyakit enggau pengidup ti enda sempurna. Nya alai, sida nemu pemerinsa ti diasaika mensia!

11. Nama kebuah Jesus ngasuh bala murid iya besampi ngambika peneka Petara nyadi di serega?

¹¹ Maya Jesus madah bala murid iya patut besampika Perintah Petara tu datai, iya mega bisi madah sida patut besampika peneka Petara nyadi “di dunya enggau di serega.” Peneka Petara di serega seruran nyadi laban disukung bala melikat ke ngasi. Ba Pelajar 3, kitai udah belajar pasal seiku melikat jai ke badu agi ngereja peneka Petara, lalu ngasuh Adam seduai Hawa bedosa. Ba Pelajar 10, kitai deka belajar mayuh agi nama ajar Bup Kudus pasal melikat jai tu. Iya dikumbai kitai, Antu Sitan. Sitan enggau bala melikat ke nitihka iya—dikumbai antu—ditejuka diau enda lama di serega. Nya alai, udah nya ukai semua melikat di serega ngereja peneka Petara. Tang, pengudah Perintah Petara didirika, semua tu deka diubah. Jesus Kristus ke baru nyadi Raja, deka beperang ngelaban Sitan.—Pemandang 12:7-9.

12. Nama dua iti pekara ti beguna bendar ke dipadah ba Pemandang 12:10?

¹² Udah nya, Bup Kudus madah: ‘Aku lalu ninga nyawa ti inggar bejaku di serega, “Diatu pengelepas, kuasa  enggau Perintah Petara kitai, enggau kuasa Kristus Iya, udah datai, laban iya [Sitan] ke bedawaka bala menyadi kitai di mua Petara kitai siang malam, udah dibuai ke baruh.”’ (Pemandang 12:10) Bisi nuan beratika dua iti pekara ti beguna bendar dipadah ba ayat tu? Kesatu, Jesus Kristus berengkah merintah ba Perintah Petara. Kedua, Sitan udah dibuai ari serega ke dunya tu.

13. Nama nyadi pengudah Sitan dibuai ari serega?

¹³ Nama nyadi ketegal dua iti pekara tu? Di serega, Bup Kudus madah: “Nya alai, rami gaga ati meh kita serega, enggau semua kita ke diau dia!” (Pemandang 12:12) Ya, bala melikat ke ngasi di serega gaga ati, laban Sitan enggau bala antu iya udah dibuai ari serega. Diatu, semina bala melikat ke ngasika Petara Jehovah aja diau di serega. Ba serega diatu penuh enggau pemaik sereta pengelantang, laban peneka Petara udah nyadi.

14. Nama nyadi ketegal Sitan dibuai ke dunya tu?

¹⁴ Tang, nama penyadi ngagai dunya tu? Bup Kudus madah: “Tang naka meh penusah tanah enggau tasik, laban Sitan udah nurun ngagai kita, balat pedis ati, laban iya nemu timpuh diri nyau deka abis.” (Pemandang 12:12) Sitan balat pedis ati ketegal iya dibuai ari serega. Pia mega, timpuh iya nyau deka abis. Nya alai, iya ngasuh pemerinsa enggau “penusah” balat nyadi ba dunya tu. Kitai deka belajar mayuh agi pasal “penusah” tu ba Pelajar 9. Tang, kitai engka betanya, Baka ni Perintah Petara ulih ngasuh peneka Petara nyadi ba dunya tu?

15. Nama tuju Petara ngaga dunya tu?

¹⁵ Kati nuan agi ingat pasal tuju Petara ngaga dunya tu? Nuan udah belajarka utai tu ba Pelajar 3. Ba kebun Eden, Petara ngayanka tuju Iya. Iya deka dunya tu nyadi paradais, penuh enggau mensia ke lurus ati sereta ulih idup belama iya. Sitan ngasuh Adam seduai Hawa  bedosa, nya kebuah tuju Petara tu bedau nyadi. Tang, tu enda ngubah tuju Petara. Jehovah deka “orang ke lurus deka bempu menua tu lalu diau ditu belama iya.” (Masmur 37:29) Lalu Perintah Petara deka ngenataika pekara tu. Baka ni chara iya?

16, 17. Nama dipadah bup Daniel 2:44 ngagai kitai pasal Perintah Petara?

¹⁶ Peratika bup Daniel 2:44. Dia kitai macha: ‘Lebuh bala raja nya megai perintah, Petara ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.’ Nama dipadah ayat tu pasal Perintah Petara?

¹⁷ Kesatu, ayat tu madah ngagai kitai Perintah Petara deka didirika “lebuh bala raja nya megai perintah” tauka lebuh perintah bukai benung merintah. Kedua, ayat tu mega madah Perintah tu deka meruan belama iya sereta enda ulih dialahka. Ketiga, bisi perang entara Perintah Petara enggau semua perintah ba dunya tu. Perintah Petara menang lalu deka merintah mensia. Udah nya, mensia deka bulih perintah ti pemadu manah.

18. Padahka nama perang entara Perintah Petara enggau perintah di dunya tu?

¹⁸ Bup Kudus madahka mayuh pasal perang entara Perintah Petara enggau perintah di dunya tu. Chunto, iya ngajar, makin kitai semak enggau pengujung dunya, melikat ke jai deka nipu “semua raja di dunya tu.” Nama kebuah? ‘Ngempuruka sida [semua raja] beperang lebuh Hari Besai Petara ti Pemadu Bekuasa.’ Semua raja di dunya tu deka digempuruka nuju “endur ti dikumbai Armagedon dalam Hebrew.” (Pemandang  16:14, 16) Ari dua iti ayat tu, kitai nemu perang entara perintah mensia enggau Perintah Petara dikumbai Armagedon.

19, 20. Nama kebuah tuju Petara bedau nyadi di dunya kemaya hari tu?

¹⁹ Nama utai deka dikenataika Perintah Petara ngena perang Armagedon? Pikirka sekali agi pasal tuju Petara ngaga dunya tu. Petara Jehovah deka ngemenuhka dunya Paradais tu enggau mensia ke lurus ati sereta sempurna. Nama kebuah utai tu bedau nyadi diatu? Kesatu, kitai bedosa, ulih sakit enggau mati. Ba Pelajar 5 kitai udah belajar, Jesus mati ngambika kitai ulih idup belama iya. Pia mega, nuan tentu ingatka Injil John: ‘Laban Petara balat rinduka dunya. Nya alai, Iya meri Anak tunggal Iya, ngambika genap iku orang ke arapka iya enda mati tang bulih pengidup ti meruan belama iya.’—John 3:16.

²⁰ Kedua, mayuh orang ngereja penyai. Sida bula, nipu enggau ngereja ulah ti kamah. Sida enggai ngereja peneka Petara. Orang ke ngaga pengawa jai deka dipunaska maya perang Armagedon. (Masmur 37:10) Ketiga, tuju Petara bedau nyadi di dunya tu laban perintah dunya tu nagang rayat ngereja peneka Petara. Mayuh perintah dunya tu jai, nipu tauka enda entu bekuasa. Bup Kudus madah: “Orang bukai ke natka diri merinsa dipegai sida.”—Pengajar 8:9.

21. Baka ni Perintah Petara deka ngenataika peneka Petara ba dunya tu?

²¹ Udah Armagedon, mensia deka dipegai siti perintah aja, Perintah Petara. Perintah tu deka ngereja peneka Petara, lalu ngemai mayuh berekat. Chunto, Sitan enggau bala antu iya deka dibuai. (Pemandang 20:1-3) Tebus Jesus deka diguna ngambika mensia ke  ngasi enda agi sakit enggau mati. Ba baruh Perintah Petara, mensia mega ulih idup belama iya. (Pemandang 21:3, 4) Dunya tu nyadi paradais. Perintah tu deka ngenataika peneka Petara ba dunya tu, lalu nguduska nama Petara. Nama reti tu? Reti iya, di baruh Perintah Petara semua mensia deka bebasaka nama Jehovah.

22. Nama kebuah kitai nemu Perintah Petara bedau datai maya Jesus ba dunya tauka maya iya baru diangkatka ari mati?

²² Maya Jesus ngasuh bala murid iya besampi, “Datai meh Perintah Nuan,” tu nunjukka Perintah nya bedau datai maya nya. Kati Perintah tu udah datai maya Jesus niki ke serega? Bedau, laban Peter seduai Paul madah, udah Jesus diangkatka ari mati, ayat ba Masmur 110:1 nyadi ba iya: ‘Ku Jehovah bejaku ngagai tuan aku, “Duduk ditu muak ari kanan Aku datai ke Aku udah ngaga munsuh nuan nyadika pelasar kaki nuan.”’ (Kereja Rasul 2:32-35; Hebrew 10:12, 13) Nyadi, Jesus deka nganti dulu sebedau Perintah Petara berengkah merintah.

23. (a) Kemaya Perintah Petara berengkah merintah? (b) Nama deka dipelajar nuan ba Pelajar 9?

²³ Berapa lama? Dalam taun 1870-an, nembiak Bup Kudus ngitung Perintah Petara deka datai ba taun 1914. (Peda Penerang ba lambar 215-218, pasal taun tu.)  Maya taun 1914, mayuh utai nyadi ba dunya tu nunjukka timpuh ke diitung nembiak Bup Kudus nya betul. Dalam taun 1914, Jesus nyadi Raja, lalu Perintah Petara berengkah merintah di serega baka ke udah dipadah ba Bup Kudus. Nya alai, kitai diau ba “timpuh” Sitan ke “nyau deka abis.” (Pemandang 12:12; Masmur 110:2) Kitai mega ulih madah, enda lama agi Perintah Petara deka ngenataika peneka Petara ba dunya tu. Enda ke tu berita manah? Kati nuan pechaya berita tu amat? Ba Pelajar 9, nuan deka nemu Bup Kudus endang ngajar semua utai tu.