1. Nama utai ke ulih ngelantangka diri sebilik?

PETARA JEHOVAH deka kita sebilik gaga ati. Jaku Iya, Bup Kudus nyediaka ajar ngagai genap iku orang ba diri sebilik. Iya mega nerangka ungkup genap iku sida nitihka peneka Petara. Sida deka bulih berekat ti ngemuaska ati enti sida nitihka ajar Petara. Ku Jesus: ‘Beberekat agi orang ke ninga lalu ngasika jaku Petara!’—Luke 11:28.

2. Pengelantang diri sebilik bepanggai ba nama?

² Pengelantang diri sebilik bepanggai ba kitai ngelala Jehovah, ke dikumbai Jesus “Apai Kami.” Nama kebuah? Laban Jehovah ngepunka ruang bilik. (Matthew 6:9) Genap ruang bilik ba dunya tu bisi ketegal Apai kitai ti di serega, lalu Iya nemu nama utai ti ngasuh diri sebilik gaga ati. Nyadi, nama ajar Bup Kudus pasal ungkup genap iku orang ba diri sebilik?

3. Baka ni Bup Kudus nerangka pun ruang bilik, lalu nama kebuah kitai nemu utai ti dipadah nya amat?

³ Jehovah ngaga mensia keterubah, Adam seduai Hawa, lalu ngasuh seduai iya jadi melaki bini. Iya  ngengkahka seduai iya ba kebun Eden di dunya tu, lalu ngasuh seduai iya beranak. Ku Jehovah: “Beranak betelesak lalu ngemenuhka dunya.” (Pemungkal 1:26-28; 2:18, 21-24) Tu ukai cherita ngapa, laban Jesus nunjukka jaku ba Pemungkal pasal pun ruang bilik nya amat. (Matthew 19:4, 5) Taja pan kitai napi mayuh penusah, lalu pengidup kitai diatu pan ukai tuju Petara, tang kitai tau bulih pengelantang entara diri sebilik.

4. (a) Baka ni genap iku diri sebilik ulih meri pengelantang? (b) Nama kebuah belajar pasal pengidup Jesus beguna ngagai pengelantang diri sebilik?

⁴ Genap iku diri sebilik ulih nulung ngelantangka pangan diri enti sida neladan pengerindu Petara. (Epesus 5:1, 2) Tang, baka ni kitai ulih neladan Petara ke enda ulih dipeda? Kitai ulih belajar pasal Jehovah laban Iya udah ngirum Anak tuai Iya, ari serega ke dunya tu. (John 1:14, 18) Maya ba dunya tu, Jesus Kristus neladan Apai iya enggau manah. Nyentukka orang ke meda enggau ninga Jesus ngasaika diri benung enggau Jehovah lalu ningaka Iya. (John 14:9) Nya alai, enggau belajarka pengerindu ti diayanka Jesus lalu nitihka teladan iya, kitai ulih ngelantangka diri sebilik.

5, 6. (a) Baka ni chara Jesus ngintu bala murid iya nyadi teladan ngagai laki? (b) Nama patut digaga kena bulih pengampun ari penyalah?

⁵ Bup Kudus madah laki patut ngintu bini iya baka Jesus ngintu bala murid iya. Peratika jaku Bup Kudus tu: ‘Kita ke laki, rinduka bini kita, baka Kristus ke rinduka eklisia, lalu nyerahka diri empu ke eklisia . . . Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. Laban nadai orang kala begedika tubuh diri, tang  iya nupi sereta bejimat ngintu tubuh nya, baka ti dikereja Kristus ke eklisia.’—Epesus 5:23, 25-29.

⁶ Pengerindu Jesus ngagai bala murid iya nyadi teladan ti manah ngagai laki. Jesus “rinduka sida datai ke ujung.” Iya nyerahka nyawa diri ketegal sida, taja pan sida enda sempurna. (John 13:1; 15:13) Pia mega, laki diasuh: “Rinduka bini kita, lalu anang kasar enggau sida.” (Kolosi 3:19) Nama ulih nulung laki nitihka jaku ajar tu, kelebih agi maya bini iya enda berunding lebuh ngereja utai? Iya patut ingatka penyalah diri empu, lalu nama patut digaga iya ngambika Petara ngampunka iya. Nya alai, iya mega patut ngampunka penyalah orang bukai, nyengkaum bini iya. Endang amat, bini iya mega patut baka nya. (Matthew 6:12, 14, 15) Bisi nuan beratika pemujur ba melaki bini bepanggai ba ulah sida ke deka ngampunka pangan diri?

7. Nama utai ti diperundingka Jesus, lalu baka ni iya nyadi teladan ngagai laki?

⁷ Laki mega patut ingat, Jesus seruran berundingka bala murid iya maya iya ngintu sida. Iya berundingka naka ni sida ulih ngereja pengawa enggau nama utai ti diguna sida. Maya sida lelak, iya bejaku: “Aram kitai mupuk ngagai endur ti sunyi, kediri kitai aja, lalu belelak dia enda lama.” (Mark 6:30-32) Nya alai, laki mega patut berundingka bini sida. Bup Kudus nerangka bini “lemi,” lalu laki diasuh “bebasaka” sida. Nama kebuah? Laban bini mega sama enggau laki bempu “pengidup” ti diberi Petara. (1 Peter 3:7) Laki patut ingat, orang berega ba mata Petara ketegal iya tetap ati, ukai ketegal iya nya lelaki tauka indu.—Masmur 101:6.

8. (a) Baka ni laki ke “rinduka bini diri, rinduka diri empu”? (b) Nama reti “siku” ba laki bini?

⁸ Bup Kudus madah, laki ke “rinduka bini diri, rinduka  diri empu.” Nama kebuah? Laban laki bini “ukai dua iku agi, tang siku,” ku Jesus. (Matthew 19:6) Nya alai, seduai iya semina ulih besetubuh enggau pangan diri aja. (Jaku Dalam 5:15-21; Hebrew 13:4) Ba pekara tu, seduai iya patut berundingka nama utai ti diguna pangan diri. (1 Korint 7:3-5) Peratika jaku lalau tu: “Nadai orang kala begedika tubuh diri, tang iya nupi sereta bejimat ngintu tubuh nya.” Laki patut rinduka bini diri, baka iya ke rinduka tubuh diri empu, laban sida betanggungjawap ngagai kepala sida, Jesus Kristus.— Epesus 5:29; 1 Korint 11:3.

9. Nama pemanah Jesus ke dipadah ba Pilipi 1:8, lalu nama kebuah laki patut ngayanka pemanah tu ngagai bini sida?

⁹ Rasul Paul bejaku pasal ‘pengerindu Jesus Kristus.’ (Pilipi 1:8) Pengerindu Jesus nya ngerinduka ati bala murid iya ke indu. (John 20:1, 11-13, 16) Nya alai, bini deka laki rinduka sida.

10. Baka ni Jesus nyadi teladan ngagai bini?

¹⁰ Ruang bilik baka siti gerempung, lalu iya begunaka tuai bilik ngambika mujur diatur. Indahka Jesus empu pan tunduk ngagai Kepala iya. ‘Petara nyadi kepala Kristus,’ sama baka “laki nyadi kepala bini.” (1 Korint 11:3) Jesus tunduk ngagai Petara ke nyadi tuai iya, nya alai kitai patut tunduk ngagai orang ke nyadi tuai kitai.

11. Nama ulah ti patut diayanka bini ngagai laki, lalu nama asil iya?

¹¹ Laki enda sempurna, nya alai sida selalu enda mujur bejalaika tanggung pengawa sida nyadi tuai bilik. Nyadi, nama patut digaga bini? Iya enda patut ngemaruhka laki iya tauka nguji deka nyadi tuai bilik, nganti penuduk laki iya. Bini patut ingat, utai ti berega ba mata Petara nya, nelap enggau imun. (1 Peter 3:4) Enggau pemanah  tu, bini deka ngasaika perintah ari Petara tu senang agi dititih, taja pan bisi penanggul ba ruang bilik. Pia mega, Bup Kudus madah: “Bini patut masa laki.” (Epesus 5:33) Tang, baka ni enti laki enda nerima Kristus nyadi Kepala iya? Bup Kudus ngasuh bini: ‘Nunduk ngagai laki kita, ngambika enti sida enda ngasika jaku Petara, sekeda sida ulih dibai arap ketegal ulah kita, ukai ketegal jaku kita, lebuh sida meda pengudus enggau pemadas ulah kita.’—1 Peter 3:1, 2.

12. Nama kebuah enda salah bini madahka penemu diri enggau basa?

¹² Sekalika laki iya nyembah Petara tauka enda, bini tau madahka penemu diri ngagai laki enggau basa. Penemu bini iya engka betul, lalu sida sebilik tau bulih penguntung enti laki ningaka iya. Chunto, Abraham enda setuju enggau penemu bini iya, Sarah, pasal penanggul ruang bilik seduai iya. Tang, Petara ngasuh iya: “Kereja aja sebarang utai ti diasuh Sarah.” (Pemungkal 21:9-12) Endang amat, maya laki meri pemutus jaku ke enda ngelanggar ukum Petara, bini nunjukka diri tunduk enggau nyukung pemutus jaku laki iya.—Kereja Rasul 5:29; Epesus 5:24.

13. (a) Nitihka Titus 2:4, 5, nama patut digaga indu ke udah belaki? (b) Nama ajar Bup Kudus pasal beserara enggau sarak?

¹³ Bini ngereja mayuh pengawa kena ngintu diri sebilik. Chunto, Bup Kudus madah, indu ke udah belaki “rinduka laki enggau anak sida, nagang diri, diau tuchi, ngintu ruang bilik sida enggau menyana, nelap, sereta nunduk ngagai laki sida.” (Titus 2:4, 5) Bini tauka indai ke ngereja tu deka bulih pengerindu enggau basa ari diri sebilik. (Jaku Dalam 31:10, 28) Laban pengawa belaki bebini ngempungka dua iku orang ke enda sempurna, sekeda penanggul besai ba ruang bilik tau ngujungka  seduai iya beserara tauka sarak. Bup Kudus ngemendarka sekeda kebuah laki bini ulih beserara. Tang, beserara tu pengawa ti berat, laban Bup Kudus ngajar: “Bini enda tau ninggalka laki; . . . lalu laki enda tau muai bini.” (1 Korint 7:10, 11) Pia mega, ayat Bup Kudus madah, laki bini semina ulih sarak ketegal butang.—Matthew 19:9.

14. Baka ni Jesus begulai enggau anak mit, lalu nama diguna anak ari apai indai?

¹⁴ Jesus nyadi teladan ti manah ngagai apai indai. Maya orang bukai nagang anak mit datai ngagai Jesus, iya bejaku: ‘Awakka sida ke mit datai ngagai aku. Anang nagang sida.’ Bup Kudus madah, udah nya iya ‘merap sida anak mit nya, ngengkahka jari iya atas sida, lalu merekatka sida.’ (Mark 10:13-16) Laban Jesus bisi hari begulai enggau anak mit, enda ke apai indai patut bisi hari enggau anak sida? Anak begunaka mayuh jam ari apai indai. Nya alai, apai indai patut bisi awak ngajar  anak sida, laban tu perintah ari Jehovah.—Ulang Adat 6:4-9.

15. Nama patut digaga apai indai kena nyaga anak sida?

¹⁵ Laban dunya tu majak jai, nya alai anak begunaka apai indai nyaga sida ari orang ke tau ngemedis. Chunto, ari orang ke ngereja ulah ti kamah. Peratika chara Jesus nyaga bala murid ke dikumbai iya “anak.” Maya iya kena tangkap lalu deka diukum bunuh, Jesus ngasuh murid iya dilepaska. (John 13:33; 18:7-9) Apai indai patut nyaga anak ari penguji Sitan ke ulih ngemedis, lalu nangkan sida. (1 Peter 5:8) Diatu meh maya pengelikun tubuh, pengarap, enggau moral anak balat diuji.

16. Nama ulih dipelajarka apai indai ari chara Jesus ngatur bala murid iya?

 ¹⁶ Malam sebedau Jesus mati, bala murid iya bekelikuh enggau pangan diri pasal sapa ke pemadu besai. Ari ke nganu sida, Jesus enggau pengasih ngajar sida ngena jaku enggau teladan. (Luke 22:24-27; John 13:3-8) Sekalika nuan apai tauka indai, ulih nuan beratika baka ni nuan tau nitihka teladan Jesus maya ngemetulka anak nuan? Anak amat begunaka ajar, tang, ‘enggau ati ti lurus [“nitihka chara ti patut,” NW]’ ukai enggau pemangah. Nuan enda patut bejaku enggau enda berunding, laban jaku nya ngasuh ati balat telih baka ke diachuk ngena pedang. (Jeremiah 30:11; Jaku Dalam 12:18) Ajar ke diberi ngena chara ti patut nulung anak nuan meda, ajar nya amat meri penguntung ngagai iya empu jemah ila.—Epesus 6:4; Hebrew 12:9-11

17. Baka ni Jesus nyadi teladan ti manah ngagai anak?

¹⁷ Ulih anak belajar ari teladan Jesus? Ulih! Ari teladan iya, Jesus nunjukka baka ni anak patut ngasika apai indai. “Aku . . . semina bejaku nitihka ajar Apai,” ku Jesus. Udah nya iya madah: “Aku seruran ngereja utai ti ngerinduka ati Iya.” (John 8:28, 29) Jesus ngasika Apai iya ti di serega. Pia mega, Bup Kudus ngasuh anak ngasika apai indai. (Epesus 6:1-3) Jesus nya Anak Petara. Tang, iya ngasika Josep seduai Maria, taja pan seduai iya enda sempurna. Tu meri pengelantang ngagai sida Jesus sebilik!—Luke 2:4, 5, 51, 52.

18. Nama kebuah Jesus seruran ngasika Apai iya ti di serega, lalu sapa gaga ati enti anak ngasika apai indai kemaya hari tu?

¹⁸ Ulih anak meratika baka ni sida tau neladan Jesus, lalu ngagaka ati apai indai? Amat, kekadang anak tusah ngasika apai indai, tang Petara deka anak ngasika sida.  (Jaku Dalam 1:8; 6:20) Jesus seruran ngasika Apai iya ti di serega, enda ngira maya tusah tauka senang. Bisi sekali Petara ngasuh Jesus ngereja peneka Iya. Jesus bejaku ‘ambi mangkuk [peneka Petara] tu ari aku.’ Taja pan tusah, Jesus terus ngereja peneka Petara, laban iya pechaya Apai iya nemu utai ti pemadu manah. (Luke 22:42) Enti anak ngasika apai indai, anak ulih ngagaka ati sida enggau ati Apai ti di serega. *—Jaku Dalam 23:22-25.

19. (a) Baka ni Sitan nguji bala anak? (b) Nama nyadi ba apai indai enti anak bisi ulah ti enda manah?

¹⁹ Sitan udah nguji Jesus, lalu kitai mega pechaya iya deka nguji anak ngambika sida ngereja utai ti salah. (Matthew 4:1-10) Siti ari chara ke dikena Antu Sitan nekan bala anak, iya nya ngena kaban sida. Chara tu enda senang dilaban. Nya alai, anak enda patut begulai enggau orang ke ngereja penyalah! (1 Korint 15:33) Dinah, anak dara Jakop selalu begulai enggau orang ke enda nyembah Jehovah, lalu tu ngujungka mayuh penusah. (Pemungkal 34:1, 2) Pikirka baka ni diri sebilik tau tusah enti seiku ari sida iya bisi ngereja ulah ti enda manah!—Jaku Dalam 17:21, 25.

20. Nama patut digaga diri sebilik ngambika bulih pengelantang?

²⁰ Penusah ba ruang bilik ulih diputarka enggau senang enti diri sebilik nitihka ajar Bup Kudus. Tu mega meri pengelantang ngagai diri sebilik. Nya alai laki, rindu meh ke bini kita, lalu jaga sida baka Jesus nyaga bala murid iya. Bini, tunduk meh ngagai laki kita ke nyadi tuai bilik, lalu titihka teladan bini ke landik ba Jaku Dalam 31:10-31. Apai indai, ajar meh anak kita. (Jaku Dalam 22:6) Apai, ‘intu ruang bilik diri empu enggau menyana.’ (1 Timoti 3:4, 5; 5:8) Lalu anak, ngasi meh ke apai indai kita. (Kolosi 3:20) Genap iku orang ba diri sebilik enda sempurna, lalu bisi ngereja penyalah. Nya alai, sida patut baruh ati ngampunka pangan diri.

21. Nama peluang ti manah nganti kitai jemah ila, lalu baka ni kitai ulih ngelantangka diri sebilik diatu?

²¹ Bup Kudus amat bisi mayuh ajar ti berega pasal pengidup diri sebilik. Pia mega, iya ngajar kitai pasal dunya baru Petara. Dunya paradais tu penuh enggau orang ke gaga ati nyembah Jehovah. (Pemandang 21:3, 4) Tu nunjukka bisi peluang ti manah nganti kitai jemah ila! Indahka diatu, kitai ulih ngelantangka diri sebilik enti nitihka ajar Petara ba Bup Kudus.