PELAJAR 11
Nama Kebuah Mayuh Pemerinsa?
1, 2. Nama ditanya mayuh orang?
NINTING hari kitai ninga mayuh bengkah penusah nyadi di serata dunya. Ngambika chunto, kitai ninga pasal tanah tusur ngerusak sebuah kampung. Seraban orang ke jai ngemakal sereta munuh beberapa iku orang ba palan mensia mayuh. Seiku indai mati ngenyit, lalu ninggalka lima iku anak iya.
2 Lebuh penusah balat ke baka tu nyadi, mayuh orang nanya, “Nama kebuah?” Mayuh orang nanya kebuah dunya tu penuh enggau pemenchi sereta pemerinsa. Kala nuan berundingka utai nya?
3, 4. (a) Kati nya salah nanya kebuah Petara ngemendarka pemerinsa? Terangka. (b) Baka ni asai ati Jehovah pasal penyai enggau pemerinsa?
3 Dalam Bup Kudus, kitai nemu pasal orang ke ngembuan pengarap ba Petara tang sida mega nanya utai ke baka nya. Ngambika chunto, nabi Habakuk nanya Jehovah: “Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu? Aku dikelingi pengerusak enggau penusah, lalu orang belaban sereta belaya.”—Habakuk 1:3.
4 Ba Habakuk 2:2, 3, kitai macha saut Petara ngagai tanya Habakuk sereta semaya Iya ti deka mutarka penusah nya. Jehovah balat rinduka orang. Bup Kudus madahka: “Iya ngibun [ibuhka] kita.” (1 Peter 5:7) Indah Petara begedi agi meda pemerinsa enti dibanding enggau kitai. (Isaiah 55:8, 9) Nya alai, aram kitai berandauka tanya, Nama kebuah mayuh pemerinsa ba dunya?
NAMA KEBUAH BISI MAYUH PEMERINSA?
5. Nama dipadah bala tuai pengarap pasal pemerinsa? Nama diajar Bup Kudus?
5 Bala paderi enggau bala tuai pengarap suah madahka, orang merinsa laban nya peneka Petara. Sekeda engka madahka, semua utai ke nyadi ba orang nyengkaum penusah ti balat, udah diatur Petara lalu kitai enda ulih nemu kebuah iya. Sekeda ke bukai indah madahka orang besai tuai, nyengkaum anak mit mati ngambika ulih enggau Petara di serega. Tang tu enda amat. Jehovah nadai kala ngasuh utai jai nyadi. Bup Kudus madahka: ‘Petara ti Pemadu Bekuasa enda ngereja penyai, lalu Iya enda kala meri atur ti enda lurus.’—Jop 34:12.
6. Nama kebuah mayuh orang nyalahka Petara ketegal semua pemerinsa ba dunya?
6 Mayuh orang nyalahka Petara ketegal semua pemerinsa ba dunya laban sida ngumbai Iya ke merintah dunya. Tang baka ke udah dipelajarka ba Pelajar 3, pemerintah dunya tu Antu Sitan.
7, 8. Nama kebuah mayuh pemerinsa ba dunya?
7 Bup Kudus madahka, “semua dunya di baruh kuasa Sitan.” (1 John 5:19) Pemerintah dunya tu, Sitan, jai sereta nadai penyinu. Iya “nipu semua dunya.” (Pemandang 12:9) Mayuh orang nunda iya. Lalu nya siti kebuah dunya tu penuh enggau pemula, pemenchi, sereta penyai.
8 Bisi kebuah bukai ke ngasuh mayuh pemerinsa nyadi ba dunya. Pengudah Adam seduai Hawa ngelaban Petara, seduai iya ninggalka dosa ngagai bala anak seduai iya. Lalu ketegal dosa, mensia ngasuh mensia bukai merinsa. Sida suah deka lebih agi ari orang bukai. Sida belaya, enggau beperang, sereta beduan orang bukai. (Pengajar 4:1; 8:9) Kekadang orang merinsa laban sida enda “nemu maya diri deka ditinggang penusah.” (Pengajar 9:12) Lebuh sida ba endur sereta maya ti salah, penusah sereta utai bukai ke enda manah ulih nyadi ba sida.
9. Kati Petara deka kitai merinsa?
9 Jehovah enda kala ngasuh pemerinsa nyadi. Iya enda patut disalahka ketegal perang, jenayah, sereta pengawa ke enda lurus. Penusah baka tanah berenyang, ribut taufan, sereta bah besai ukai datai ari Petara. Petara rindu bendar ke kitai. Iya enggai kitai merinsa, tang kitai agi merinsa. Nya alai kitai deka belajarka kebuah Iya ngemendarka pemerinsa nyadi ba genteran pengudah tu.—1 John 4:8.
KEBUAH PETARA NGEMENDARKA PEMERINSA
10. Nama dipadah Sitan pasal Jehovah ngagai Adam seduai Hawa?
10 Ba Kebun Eden, Sitan nesatka Adam seduai Hawa. Sitan nuduh Jehovah nya Pemerintah ti jai. Sitan ngumbai Jehovah ngenan utai ti manah ari Adam seduai Hawa. Sitan deka seduai iya pechaya, iya deka nyadi pemerintah ti manah agi ari Jehovah, lalu ngumbai seduai iya enda begunaka Jehovah.—Pemungkal 3:2-5; peda Nota Penutup 27.
11. Nama tanya ke patut disaut kitai?
11 Adam seduai Hawa enda ngasika Jehovah, lalu angkat ngelaban Iya. Seduai iya ngumbai diri bisi hak mutuska bagi utai ti betul enggau utai ti salah kediri empu. Baka ni Jehovah ulih nunjukka Adam seduai Hawa nya salah, lalu nunjukka Iya nemu utai ti pemadu badas ke kitai?
12, 13. (a) Taja pan Adam seduai Hawa bedosa, nama kebuah Jehovah enda tekala nya ngemunaska seduai iya? (b) Nama kebuah Jehovah ngemendarka Sitan nyadi pemerintah dunya tu, lalu mensia merintah diri empu?
12 Lebuh Adam seduai Hawa bedosa, Jehovah enda tekala nya ngemunaska seduai iya. Tang, Iya ngemendarka seduai iya ngembuan anak. Udah nya Iya ngawakka bala anak Adam seduai Hawa milih bagi orang ke dikedekaka sida nyadi pemerintah. Tuju Jehovah, iya nya deka ngemenuhka dunya enggau orang ti sempurna, lalu nya deka nyadi enda ngira nama utai ti deka digaga Sitan.—Pemungkal 1:28; Isaiah 55:10, 11.
13 Sitan madahka Jehovah nya Pemerintah ti jai di mua bejuta iku melikat. (Jop 38:7; Pemandang 5:11) Nya alai, Jehovah meri Sitan awak kena nunjukka jaku tuduh Sitan nya amat tauka bula. Jehovah mega meri mensia awak kena numbuhka perintah ke diri empu di baruh iring Sitan, kena nunjuk sekalika sida ulih mujur enti nadai saup ari Iya.
14. Nama ulih ditemu kitai pengudah beribu taun?
14 Beribu taun mensia nguji merintah diri empu, tang enda mujur. Sitan endang pemula. Mensia amat begunaka saup ari Petara. Utai ke disebut nabi Jeremiah endang amat: ‘Jehovah, aku nemu, nadai siku kami bisi kuasa ngatur pengidup diri. Nadai siku kami bisi kuasa atas seput diri empu.’—Jeremiah 10:23.
NAMA KEBUAH JEHOVAH NGEMENDARKA PEMERINSA LAMA AMAT NYADI?
15, 16. (a) Nama kebuah Jehovah ngemendarka pemerinsa lama amat nyadi? (b) Nama kebuah Jehovah bedau muai pemerinsa?
15 Jehovah udah meri awak kena nunjukka Sitan enggau mensia enda ulih merintah. Mensia udah nguji mayuh bengkah perintah, tang enda mujur. Taja pan sida udah mansang ba sains enggau teknologi, tang pengawa ke enda lurus, penyuntuk, jenayah, sereta perang majak nyadi ari ke udah. Kitai enda ulih mujur merintah diri empu enti nadai saup ari Petara.
16 Tang, nama kebuah Jehovah bedau muai pemerinsa? Enti Iya muai pemerinsa, reti nya Iya nyukung perintah Sitan. Pia mega, mensia deka pechaya, sida ulih merintah diri empu enggau mujur munyi ku Sitan. Tang tu jaku bula, lalu Jehovah enggai ngereja sebarang utai ke deka ngasuh mensia pechayaka jaku bula nya. Jehovah enda kala bula.—Hebrew 6:18.
17, 18. Nama deka digaga Jehovah kena ngaduka semua pengerusak ke datai ari Sitan?
17 Ulih Jehovah ngaduka semua pengerusak ke datai ari Sitan enggau mensia ke ngelaban? Ulih. Ba Jehovah, semua utai ulih magang. Jehovah nemu maya Iya deka muai semua pemerinsa. Iya deka ngereja nya pengudah semua jaku bula Sitan diputarka. Udah nya, Jehovah deka ngaga dunya nyadi paradais, baka ti dikedekaka Iya. Semua orang “ke udah mati” deka diangkatka idup baru. (John 5:28, 29) Orang enda agi sakit tauka mati. Jehovah deka ngena Jesus “ngerusak pengawa Sitan.” (1 John 3:8) Kitai beterima kasih laban ngelama tu Jehovah udah sabar enggau kitai ngambika ulih ngelala Iya sereta ulih nunjukka diri dekaka Iya nyadi Pemerintah kitai. (Bacha 2 Peter 3:9, 10.) Indah lebuh kitai merinsa, Iya nulung kitai tan natka pemerinsa.—John 4:23; bacha 1 Korint 10:13.
18 Jehovah enda mejal kitai milih Iya nyadika Pemerintah. Iya meri mensia pemeri bibas milih. Aram kitai meresa kebuah pemeri tu berega ba kitai.
BAKA NI NUAN DEKA NGENA PEMERI BIBAS MILIH?
19. Nama pemeri ti ngerinduka ati ke udah diberi Jehovah ngagai kitai? Nama kebuah kitai patut beterima kasih ke pemeri tu?
19 Pemeri bibas milih ti ngerinduka ati ari Jehovah deka ngasuh kitai bebida ari jelu. Jelu ngereja utai nitihka pengasai, sereta nadai ngembuan penau kena mutuska bagi utai ti betul enggau salah. Tang kitai ulih milih baka ni kitai deka idup sereta nentu sekalika kitai deka ngelantangka ati Jehovah. (Jaku Dalam 30:24-28) Pia mega, kitai ukai baka mesin ke semina ngereja utai ti diasuh. Kitai ulih bibas milih deka nyadi orang ke baka ni, sapa ke patut nyadi pangan kitai, sereta nama deka digaga enggau pengidup diri. Jehovah deka kitai lantang ati enggau pengidup.
20, 21. Nama pemutus ti pemadu manah ke ulih digaga nuan diatu?
20 Jehovah deka kitai rinduka Iya. (Matthew 22:37, 38) Iya baka apai ti gaga ninga anak iya nyebut “Aku sayauka nuan” lebuh anak nyebut leka jaku nya ari ati, ukai ketegal dipejal. Jehovah meri kitai peluang bibas milih sekalika deka nyembah Iya tauka enggai. Sitan, Adam, enggau Hawa milih deka nulak Jehovah. Baka ni nuan deka ngena pemeri bibas milih?
21 Kena meh pemeri bibas milih nya nyembah Jehovah. Bisi bejuta iku sida ke bukai udah milih deka ngelantangka ati Jehovah, lalu nulak Sitan. (Jaku Dalam 27:11) Nama patut digaga nuan diatu ngambika ulih diau ba dunya baru Petara pengudah Iya muai semua pemerinsa? Pelajar pengudah tu deka nyaut tanya nya.
