Petara mai semua orang ari genap menua datai semak ngagai iya ari besampi. (Masmur 65:2) Tang, iya enda ninga tauka nerima semua sampi. Ngambika chunto, iya enda ninga sampi laki ti enda siru enggau bini iya. (1 Peter 3:7) Pia mega, lebuh bansa Israel balat ngereja penyai, Petara enggai ninga sampi sida. Tu nunjukka sampi nya siti pemeri ti berega. Tang, Petara deka nerima sampi orang ti udah ngereja utai ti jai amat enti sida bebendar udah berubah.​—Bacha Isaiah 1:15; 55:7.

 Besampi nya siti pengawa sembah. Nya alai kitai patut besampi semina ngagai Penempa kitai, Jehovah. (Matthew 4:10; 6:9) Pia mega, laban kitai enda sempurna, kitai patut besampi nengah Jesus ti udah mati ketegal dosa kitai. (John 14:6) Jehovah enda ngasuh kitai besampi ngena leka sampi ti diingat tauka ngena leka sampi ti udah ditulis. Iya ngasuh kitai besampi ari ati.​—Bacha Matthew 6:7; Pilipi 4:​6, 7.

 Petara mega ulih ninga sampi ti enda bemunyi, ti disebut dalam ati kitai. (1 Samuel 1:​12, 13) Iya mai kitai besampi ba sebarang maya, siang tauka malam, sebedau makai tauka lebuh kitai bisi penusah.​—Bacha Masmur 55:22; Matthew 15:36.

 Besemak ngagai Petara ukai pekara ti mudah laban mayuh orang ti enda arapka Petara deka ngeleseka janji iya ti deka meri pengelikun ba dunya. (2 Timoti 3:​1, 4; 2 Peter 3:​3, 13) Nya alai, kitai begunaka jaku peransang ari orang  ti sama pengarap. Sida tu mega begunaka jaku peransang ari kitai.​—Bacha Hebrew 10:​24, 25.

 Begulai enggau orang ti rinduka Petara ulih nulung kitai besemak ngagai Petara. Gempuru ti diatur Saksi-saksi Jehovah ulih meri kitai peluang ngeringka pengarap pangan diri.​—Bacha Rome 1:​11, 12.

 Nuan ulih nyemakka diri ngagai Petara ngena chara berundingka lalu ngerejaka utai ti udah dipelajar nuan ari Jaku Iya. Nuan ulih nguji berundingka utai ti udah dikereja iya, jaku ajar iya enggau janji iya. Ari berundingka semua utai tu, iya ulih meransang kitai beterima kasih ngagai pengerindu enggau pemandai Petara.​—Bacha Josua 1:8; Masmur 1:​1-3.

 Nuan semina ulih besemak ngagai Petara enti nuan pechayaka iya enggau bisi pengarap ba iya. Tang pengarap tu baka utai idup ti begunaka jaga. Nya alai nuan enda tau enda nyaga pengarap nuan, selalu berundingka kebuah nuan megai pengarap nya.​—Bacha Matthew 4:4; Hebrew 11:​1, 6.

 Jehovah ngintu orang ti rinduka Iya. Iya ulih nyaga sida ari utai ti ulih ngerusak pengarap sida enggau pengarap sida ti bepanggai ba pengidup ti meruan. (Masmur 91:​1, 2, 7-10) Iya ngasuh kitai bejaga-jaga ari pengawa ti ulih ngerusak pengerai enggau pengelantang kitai. Jehovah ngajar kitai chara idup ti pemadu manah.​—Bacha Masmur 73:​27, 28; James 4:​4, 8.