PELAJAR 2
Ati ti Beresi Ba Mua Petara
“Intu ati kita beresi.”—1 PETER 3:16.
1, 2. (a) Nama kebuah kitai begunaka iring? Beri siti chunto. (b) Nama udah diberi Jehovah kena ngiring kitai?
GAMBARKA nuan benung bejalai ba padang pasir. Baka ni nuan ulih nentuka tuju pejalai nuan ngambika enda tesat? Nuan tentu begunaka iring. Nuan ulih ngena peta, GPS tauka minta tulung ari orang ke nemu jalai ba endur nya ngiring nuan.
2 Semua kitai napi mayuh penanggul ba pengidup. Nya alai kitai begunaka iring. Jehovah meri kitai penemu ati kena ngiring kitai. (James 1:17) Ba pelajar tu, kitai deka belajar (1) nama reti penemu ati lalu baka ni iya ulih nulung kitai, (2) chara kitai ngelatih penemu ati, (3) kebuah kitai berundingka ati orang bukai, sereta (4) baka ni ati ti beresi ulih mai penguntung.
NAMA RETI PENEMU ATI LALU BAKA NI IYA NGIRING KITAI?
3. Nama reti penemu ati?
3 Penemu ati nya pemeri ti berega ari Jehovah. Penemu ati ngiring kitai ngereja utai ti betul sereta nyeliahka utai ti salah. Leka jaku Gerika “penemu ati” mai reti “penemu pasal diri empu.” Lebuh penemu ati kitai bekereja enggau manah, kitai ulih meresa runding enggau asai ati diri ti bendar. Enti kitai ngaga pemutus ti manah, ati kitai deka berasai lantang. Tang enti kitai ngaga pemutus ti enda manah, tu ulih ngachau ati kitai.—Peda Nota Penutup 5.
4, 5. (a) Nama nyadi ngagai Adam enggau Awa? (b) Beri chunto ti nunjukka baka ni penemu ati udah nulung Jop enggau David.
4 Tiap iku kitai ulih milih sekalika deka diiring penemu ati tauka enda. Adam enggau Awa bisi penemu ati ti sempurna. Tang seduai iya enda nitihka iring nya lalu ngereja dosa. Udah nya, seduai iya berasai besalah. Tang nya nyau nadai guna agi laban seduai udah enda ngasika Petara.—Pemungkal 3:7, 8.
5 Taja pia, mayuh mensia ti enda sempurna nitihka iring penemu ati sida. Ambika chunto, Jop. Ketegal iya ngaga pemutus ti manah, iya ulih madah: “Seagi-agi aku idup, ati aku enda nyalahka aku.” (Jop 27:6) “Ati” ke disebut Jop nunjukka penemu ati iya, ke nulung iya ngelala utai ti betul tauka salah. Enda baka Jop, David kekadang enda nitihka iring penemu ati iya. Tu ngujungka iya enda ngasika Jehovah. Ketegal nya, iya berasai besalah lalu “ati iya enda lantang.” (2 Samuel 24:10) Pengudah nya, iya belajar nitihka iring penemu ati lalu enda ngereja penyalah nya agi.
6. Baka ni kitai nemu penemu ati nya pemeri ari Petara ngagai semua orang?
6 Kebendar iya, indah orang ke enda nyembah Jehovah pan nemu utai ti betul enggau utai ti salah. Bup Kudus madahka sida “kadang-kadang ngumbai diri udah ngereja penyalah, lalu kadang-kadang ngumbai diri nadai udah ngereja penyalah.” (Rome 2:14, 15) Ambika chunto, mayuh orang nemu ngenchuri tauka munuh nya salah. Tu ketegal sida diiring penemu ati, iya nya penau ngelala utai ti betul enggau utai ti salah. Tu pemeri ari Jehovah. Taja pan sida enda sedar, sida mega nitihka jaku lalau Petara lalu ngaga pemutus ti manah.
7. Nama kebuah penemu ati kitai kekadang ulih salah?
7 Tang penemu ati kitai kadang-kadang ulih salah laban dikachau runding enggau pengingin kitai ti enda sempurna. Ketegal tu, kitai ngereja utai ti salah. Nya alai, penemu ati patut dilatih. Ambika chunto, Josep. Iya ulih nulak penguji laban iya bisi penemu ati ti dilatih. (Pemungkal 39:1, 2, 7-12) Jehovah meri kitai roh kudus sereta Bup Kudus kena ngelatih kitai. (Rome 9:1) Aram kitai belajar baka ni kitai ulih matih penemu ati.
CHARA NGELATIH PENEMU ATI
8. (a) Baka ni asai ati ulih ngachau penemu ati kitai? (b) Nama patut ditanya kitai sebedau ngaga pemutus?
8 Sekeda orang ngumbai, nitihka penemu ati reti iya nitihka asai ati. Sida ngasaika diri ulih ngereja sebarang utai enti nya ngelantangka ati sida. Tang kitai enda sempurna lalu asai ati kitai ulih ngakal. Asai ati ulih balat ngachau penemu ati kitai. Kitai engka ngumbai utai ti salah nya, utai ti betul. Baka ke dipadah ba Bup Kudus: “Sapa nemu ati mensia? Nadai utai ti nemu agi ngakal ari ati mensia. Iya kelalu balat sakit lalu enda ulih digeraika.” (Jeremiah 17:9) Ambika chunto, Paul. Sebedau iya nyadi orang Kristian, iya merinsaka nembiak Petara. Iya ngasaika pengawa iya nya betul sereta ngumbai ati diri beresi. Tang pengudah nya, ku iya: ‘Jehovah ke ngakim aku.’ (1 Korint 4:4; Kereja Rasul 23:1; 2 Timoti 1:3) Lebuh Paul nemu utai ke digaga iya salah ba mata Jehovah, iya nesal ati. Nya alai, sebedau kitai ngaga pemutus, kitai patut nanya diri empu, ‘Jehovah deka aku ngereja nama?’
9. Nama reti nangika Petara?
9 Lebuh kitai rinduka seseiku orang, kitai enggai ngasuh iya tusah ati. Pia mega, lebuh kitai rinduka Jehovah, kitai enggai ngereja utai ti ulih ngemediska ati Iya. Ambika chunto, Nehemiah nya seiku gabenor. Tang iya enda nyalah guna pangkat iya bulih pengaya. Nama kebuah? Laban iya “nangika Petara.” (Nehemiah 5:15) Iya irauka ulah iya ulih ngemediska ati Jehovah. Baka Nehemiah, kitai mega nangika Petara sereta enggai ngereja utai ti salah. Kitai ulih nemu utai ti ngerinduka ati Jehovah lebuh kitai macha Bup Kudus.—Peda Nota Penutup 6.
10, 11. Nama jaku lalau ke ulih nulung kitai ngaga pemutus ti manah pasal ai bisa?
10 Orang Kristian patut ngaga pemutus sekalika iya ulih ngirup ai bisa tauka enda. Nama jaku lalau ke ulih nulung iya ngaga pemutus ti manah? Bup Kudus enda nagang kitai ngirup ai bisa. Kebendar iya, wain nya pemeri ari Petara. (Masmur 104:14, 15) Taja pia, Jesus madahka kitai enda patut “mabuk.” (Luke 21:34) Paul mega madah ngagai orang Kristian, anang berami enda beiga-iga sereta mabuk. (Rome 13:13) Iya madah orang ke pengirup ‘enda ulih bempu Perintah Petara.’—1 Korint 6:9, 10.
11 Kitai ulih nanya diri empu: ‘Kati aku amat begunaka ai bisa? Kati aku ngirup kena ngelantangka ati? Kati aku ngirup ngambika aku berasai berani agi? Ulih aku nagang penyampau ai bisa ke ulih diirup aku? Ulih aku nagang penyuah aku ngirup? * Kati aku agi ulih begulai enggau bakih aku enti aku enda ngirup? Kitai ulih minta Jehovah nulung kitai ngaga pemutus ti manah. (Bacha Masmur 139:23, 24.) Enggau chara tu, kitai ngelatih penemu ati kitai ngambika sejalai enggau jaku lalau Bup Kudus. Tang bisi utai bukai ke patut diperundingka.
NAMA KEBUAH KITAI BERUNDINGKA ATI ORANG BUKAI?
12, 13. Nama kebuah penemu ati kitai enda sebaka? Nama patut digaga kitai enti pemutus orang bukai enda sebaka enggau kitai?
12 Tiap iku orang bisi penemu ati ke enda sebaka. Penemu ati nuan engka ngemendarka nuan ngaga sesiti utai, tang penemu ati orang bukai engka enda ngemendarka iya ngereja nya. Ambika chunto, nuan engka milih ngirup ai bisa, tang orang bukai enda. Nama kebuah penemu ati kita enda sebaka?
Penemu ati ke dilatih deka nulung nuan ngaga pemutus sekalika ulih ngirup ai bisa tauka enda
13 Penemu ati orang enda sebaka ketegal gaya pengidup, chara sida dibesaika, utai ke nyadi ba pengidup sida sereta kebuah bukai. Seiku orang ke kala gian ngirup engka mutuska enggai ngirup ai bisa agi. (1 Raja 8:38, 39) Enti sema iya datai makai ba rumah nuan, lalu enggai ngirup ai bisa, kati nuan enda nyamai ati? Kati nuan mejal iya ngirup? Kati nuan ngansak iya nerangka kebuah iya enggai ngirup? Tentu enda, laban nuan bebasaka pemutus iya.
14, 15. Nama utai ke nyadi ba jeman Paul? Nama jaku lalau ke diberi Paul?
14 Ba jeman rasul Paul, bisi utai nyadi ke ngasuh orang Kristian enda sebaka penemu ati. Maya nya, dagin ke dijual ba pasar udah dikena nyembah engkeramba. (1 Korint 10:25) Ba runding Paul, semua pemakai datai ari Jehovah. Nya alai, enda salah meli tauka makai dagin nya. Tang sekeda menyadi Kristian ke kala nyembah engkeramba enda setuju. Sida ngasaika dagin nya enda patut diempa. Kati Paul berunding: ‘Tu enda ngachau ati aku. Aku ulih makai sebarang utai ke deka diempa aku’?
15 Paul enda berunding baka nya. Iya amat ibuhka asai ati bala menyadi iya, nyentukka iya enda ngemeratka pengingin diri. Paul madahka kitai enda patut “ngelantangka diri empu aja.” Ku iya agi: ‘Laban Kristus ukai datai ngelantangka diri.’ (Rome 15:1, 3) Baka Jesus, Paul ibuhka asai ati orang bukai lebih agi ari pengingin diri empu.—Bacha 1 Korint 8:13; 10:23, 24, 31-33.
16. Nama kebuah kitai enda patut ngakim orang bukai?
16 Tang baka ni enti penemu ati seseiku orang ngemendarka iya ngereja utai ti dikumbai kitai salah? Kitai enda patut ngakim iya, lalu ngumbai kitai betul tang iya salah. (Bacha Rome 14:10.) Jehovah meri kitai penemu ati kena ngakim diri empu, ukai dikena ngakim orang bukai. (Matthew 7:1) Kitai enggai ngachau penyerakup ba eklisia ketegal deka nitihka pengingin kitai empu. Tang kitai patut ngemansangka pengerindu sereta penyerakup ba eklisia.—Rome 14:19.
ATI TI BERESI MAI PENGUNTUNG
17. Nama nyadi ngagai penemu ati sekeda orang?
17 Rasul Peter nulis: “Intu ati kita beresi.” (1 Peter 3:16) Tang sinu amat, sekeda orang enda ibuhka jaku lalau Jehovah lalu ngujungka penemu ati sida enda ulih ngiring sida. Ku Paul, penemu ati sida baka ke udah “disar ngena besi ti angat.” (1 Timoti 4:2) Kala nuan balat betu ba kulit? Enti kala, nuan tentu nemu bekau betu nya ngasuh kulit nuan enda ulih ngasaika nama-nama. Baka nya mega, enti seiku orang selalu ngereja utai ti salah, penemu ati iya deka “disar.” Nyau kelama, nya enda ulih ngiring iya agi.
Penemu ati ti manah ulih ngiring kitai ba pengidup sereta mai pengelantang ba ati
18, 19. (a) Baka ni asai besalah ulih nulung kitai? (b) Nama patut digaga kitai enti kitai berasai besalah taja pan udah nesal ati?
18 Lebuh kitai berasai besalah, tu reti iya penemu ati madahka kitai udah ngereja utai ti salah. Tu ulih nulung kitai nemu penyalah diri lalu badu ngereja nya. Kitai patut belajar ari penyalah diri lalu enda ngereja nya agi. Ambika chunto, taja pan Raja David ngereja penyalah, tang penemu ati meransang iya nesal ati. Iya begedika pengawa ke udah digaga iya lalu enggau naka ulih ngasika Jehovah. Nya kebuah iya ulih madahka Jehovah ‘manah sereta ngampun.’—Masmur 51:1-19; 86:5; peda Nota Penutup 7.
19 Kekadang kitai agi berasai besalah, taja pan udah nesal ati. Asai besalah tu ulih ngasuh kitai tusah ati sereta berasai nadai guna. Tang ingat meh, kitai enda ulih ngubah utai ti udah nyadi. Enda ngira kitai sengaja tauka enda maya ngereja penyalah nya, Jehovah udah ngampun kitai, laban kitai udah nesal ati. Iya enda agi ingatka penyalah kitai. Bup Kudus madahka: ‘Petara besai agi ari ati kitai.’ (Bacha 1 John 3:19, 20.) Tu reti iya, pengerindu Petara sereta pengampun Iya, ulih nulung kitai mutarka asai ati ti besalah. Nuan ulih andal, Jehovah udah ngampun nuan. Enti nuan nerima pengampun ari Iya, nuan ulih lantang ati sereta nyembah Iya enggau ati ti gaga.—1 Korint 6:11; Hebrew 10:22.
20, 21. (a) Baka ni bup tu nulung kitai? (b) Nama peluang bibas milih ti dikembuan kitai? Baka ni kitai patut ngena iya?
20 Bup tu nulung kitai ngelatih penemu ati. Penemu ati ke dilatih ulih nangkan sereta ngiring kitai ba hari ti penudi tu. Bup tu mega nulung kitai nitihka jaku lalau Bup Kudus. Kitai enda diberi lis pesan ti silik, tang kitai idup nitihka “adat Kristus,” ke bepelasarka jaku lalau Petara. Nya alai, kitai bisi peluang bibas milih. (Galatia 6:2) Taja pia, kitai enda salah guna peluang bibas milih tu. Enti sema kitai enda diberi pesan ti silik bekaul enggau sesiti pekara, tu ukai reti iya kitai ulih ngereja utai ti salah. (2 Korint 4:1, 2; Hebrew 4:13; 1 Peter 2:16) Enti kitai ngaga pemutus enggau manah, tu nunjukka kitai rinduka Jehovah.
21 Lebuh kitai belematika jaku lalau Bup Kudus sereta ngena iya, kitai ulih belajar “ngelala bida entara utai ti badas enggau utai ti jai.” Kitai mega ulih belajar runding Jehovah. (Hebrew 5:14) Asil iya, penemu ati kitai dilatih lalu ulih ngiring kitai ngaga pemutus ti manah sereta terus meruan ba pengerindu Petara.
^ Mayuh lutur madahka orang ke pengirup enda ulih tetagangka penyampau ai bisa ke diirup sida. Nya alai, sida dilalau anang ngirup ai bisa.