1, 2. Nama pemeri ti berega ke diberi Jehovah ngagai kitai?

 JEHOVAH meri tiap iku kitai pemeri ti berega, iya nya nyawa. (Pemungkal 1:27) Iya deka kitai bulih pengidup ti pemadu manah. Nya alai, Iya meri kitai jaku lalau ari Bup Kudus ngambika ulih ngaga pemutus ti manah. Jaku lalau tu ulih nulung kitai “ngelala bida entara utai ti badas enggau utai ti jai.” (Hebrew 5:14) Enti kitai ngena jaku lalau nya, kitai ngemendarka Jehovah ngelatih runding kitai. Asil iya, pengidup kitai deka lantang agi. Endang terang, jaku lalau Petara beguna bendar ke kitai!

² Kekadang kitai engka napi sekeda penanggul ke nadai iring ti nyemetak ari Bup Kudus. Ambika chunto, kitai engka patut ngaga pemutus pasal chara berubat ti ngena darah. Baka ni kitai ulih ngaga pemutus ti ngelantangka ati Jehovah? Bup Kudus bisi jaku lalau ti madahka runding Jehovah pasal nyawa enggau darah. Enti kitai meretika jaku lalau tu, kitai ulih ngaga pemutus ti manah sereta bisi ati ti beresi. (Jaku Dalam 2:6-11) Aram meda sekeda ari jaku lalau tu.

3, 4. (a) Baka ni kitai nemu runding Petara pasal darah? (b) Darah ngambarka nama?

³ Bup Kudus ngajar kitai darah nya tuchi laban iya ngambarka nyawa. Nyawa nya berega ba Jehovah. Pengudah Kain munuh menyadi iya, Jehovah madah: “Darah menyadi nuan nyabak ngangauka Aku ari tanah.” (Pemungkal 4:10) Maya Jehovah nyebut pasal darah Abel, tu ditujuka ngagai nyawa Abel.

⁴ Pengudah Bah Besai maya jeman Noah, Petara madahka mensia ulih makai dagin. Tang Iya enggau silik mesan sida: “Kita enda tau makai dagin ti agi bedarah, laban darah ngundan seput.” (Pemungkal 9:4) Pesan tu mega dituju ngagai semua kitai. Endang terang, ba Jehovah, darah ngambarka nyawa. Lalu kitai patut bisi runding ti sebaka.—Masmur 36:9.

5, 6. Baka ni Adat Moses nunjukka runding Jehovah pasal nyawa enggau darah?

⁵ Adat Moses madahka: ‘Enti orang . . . makai dagin ti agi bedarah, Jehovah deka ngelaban sida, lalu Iya deka badu agi ngumbai sida nembiak Iya. Seput semua utai ti idup endang dalam darah.’—Adat Lewi 17:10, 11.

⁶ Nitihka Adat Moses, lebuh jelu dibunuh, darah jelu nya patut dituang ngagai tanah. Tu nunjukka nyawa jelu nya enggi Jehovah, ke ngaga semua utai. (Ulang Adat 12:16; Esekiel 18:4) Tang, Jehovah  enda minta orang Israel muai semua darah jelu nya nyentukka titik darah ti penudi. Enti sida enggau naka ulih muai darah jelu nya, sida ulih makai dagin nya enggau ati ti beresi. Enggau ngereja nya, sida nunjukka diri bebasaka Jehovah sereta nyawa jelu. Adat Moses mega ngasuh orang Israel meri jelu nyadika pemeri kena bulih pengampun ari dosa.—Peda Nota Penutup 19 enggau 20.

7. Baka ni David nunjukka darah nya berega?

⁷ David mega ngumbai darah nya berega. Bisi sekali, David berasai aus. Sekeda soldadu iya berambunka nyawa tama ngagai kem munsuh lalu ngambi ai ke iya. Tang David enggai ngirup lalu “nyiuhka ai nya” ngagai Jehovah. Ku David: ‘Jehovah, aku enggai ngirup ai tu! Enti aku ngirup ai tu, aku baka ke ngirup darah orang ke udah berambunka nyawa nyauk ai nya!’ Ba David, ai nya ngambarka nyawa soldadu iya. Tu nunjukka David ngembuan runding Petara pasal nyawa enggau darah.—2 Samuel 23:15-17.

8, 9. Nama runding orang Kristian kemayaharitu pasal darah?

⁸ Kenyau ari abad keterubah, orang Kristian enda agi meri pemeri jelu. Taja pia, sida patut ngembuan runding ti betul pasal darah. Jehovah ngasuh sida “anang makai darah.” Pesan tu sama berat baka nyeliahka ulah seks ti kamah tauka nyembah engkeramba.—Kereja Rasul 15:28, 29.

⁹ Kemayaharitu, kitai mega nitihka pesan ti sama. Kitai nemu Jehovah nya Pun pengidup lalu semua nyawa enggi Iya. Kitai mega nemu darah nya  tuchi sereta ngambarka nyawa. Nya alai, kitai deka berundingka jaku lalau Bup Kudus lebuh ngaga pemutus pasal chara berubat ti ngena darah.

10, 11. (a) Nama runding Saksi-Saksi Jehovah pasal nerima darah tauka empat bengkah bansa darah? (b) Nama pemutus ke patut digaga tiap iku orang Kristian?

¹⁰ Saksi-Saksi Jehovah nemu pesan “anang makai darah” reti iya ukai semina enda makai tauka ngirup darah. Tang pesan tu mega nyengkaum enda nerima darah, meri darah, tauka nyimpan darah diri empu ngambika dikena lebuh begunaka iya. Tu mega mai reti enda nerima empat bengkah bansa darah, iya nya sel darah mirah, sel darah burak, platelet enggau plasma.

¹¹ Empat bengkah bansa darah tu ulih dibagi ngagai begian darah ke mit agi. Tiap iku orang Kristian patut mutuska sekalika sida ulih nerima begian darah ke mit agi. Sida mega patut nentuka baka ni darah sida dikena maya beputung, lebuh beperesa, tauka lebuh benung berubat.—Peda Nota Penutup 21.

12. (a) Nama kebuah Jehovah ibuhka pemutus ti digaga kitai ngena penemu ati? (b) Baka ni kitai ngaga pemutus ti manah lebuh milih chara berubat?

¹² Kati Jehovah ibuhka pemutus ti digaga kitai? Au. Jehovah deka kitai ngaga pemutus ti manah taja pan nadai iring ti nyemetak ari Bup Kudus. Iya meresa runding enggau tuju ati kitai. (Bacha Jaku Dalam 21:2; 24:12.) Nya alai, sebedau ngaga  pemutus pasal chara berubat, besampi meh minta iring Jehovah. Udah nya, gaga pansik. Penemu ati ti dilatih ulih nulung kitai ngaga pemutus ti manah. Kitai enda patut nanya orang bukai pasal pemutus ke deka digaga sida enti sema sida napi penanggul ti sama. Kitai mega enda nejuka orang bukai ngachau pemutus ke udah digaga kitai. Tiap iku orang Kristian patut “mai ma diri empu.”—Galatia 6:5; Rome 14:12.

13. Nama ulih dipelajarka kitai pasal Jehovah ari adat enggau jaku lalau Iya bekaul enggau darah?

¹³ Adat ti diberi Jehovah ngagai kitai mandangka pengerindu Iya ke kitai. (Masmur 19:7-11) Tang kitai ngasika adat nya ukai ketegal deka nerima penguntung aja. Kitai ngasika Jehovah laban kitai rinduka Iya. Pengerindu kitai ke Jehovah meransang kitai enda nerima darah. (Kereja Rasul 15:20) Tu manah ke pengerai kitai. Kemayaharitu, mayuh orang nemu penusah ulih nyadi pengudah nerima darah. Lalu mayuh lutur nemu beputung ke enda ngena darah manah agi ke pengerai pesakit. Tu enggau terang nunjukka Jehovah ngembuan pengerindu enggau penemu ti pemadu dalam.—Bacha Isaiah 55:9; John 14:21, 23.

14, 15. (a) Nama pesan ke diberi Jehovah kena nyaga nembiak Iya? (b) Baka ni kitai ngembuan runding Jehovah pasal nyawa?

¹⁴ Adat Petara seruran ke pemanah nembiak Iya. Jehovah meri orang Israel adat kena nyaga sida.  Ambika chunto, sida patut ngaga reraga ba tisi perabung ngambika orang enda labuh ari perabung. (Ulang Adat 22:8) Petara mega mesanka sapi ti mangah patut dikurung ngambika enda nyerang tauka munuh orang. (Pemansut 21:28, 29) Enti orang Israel enda nitihka pesan tu lalu bisi orang lenyau nyawa, sida deka berutang darah.

¹⁵ Ari adat ti diberi Jehovah, kitai nemu nyawa amat berega ba Iya. Nya alai, kitai mega patut bebasaka nyawa. Kitai nunjukka tu ari chara kitai nyaga rumah enggau perengka pengangkut, chara kitai deriba sereta pemerindang ti dipilih. Sekeda orang, kelebih agi sida ke biak milih pemerindang ti tau ngemedis laban sida ngumbai nadai utai ulih nganu nyawa sida. Tang Jehovah deka kitai ngembuan runding ti sebaka enggau Iya. Kitai nyeliahka pengawa ti tau ngemedis laban nyawa kitai enggau orang bukai amat berega.—Pengajar 11:9, 10.

16. Nama runding Jehovah pasal pengawa bebuai anak?

¹⁶ Nyawa tiap iku orang, nyengkaum anak ke bedau ada, berega ba Jehovah. Nitihka Adat Moses, “Enti orang lelaki belaya, lalu ngemediska seiku indu ke ngandung, lalu anak iya ada muda, tang nadai lenyau nyawa, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim. Tang enti indu nya tauka anak iya lenyau nyawa, ukum ti dikena nya; nyawa balas nyawa.” (Pemansut 21:22, 23, NWT) Reti iya, enti bisi orang ngemediska  indu ke ngandung nyentukka indu tauka anak dalam kandung iya mati, orang nya berutang darah. Taja pan iya enda sengaja, Jehovah ngumbai orang nya salah lalu patut diukum mati. Ba mata Jehovah, indah anak ke bedau ada bisi nyawa. Pikirka asai ati Iya lebuh meda bejuta iku anak ke bedau ada dibuai ari kandung ninting taun!

17. Nama kebuah indu ke kala muai anak dalam kandung sebedau iya nemu pasal Jehovah enda ibuh terus berasai besalah?

¹⁷ Kati enti seiku indu kala muai anak dalam kandung sebedau iya belajar pasal runding Jehovah? Iya ulih arap Jehovah deka ngampun iya nengah genselan Jesus. (Luke 5:32; Epesus 1:7) Enti iya amat nesal ati, iya enda ibuh terus berasai besalah. Ku Bup Kudus: ‘Jehovah endang kasih sereta rindu, . . . Baka timur ti jauh ari barat, baka nya meh penyauh Iya muai dosa kitai.’—Masmur 103:8-14.

18. Nama kebuah kitai patut muai asai begedi ari ati kitai?

¹⁸ Enti kitai bebasaka nyawa, kitai muai asai begedi ari ati kitai. Rasul John nulis: “Semua orang ke begedika pangan diri endang pemunuh.” (1 John 3:15) Nyau kelama, asai enda rinduka orang ulih nyadi begedi. Enti kitai begedika seseiku orang, kitai enda bebasaka iya, betenah pasal iya, indah ngarapka iya mati. Jehovah ulih meda ati kitai. (Adat Lewi 19:16; Ulang Adat 19:18-21; Matthew 5:22) Nya alai, enti kitai bisi begedika seseiku orang, kitai patut mutarka asai ati tu enggau lengkas.—James 1:14, 15; 4:1-3.

19. Nama siti agi chara ti nunjukka kitai bebasaka nyawa?

 ¹⁹ Bisi siti agi chara ti nunjukka kitai bebasaka nyawa. Ari Masmur 11:5 kitai belajar, Jehovah “begedika orang ke mangah.” Enti kitai milih pemerindang ti ngayanka pemangah, tu engka nunjukka kitai rinduka ulah ti kasar. Kitai tentu enggai berundingka jaku sereta ulah ti kasar. Tang kitai deka berundingka utai ti tuchi sereta meri pemaik.—Bacha Pilipi 4:8, 9.

20-22. (a) Nama runding Jehovah pasal dunya Sitan? (b) Baka ni nembiak Jehovah nunjukka sida “ukai enggi dunya”?

²⁰ Ba mata Jehovah, dunya Sitan berutang darah laban enda bebasaka nyawa. Ari kelia menya, gerempung politik udah munuh bejuta iku orang, nyengkaum nembiak Jehovah. Ba Bup Kudus, perintah mensia digambarka ngena jelu ti mangah. (Daniel 8:3, 4, 20-22; Pemandang 13:1, 2, 7, 8) Kemayaharitu, pengawa nyual senyata mai mayuh untung. Endang amat, tu nunjukka “semua dunya di baruh kuasa Sitan.”—1 John 5:19.

²¹ Tang, orang Kristian ti bendar “ukai enggi dunya.” Nya alai, nembiak Jehovah enda enggau ba politik sereta perang. Sida enda munuh orang, lalu enda nyukung sebarang gerempung ti nyukung pengawa beperang tauka munuh orang. (John 15:19; 17:16) Lebuh sida diperinsa, sida enda malas enggau penyai. Jesus ngajar kitai rinduka orang, indah munsuh kitai.—Matthew 5:44; Rome 12:17-21.

 ²² Kitai mega nyeliahka diri ari Babilon ti Besai, iya nya gerempung pengarap pelesu ba dunya. Gerempung tu mega berutang darah. Bup Kudus madahka: “Darah sida nabi, darah nembiak Tuhan, enggau darah semua orang ke udah dibunuh di dunya,” ditemu dalam iya. Nya alai, Jehovah nangkan kitai: “Pansut ari iya, kita ke nembiak Aku.”—Pemandang 17:6; 18:2, 4, 24.

23. Nama reti “pansut ari” Babilon ti Besai?

²³ “Pansut ari” Babilon ti Besai reti iya kitai enda tau enda pansut ari pengarap pelesu. Ambika chunto, kitai patut nulis surat ngambika nama kitai nadai ba lis gerija. Tang, nya enda chukup. Kitai mega patut begedika sereta nulak ulah jai ti diterima pengarap pelesu baka ulah seks ti kamah, pengawa politik, sereta pengamu. (Bacha Masmur 97:10; Pemandang 18:7, 9, 11-17) Ari suba, ulah ti jai tu udah munuh bejuta iku orang.

24, 25. Baka ni ngelala Jehovah meri kitai pengelantang sereta ati ti beresi?

²⁴ Sebedau kitai ngelala Jehovah, kitai engka udah nyukung dunya Sitan. Tang diatu kitai udah ngaga ubah. Kitai nerima tebus Jesus lalu nyerahka diri ngagai Jehovah. Kitai mega udah ‘ngasaika pengering ari Jehovah.’ Nya alai, kitai bisi pengelantang sereta ati ti beresi laban nemu kitai udah ngelantangka ati Jehovah.—Kereja Rasul 3:19; Isaiah 1:18.

²⁵ Taja pan kitai kala enggau gerempung ti enda bebasaka nyawa, Jehovah ulih ngampun kitai ngena tebus Jesus. Kitai beterima kasih enggau nyawa  ti udah diberi Jehovah. Nya alai, kitai nulung orang bukai ngelala Iya, ngambika sida ulih pansut ari dunya Sitan lalu bisi kaul ti rapat enggau Jehovah.—2 Korint 6:1, 2.

26-28. (a) Nama pengawa ti diberi Jehovah ngagai Esekiel? (b) Nama pengawa ti diberi Jehovah ngagai kitai kemayaharitu?

²⁶ Ba jeman Israel menya, Jehovah ngasuh nabi Esekiel nangkan orang pasal pengerusak Jerusalem. Jehovah ngasuh Esekiel madahka chara sida ulih ngelepaska diri. Enti Esekiel enda nangkan sida, iya deka betanggungjawapka pemati sida. (Esekiel 33:7-9) Esekiel enggau naka ulih madahka pasal pesan ti berat tu. Ulah iya nunjukka iya bebasaka nyawa.

²⁷ Kemayaharitu, Jehovah meri kitai pengawa nangkan orang pasal pengerusak dunya Sitan. Jehovah deka kitai nulung sida ngelala Iya ngambika ulih idup ba dunya baru. (Isaiah 61:2; Matthew 24:14) Kitai enggau naka ulih madahka pesan tu ngagai orang bukai. Enti kitai ngereja nya, kitai nunda Paul ke madah: ‘Aku enda betanggungjawapka nyawa kita, laban aku nadai kala enggai madah ngagai kita semua juluk ati Petara.’—Kereja Rasul 20:26, 27.

²⁸ Endang amat, ngambika ulih meruan dalam pengerindu Petara, kitai ukai semina ngembuan runding Jehovah pasal nyawa enggau darah. Kitai mega patut mengkang beresi ba mata Iya. Aram meda baka ni kitai ulih ngereja nya ba Pelajar 8.