1-3. Nitihka Jaku Dalam 13:20, nama kebuah kitai patut bejimat milih pangan?

 SEBEDAU anak mit ulih bejaku, iya belajar ari utai ti dipeda enggau didinga iya. Lebuh mansang besai, iya berengkah nunda apai indai iya. Baka nya mega, orang ke besai tuai senang nitihka runding sereta ulah orang ke begulai rapat enggau sida.

² Jaku Dalam 13:20 madahka: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam.” Leka jaku “begulai” mai reti ngena mayuh awak begulai enggau seseiku orang ketegal kitai rinduka iya.

³ Kitai senang nitihka ulah bakih kitai, enda ngira ulah ti manah tauka jai. Jaku Dalam 13:20 nambahka agi: “Enti nuan bepangan enggau orang ke beli, nuan deka rusak.” Pangan ke rinduka Jehovah ulih meransang kitai terus tetap ati ngagai  Jehovah. Kena nulung kitai milih pangan ti manah, aram kitai belajar ari chara Jehovah milih pangan.

4. (a) Nama kebuah nyadi pangan Petara nya siti basa ti besai? (b) Nama kebuah Jehovah ngumbai Abraham “pangan Aku”?

⁴ Jehovah, Pemerintah dunya raya, mai kitai nyadi pangan Iya. Tu siti basa ti besai. Jehovah milih sida ke arap sereta rinduka Iya nyadika pangan. Perundingka Abraham. Iya sedia ngereja sebarang utai ke Petara. Mayuh kali, Abraham nunjukka diri ngasi sereta tetap ati. Iya indah sanggup nyerah anak iya, Isak, nyadika pemeri. Abraham pechaya ‘Petara ulih ngangkatka [Isak] ari mati.’ (Hebrew 11:17-19; Pemungkal 22:1, 2, 9-13) Abraham ngasi sereta tetap ati ngagai Jehovah. Nya alai, Jehovah ngumbai iya “pangan Aku.”—Isaiah 41:8; James 2:21-23.

5. Nama runding Jehovah pasal sida ke tetap ati ngagai Iya?

⁵ Jehovah rinduka orang ke tetap ati ngagai Iya. Penetap ati nya utai ti pemadu beguna ba sida ke nyadi pangan Jehovah. (Bacha 2 Samuel 22:26.) Sida ngasi sereta tetap ati laban sida rinduka Jehovah. Ku Bup Kudus, ‘Petara ngaga orang ke lurus,’ iya nya orang ke ngasi, “nyadika pangan Iya.” (Jaku Dalam 3:32) Jehovah ngelaluka pangan Iya ngagai “Rumah Sembiang.” Iya mai sida nyembah sereta besampi ngagai Iya ba sebarang maya.—Masmur 15:1-5.

6. Baka ni kitai nunjukka diri rinduka Jesus?

 ⁶ Ku Jesus: ‘Orang ke rinduka aku deka ngasika pesan aku, lalu Apai aku deka rinduka iya.’ (John 14:23) Nya alai, ngambika ulih nyadi pangan Jehovah, kitai patut rinduka Jesus sereta ngasika pesan iya. Ambika chunto, kitai ngasika Jesus lebuh kitai nginjil lalu ngaga orang nyadi murid. (Matthew 28:19, 20; John 14:15, 21) Ketegal kitai rinduka Jesus, kitai “deka nitihka singkang iya.” (1 Peter 2:21) Jehovah gaga ati lebuh kitai enggau naka ulih nitihka teladan Anak Iya ba jaku enggau ulah.

7. Nama kebuah kitai patut nunda Jehovah lebuh milih pangan?

⁷ Jehovah milih orang ke tetap ati, ngasi, sereta rinduka Anak Iya nyadika pangan. Kitai mega deka milih pangan ke baka nya. Enti pangan kitai nitihka teladan Jesus sereta ransing nginjil, sida ulih nulung kitai nyadi orang ke manah agi sereta nulung kitai tetap ati ngagai Jehovah.

8. Nama ngerinduka ati nuan pasal kaul Rut enggau Naomi?

⁸ Dalam Bup Kudus, bisi mayuh chunto pasal pangan ti manah, baka Rut enggau Naomi. Naomi nya entua Rut, lalu jauh tuai ari Rut. Seduai datai ari menua ti enda sama lalu ngembuan gaya pengidup ti bebida. Tang seduai iya ulih nyadi kaling rapat laban sama rinduka Jehovah. Lebuh Naomi deka ninggalka menua Moab lalu  pulai baru ngagai menua Israel, “Rut enggai ngelengkaka Naomi.” Ku Rut madah ngagai Naomi: ‘Bala nuan deka nyadika bala aku, lalu Petara nuan deka nyadika Petara aku.’ (Rut 1:14, 16) Rut amat manah enggau Naomi. Maya ba Israel, Rut bagas gawa kena nyaga Naomi. Naomi mega amat sayauka Rut. Nya alai, iya meri Rut jaku lalau ti manah. Ketegal Rut mending, seduai iya bulih mayuh berekat.—Rut 3:6.

9. Nama dikerinduka nuan pasal kaul David enggau Jonatan?

⁹ David enggau Jonatan bakih ti rapat. Seduai sama tetap ati ngagai Jehovah. Jonatan 30 taun tuai ari David sereta deka nganti apai iya nyadi raja menua Israel. (1 Samuel 17:33; 31:2; 2 Samuel 5:4) Taja pan iya nemu Jehovah udah milih David nyadi raja, Jonatan enda kepapas. Tang, iya enggau naka ulih nyukung David. Ambika chunto, lebuh Saul deka munuh David, Jonatan mupuk betemu enggau David ngambika ulih meransang iya. Iya indah sanggup mati ke David. (1 Samuel 23:16, 17) David mega pangan ti tetap ati. Iya besemaya deka ngibun ruang bilik Jonatan. Lalu iya ngamatka semaya nya taja pan Jonatan udah mati.—1 Samuel 18:1; 20:15-17, 30-34; 2 Samuel 9:1-7.

10. Nama dikerinduka nuan pasal kaul Sadrak, Mesak enggau Abednego?

¹⁰ Sadrak, Mesak enggau Abednego nya tiga iku orang Hebrew ke ditaban ngagai Babilon lebuh sida agi biak. Taja pan jauh ari diri sebilik, sida nulung pangan diri tetap ati ngagai Jehovah. Lebuh  sida udah besai, pengarap sida diuji. Raja Nebukadnesar ngasuh sida nyembah engkeramba emas. Tang enggau berani sida madah ngagai raja, ‘Enggai kami nyembah petara nuan, lalu meremi ngagai engkeramba emas ti didirika nuan.’ Lebuh pengarap sida diuji, tiga iku kaban rapat tu mengkang tetap ati ngagai Jehovah.—Daniel 1:1-17; 3:12, 16-28.

11. Baka ni Paul enggau Timoti ulih nyadi pangan ti manah?

¹¹ Lebuh rasul Paul betemu enggau Timoti, iya ulih meda Timoti rinduka Jehovah sereta ibuhka eklisia. Nya alai, Paul ngelatih Timoti ngambika ulih nulung bala menyadi ba mayuh endur. (Kereja Rasul 16:1-8; 17:10-14) Paul madahka Timoti ‘sama bekereja enggau iya nusui Berita Manah.’ Paul nemu Timoti deka “balat ibuhka” bala menyadi Kristian. Seduai iya ulih nyadi pangan ti manah laban sama ransing gawa ke Jehovah.—Pilipi 2:20-22; 1 Korint 4:17.

12, 13. (a) Nama kebuah kitai patut bejimat milih pangan indah ba eklisia? (b) Nama kebuah Paul meri jaku tangkan ba 1 Korint 15:33?

¹² Bala menyadi Kristian kitai datai ari bemacham bansa enggau gaya pengidup. Nya alai, kitai ulih belajar ari pangan diri. Kitai meransang pangan diri ngambika terus tetap ati ngagai Jehovah. (Bacha Rome 1:11, 12.) Taja pia, kitai patut bejimat lebuh milih pangan, indah dalam  eklisia. Sekeda menyadi begunaka awak ngambika ulih kering ba pengarap, baka buah ti begunaka awak ngambika mansau. Nya alai, kitai patut sabar sereta rinduka pangan diri.—Rome 14:1; 15:1; Hebrew 5:12–6:3.

¹³ Kadang-kadang bisi penanggul ti besai nyadi ba eklisia. Ambika chunto, seiku menyadi engka ngereja pengawa ti salah. Seiku agi engka balat  mutap nyentukka ulih ngachau pemaik ba eklisia. Pekara tu enda ngasuh kitai tekenyit. Eklisia ba kurun keterubah mega napi penanggul ti sama. Nya alai, Paul nangkan sida: “Anang nejuka orang nipu kita: ‘Orang ke jai ngerusak moral ti menyana.’” (1 Korint 15:12, 33) Paul mega ngingatka Timoti ngambika milih pangan enggau bejimat. Kemayaharitu, kitai pan patut bejimat milih pangan.—Bacha 2 Timoti 2:20-22.

14. Baka ni pangan ke dipilih kitai ulih ngachau kaul kitai enggau Jehovah?

¹⁴ Kaul kitai enggau Jehovah nya utai ti pemadu berega. Nya alai, kitai patut nyaga nya enggau manah. Kitai enda begulai enggau orang ke ulih ngelemika pengarap sereta ngerusak kaul kitai enggau Jehovah. Lebuh kitai nyepuhka kapas ke dalam ai ti kamah, kitai enda ulih ngarapka kapas nya nginsap ai ti beresi. Pia mega, kitai enda ulih begulai enggau orang ke ngereja ulah ti salah lalu ngumbai diri ulih ngereja utai ti betul. Nya alai, kitai patut bejimat lebuh milih pangan ti rapat.—1 Korint 5:6; 2 Tesalonika 3:6, 7, 14.

15. Nama ulih digaga nuan ngambika bulih pangan ti manah ba eklisia?

¹⁵ Ba eklisia, nuan tau bulih pangan ti rinduka Jehovah. Sida ulih nyadi pangan rapat nuan. (Masmur 133:1) Tang, anang semina milih pangan ke serambau tauka sama gaya pengidup. Kingatka, Jonatan jauh tuai ari David lalu Rut mega jauh biak ari Naomi. Kitai deka nitihka jaku lalau Bup Kudus:  “Tukangka ati kita.” (2 Korint 6:13; bacha 1 Peter 2:17.) Nuan deka bulih mayuh agi pangan enti nuan bebendar neladan Jehovah.

16, 17. Nama ke enda patut digaga kitai enti bisi orang dalam eklisia ngemediska ati kitai?

¹⁶ Tiap iku orang bisi personaliti, runding, sereta chara ngereja utai ti enda sebaka. Nya alai, kitai ulih belajar ari pangan diri. Tang kekadang, kitai enda sepenemu lalu salah sangka enggau bala menyadi Kristian. Tu engka ngasuh kitai pedis ati enggau sida.—Jaku Dalam 12:18.

¹⁷ Kati kitai deka ngelakka penanggul tu ngasuh kitai enda agi datai gempuru? Enda. Taja pan bisi orang ngemediska ati kitai, kitai deka terus datai ngagai gempuru. Nama kebuah? Laban ukai Jehovah ke ngasuh kitai pedis ati. Iya udah meri kitai pengidup sereta semua utai bukai. Nya alai, kitai patut rindu sereta tetap ati ngagai Iya. (Pemandang 4:11) Iya mega meri kitai eklisia kena negapka pengarap kitai. (Hebrew 13:17) Enti kitai beterima kasihka pemeri tu, kitai deka terus datai ngagai gempuru taja pan bisi berasai pedis ati enggau seiku ari bala menyadi.—Bacha Masmur 119:165.

18. (a) Nama ulih nulung kitai begulai manah enggau bala menyadi Kristian? (b) Nama kebuah kitai patut ngampun pangan diri?

¹⁸ Kitai rinduka bala menyadi Kristian lalu deka begulai manah enggau sida. Jehovah enda ngarapka kitai sempurna. Baka nya mega, kitai enda  ngarapka bala menyadi sempurna. (Jaku Dalam 17:9; 1 Peter 4:8) Kitai semua ngereja penyalah, tang pengerindu nulung kitai terus ‘ngampun pangan diri.’ (Kolosi 3:13) Enti kitai bisi pengerindu, kitai enda ngelakka penanggul ti mit nyadi besai. Lebuh bisi menyadi ngemediska ati kitai, kitai engka selalu berundingka utai nya. Kitai senang berasai ringat sereta bedendam enggau menyadi nya. Tu deka ngasuh kitai tusah sereta pedis ati. Tang, enti kitai sedia ngampun, kitai deka lantang ati sereta bisi penyerakup ba eklisia. Kelebih agi, kitai deka bisi kaul ti manah enggau Jehovah.—Matthew 6:14, 15; Luke 17:3, 4; Rome 14:19.

19. Ni maya kitai patut badu begulai enggau seseiku orang ba eklisia?

¹⁹ Dalam siti ruang bilik, tiap iku orang bisi tanggung pengawa kediri empu. Enti sida ngereja nya enggau manah, sida sebilik deka lantang. Tang nama nyadi enti sema seiku ari sida berengkah ngelaban? Diri sebilik bebendar deka nulung iya, tang iya enggai ninga. Iya mutus deka ninggalka rumah tauka tuai bilik engka ngasuh iya ninggalka rumah. Penanggul tu mega ulih nyadi ba eklisia. Seiku menyadi engka terus ngereja penyalah lalu tu tau ngerusak pengarap bala menyadi ba eklisia. Iya enggai nerima bantu sereta enggai ngubah ulah diri. Tu ulih ngujungka iya dibuai ari  gerempung. Tauka iya empu mutuska deka ninggalka gerempung. Enti tu nyadi, Bup Kudus madah enggau terang, kitai enda patut begulai enggau iya. (Bacha 1 Korint 5:11-13; 2 John 9-11) Tu engka tusah dikereja, kelebih agi enti orang ke dibuai nya pangan tauka diri sebilik kitai. Lebuh tu nyadi, kitai deka terus tetap ati ngagai Petara Jehovah, ukai ngagai mensia.—Peda Nota Penutup 8.

20, 21. (a) Nama kebuah atur dibuai ari gerempung nunjukka pengerindu? (b) Nama kebuah kitai patut bejimat lebuh milih pangan?

²⁰ Jehovah udah ngatur ngambika tuai gempuru muai sida ke enda nesal ati ari gerempung. Atur tu ngayanka pengerindu Jehovah. Tu mega ulih ngelindung bala menyadi ba eklisia ari sida ke sengaja ngereja utai ti salah. (1 Korint 5:7; Hebrew 12:15, 16) Enti kitai nyukung atur tu, kitai nunjukka diri rinduka Jehovah, nama Iya ti kudus enggau standard moral Iya. (1 Peter 1:15, 16) Atur tu mega nunjukka pengerindu Jehovah ngagai orang ke dibuai ari gerempung. Tu chara Jehovah ngerara iya ngambika iya nesal ati lalu ngaga ubah. Mayuh menyadi ke kala dibuai ari gerempung pulai baru ngagai Jehovah, lalu bala menyadi gaga ati nyambut penatai sida.—Hebrew 12:11.

²¹ Endang amat, kitai senang nitihka ulah orang ke enggau kitai begulai. Nya alai, amat beguna kitai milih pangan enggau bejimat. Enti kitai milih pangan ti dikerinduka Jehovah, sida ulih nulung kitai terus tetap ati ngagai Jehovah belama iya.