1. Nama patut dikereja kitai kena nentuka sembah kitai ngerinduka ati Jehovah, lalu nama kebuah?

 JESUS madah: ‘Orang ke amat nyembah Apai, deka nyembah Iya dalam roh enggau pemendar, laban nya gaya orang ke dikedekaka Apai nyembah Iya.’ (John 4:23; 6:44) Tiap iku kitai patut ‘ngiga utai ti ngerinduka ati Tuan.’ (Epesus 5:10) Tu enda senang laban Sitan nguji nipu kitai ngereja utai ti enda dikerinduka Jehovah.—Pemandang 12:9.

2. Padahka utai ke nyadi ba Bukit Sinai.

² Baka ni Sitan nguji nipu kitai? Siti chara iya nya ngasuh kitai tusah ngelala utai ti betul enggau utai ti salah. Peratika utai ke nyadi ngagai orang Israel ba Bukit Sinai. Orang Israel enda sabar nganti Moses nurun ari bukit nya. Nya alai, sida ngasuh Aron ngaga petara ke sida. Aron ngaga anak sapi emas lalu sida berengkah berami lalu meremi ngagai sapi emas nya. Lebuh sida meremi ngagai sapi emas nya, sida ngumbai diri nyembah Jehovah. Taja pan sida madah pengerami nya ‘pengerami ke  Jehovah,’ tang ba Jehovah, sida nyembah engkeramba. Ketegal nya mayuh sida dibunuh. (Pemansut 32:1-6, 10, 28) Nama utai ke dipelajar kitai? Kitai enggai ditipu Sitan. Kitai enda patut “negu utai ti enda tuchi,” ke bisi kaul enggau pengarap pelesu. Kitai deka Jehovah ngajar kitai ngelala utai ti betul enggau utai ti salah.—Isaiah 52:11; Esekiel 44:23; Galatia 5:9.

3, 4. Nama kebuah kitai patut nemu pun penatai siti-siti pengerami?

³ Lebuh Jesus ba dunya, iya ngajar bala murid chara sembah ti tuchi. Pengudah Jesus mati, bala rasul terus ngajar pesan Jehovah ngagai bala murid ti baru. Tang pengudah bala rasul mati, pengajar ti pelesu berengkah ngajar adat sereta pengerami pengarap pelesu ngagai eklisia. Sida indah ngubah nama sekeda pengerami lalu ngumbai nya pengerami Kristian. (Kereja Rasul 20:29, 30; 2 Tesalonika 2:7, 10; 2 John 6, 7) Mayuh ari pengerami nya agi diintu kemayaharitu, lalu bisi kaul enggau ajar ti pelesu sereta roh ti jai. *—Pemandang 18:2-4, 23.

⁴ Ba serata dunya, orang rindu berami. Tang enti Jehovah enda nerima sesiti pengerami, kati nuan sanggup ngaga ubah kena ngelantangka ati Iya? Tu enda senang. Tang Jehovah ulih nulung nuan. Aram kitai berandauka baka ni sekeda pengerami berengkah ngambika kitai ulih nemu asai ati Jehovah.

5. Baka ni kitai nemu Jesus ukai ada kena 25 Disember?

⁵ Ba serata dunya, Krismas diintu kena 25 Disember. Mayuh orang ngumbai nya hari pengada Jesus. Tang Bup Kudus nadai madah kemaya Jesus ada. Ku Luke, lebuh Jesus ada di Betlehem, “bala pengibun bedus diau di padang, benung ngibun raban bedus sida lebuh malam hari.” (Luke 2:8-11) Ba bulan Disember, menua Betlehem benung musin chelap, bisi ujan enggau seleju. Nya alai, pengibun bedus nadai ba padang nyaga bedus sida maya malam hari. Tu nunjukka Jesus ukai ada ba bulan Disember. Enti kitai mansik sejarah sereta utai ke ditulis Bup Kudus, kita deka nemu Jesus ada ba urung bulan September enggau Oktober.

6, 7. (a) Ari ni penatai adat ngintu Krismas? (b) Nama tuju kitai meri pemeri?

⁶ Nyadi, baka ni Krismas berengkah? Krismas datai ari pengerami ke enda sejalai enggau ajar Bup Kudus, baka pengerami Saturnalia. Pengerami tu ke Saturn, iya nya petara pengawa betanam. Nitihka penerang ari siti bup (The Encyclopedia Americana), pengerami Saturnalia diintu orang Rome ba tengan bulan Disember. Adat ngintu Krismas, baka makai besai, meri pemeri sereta nunu dian, datai ari pengerami tu. Kelimpah ari nya, 25 Disember mega hari pengada petara Mitra, iya nya petara mata panas orang Persia.

⁷ Tang kemayaharitu, mayuh orang ke ngintu Krismas nadai berundingka baka ni pengerami  nya berengkah. Sida semina deka ngena awak nya begulai sereta makai enggau diri sebilik, lalu meri pemeri. Endang amat kitai rinduka diri sebilik sereta bala bakih, lalu Jehovah deka kitai bekunsi utai ti manah enggau pangan diri. 2 Korint 9:7 madahka, ‘Petara rinduka orang ke meri enggau ati ti gaga.’ Jehovah deka kitai meri pemeri  ketegal pengerindu. Nembiak Jehovah rindu begulai enggau pangan diri lalu meri pemeri ba sebarang maya sereta enda minta balas.—Luke 14:12-14.

8. Kati orang ke pandai pasal bintang meri pemeri ngagai Jesus lebuh iya baru ada? Terangka.

⁸ Mayuh orang madah kebuah sida meri pemeri maya Krismas laban tiga iku orang ke pandai pasal bintang meri pemeri ngagai Jesus maya iya baru ada. Ba jeman Bup Kudus, meri pemeri ngagai orang ke dipebasa endang suah digaga. (1 Raja 10:1, 2, 10, 13) Tang nemu nuan, tiga iku orang ke pandai pasal bintang nya ukai penyembah Jehovah? Pia mega, pejalai sida ari Timur tentu ngena awak bebulan-bulan. Nya alai, lebuh sida betemu enggau Jesus, iya ukai agi anak mit ke baru ada. Lalu ba maya nya, Jesus udah diau ba rumah.—Matthew 2:1, 2, 11.

9. Dalam Bup Kudus, sapa ke nyambut hari pengada?

⁹ Lebuh anak mit ada, nya maya ti ngagaka ati. (Masmur 127:3) Tang nya ukai reti iya kitai patut ngintu hari pengada. Perundingka tu: Dalam Bup Kudus, semina dua iti hari pengada ke disebut, iya nya hari pengada Raja menua Ejip sereta Raja Herod. (Bacha Pemungkal 40:20-22; Mark 6:21-29.) Seduai iya ukai penyembah Jehovah. Kebendar iya, Bup Kudus nadai kala nyebut nembiak Jehovah ngintu hari pengada.

10. Nama kebuah orang Kristian kelia enda ngintu hari pengada?

 ¹⁰ Nitihka siti bup (The World Book Encyclopedia), orang Kristian ba abad kesatu enggau kedua “ngumbai ngintu hari pengada nya adat ke enda sejalai enggau ajar Bup Kudus.” Adat ke baka nya datai ari pengarap pelesu. Ambika chunto, orang Gerika kelia pechaya lebuh seiku anak mit ada, bisi roh datai lalu nyaga anak mit nya sepemanjai idup iya. Sida mega pechaya roh tu bisi kaul ti rapat enggau petara ke sama hari pengada enggau anak mit nya. Kelimpah ari nya, hari pengada bisi kaul enggau orang ke pandai pasal bintang sereta horoskop.

11. Kemaya kitai nunjukka pengerah jari?

¹¹ Mayuh orang ngasaika hari pengada sida hari ti spesial. Sida deka orang nunjukka pengerindu sereta beterima kasih ngagai sida ba hari nya. Tang Jehovah deka kitai gerah jari lalu nunjukka pengerindu sereta pemanah ati tiap hari. (Bacha Kereja Rasul 20:35.) Kitai patut beterima kasih ngagai Petara ninting hari, ukai ba maya hari pengada kitai aja.—Masmur 8:3, 4; 36:9.

12. Nama reti ayat ba Pengajar 7:1?

¹² Pengajar 7:1 madah: “Tampak nama nya manah agi ari minyak wangi ti berega, lalu hari nuan mati nya manah agi ari hari nuan ada.” Nama reti ayat tu? Lebuh kitai ada, kitai bedau ulih ngereja nama-nama utai. Tang enti kitai ngena pengidup kitai nyembah Jehovah sereta manah enggau orang bukai, kitai deka bulih “nama” ti manah. Enti sema kitai mati, Jehovah deka ingatka kitai.  (Jop 14:14, 15) Nembiak Jehovah enda ngintu hari pengada diri empu tauka hari pengada Jesus. Kebendar iya, Jesus semina ngasuh kitai ngingatka hari pemati iya.—Luke 22:17-20; Hebrew 1:3, 4.

13, 14. Pengerami Ester bisi kaul enggau nama?

¹³ Mayuh orang ngumbai pengerami Ester kena ngintu pengangkat Jesus ari mati. Tang kebendar  iya, pengerami tu bisi bekaul enggau Eostre, iya nya petara indu musin bungai orang Anglo-Saxon. Siti bup (The Dictionary of Mythology) madahka Eostre mega petara indu ke meri tuah ngambika ulih pisit beranak. Sekeda adat pengerami Ester bisi bekaul enggau pekara tu. Ambika chunto, nitihka siti bup (Encyclopædia Britannica), telu “suah dikena ngambarka pengidup baru sereta pengangkat ari mati.” Lalu ribit dikena ngambarka pisit beranak ba sembah ti pelesu. Endang terang, pengerami Ester nadai kaul enggau pengangkat Jesus ari mati.

¹⁴ Lebuh Jehovah meda orang ngaitka pengangkat Anak Iya ari mati enggau adat pengarap pelesu, kati Iya nyamai ati? Tentu enda. (2 Korint 6:17, 18) Kebendar iya, Jehovah nadai kala ngasuh kitai ngintu pengangkat Jesus ari mati.

15. Nama kebuah orang Kristian ti bendar nyeliahka adat ti bekaul enggau pemati?

¹⁵ Orang Kristian ti bendar nyeliahka mayuh adat ti bekaul enggau pemati. Lebuh bisi pemati, orang ke mati deka disenggai sepemanjai malam. Lebuh iya dikubur, diri sebilik muai tanah tauka bungai ke dalam lubang pendam sebedau iya ditimbun ngena tanah. Bisi mega adat bukai dikereja beberapa hari, bulan tauka taun pengudah orang nya mati. Adat tu dikereja laban mayuh orang pechaya orang ke mati nya ulih nulung tauka ngachau orang ke agi idup.  Tang Bup Kudus ngajar, orang ke mati “nadai nemu utai.” Kitai patut nyeliahka adat ke bekaul enggau pemati enti kitai deka meruan dalam pengerindu Petara.—Pengajar 9:5, 10.

16, 17. Nama patut diperundingka kitai lebuh deka ngaga pengerami kawin?

¹⁶ Pengerami kawin nya ngelantangka ati. Ba serata dunya, orang kawin ngena mayuh chara. Tang sekeda adat kawin nya enda sejalai enggau ajar Bup Kudus. Nya alai, orang Kristian ke deka kawin patut nentuka pengerami kawin sida ngerinduka ati Jehovah. Enti sida mansik dulu pasal penatai adat kawin, sida ulih ngaga pemutus ti manah.—Mark 10:6-9.

¹⁷ Sekeda adat kawin dikumbai ulih mai “penguntung” tauka meri tuah ngagai orang ke kawin. (Isaiah 65:11) Ambika chunto, adat bebiau ngena manuk. Orang pechaya pengawa tu ulih ngelindung orang ke kawin nya ari roh ti jai, lalu ulih meri sida pengelantang, umur panjai sereta mayuh anak. Tang orang Kristian patut bejimat ngambika enda ngereja adat ti bisi kaul enggau pengarap pelesu.—Bacha 2 Korint 6:14-18.

18. Nama jaku lalau Bup Kudus ke bukai ti patut diperundingka sebedau ngaga pengerami kawin?

¹⁸ Orang Kristian ke deka kawin nentuka pengerami kawin sida mai pengaga ati ngagai semua orang. Tang pengerami kawin ukai maya ngayanka  “pengaya.” (1 John 2:16) Orang ke datai ngagai pengerami nya enda patut ngena jaku bungah ti kamah, ngemaluka tauka enda bebasaka orang ke kawin tauka orang bukai. (Jaku Dalam 26:18, 19; Luke 6:31; 10:27) Enti nuan deka kawin, tentuka pengerami kawin nuan digaga enggau manah ngambika ulih nyadi pengingat ti ngerinduka ati.—Peda Nota Penutup 28.

19, 20. Ari ni penatai adat nyaguka gelas?

¹⁹ Siti pengawa ke selalu digaga lebuh pengerami kawin sereta begelumu enggau pangan diri iya nya nyaguka gelas. Siku orang deka minta berekat lalu orang bukai nyaguka gelas sida. Nama runding orang Kristian pasal pengawa tu?

²⁰ Siti bup madahka, “Pengawa nyaguka gelas engka datai ari pengarap ti pelesu kelia menya. Darah tauka wain disadung ngagai petara sida ngambika peminta sida dikeamatka. Udah nya, sida nyebut ‘gayu guru’ tauka ‘gerai nyamai!’” * Ba jeman kelia, orang suah nyaguka gelas minta berekat ari petara sida. Tang tu ukai chara Jehovah meri berekat.—John 14:6; 16:23.

21. Nama sekeda pengerami ke patut diseliahka orang Kristian?

²¹ Sebedau nuan ngaga pemutus sekalika deka ngintu siti-siti pengerami, perundingka ulah ti  suah diayanka maya nya. Ambika chunto, sekeda pengerami meransang orang betanda enggau gaya ti kamah, mabuk, indah ngereja ulah seks ti kamah. Bisi pengerami meransang kaul lelaki sama lelaki (gay) sereta indu sama indu (lesbian), tauka semangat patriotik. Enti kitai enggau pengerami tu, ulih kitai ngumbai diri begedika penyai baka Jehovah?—Masmur 1:1, 2; 119:37; Rome 12:9.

22. Baka ni kitai ulih nentuka sekalika ulih enggau sesiti pengerami?

²² Orang Kristian patut bejimat ngambika enda ngintu pengerami ti enda meri mulia ngagai Petara. Rasul Paul nulis: ‘Nemuka kita makai tauka ngirup, tauka ngereja sebarang utai, kereja semua utai nya ke mulia Petara.’ (1 Korint 10:31; peda Nota Penutup 29.) Endang amat, ukai semua pengerami bisi kaul enggau ulah seks ti kamah, pengarap pelesu tauka ngemansangka semangat patrotik. Enti sesiti pengerami enda ngelanggar ajar Bup Kudus, kitai ulih mutuska kediri sekalika kitai ulih enggau pengerami nya tauka enda. Tang kitai patut berundingka asai ati orang bukai.

23, 24. Baka ni kitai ulih nerangka kebuah enda ngintu sekeda pengerami ngagai kaban belayan ke ukai Saksi-Saksi Jehovah?

²³ Nuan engka nadai agi ngintu pengerami ti enda ngerinduka ati Jehovah. Ketegal nya, sekeda ari kaban belayan nuan ke ukai Saksi-Saksi Jehovah engka ngumbai nuan enda agi rinduka sida. Sida  ngasaika pengerami nya maya kita sebilik ulih begelumu. Nama ulih digaga nuan? Padahka nuan agi sayauka sida. (Jaku Dalam 11:25; Pengajar 3:12, 13) Nuan mega ulih mai sida makai begulai ba maya bukai.

²⁴ Nama ulih digaga nuan enti kaban belayan nanya kebuah nuan enda ngintu sekeda pengerami? Nuan ulih mansik penerang ba litaricha kitai sereta ba jw.org kena nulung nuan nerangka ngagai sida. Padahka nuan udah berunding enggau manah sebedau ngaga pemutus nya. Kingatka, kitai ukai deka ngubah runding sida tauka nunjukka sida salah. Nya alai, bejaku meh enggau nelap sereta tentuka jaku kitai “seruran badas sereta ngenyamaika ati orang.”—Kolosi 4:6.

25, 26. Baka ni apai indai nulung anak sida rinduka pesan Jehovah?

²⁵ Tiap iku kitai patut nemu kebuah kitai ngaga pemutus enda enggau ba sesiti pengerami. (Hebrew 5:14) Tuju kitai laban deka ngelantangka ati Jehovah. Apai indai, kena meh awak ngajar anak nuan mereti sereta rinduka ajar Bup Kudus. Enti sida rinduka Jehovah, sida tentu deka ngaga pemutus ti ngerinduka ati Iya.—Isaiah 48:17, 18; 1 Peter 3:15, 16.

²⁶ Jehovah gaga ati meda kitai enggau naka ulih nyembah Iya enggau chara ti tuchi. (John 4:23) Tang mayuh orang ngumbai tusah deka ngereja utai enggau lurus kemayaharitu. Kati nya amat? Aram berandauka tu ba Pelajar 14.