1, 2. Nama patut ditemu kitai pasal Sitan enggau bala melikat iya?

 PENGIDUP ba dunya baru deka ngerinduka ati. Tang ke diatu, kitai idup ba dunya ke dibaruh kuasa Sitan enggau bala melikat iya. (2 Korint 4:4) Taja pan kitai enda ulih meda sida, tang sida endang bisi lalu bekuasa.

² Ba pelajar tu, kitai deka belajar chara mengkang semak enggau Jehovah sereta ngelindung diri ari Sitan. Jehovah besemaya Iya deka nulung kitai. Tang kitai patut nemu chara ti dikena Sitan enggau melikat iya nipu sereta nyerang kitai.

3. Nama keran digaga Sitan?

³ Sitan madahka mensia nyembah Jehovah ketegal deka bulih utai. Enti kitai napi penanggul, kitai badu nyembah Jehovah. (Bacha Jop 2:4, 5.) Lebuh seseiku orang deka belajar pasal Jehovah, Sitan enggau bala melikat iya deka nagang iya. Sida ringat lebuh orang nyerahka diri ngagai Jehovah lalu dibaptisa. Bup Kudus nyemaka Sitan “baka singa ti negung, begigaka orang ke deka diempa  iya.” (1 Peter 5:8) Sitan keran deka ngerusakka kaul kitai enggau Jehovah.—Masmur 7:1, 2; 2 Timoti 3:12.

4, 5. (a) Nama enda ulih digaga Sitan? (b) Baka ni kitai ulih ngelaban Sitan?

⁴ Tang kitai enda patut takutka Sitan enggau bala melikat iya. Jehovah bekuasa agi ari sida. Jehovah udah besemaya “mayuh amat” orang Kristian ti  bendar deka selamat “pansut ari penusah ti besai.” (Pemandang 7:9, 14) Sitan enda ulih nagang tu ari nyadi laban Jehovah nyaga nembiak Iya.

⁵ Enti kitai mengkang semak enggau Jehovah, Sitan enda ulih ngerusak kaul kitai enggau Jehovah. Bup Kudus madahka: ‘Jehovah bisi enggau kita, seagi-agi kita meruan enggau Iya.’ (2 Bansa Israel 15:2; bacha 1 Korint 10:13.) Mayuh nembiak Jehovah ke tetap ati baka Abel, Enok, Noah, Sarah enggau Moses ulih ngelaban Sitan laban sida mengkang semak enggau Jehovah. (Hebrew 11:4-40) Kitai mega ulih ngereja utai ti sama. Bup Kudus besemaya: “Laban meh Sitan, lalu iya deka rari ari kita.”—James 4:7.

6. Baka ni Sitan nyerang kitai?

⁶ Taja pan Sitan nemu Jehovah deka nyaga kitai, tang iya enggau naka ulih ngerusak kaul kitai enggau Jehovah. Kemayaharitu, Sitan nyerang kitai ngena mayuh chara, ke udah dikena iya beribu taun. Nama sekeda chara tu?

7. Nama kebuah Sitan nyerang nembiak Petara?

⁷ Rasul John nulis: “Semua dunya di baruh kuasa Sitan.” (1 John 5:19) Sitan bisi kuasa atas dunya tu lalu iya mega deka nguasa nembiak Jehovah. (Mikah 4:1; John 15:19; Pemandang 12:12, 17) Iya nemu timpuh merintah iya deka abis. Nya alai, iya balat nekan kitai ngambika enda tetap ati ngagai Jehovah. Sitan nyerang kitai ngena dua iti chara,  iya nya serang ti terang dipeda enggau serang ke enda terang dipeda.

8. Nama patut ditemu tiap iku orang Kristian?

⁸ Bup Kudus madahka: “Kitai bibat . . . ngelaban kuasa roh ti jai di serega.” (Epesus 6:12, NWT) Tiap iku orang Kristian ke udah nyerahka diri ngagai Jehovah patut ngelaban Sitan enggau bala melikat iya. Lebuh nulis surat ngagai orang Kristian ba Epesus, rasul Paul meransang sida “bediri tegap” ngelaban kuasa roh ti jai.—Epesus 6:11, 13, 14.

9. Nama deka digaga Sitan enggau bala melikat iya ngagai kitai?

⁹ Sitan enggau bala melikat iya nguji nipu kitai ngena bemacham chara. Kitai engka mujur nyeliahka diri ari ditipu Sitan ba sekeda pekara. Tang nya ukai reti iya Sitan enda ulih manjuk kitai ngena chara bukai. Iya nguji ngiga pengelemi kitai lalu manjuk kitai ngena panjuk ti engkeman. Tang kitai ulih nyeliahka diri ari dipanjuk, laban Bup Kudus nulung kitai ngelala panjuk ke dikena iya. (2 Korint 2:11; peda Nota Penutup 31.) Siti ari panjuk nya pengawa bemanang.

10. (a) Nama reti pengawa bemanang? (b) Nama runding Jehovah pasal pengawa bemanang?

¹⁰ Pengawa bemanang ngasuh orang bisi kaul enggau roh ti jai. Pengawa bemanang nyengkaum betilitka nasit, bedukun, bekenaka pengaruh tauka bejaku enggau orang ke udah mati. Bup Kudus madahka pengawa bemanang nya “utai ti  jai.” Kitai enda ulih ngereja pengawa tu lalu ba maya ti sama nyembah Jehovah. (Ulang Adat 18:10-12; Pemandang 21:8) Orang Kristian enda tau enda nyeliahka semua bengkah pengawa bemanang.—Rome 12:9.

11. Nama kebuah Sitan deka kitai bisi minat pasal bala antu?

¹¹ Sitan nemu pengawa bemanang ulih ngerusakka kaul kitai enggau Jehovah. Nya alai, enti kitai bisi minat pasal bala antu tauka kuasa ti bekaul enggau antu, Sitan senang agi manjuk kitai.

12. Sitan deka kitai bisi runding ti baka ni?

¹² Sitan deka kitai charut runding. Iya ngasuh orang kakang ati nyentukka sida ngumbai “utai ti jai manah, lalu utai ti manah jai.” (Isaiah 5:20) Sitan deka kitai berunding, jaku lalau Bup Kudus enda ulih dikena, lalu kitai deka lantang agi enti enda nitihka standard Petara.

13. Baka ni Sitan ngasuh orang kakang ati?

¹³ Siti chara ti mujur dikena Sitan ari kelia, iya nya ngasuh orang kakang ati. Maya ba kebun Eden, iya nanya Awa: ‘Kati amat Petara enda nyagi seduai makai buah ari semua kayu ti dalam kebun tu?’ (Pemungkal 3:1) Maya jeman Jop, Sitan nanya Jehovah ba mua bala melikat: “Kati Jop deka nyembah Nuan enti iya nadai bulih utai ari nya?” (Jop 1:9) Pengudah Jesus dibaptisa, Sitan ngasuh Jesus: ‘Enti nuan amat Anak Petara, asuh batu tu nyadi roti.’—Matthew 4:3.

14. Baka ni Sitan ngasuh orang kakang ati pasal pengawa bemanang?

 ¹⁴ Kemayaharitu, Sitan terus ngasuh orang kakang ati. Iya deka orang berunding sekalika pengawa bemanang nya jai tauka enda. Iya ngaga pengawa bemanang baka ke enda salah nyentukka sekeda orang Kristian mega ditipu. (2 Korint 11:3) Nya alai, baka ni kitai ulih nyeliahka diri ari ditipu Sitan? Baka ni kitai ulih nyaga diri empu? Aram mansik dua pekara, iya nya pemerindang enggau chara berubat.

15. Baka ni pemerindang ke dipilih ulih ngujungka kitai bisi kaul enggau roh ti jai?

¹⁵ Kemayaharitu, mayuh pemerindang mandangka pengawa bemanang, antu, majik enggau kuasa ti bekaul enggau antu. Bisi mega rindu meda horoskop, macha garis tapa jari, daun terup enggau atau babi. Mayuh orang ngumbai utai tu ngerinduka ati lalu enda nganu. Tang kebendar iya, tu tau ngujungka sida bisi kaul enggau roh ti jai. Seseiku orang engka ngumbai meda utai ke bisi kaul enggau pengawa bemanang enda salah enti iya enda ngereja nya. Tang nama kebuah runding tu ulih ngemediska?—1 Korint 10:12.

16. Nama kebuah kitai patut nyeliahka diri ari pemerindang ti mandangka pengawa bemanang?

¹⁶ Sitan enggau bala melikat iya enda nemu utai ba runding kitai. Tang sida ulih nemu pengingin  enggau runding kitai ari beratika ulah kitai. Enti kitai milih cherita, lagu tauka bup ti mandangka pengawa bemanang, bekenaka pengaruh, antu, dukun tauka utai bukai, Sitan enggau bala melikat iya deka nemu kitai bisi minat enggau sida. Udah nya, sida deka ngiga chara ngambika kitai ngereja pengawa bemanang.—Bacha Galatia 6:7.

17. Baka ni Sitan ngambi ulih ari pengingin kitai ke deka gerai?

¹⁷ Sitan mega ngambi ulih ari pengingin kitai ke deka gerai. Kemayaharitu, mayuh orang enda bepengerai. Sida engka nguji mayuh chara berubat  tang enda mujur. (Mark 5:25, 26) Asil iya, sida sanggup nguji sebarang chara berubat. Tang orang Kristian patut bejimat. Kitai enggai milih chara berubat ti bekenaka “manang.”—Adat Lewi 19:31.

18. Nama chara berubat ti patut diseliahka orang Kristian?

¹⁸ Ba Israel menya, bisi orang ngena “manang.” Jehovah madah ngagai sida: “Lebuh kita ngangkatka jari kita besampi, Aku enggai malik ngagai kita. Taja pen kita bebendar besampi, tang enggai meh Aku mending.” (Isaiah 1:15) Au, Jehovah enggai mendingka sampi sida! Kitai enggai nejuka sebarang utai ngerusak kaul kitai enggau Jehovah nyentukka Iya enggai nulung kitai, kelebih agi maya kitai sakit. (Masmur 41:3) Nya alai, sebedau kitai mutuska chara berubat ke dikena, tentuka chara nya enda bekaul enggau pengawa bemanang. (Matthew 6:13) Enti sema bisi, kitai enda tau enda nyeliahka chara berubat nya!—Peda Nota Penutup 32.

19. Nama ngasuh orang takutka Sitan?

¹⁹ Sekeda orang enda pechaya Sitan enggau bala melikat iya amat bisi. Taja pia, mayuh orang takutka roh ti jai laban sida kala dikachau. Tu ngasuh sida bebendar nitihka adat ti bula. Sekeda orang becherita pasal utai ke digaga roh ti jai ngagai mensia. Mayuh orang rindu ninga cherita tu lalu gagit ati deka bekunsi nya enggau orang bukai. Ketegal nya, mayuh orang takutka Sitan.

20. Baka ni kitai engka nulung Sitan ngerembaika pemula?

 ²⁰ Sitan deka orang takutka iya. (2 Tesalonika 2:9, 10) Iya seiku pemula ti landik nesatka runding orang ke bisi minat enggau roh ti jai. Iya ngasuh orang pechaya utai ti dipeda sereta didinga sida nya amat, lalu sida berengkah becherita pasal nya. Suah agi sida nandu cherita nya, balat agi cherita nya ditambah. Nya alai, kitai enggai nampung cherita nya laban kitai enggai nulung Sitan ngerembaika pemula.—John 8:44; 2 Timoti 2:16.

21. Ari ke becherita pasal bala antu, kitai ulih berandau pasal nama?

²¹ Enti kitai kala meda antu, kitai enggai merindang orang ngena cherita nya. Nembiak Jehovah enda patut takut enggau utai ti ulih digaga Sitan sereta bala melikat iya. Tang kitai patut beratika Jesus laban Jehovah udah meri iya kuasa. (Hebrew 12:2) Jesus enda merindang bala murid iya ngena cherita pasal bala antu. Tang iya madahka pesan Perintah Petara sereta ‘pemesai pengawa Petara.’—Kereja Rasul 2:11; Luke 8:1; Rome 1:11, 12.

22. Nama keran digaga nuan?

²² Kingatka, Sitan deka ngerusak kaul kitai enggau Jehovah. Iya bebendar ngereja nya. Tang kitai nemu chara ke dikena Sitan lalu keran nulak semua bengkah pengawa bemanang. Kitai enggai “meri peluang ngagai Sitan” ngelemika pengeran kitai. (Bacha Epesus 4:27.) Nya alai, laban meh Sitan! Enti ngereja nya, kitai ulih nyeliahka panjuk iya lalu likun dibaruh jaga Jehovah.—Epesus 6:11.