1, 2. Baka ni asai ati Jehovah lebuh kitai lurus?

 SEIKU nembiak lelaki tetemuka dumpit ti penuh enggau duit. Nama deka digaga iya? Iya ulih ngambi dumpit nya. Tang iya mulaika dumpit nya ngagai orang ke bempu dumpit. Lebuh indai iya nemu pasal tu, iya amat temegah ati enggau anak iya.

² Mayuh apai indai gaga ati enti anak sida lurus. Apai kitai Jehovah, “enda kala bula,” lalu Iya mega gaga ati lebuh kitai lurus. (Titus 1:2) Kitai deka Iya gaga ati. Nya alai, kitai “nyebut utai ti bendar ngagai pangan diri.” (Epesus 4:25) Aram kitai meda empat iti chara kitai nunjukka pengelurus lalu penguntung ke diulih enti kitai lurus.

3-5. (a) Baka ni kitai ulih nipu diri empu? (b) Nama ulih nulung kitai meresa diri enggau lurus?

³ Kitai patut meresa diri, ngaku pengelemi diri, sereta sedia ngaga ubah. Tang tu enda senang. Ba abad keterubah, bala menyadi ba eklisia Laudisia ngumbai sida ngelantangka ati Petara. Tang  kebendar iya, enda. (Pemandang 3:17) Kitai mega engka nipu diri baka sida.

⁴ James madahka: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.” (James 1:26) Kitai nipu diri enti kitai ngumbai: ‘Jehovah enda ringat enti aku bejaku bula tauka kasar, asal aku ngereja utai ti manah.’ Nama ulih nulung kitai nyeliahka runding ti salah tu?

⁵ Lebuh kitai meda cheremin, kitai ulih meda gamal diri. Pia mega, lebuh kitai macha Bup Kudus, kitai ulih meda sapa kitai ti bendar. Bup Kudus nulung kitai nemu pemanah sereta pengelemi diri empu. Kitai nemu ubah ke patut digaga ba runding, ulah enggau jaku. (Bacha James 1:23-25.) Tang enti kitai ngumbai diri nadai pengelemi, kitai tusah deka ngaga ubah. Nya alai, kitai begunaka Bup Kudus ngambika ulih meresa diri enggau lurus. (Sabak Kenang 3:40; Hagai 1:5) Kitai mega ulih besampi ngagai Jehovah ngambika Iya ulih meresa lalu nulung kitai meda pengelemi diri. (Masmur 139:23, 24) Kingatka, Jehovah “begedika orang ke ngereja penyai [tauka “pura-pura,” NWT], tang Iya ngaga orang ke lurus nyadika pangan Iya.”—Jaku Dalam 3:32.

6. Nama kebuah laki bini patut lurus enggau pangan diri?

⁶ Diri sebilik patut lurus enggau pangan diri. Lebuh laki bini sama bela lurus, seduai iya berasai  likun lalu ulih pechayaka pangan diri. Seduai patut nyeliahka diri ari ulah ti enda lurus baka nguntik orang bukai, meda pornografi tauka bisi ambai lalai. Peratika utai dipadah pemasmur: “Aku enda begulai enggau orang ke bula, lalu aku enggai begulai enggau orang ke pura-pura ngapa.” (Masmur 26:4) Enti seiku ari sida bisi runding ti kamah pasal orang bukai, tu mega enda lurus, lalu ulih ngachau kaul seduai iya.

7, 8. Baka ni nuan ulih ngena Bup Kudus ngajar bala anak pasal ulah ti lurus?

 ⁷ Bala anak mega patut nemu ulah ti lurus nya beguna. Apai indai ulih ngena teladan ari Bup Kudus ngajar sida pasal tu. Ambika chunto, orang ke enda lurus baka Achan ke ngenchuri; Gehasi ke bebula ketegal deka bulih duit; sereta Judas ke ngenchuri duit lalu nyual Jesus ke 30 singkap duit pirak.—Josua 6:17-19; 7:11-25; 2 Raja 5:14-16, 20-27; Matthew 26:14, 15; John 12:6.

⁸ Bup Kudus mega madahka sekeda orang ti lurus baka Jakob ke ngasuh anak lelaki iya mulaika duit ti ditemu sida; Jeptah enggau anak indu iya ti ngamatka semaya ngagai Petara; sereta Jesus ke lurus taja pan napi penanggul. (Pemungkal 43:12; Pengulu 11:30-40; John 18:3-11) Teladan sida ulih nulung bala anak nemu ulah ti lurus nya amat beguna.

9. Baka ni teladan apai indai ti lurus ulih nulung anak sida?

⁹ Apai indai patut ingat jaku lalau Bup Kudus tu: “Kita ngajar orang bukai, kati kita enda ngajar diri empu? Kita ngajar orang, enda nyagi orang ngenchuri, kati kita ngenchuri?” (Rome 2:21) Enti apai indai ngajar anak pasal ulah ti lurus, tang sida enda lurus, bala anak deka charut runding. Enti bala anak meda apai indai bebula, indah ba utai ti mit, sida deka ngereja utai ti sama. (Bacha Luke 16:10.) Tang, enti sida meda apai indai lurus ba semua pekara, sida engka nyadi apai indai ti lurus dudi hari.—Jaku Dalam 22:6; Epesus 6:4.

10. Baka ni kitai ulih lurus lebuh berandau enggau bala menyadi Kristian?

¹⁰ Kitai mega patut lurus enggau bala menyadi Kristian. Enti kitai enda bejimat, randau enggau pangan diri ulih ngujungka kitai bejakuka orang tauka betenah. Enti kitai nandu cherita ke enda ditemu amat tauka enda, kitai engka madahka utai ti bula. Nya alai, manah agi kitai “enda bemunyi.” (Jaku Dalam 17:27) Kitai patut lurus, tang tu ukai reti iya kitai ulih nyebut semua utai ti ditemu, didinga tauka dirunding kitai. Taja pan cherita nya utai ti amat, kitai enda nandu iya laban cherita nya nadai kaul enggau kitai. Kitai enggai becherita pasal utai ti enda meransang bala menyadi. (1 Tesalonika 4:11) Sekeda orang engka ngiga tegal lalu madahka: “Aku semina nyebut utai ti amat.” Tang kingatka, laban kitai nembiak Jehovah, jaku kitai patut badas sereta ngenyamaika ati.—Bacha Kolosi 4:6.

11, 12. (a) Nama kebuah orang ke ngereja penyalah ti besai patut madah utai ti bendar ngagai bala tuai gempuru? (b) Enti kitai nemu bakih kitai udah ngereja penyalah ti besai, nama runding ti patut diseliahka? Nama kebuah? (c) Baka ni kitai enda bebula ngagai gerempung Jehovah?

¹¹ Jehovah meri bala tuai gempuru tanggung pengawa nyaga eklisia. Sida senang agi nulung kitai enti kitai madah utai ti bendar ngagai sida. Nama kebuah? Enti nuan sakit lalu betemu enggau lutur, kati nuan deka ngelalaika sekeda utai pasal penyakit nuan? Enti nuan ngereja nya, kati lutur ulih nulung nuan? Pia mega, enti kitai udah ngereja penyalah ti  besai, kitai enggai ngelalaika nya. Kitai madah ngagai bala tuai gempuru pasal penyalah kitai. (Masmur 12:2; Kereja Rasul 5:1-11) Tang kati enti nuan nemu seiku ari bakih nuan udah ngereja penyalah ti besai? (Adat Lewi 5:1) Kati nuan deka nulung iya ngelalaika nya? Tauka nuan deka ingat tuai gempuru ulih nulung bakih nuan ngemanahka kaul iya enggau Jehovah?—Hebrew 13:17; James 5:14, 15.

¹² Kitai mega enggai bebula ngagai gerempung Jehovah lebuh meri riput pengawa nginjil, ngisi pom nyadi pengerintis tauka pengawa bukai.—Bacha Jaku Dalam 6:16-19.

13. Baka ni kitai ulih lurus lebuh bedagang enggau menyadi Kristian?

¹³ Orang Kristian patut nentuka pengawa bedagang enggau sembah enda disegulaika. Ambika chunto, kitai enda bedagang lebuh ba palan gempuru tauka ba pengawa nginjil. Kitai mega enda ngambi ulih ba bala menyadi Kristian lebuh bedagang. Enti nuan ngaji bala menyadi Kristian, nuan patut mayar gaji nitihka haribulan enggau penyampau ti udah disemayaka. Nuan mega patut nyediaka utai ti patut diterima pekereja nitihka undang-undang menua, baka insuran pengerai sereta chuti begaji. (1 Timoti 5:18; James 5:1-4) Lalu enti nuan gawa enggau menyadi Kristian, nuan enda ngarapka diri bulih utai manah agi ari orang bukai. (Epesus 6:5-8) Gawa meh nitihka jam ti ditetapka sereta nembuka pengawa ti diberi.—2 Tesalonika 3:10.

14. Nama patut digaga menyadi Kristian sebedau sida sama-sama bejalaika pengawa dagang?

 ¹⁴ Baka ni enti kitai deka bejalaika pengawa dagang enggau menyadi Kristian, baka ngelabur tauka nginjau duit? Titih meh jaku lalau Bup Kudus, iya nya ngaga surat. Lebuh nabi Jeremiah meli tanah, iya ngaga dua salin surat tanah. Siti salin disain bala saksi, lalu Jeremiah nyimpan kedua salin nya ke dudi hari. (Jeremiah 32:9-12; peda mega Pemungkal 23:16-20.) Sekeda orang ngasaika enti sida ngaga surat, tu nunjukka sida enda pechayaka menyadi Kristian. Tang, ngaga surat ulih nyeliahka penanggul baka saru penemu, asa ati sereta kelikuh. Kingatka, pemaik ba eklisia beguna agi ari pengawa dagang.—1 Korint 6:1-8; peda Nota Penutup 30.

15. Baka ni asai ati Jehovah pasal pengawa dagang ti enda lurus?

¹⁵ Jehovah deka kitai lurus enggau semua orang, nyengkaum orang ke ukai Saksi-Saksi Jehovah. Bup Kudus madahka: ‘Jehovah begedika orang ke ngena dachin ti enda betul, tang Iya lantang ati ke timbang ti betul.’ (Jaku Dalam 11:1; 20:10, 23) Ba jeman Bup Kudus, orang ngena dachin lebuh bedagang. Tang bisi pedagang ke nipu orang laban ngena dachin ti enda betul. Ketegal nya, orang patut mayar lebih ari utai ti ditimbang. Kemayaharitu, pengawa enda lurus maya bedagang suah nyadi. Jehovah begedika ulah tu!

16, 17. Nama sekeda ulah ti enda lurus ke patut diseliahka kitai?

 ¹⁶ Kitai deka lurus maya peresa ba sekula, minta kereja, ngisi pom perintah sereta ba maya bukai. Mayuh orang ngumbai enda salah enti nipu tauka meri penerang ti enda betul. Kitai enda tekenyit enggau ulah tu. Bup Kudus madahka ba hari ti penudi, “orang deka semina berundingka diri empu aja, angkunka duit, . . . begedika utai ti badas.”—2 Timoti 3:1-5.

¹⁷ Kekadang, orang ke enda lurus ba dunya tu, baka mujur. (Masmur 73:1-8) Lalu ketegal lurus, orang Kristian ulih lenyau kereja, napi penanggul ba penatai pemisi tauka orang jai enggau iya ba endur kereja. Tang, ulah ti lurus ulih mai penguntung.

18. Nama kebuah dikumbai lurus amat berega?

¹⁸ Semua kitai bisi peluang dikumbai orang ti lurus, ti ulih dipechaya sereta dikearapka. Ulah tu majak kurang kemayaharitu. (Mikah 7:2) Endang amat, ketegal nuan lurus, sekeda orang engka ngeleseka nuan lalu ngumbai nuan beli. Tang orang bukai deka bebasaka lalu pechayaka nuan. Mayuh orang nemu Saksi-Saksi Jehovah orang ti lurus. Bala tuke rindu ngaji bala Saksi laban nemu sida ngereja pengawa enggau lurus. Indah lebuh orang bukai dibuai ari kereja laban enda lurus, Saksi-Saksi Jehovah agi ulih terus gawa.

19. Baka ni kaul kitai enggau Jehovah enti kitai lurus?

 ¹⁹ Enti kitai lurus ba semua pekara, tu deka meri kitai ati ti beresi sereta pengelantang ba runding. Kitai ulih baka Paul, ke nulis: “Kami nemu ati diri beresi.” (Hebrew 13:18) Tang keberat agi, Jehovah meda sereta beterima kasih lebuh kitai bebendar ngereja semua utai enggau lurus.—Bacha Masmur 15:1, 2; Jaku Dalam 22:1.