PELAJAR 17
Meruan Dalam Pengerindu Petara
‘Negapka pengarap kita ti pemadu kudus . . . Meruan dalam pengerindu Petara.’—JUDE 20, 21.
1, 2. Baka ni kitai ulih meruan dalam pengerindu Petara?
SEMUA kitai deka gerai. Nya alai, kitai makai pemakai ti manah ke pengerai, suah besukan sereta nyaga pengerai tubuh. Taja pan enda senang, tang asil iya mai penguntung ngagai kitai. Pia mega, kitai patut bebendar nyaga pengerai ba pengarap kitai.
2 Pengudah kitai ngelala Jehovah, kitai patut terus ngeringka kaul kitai enggau Iya. Jude meransang orang Kristian, “Meruan dalam pengerindu Petara.” Iya madahka chara ngereja nya: “Negapka pengarap kita ti pemadu kudus.” (Jude 20, 21) Nyadi, baka ni kitai ulih negapka pengarap kitai?
TERUS NEGAPKA PENGARAP NUAN
3-5. (a) Sitan deka nuan bisi runding ti baka ni pasal standard Jehovah? (b) Nama runding nuan pasal pesan enggau jaku ari Jehovah?
3 Tiap iku kitai patut pechaya chara Jehovah nya pemadu manah. Nama kebuah? Laban Sitan deka kitai berunding standard Jehovah kelalu tusah dititihka, lalu kitai deka lantang agi enti enda nitihka iring Petara. Kenyau ari kebun Eden nyentukka diatu, Sitan terus nipu orang ngena runding tu.—Pemungkal 3:1-6.
4 Kati Sitan betul? Kati standard Jehovah kelalu terit? Enda. Ambika chunto, sema nuan bejalai ba siti taman lalu nuan meda pagar ti tinggi. Engka nuan nanya, ‘Nama kebuah pagar tu ditu?’ Tang enda lama udah nya nuan ninga nyawa singa ba luar pagar nya. Baka ni asai ati nuan? Nuan tentu beterima kasih laban pagar nya ngelindung nuan ari diempa singa! Standard Jehovah baka pagar nya, lalu Sitan baka singa. Bup Kudus meri kitai jaku tangkan: “Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.”—1 Peter 5:8.
5 Jehovah deka kitai ngembuan pengidup ti pemadu manah. Nya alai, Iya meri kitai pesan sereta jaku lalau ke ulih ngelindung kitai ari tipu Sitan. (Epesus 6:11) James nulis: “Orang ke merening ngagai adat ti pemadu badas, adat pengelepas, lalu majak ngasika adat nya . . . deka [‘gaga ati,’ NWT] dalam semua utai ti dikereja iya.”—James 1:25.
6. Nama nulung kitai pechaya chara Jehovah nya pemadu manah?
6 Lebuh kitai nitihka iring ari Jehovah, pengidup kitai manah agi sereta kaul kitai enggau Iya majak tegap. Ambika chunto, Jehovah ngasuh kitai besampi ngagai Iya, datai gempuru, meransang pangan diri sereta nginjil. (Matthew 6:5-8; 28:19, 20; Galatia 6:2; 1 Tesalonika 5:17; Hebrew 10:24, 25) Enti kitai ngereja semua tu, pengarap kitai deka majak tegap. Lebuh kitai belematika penguntung ke diulih, kitai deka andal agi chara Jehovah nya pemadu manah.
7, 8. Nama ulih nulung kitai enda kelalu irau pasal penguji ke deka datai?
7 Enti nuan irau enda ulih natka penguji ke deka datai, ingat meh jaku Jehovah: “Aku tu Jehovah, Petara kita, ti deka ngajar kita utai ke penguntung kita lalu nunjukka jalai ti patut ditengah kita. Enti sema kita udah mendingka jaku Aku, nya baru pemaik deka rarat ngagai kita baka sungai ti enda nemu langkang. Lalu, pengawa kita ti lurus deka baka gelumbang ti ngalun ngagai tebing.”—Isaiah 48:17, 18, NWT.
8 Lebuh kitai ngasika Jehovah, pemaik kitai deka baka sungai ke enda nemu langkang. Pengawa kitai ti lurus deka nyadi baka gelumbang ti enda ngetu ngalun ngagai tebing. Enda ngira nama nyadi, kitai ulih tetap ati ngagai Jehovah. Bup Kudus meri jamin tu: ‘Serahka penusah nuan ngagai Jehovah, lalu Iya deka nyaga nuan. Iya nadai kala nejuka orang ke lurus alah.’—Masmur 55:22.
TERUS TEGAP BA PENGARAP
9, 10. Nama reti tegap ba pengarap?
9 Lebuh nuan negapka kaul enggau Jehovah, nuan deka “mansang ngagai ajar ke orang ti besai tuai” tauka tegap ba pengarap. (Hebrew 6:1) Nama reti tegap ba pengarap?
10 Kena tegap ba pengarap, kitai patut nyadi pangan Jehovah sereta ngembuan runding Iya. (John 4:23) Paul nulis: ‘Orang ke idup nitihka peneka mensia berundingka utai ti dikinginka mensia, tang orang ke idup nitihka peneka roh kudus berundingka utai ti dikedekaka roh kudus.’ (Rome 8:5) Orang ke tegap ba pengarap enda ngemeratka pengelantang ba pengidup tauka pengaya. Tang iya enggau bebendar nyembah Jehovah sereta ngaga pemutus ti manah ba pengidup. (Jaku Dalam 27:11; bacha James 1:2, 3.) Iya enda alah dibai ngereja utai ti salah. Iya nemu utai ti betul lalu keran deka ngereja nya.
11, 12. (a) Nama dipadahka Paul pasal penau orang Kristian “ngelala bida entara utai ti badas enggau utai ti jai”? (b) Nama utai ti sama entara orang Kristian ti tegap ba pengarap enggau pemain sukan ke landik?
11 Kitai enggau naka ulih nyadi orang ke tegap ba pengarap. Rasul Paul nulis: “Asi kering nya ke orang ke besai tuai, ke udah matihka diri ngelala bida entara utai ti badas enggau utai ti jai.” (Hebrew 5:14) Leka jaku “matihka” ngasuh kitai berunding pasal latih ke diterima pemain sukan.
12 Pemain sukan begunaka mayuh awak sereta latih ngambika ulih nyadi landik. Lebuh iya anak mit ke baru ada, iya enda nemu chara ngena jari enggau kaki iya. Tang nyau iya mansang besai, iya belajar megai utai sereta bejalai. Enggau latih ti chukup, iya nyadi pemain sukan ke landik. Pia mega, kena nyadi orang Kristian ti tegap ba pengarap, kitai begunaka mayuh awak sereta latih.
13. Baka ni kitai ulih ngembuan runding Jehovah?
13 Ba bup tu, kitai udah belajar baka ni kitai ulih ngembuan runding Jehovah. Kitai mega beterima kasih sereta rinduka standard Jehovah. Lebuh kitai ngaga pemutus, kitai patut nanya diri empu: ‘Nama pesan tauka jaku lalau Bup Kudus ti bekaul enggau pekara tu? Baka ni aku ngena nya? Jehovah deka aku ngereja nama?’—Bacha Jaku Dalam 3:5, 6; James 1:5.
14. Nama patut digaga kitai kena negapka pengarap?
14 Kitai patut terus negapka pengarap kitai ngagai Jehovah. Baka pemakai ti manah nulung tubuh kitai kering, penemu pasal Jehovah mega ulih nulung kitai kering ba pengarap. Maya kitai berengkah belajarka Bup Kudus, kitai belajar pasal Jehovah enggau chara Iya berunding. Tang nyau kelama, kitai patut meretika utai ke dalam agi. Nya meh kebuah Paul madah: “Asi kering nya ke orang ke besai tuai.” Lebuh kitai ngena utai ti udah dipelajarka, kitai bulih penemu-dalam. Bup Kudus madahka: “Begigaka penemu-dalam nya utai ti pemadu beguna.”—Jaku Dalam 4:5-7; 1 Peter 2:2.
15. Nama kebuah pengerindu ngagai Jehovah sereta bala menyadi Kristian amat beguna?
15 Enti kitai deka mengkang gerai sereta kering, kitai patut terus nyaga pengerai diri empu. Pia mega, enti kitai deka nyadi orang Kristian ti tegap ba pengarap, kitai patut terus nyaga kaul kitai enggau Jehovah. Paul ngasuh kitai: “Peresa diri empu, kena nentuka kita amat idup ngena pengarap tauka enda. Uji diri empu.” (2 Korint 13:5) Kelimpah ari ngeringka pengarap, kitai patut terus ngeringka pengerindu kitai ngagai Jehovah sereta bala menyadi Kristian. Paul madah: “Enti aku . . . nemu semua penemu, lalu enti aku bisi pengarap kena nginsitka bukit, tang nadai pengerindu, aku nadai guna.”—1 Korint 13:1-3.
MERENING NGAGAI PENGADANG NUAN
16. Sitan deka kitai bisi runding ti baka ni?
16 Sitan deka kitai berunding, mensia enda ulih ngelantangka ati Jehovah. Iya deka kitai asa ati lalu ngumbai penusah kitai enda ulih diputarka. Iya mega enggai kitai arapka bala menyadi Kristian, lalu enggai kitai gaga ati. (Epesus 2:2) Sitan nemu runding ti enda manah ulih ngenusahka kitai sereta ngerusak kaul kitai enggau Jehovah. Tang Jehovah meri kitai siti utai kena ngelaban runding ti enda manah, iya nya pengadang.
17. Nama kebuah pengadang amat beguna?
17 Ba 1 Tesalonika 5:8, Bup Kudus nyemaka pengadang kitai baka selapuk kebal ke ngelindung pala seiku soldadu lebuh beperang. Selapuk nya dikumbai “pengadang kitai ke pengelepas.” Enti kitai merening ngagai pengadang ti disemaya Jehovah, kitai ulih nyaga runding kitai lalu ngelaban runding ti enda manah.
18, 19. Nama nulung Jesus tan napi penguji?
18 Ba malam sebedau iya dibunuh, Jesus dipetenah sereta ditinggalka bala pangan iya. Orang ke sebansa enggau iya mega ngelaban sereta ngasuh iya diukum mati. Nama nulung Jesus napi semua tu? Hebrew 12:2 madahka: ‘Iya enda malu natka diri [“dipantang ba tiang perinsa,” NWT] ketegal pengaga ti deka diasaika iya, lalu diatu iya duduk muak ari kanan kerusi diraja Petara.’
19 Jesus nemu enti iya mengkang tetap ati, iya ulih meri mulia ngagai Jehovah lalu nunjukka Sitan nya pemula. Pengadang tu meri iya pengelantang. Iya mega nemu diri deka begulai baru enggau Apai iya ba serega. Pengadang tu nulung iya terus betan. Baka Jesus, kitai patut merening ngagai pengadang kitai. Pengadang deka nulung kitai natka sebarang penguji.
20. Nama ulih nulung nuan bisi runding ti manah?
20 Jehovah nemu lebuh nuan nunjukka pengarap sereta tan napi penguji. (Isaiah 30:18; bacha Malaki 3:10.) Iya besemaya “deka meri nuan utai ti dikinginka nuan.” (Masmur 37:4) Nya alai, terus meh merening ngagai pengadang ti disemayaka Iya. Sitan deka nuan berasai asa ati sereta ngumbai Jehovah enda ngamatka semaya Iya. Tang nuan enda tau berunding baka nya! Enti nuan bisi runding ti enda manah, minta meh tulung ari Jehovah. Kingatka utai ti ditulis ba Pilipi 4:6, 7: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’
21, 22. (a) Nama tuju Jehovah ke dunya? (b) Nama juluk ati nuan?
21 Terus meh merening ngagai pengadang ti disemaya Jehovah. Pengidup ba dunya baru manah agi ari ke digambarka kitai! Ba dunya baru, semua orang deka nyembah Jehovah. (Pemandang 7:9, 14) Sitan, roh ti jai sereta semua penyai deka nadai agi. Nuan enda sakit sereta mati. Semua orang beserakup ngaduka dunya tu nyadi Paradais. Tiap iku orang deka bisi pemakai ti chukup sereta berasai likun. Nadai orang jai tauka kasar. Enggau belubah-lubah, semua mensia ba dunya deka nyadi sempurna lalu ‘bulih pengelepas ti bemulia ti endang enggi bala anak Petara.’—Rome 8:21.
22 Jehovah deka nuan milih Iya nyadi Pangan nuan ti pemadu manah. Nya alai, bebendar meh ngasika Iya sereta majak semak enggau Iya ninting hari. Arapka semua kitai ulih meruan dalam pengerindu Petara belama iya!—Jude 21.
^ Bacha ari Pelajar 17, genteran 7.