PELAJAR 6
Baka Ni Milih Pemerindang ti Manah?
‘Kereja semua utai nya ke mulia Petara.’—1 KORINT 10:31.
1, 2. Nama kebuah kitai patut milih pemerindang enggau bejimat?
GAMBARKA nuan deka makai sigi buah, tang nuan tetemuka sebagi ari buah nya udah jai. Nama deka digaga nuan? Kati nuan agi makai buah nya? Kati nuan muai buah nya? Tauka muai begian ke jai lalu makai begian ke manah?
2 Pemerindang ulih disema baka buah nya. Bisi pemerindang ti manah, lalu bisi pemerindang ti jai laban bisi mandangka ulah seks, ulah ti kasar, tauka utai ti bekaul enggau roh jai. Nya alai, lebuh nuan milih pemerindang, nama patut digaga nuan? Kati nuan madah: “Tu pilih aku empu. Aku ulih milih nitihka peneka ati”? Kati nuan ngumbai semua pemerindang nya jai? Tauka, nuan bejimat lebuh milih pemerindang, nyeliahka pemerindang ti jai lalu milih pemerindang ti manah?
3. Nama tanya ke patut diperundingka kitai lebuh milih pemerindang?
3 Kitai semua begunaka main sereta pemerindang. Nya alai, kitai deka milih enggau manah. Kitai ulih nanya diri empu, “Baka ni pemerindang ke dipilih aku ulih ngachau sembah aku ngagai Jehovah?”
‘KEREJA SEMUA UTAI NYA KE MULIA PETARA’
4. Nama jaku lalau Bup Kudus ke ulih nulung kitai lebuh milih pemerindang?
4 Lebuh kitai nyerahka diri ngagai Jehovah, kitai besemaya deka ngena pengidup kitai nyembah Iya. (Bacha Pengajar 5:4.) Kitai besemaya deka ‘ngereja semua utai nya ke mulia Petara.’ (1 Korint 10:31) Tu reti iya semua utai ti dikereja kitai, nyengkaum pemerindang ke dipilih, patut meri mulia ngagai Petara.
5. Nama patut digaga kitai ngambika sembah kitai diterima Jehovah?
5 Semua utai ti digaga ba pengidup bisi kaul enggau sembah kitai ngagai Jehovah. Nya alai, Paul madah: ‘Serahka tubuh kita nyadi [“pemeri,” NWT] ti idup, ti kudus, ti dikerinduka Petara.’ (Rome 12:1) Ku Jesus: ‘Kita enda tau enda rinduka Jehovah Petara kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’ (Mark 12:30) Kitai deka meri utai ti pemadu manah ngagai Jehovah. Ba jeman Israel, orang Israel patut meri jelu ti nadai penimpang ngagai Jehovah nyadika pemeri. Enti jelu nya bisi penimpang, pemeri nya enda diterima Petara. (Adat Lewi 22:18-20) Baka nya mega, sembah kitai ngagai Jehovah engka enda diterima Iya. Nama kebuah?
6, 7. Baka ni pemerindang ulih ngachau sembah kitai ngagai Jehovah?
6 Jehovah madahka: “Diau kudus, laban Aku kudus.” (1 Peter 1:14-16; 2 Peter 3:11) Jehovah semina nerima sembah ti kudus, tauka tuchi. (Ulang Adat 15:21) Sembah kitai enda tuchi enti kitai ngereja ulah seks ti kamah, ulah ti kasar, sereta utai ti bekaul enggau roh ti jai. (Rome 6:12-14; 8:13) Pia mega, Jehovah pedis ati enti kitai rinduka pemerindang ti baka nya. Tu ulih ngasuh sembah kitai enda tuchi lalu enda diterima Jehovah. Kaul kitai enggau Jehovah pan ulih rusak.
7 Nya alai, baka ni kitai ulih milih pemerindang enggau manah? Nama jaku lalau Bup Kudus ti ulih nulung kitai ngelala pemerindang ti manah tauka jai?
BEGEDIKA PENYAI
8, 9. Nama pemerindang ti patut diseliahka orang Kristian? Nama kebuah?
8 Bisi mayuh macham pemerindang kemayaharitu. Bisi pemerindang ti manah ke orang Kristian, tang ke suah agi mayuh pemerindang ti enda manah. Diatu kitai deka berandauka pemerindang ti patut diseliahka orang Kristian.
9 Mayuh cherita, laman web, program TV, video game sereta lagu, mandangka utai ti bekaul enggau roh ti jai, ulah ti kasar sereta ulah seks. Ke suah agi, dunya pemerindang mandangka utai ti jai baka utai ti manah sereta ngasuh ketawa. Nya alai, orang Kristian patut bejimat sereta nyeliahka pemerindang ti dipegedika Petara. (Kereja Rasul 15:28, 29; 1 Korint 6:9, 10) Enggau nyeliahka pemerindang ti enda manah, kitai nunjuk ngagai Jehovah kitai endang begedika utai ti jai.—Masmur 34:14; Rome 12:9.
10. Nama deka nyadi enti kitai suah meda pemerindang ti enda manah?
10 Mayuh orang berunding, “Aku semina meda pemerindang ti enda manah, tang aku enda ngereja nya.” Runding baka tu enda betul, laban Bup Kudus madahka kitai: “Nadai utai ti nemu agi ngakal ari ati mensia. Iya kelalu balat sakit lalu enda ulih digeraika.” (Jeremiah 17:9) Enti kitai meda pemerindang ti dipegedika Petara, kati kitai endang begedika utai ti jai? Kebendar iya, enti kitai suah meda pemerindang ti jai, kitai majak ngumbai utai nya enda salah. Belubah-lubah, penemu ati kitai deka nyadi lemi lalu enda ulih nangkan kitai agi.—Masmur 119:70; 1 Timoti 4:1, 2.
11. Baka ni Galatia 6:7 ulih nulung kitai milih pemerindang?
11 Bup Kudus madah: “Kita deka ngetau utai ti ditanam kita empu.” (Galatia 6:7) Enti kitai suah meda pemerindang ti enda manah, nyau kelama kitai ngereja utai ti salah. Ambika chunto, sekeda orang Kristian ngereja ulah ti kamah laban suah meda pemerindang ti kamah. Tang Jehovah ulih nulung kitai milih pemerindang enggau manah.
NGAGA PEMUTUS NITIHKA JAKU LALAU BUP KUDUS
12. Nama ulih nulung kitai ngaga pemutus ti manah pasal pemerindang?
12 Kitai endang patut nyeliahka pemerindang ti dipegedika Jehovah. Tang baka ni enti kitai enda entu nemu sekalika pemerindang nya manah tauka enda? Jehovah enda meri penerang ti silik pasal utai ti ulih dipeda, didinga tauka dibacha. Taja pia, Iya deka kitai ngaga pemutus nitihka penemu ati ke dilatih ngena Bup Kudus. (Bacha Galatia 6:5.) Jehovah meri kitai jaku lalau Bup Kudus ti ngajar kitai pasal runding Iya sereta matih penemu ati kitai. Jaku lalau tu ulih nulung kitai nemu peneka Jehovah, ngambika kitai ulih ngaga pemutus ti manah.—Epesus 5:17.
Jaku lalau Bup Kudus nulung kitai milih pemerindang
13. Nama kebuah kitai ngaga pemutus ti enda sebaka pasal pemerindang? Tang nama patut digaga tiap iku orang Kristian?
13 Kitai ngaga pemutus ti enda sama pasal pemerindang laban minat kitai enda sama. Taja pia, pemerindang ke ulih diterima seseiku orang engka ngasuh orang bukai enda nyamai ati. Nya alai, kena ngaga pemutus ti manah, semua orang Kristian patut nitihka jaku lalau Bup Kudus. (Pilipi 1:9) Jaku lalau tu ulih nulung kitai milih pemerindang ti diterima Petara.—Masmur 119:11, 129; 1 Peter 2:16.
14. (a) Nama kebuah kitai patut berundingka penyampau jam ke dikena kitai ba pemerindang? (b) Nama jaku lalau Paul ngagai orang Kristian?
14 Kitai mega patut berundingka awak ti dikena kitai ba pemerindang. Laban kitai orang Kristian, kitai patut ngenuluka pengawa ke Jehovah. (Bacha Matthew 6:33.) Tang, enti kitai enda bejimat, kitai engka ngena kelalu mayuh awak ba pemerindang. Paul meri jaku lalau ngagai orang Kristian: “Idup enggau bejimat, ukai baka orang ke beli, tang baka orang ke bepenemu-dalam. Kena semua [‘awak,’ NWT] kita enggau badas.” (Epesus 5:15, 16) Nya alai, kitai patut netapka awak kena pemerindang lalu seruran nentuka diri ngemeratka sembah ngagai Jehovah.—Pilipi 1:10.
15. Nama patut digaga kitai enti sesiti pemerindang ulih ngerusak kaul kitai enggau Jehovah?
15 Endang terang, kitai patut nulak pemerindang ti enda diterima Jehovah. Tang baka ni enti nuan agi kakang ati enggau sekeda pemerindang? Perundingka, sema nuan niki bukit, kati nuan bejalai kelalu semak enggau tisi bukit nya? Tentu enda. Enti nuan sayauka nyawa, nuan deka ngenyauhka diri ari utai ti tau nganu. Baka nya mega lebuh kitai milih pemerindang. Bup Kudus madahka: “Seliahka penyai.” (Jaku Dalam 4:25-27) Nya alai, kitai ukai semina nyeliahka pemerindang ti ditemu kitai jai, tang kitai mega nyeliahka sebarang pemerindang ti engka ulih ngerusak kaul kitai enggau Jehovah.
NGEMBUAN RUNDING JEHOVAH
16. (a) Nama sekeda pengawa ti dipegedika Jehovah? (b) Baka ni kitai nunjukka diri begedika utai ti dipegedika Jehovah?
16 Pemasmur madah: ‘Jehovah rinduka orang ke begedika penyai.’ (Masmur 97:10) Lebuh kitai belajarka Bup Kudus, kitai ulih nemu runding sereta asai ati Jehovah. Ambika chunto, kitai belajar Jehovah begedika “dilah ti bula, jari ti munuh orang ke nadai penyalah, ati ti berundingka akal ti jai, kaki ti beguai bejalaika ngereja penyai.” (Jaku Dalam 6:16-19) Kitai mega patut nyeliahka pengawa “bambai, . . . besembahka engkeramba, bemanang, . . . kepapas, [‘balat ringat,’ NWT], . . . ngining orang, pemabuk, berami enda beiga-iga, enggau utai ti baka nya.” (Galatia 5:19-21) Semua jaku lalau tu ulih nulung kitai milih pemerindang ti manah. Enda ngira lebuh kitai kediri tauka enggau orang bukai, kitai deka nitihka standard Jehovah. (2 Korint 3:18) Pemutus ke digaga lebuh kitai kediri nunjukka sapa kitai kebendar.—Masmur 11:4; 16:8.
17. Sebedau milih pemerindang, nama tanya ti patut diperundingka kitai?
17 Sebedau nuan milih pemerindang, tanya diri empu: ‘Baka ni pemerindang ke dipilih aku ulih ngachau kaul aku enggau Jehovah? Nama empas iya ngagai penemu ati aku?’ Aram meh kitai beratika sekeda jaku lalau Bup Kudus ke ulih nulung kitai milih pemerindang.
18, 19. (a) Nama jaku lalau Paul ngagai orang Kristian? (b) Nama jaku lalau ke ulih nulung kitai milih pemerindang?
18 Pemerindang ke dipilih kitai ulih lekat ba runding kitai. Paul nulis: “Perundingka utai ti bendar, ti manah, ti lurus, ti tuchi, ti badas, ti nelap, ti pemadu menyana, ti tau dipuji.” (Pilipi 4:8) Lebuh kitai berundingka utai ti manah, kitai ulih madah: ‘Awakka jaku enggau runding aku manah dipeda Nuan, O Jehovah!’—Masmur 19:14.
19 Tanya diri empu: ‘Nama utai ke diisi aku ba runding? Kati aku berundingka utai ti manah pengudah aku meda cherita tauka program ba TV? Kati aku berasai lantang lalu ngembuan ati ti beresi? (Epesus 5:5; 1 Timoti 1:5, 19) Kati aku ulih besampi ngagai Jehovah? Kati pemerindang nya ngasuh aku berundingka pengawa kasar sereta ulah ti kamah? (Matthew 12:33; Mark 7:20-23) Kati pemerindang ke dipilih aku ngujungka aku “nitihka chara dunya”?’ (Rome 12:2) Enti kitai meresa diri ngena semua tanya tu, nya ulih nulung kitai ngetanka kaul kitai enggau Jehovah. Kitai nitihka teladan pemasmur ke besampi: “Anang ngasuh mata aku merening ngagai utai ti nadai guna.” *—Masmur 119:37, NWT.
PEMUTUS KITAI BISI KAUL ENGGAU ORANG BUKAI
20, 21. Nama kebuah kitai patut berundingka asai ati orang bukai lebuh milih pemerindang?
20 Bisi siti agi jaku lalau ti amat beguna ke patut dikingatka kitai, iya nya: ‘Semua utai tau dikereja magang, tang ukai semua utai nya ulih ngemansangka pengidup kitai. Anang berundingka diri empu aja, tang berunding ke orang bukai.’ (1 Korint 10:23, 24) Taja pan kitai ulih ngereja sesiti utai, tu ukai reti iya kitai patut ngereja nya. Pemutus kitai ulih meri empas ngagai bala menyadi Kristian. Nya alai, kitai patut berunding enggau bejimat.
21 Penemu ati tiap iku orang enda sebaka. Ambika chunto, penemu ati nuan engka ngemendarka nuan meda siti cherita. Tang penemu ati orang bukai engka enda ngemendarka iya ngereja nya. Nama deka digaga nuan? Taja pan nuan ulih meda cherita nya, nuan engka enggai ngereja nya. Nama kebuah? Laban nuan enggai “bedosa ngelaban” bala menyadi Kristian, tauka “bedosa ngelaban Kristus.” (1 Korint 8:12) Kitai enggai milih pemerindang ti ulih ngasuh bala menyadi Kristian kitai enda nyamai ati.—Rome 14:1; 15:1; 1 Korint 10:32.
22. Nama kebuah kitai enda ngansak bala menyadi Kristian ngaga pemutus ti sama enggau kitai?
22 Tang, baka ni enti penemu ati kitai enda ngasuh kita meda, macha, tauka ngaga sesiti utai, tang penemu ati orang bukai ulih ngereja nya? Laban nuan rindu sereta bebasaka bala menyadi Kristian, nuan tentu enda ngansak sida ngaga pemutus ti sama enggau nuan. Ambika chunto, seiku orang ke deriba nemu kekadang bisi orang deriba lubah tauka laju agi ari iya. Tang sida enda salah laban sida enda ngelanggar pengelaju ti udah ditetapka. Pia mega, nuan enggau menyadi Kristian engka ngaga pemutus ti enda sebaka pasal pemerindang. Tu enda salah enti seduai enda ngelanggar jaku lalau Bup Kudus.—Pengajar 7:16; Pilipi 4:5.
23. Nama ulih nulung kitai milih pemerindang enggau manah?
23 Nyadi, nama ulih nulung kitai milih pemerindang enggau manah? Penemu ati ke dilatih ngena jaku lalau Bup Kudus sereta pengerindu kitai ke bala menyadi Kristian deka nulung kitai ngaga pemutus ti manah lebuh milih pemerindang. Kitai tentu deka gaga ati lebuh ngereja ‘semua utai ke mulia Petara.’
^ Kitai ulih tetemuka mayuh agi jaku lalau ke nulung kitai milih pemerindang ari Jaku Dalam 3:31; 13:20; Epesus 5:3, 4; enggau Kolosi 3:5, 8, 20.