1, 2. (a) Iring sapa ke patut dititihka kitai? (b) Nama tanya ti deka dikerandauka kitai ba pelajar tu?

 LEBUH nuan agi mit, kala apai indai ngasuh nuan ngereja utai ti dikenggaika nuan? Nuan rinduka apai indai sereta nemu diri patut ngasika sida. Tang kekadang, nuan engka enggai ngasika sida.

² Kitai nemu Apai kitai, Jehovah, rinduka kitai. Iya nyaga kitai sereta meri semua utai ti diguna ngambika kitai idup lantang. Jehovah mega meri iring kena nulung kitai mujur ba pengidup. Kekadang, Iya ngena orang ngiring kitai. Enda ngira nama chara ke dikena Jehovah, kitai patut bebasaka kuasa Iya. (Jaku Dalam 24:21) Tang, nama kebuah kitai engka tusah nerima iring? Nama kebuah Jehovah dekaka kitai nitihka iring? Lalu baka ni kitai nunjukka diri bebasaka kuasa Jehovah?—Peda Nota Penutup 9.

3, 4. Nama kebuah mensia nyadi enda sempurna? Nama kebuah kitai tusah nerima iring ari orang bukai?

³ Taja pan Adam seduai Awa sempurna, seduai iya ngelaban kuasa Petara. Nya alai, semua peturun sida nyadi enda sempurna sereta bisi ati ti deka ngelaban. Tu kebuah kitai tusah nerima iring ari Jehovah sereta orang bukai. Siti agi kebuah kitai tusah nerima iring, laban Jehovah ngena mensia ti enda sempurna ngiring kitai.—Pemungkal 2:15-17; 3:1-7; Masmur 51:5; Rome 5:12.

⁴ Ketegal kitai enda sempurna, kitai jampat sumbung. Penyumbung ngasuh kitai tusah nerima iring. Ambika chunto, ba Israel kelia, Jehovah milih Moses ngiring nembiak Iya. Taja pan Moses dipilih Jehovah, tang iya enda sumbung. Bup Kudus madahka, Moses orang ti pemadu baruh ati ba maya nya. Korah, ke udah gawa ke Jehovah betaun-taun, nyadi sumbung sereta ngelaban Moses. Korah enggai nerima iring ari Moses lalu mai mayuh orang Israel angkat ngelaban Moses. Ketegal tu, sida diukum mati. (Penyampau 12:3; 16:1-3, 31-35) Bup Kudus ngembuan mayuh chunto bukai ti nunjukka penyumbung tau ngemediska kitai.—2 Bansa Israel 26:16-21; peda Nota Penutup 10.

5. Baka ni sekeda orang salah guna kuasa?

⁵ Sejarah nunjukka mayuh orang udah salah guna kuasa. (Bacha Pengajar 4:1.) Ambika  chunto, Saul orang ke manah sereta baruh ati lebuh Jehovah milih iya nyadi raja bansa Israel. Belubah-lubah, iya nyadi sumbung enggau kepapas lalu iya merinsaka David. (1 Samuel 9:20, 21; 10:20-22; 18:7-11) Udah nya, David nyadi raja. Taja pan iya seiku ari raja ti manah ba menua Israel, iya kala salah guna kuasa. Iya beleman enggau Batseba, bini Uriah. Kena ngelalaika penyalah iya, David ngatur ngambika Uriah mati maya beperang.—2 Samuel 11:1-17.

6, 7. (a) Pengerindu kitai ngagai Jehovah meransang kitai ngereja nama? (b) Nama ulih nulung kitai ngasika Jehovah taja pan enda senang?

⁶ Kitai bebasaka iring Jehovah laban kitai rinduka Iya. Ketegal kitai rinduka Jehovah lebih ari semua utai, kitai deka ngagaka ati Iya. (Bacha Jaku Dalam 27:11; Mark 12:29, 30.) Kenyau ari Kebun Eden, Sitan deka orang ngelaban Petara. Iya deka kitai berunding, Jehovah nadai kuasa meri iring ngagai mensia. Tang kitai nemu, tu bula. Kitai setuju enggau jaku tu: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai.’—Pemandang 4:11.

⁷ Lebuh nuan agi mit, nuan diajar ngasika apai indai taja pan kekadang nuan enggai. Pia mega, kekadang kitai tusah deka ngasika Jehovah. Tang  laban kitai rindu sereta bebasaka Jehovah, kitai enggau naka ulih ngasika Iya. Jesus netapka teladan ti manah ke kitai. Enda ngira senang tauka tusah, iya seruran ngasika Jehovah. Nya kebuah iya ulih madah ngagai Apai iya: ‘Ukai nitihka peneka aku, tang awakka peneka Nuan nyadi.’—Luke 22:42; peda Nota Penutup 11.

8. Baka ni Jehovah meri iring ngagai kitai? (Peda kutak “ Pendingka Jaku Lalau.”)

⁸ Kemayaharitu, Jehovah ngena mayuh chara ngiring kitai. Ambika chunto, Iya meri kitai Bup Kudus sereta bala tuai gempuru. Enti kitai bebasaka orang ke dipilih Iya, tu nunjukka kitai bebasaka kuasa Jehovah. Tang, enti kitai ngelaban sida, kitai baka ke ngelaban Jehovah. Lebuh orang Israel ngelaban Moses, Jehovah ngumbai sida ngelaban Iya.—Penyampau 14:26, 27; peda Nota Penutup 12.

9. Baka ni pengerindu meransang kitai nitihka iring?

⁹ Lebuh kitai bebasaka kuasa Jehovah, tu nunjukka kitai rinduka bala menyadi Kristian. Ambika chunto, maya bisi penusah ai bah, tim penyelamat patut sama bekereja sereta nitihka iring ari tuai ngambika ulih nyelamat mayuh orang. Nama deka nyadi enti seiku ari sida enda ngasika iring? Tu ulih ngenusahka tim sereta ngasuh sida balat bakal. Pia mega, enti kitai enda nitihka iring ari Jehovah sereta orang ke dipilih Iya, orang bukai deka tusah. Tang enti kitai ngasika Jehovah, tu nunjukka kitai rinduka bala menyadi sereta bebasaka atur ari Jehovah.—1 Korint 12:14, 25, 26.

10, 11. Nama deka dikerandauka kitai?

 ¹⁰ Semua iring ari Jehovah ke pemanah kitai. Nya alai, enti kitai bebasaka kuasa ba ruang bilik, ba eklisia, sereta orang ke gawa perintah, semua orang deka bulih penguntung.—Ulang Adat 5:16; Rome 13:4; Epesus 6:2, 3; Hebrew 13:17.

¹¹ Jehovah dekaka kitai bebasaka orang bukai. Enti kitai meretika kebuah iya, tu deka meransang kitai terus ngereja nya. Diatu kitai deka berandauka chara kitai ulih nunjukka basa ba ruang bilik, ba eklisia, sereta lebuh betemu enggau orang ke gawa perintah.

12. Baka ni laki nunjukka iya bebasaka kuasa Jehovah?

¹² Jehovah ngepunka ruang bilik. Enti semua orang dalam ruang bilik bejalaika tanggung pengawa diri, baka ke udah ditetapka Jehovah, sida deka bulih penguntung. (1 Korint 14:33) Jehovah milih laki nyadi tuai bilik. Reti nya, laki patut ngintu sereta ngiring ruang bilik enggau pengerindu. Tu tanggung pengawa ti berat bendar ba Jehovah. Bala laki Kristian patut nelap, bisi pengerindu, sereta ngintu ruang bilik baka chara Jesus ngintu eklisia. Enggau ngereja tu, sida  bebasaka kuasa Jehovah.—Epesus 5:23; peda Nota Penutup 13.

13. Baka ni bini nunjukka iya bebasaka kuasa Jehovah?

¹³ Bini mega bisi tanggung pengawa ti beguna bendar. Bini bebasaka laki sereta nyukung iya nyadi tuai bilik ti manah. Lebuh bini enda setuju enggau pemutus laki iya, iya ulih madahka runding diri enggau basa sereta nelap. Seduai iya sama bela ngajar anak. Bini ngajar bala anak nunjukka basa ari teladan iya empu. (Jaku Dalam 1:8) Enti laki iya enda nyembah Jehovah, iya engka napi penanggul ke tusah agi. Tang enti bini tetap rindu sereta bebasaka laki iya, engka tu ulih meransang laki iya ngelala sereta nyembah Jehovah dudi hari ila.—Bacha 1 Peter 3:1.

14. Baka ni anak nunjukka iya bebasaka kuasa Jehovah?

¹⁴ Bala anak amat berega ba Jehovah lalu patut dijaga sereta diiring. Lebuh bala anak ngasika apai indai, sida ngagaka ati apai indai. Tang keberat agi, tu nunjukka sida bebasaka kuasa Jehovah sereta ngelantangka ati Iya. (Jaku Dalam 10:1) Ba mayuh ruang bilik, anak dibesaika apai tauka indai tunggal. Pengidup sida engka enda senang. Tang enti anak ngasi sereta nyukung apai tauka indai, ruang bilik deka nyadi lantang agi. Taja pan nadai ruang bilik ti sempurna, tang enti tiap iku sida nitihka iring Jehovah, tu deka mai penguntung ke sida. Tu ngemuliaka Jehovah, ke ngepunka ruang bilik.—Epesus 3:14, 15.

15. Baka ni kitai nunjukka kitai bebasaka kuasa Jehovah ba eklisia?

¹⁵ Jehovah ngiring kitai nengah eklisia Kristian. Iya milih Jesus nyadi Kepala eklisia. (Kolosi 1:18) Jesus ngasuh “ulun ke tetap ati sereta bepenemu-dalam” ngemataka nembiak Petara ba serata dunya. (Matthew 24:45-47) Kemayaharitu, “ulun ke tetap ati sereta bepenemu-dalam” nya Raban ti Ngiring. Sida nyediaka utai ti diguna ba maya ti patut kena ngeringka pengarap kitai. Bala tuai gempuru, penulung gempuru, sereta tuai ti ngabas nerima iring ari Raban ti Ngiring kena nyaga eklisia ba serata dunya. Jehovah meri tanggung pengawa ngagai semua menyadi lelaki tu. Iya dekaka sida bejalaika pengawa sida enggau manah. Nya alai, enti kitai bebasaka sida, kitai bebasaka Jehovah.—Bacha 1 Tesalonika 5:12; peda Nota Penutup 14.

16. Nama kebuah kitai ngumbai tuai gempuru enggau penulung gempuru dipilih ngena roh kudus?

¹⁶ Tuai gempuru enggau penulung gempuru nulung bala menyadi beserakup sereta teguh ba pengarap. Sida mega enda sempurna baka kitai. Nyadi, baka ni sida dipilih? Sida patut nitihka syarat ke dipadah ba Bup Kudus. (1 Timoti 3:1-7, 12; Titus 1:5-9) Jehovah ngena roh kudus Iya nulung penulis Bup Kudus madahka syarat tu. Sebedau bala tuai gempuru milih menyadi lelaki nyadi tuai gempuru tauka penulung gempuru, sida besampi minta Jehovah ngiring sida ngena roh kudus. Tu enggau  terang nunjukka eklisia Kristian di baruh iring Jesus enggau Jehovah. (Kereja Rasul 20:28) Menyadi lelaki ke dipilih nya pemeri ari Petara kena nyaga kitai.—Epesus 4:8.

17. Nama kebuah menyadi indu kadang-kadang patut nudung pala?

¹⁷ Kadang-kadang, engka nadai tuai gempuru tauka penulung gempuru ngereja pengawa ba eklisia. Enti tu nyadi, seiku menyadi lelaki ke udah dibaptisa ulih ngereja pengawa nya. Enti nadai, seiku menyadi indu ulih ngereja pengawa ke suah digaga menyadi lelaki ba eklisia. Tang iya patut nudung pala. (1 Korint 11:3-10) Chara tu nunjukka menyadi indu nya bebasaka chara Jehovah ngiring ruang bilik sereta eklisia.—Peda Nota Penutup 15.

18, 19. (a) Nama ulih dipelajarka kitai ari Rome 13:1-7? (b) Baka ni kitai nunjukka basa ngagai perintah?

¹⁸ Kemayaharitu, Petara nejuka perintah mensia megai kuasa. Nya alai, kitai patut bebasaka sida. Perintah mensia nulung nyaga pengelikun sereta nyediaka utai ti diguna kitai. Orang Kristian patut ngasika iring ari Rome 13:1-7. (Bacha.) Kitai bebasaka “perintah ti megai menua” lalu nitihka undang-undang menua ti udah ditetapka. Undang-undang tu engka meri empas ngagai ruang bilik, pengawa dagang tauka reta tengkira kitai. Ambika chunto, kitai dipinta mayar chukai sereta meri penerang ti diguna perintah. Tang, baka ni enti sida  ngasuh kitai ngereja utai ti ngelaban atur Petara? Ku rasul Peter: ‘Kami enda tau enda ngasika Petara, ukai ngasika mensia.’—Kereja Rasul 5:28, 29.

¹⁹ Lebuh betemu enggau pegawai perintah, baka hakim tauka polis, kitai deka bebasaka sida. Orang Kristian ti biak bebasaka cikgu sereta orang bukai ke gawa ba sekula. Pia mega, ba endur kereja, kitai bebasaka tuke taja pan orang bukai enda. Enti kitai ngereja tu, kitai nitihka teladan Paul ti bebasaka pemesai perintah taja pan tu enda senang. (Kereja Rasul 26:2, 25) Lebuh orang bukai jai enggau kitai, kitai tetap bebasaka sida.—Bacha Rome 12:17, 18; 1 Peter 3:15, 16.

20, 21. Nama penguntung ke diulih enti kitai bebasaka orang bukai?

²⁰ Ba serata dunya, orang nyau enda bebasaka orang bukai. Tang nembiak Jehovah enda baka nya. Kitai nitihka jaku lalau rasul Peter: “Bebasaka semua orang.” (1 Peter 2:17) Orang bukai ulih nemu enti kitai bebasaka sida. Jesus madahka kitai: “Awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega.”—Matthew 5:16.

²¹ Lebuh kitai ngayanka basa ba ruang bilik, ba eklisia, sereta ba sebarang maya, teladan kitai ulih meransang orang bukai deka ngelala Jehovah. Lebuh kitai bebasaka orang bukai, tu nunjukka kitai bebasaka kuasa Jehovah sereta rinduka Iya. Jehovah tentu gaga ati!