PELAJAR 8
Petara Deka Nembiak Iya Beresi
“Nuan mandangka Diri tuchi ngagai orang ke tuchi.”—MASMUR 18:26.
1-3. (a) Nama kebuah seiku indai nentuka anak iya kemas sereta beresi? (b) Nama kebuah Jehovah deka nembiak Iya beresi?
GAMBARKA seiku indai nentuka anak iya udah mandi sereta ngena gari ti kemas enggau beresi sebedau nurun ke sekula. Nama kebuah iya ngereja nya? Tu pulaika pengerai anak lalu nunjuk ngagai orang bukai anak nya bisi diintu apai indai.
2 Apai kitai, Jehovah, deka kitai beresi sereta tuchi. (Masmur 18:26) Iya nemu nyaga pemeresi nya mai penguntung ke kitai. Lebuh kitai beresi, kitai ngemuliaka Jehovah.—Esekiel 36:22; bacha 1 Peter 2:12.
3 Nama reti pemeresi? Nama kebuah kitai patut nyaga pemeresi? Lebuh kitai beratika tanya tu, kitai deka nemu ni bagi utai ke patut dikemansangka kitai.
NAMA KEBUAH KITAI PATUT BERESI?
4, 5. (a) Nama kebuah kitai nyaga pemeresi? (b) Baka ni utai ti digaga ngajar kitai runding Jehovah pasal pemeresi?
4 Ari teladan Jehovah, kitai belajar chara kitai ulih beresi sereta tuchi. (Adat Lewi 11:44, 45) Batang kebuah kitai nyaga pemeresi iya nya kitai deka ‘nunda teladan Petara.’—Epesus 5:1.
5 Ari utai ti digaga, kitai belajar runding Jehovah pasal pemeresi. Jehovah ngaga dunya nyadi endur diau ti beresi ke mensia. Perundingka chara dunya tu ulih meresi diri empu, taja pan udah dikamahka mensia. Ambika chunto, lebuh angin penuh enggau sebun asap, Jehovah meri ujan kena meresika angin. Asil iya kitai bisi angin ti beresi.—Jeremiah 10:12; Rome 1:20.
6, 7. Baka ni Adat Moses nunjukka orang ke nyembah Jehovah patut nyaga pemeresi?
6 Adat Moses nunjukka Jehovah deka nembiak Iya nyaga pemeresi. Ambika chunto, orang Israel patut beresi ba tubuh ngambika sembah sida diterima Jehovah. Lebuh Hari Pengampun Dosa, imam besai patut mandi dua kali. (Adat Lewi 16:4, 23, 24) Sebedau bala imam ulih meri pemeri ngagai Jehovah, sida patut nuchi jari enggau kaki sida. (Pemansut 30:17-21; 2 Bansa Israel 4:6) Ba sekeda pekara, orang ke enda ngasika atur pemeresi deka diukum mati.—Adat Lewi 15:31; Penyampau 19:17-20
7 Baka ni enggau kemayaharitu? Kitai ulih belajar mayuh utai pasal runding Jehovah ari Adat Moses. (Malaki 3:6) Adat tu nunjukka orang ke nyembah Jehovah enda tau enda nyaga pemeresi. Standard Jehovah tetap enda berubah nyentukka kemayaharitu. Jehovah agi deka kitai beresi sereta tuchi.—James 1:27.
NAMA RETI PEMERESI?
8. Ba nama kitai patut beresi?
8 Ba mata Jehovah, kitai ukai semina nyaga pemeresi ba tubuh, gari sereta rumah. Tang kitai patut beresi ba semua pekara, nyengkaum sembah, ulah sereta runding kitai. Au, enti kitai deka beresi ba mata Jehovah, kitai patut beresi sereta tuchi ba semua pekara dalam pengidup kitai.
9, 10. Nama reti sembah ti tuchi?
9 Sembah ti tuchi. Kitai patut nyeliahka semua pengarap ti pelesu. Lebuh orang Israel ditaban ngagai Babilon, sida dikelingi orang ke nyembah petara ti pelesu. Tang Isaiah madahka orang Israel deka pulai baru ngagai Israel lalu sembah ti tuchi deka diaduka baru. Jehovah ngasuh sida: “Angkat ari menua Babilon, anang negu utai ti enda tuchi. Intu diri kudus lalu mupuk.” Sembah sida ngagai Jehovah enda patut dikamahka enggau ajar, ulah tauka adat ti bekaul enggau pengarap pelesu ba Babilon.—Isaiah 52:11.
10 Kemayaharitu, orang Kristian ti bendar mega nyeliahka pengarap ti pelesu. (Bacha 1 Korint 10:21.) Ba serata dunya, mayuh adat sereta ajar datai ari pengarap ti pelesu. Ambika chunto, mayuh orang pechaya orang ke udah mati bisi semengat ti agi idup. Nya alai, bisi mayuh adat bekaul enggau tu. (Pengajar 9:5, 6, 10) Diri sebilik engka mejal kitai nitih adat ti bekaul enggau ajar pelesu tu. Tang kitai anang alah dipejal, laban kitai deka mengkang beresi ba mata Jehovah.—Kereja Rasul 5:29.
11. Nama reti ulah ti tuchi?
11 Ulah ti tuchi. Enti kitai deka beresi ba mata Jehovah, kitai enda tau enda nyeliahka semua ulah ti kamah. (Bacha Epesus 5:5.) Ba Bup Kudus, Jehovah ngasuh kitai “seliahka ulah ti kamah.” Iya enggau terang madahka orang ke ngereja ulah ti kamah lalu enda nesal ati ‘enda ulih bempu Perintah Petara.’—1 Korint 6:9, 10, 18; peda Nota Penutup 22.
12, 13. Nama kebuah kitai patut bisi runding ti tuchi?
12 Runding ti tuchi. Utai ti digaga kitai selalu iya bepun ari runding kitai. (Matthew 5:28; 15:18, 19) Runding ti tuchi deka meransang kitai ngereja utai ti manah. Tang laban kitai enda sempurna, kitai kadang-kadang bisi runding ti salah. Enti kitai enda muai runding ti salah nya enggau lengkas, nyau kelama ati kitai enda tuchi. Kitai engka deka ngereja pengawa ti enda tuchi. Nya alai, kitai enda tau enda ngisi runding enggau utai ti tuchi. (Bacha Pilipi 4:8.) Kitai patut nyeliahka pemerindang ti mandangka ulah ti kamah tauka pemangah. Kitai patut bejimat lebuh milih utai ke dibacha, dipeda sereta dikerandauka.—Masmur 19:8, 9.
13 Ngambika meruan dalam pengerindu Petara kitai patut tuchi ba sembah, ulah sereta runding. Tang Jehovah mega deka kitai nyaga pemeresi diri.
BAKA NI KITAI NYAGA PEMERESI?
14. Nama kebuah kitai patut nyaga pemeresi?
14 Lebuh kitai nyaga pemeresi, tu mai penguntung ngagai kitai sereta orang bukai. Kitai deka berasai lantang lalu orang bukai mega rindu begulai enggau kitai. Tang keberat agi, kitai ngemuliaka Jehovah. Ambika chunto, enti nuan meda seiku anak mit ke selalu kamah, tu engka ngasuh nuan bisi runding ke enda manah pasal apai indai iya. Pia mega, enti kitai enda nyaga pemeresi, tu ulih ngemaluka Jehovah. Paul madah: ‘Kami nadai mempang jalai orang, ngambika orang enda ulih besalahka pengawa kami, tang dalam semua utai enggau ngena semua macham chara kami udah ngayanka diri amat ulun Petara.’—2 Korint 6:3, 4.
Kitai ke nyadi nembiak Jehovah patut nyaga pemeresi tubuh enggau utai ti ngelingi kitai
15, 16. Baka ni kitai ulih nyaga pemeresi diri?
15 Tubuh enggau gari kitai. Kitai patut nyaga pemeresi diri tiap hari. Ambika chunto, kitai mandi tiap hari. Pia mega, kitai masu jari ngena sabun enggau ai, kelebih agi sebedau manduk pemakai tauka makai, sereta pengudah ngena jamban tauka negu utai ti kamah. Masu jari amat beguna laban ulih nyeliahka penyakit, indah ulih nyelamatka nyawa. Enti kitai nadai jamban, kitai ulih ngiga chara ti bukai. Orang Israel kelia nadai jamban. Nya alai, sida ngelamun tai ngena tanah, jauh ari endur diau sereta telaga.—Ulang Adat 23:12, 13.
16 Gari kitai enda ibuh mar tauka nitihka gaya ti baru. Tang iya patut kemas sereta beresi. (Bacha 1 Timoti 2:9, 10.) Kitai patut seruran nentuka chara kitai begari ngemuliaka Jehovah.—Titus 2:10.
17. Nama kebuah kitai patut nyaga pemeresi rumah enggau utai ti ngelingi kitai?
17 Rumah enggau reta kitai. Lebuh nginjil, kitai ngajar orang pasal dunya Paradais ti beresi. Nya alai, enda ngira dini endur kitai diau, kitai patut nyaga pemeresi rumah kitai. Kitai nentuka kerita, motosikal sereta basikal kitai seruran beresi. Kelebih agi enti kitai ngena perengka pengangkut nya ngagai gempuru tauka nginjil. (Luke 23:43; Pemandang 11:18) Lebuh kitai nyaga pemeresi rumah enggau utai ti ngelingi kitai, tu nunjukka kitai benung nyediaka diri diau ba dunya Paradais.
18. Nama kebuah kitai nyaga pemeresi endur kitai nyembah Petara?
18 Endur kitai nyembah Petara. Kitai nyaga pemeresi Palan Gempuru sereta endur ti dikena gempuru besai sereta konvensyen. Lebuh orang datai ngagai Palan Gempuru keterubah iya, lalu meda pemeresi palan kitai, tu ngemuliaka Jehovah. Kitai besaup enggau pangan diri lebuh meresi sereta nyeruri Palan Gempuru.—2 Bansa Israel 34:10.
SELIAHKA ULAH TI ENDA TUCHI
19. Nama patut diseliahka kitai?
19 Bup Kudus enda madah enggau silik semua ulah ti enda tuchi ke patut diseliahka kitai. Tang Bup Kudus bisi meri jaku lalau ti ngajar kitai pasal runding Jehovah. Jehovah enggai kitai nginsap, balat ngirup ai bisa tauka makai dadah. Laban kitai pangan Petara, kitai nyeliah ulah baka nya. Nama kebuah? Tu ketegal kitai bebasaka nyawa. Ulah ti enda tuchi ukai semina ulih nganu nyawa kitai tang mega nyawa orang ke ngelingi kitai. Mayuh orang badu ngereja ulah baka tu laban deka nyaga pengerai. Tang laban kitai pangan Jehovah, kitai bisi kebuah manah badu ngereja ulah nya—pengerindu kitai ke Petara. Seiku indu ke biak madah: “Ketegal tulung ari Jehovah, aku ulih ngubah pengidup sereta badu ngereja ulah ti gian. . . . Aku engka enda ulih berubah enti aku bepanggai ba diri empu.” Aram kitai berandauka lima iti jaku lalau Bup Kudus ke ulih nulung kitai nyeliahka ulah ti enda tuchi.
20, 21. Jehovah deka kitai bibas ari ulah ti baka ni?
20 ‘Laban kitai bisi semaya tu, menyadi, aram kitai nuchi diri empu ari semua utai ti ngamahka tubuh enggau roh kitai, lalu nyadi pemadu kudus nangika Petara.’ (2 Korint 7:1) Jehovah deka kitai bibas ari ulah ti enda tuchi, laban tu ulih ngerusak tubuh enggau runding kitai.
21 Siti kebuah kitai patut “nuchi diri empu ari semua utai ti ngamahka” bisi dipadah ba 2 Korint 6:17, 18. Jehovah madah ngagai kitai: “Anang negu utai ti enda tuchi.” Udah nya Iya besemaya: “Aku deka nerima kita, lalu Aku deka nyadi Apai kita, lalu kita deka nyadi anak lelaki enggau anak indu Aku.” Au, enti kitai nyeliahka sebarang ulah ti enda tuchi, Jehovah deka rinduka kitai baka seiku apai ti rinduka anak iya.
22-25. Nama jaku lalau Bup Kudus ti ulih nulung kitai nyeliahka ulah ti enda tuchi?
22 ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ (Matthew 22:37) Tu meh pesan ti pemadu besai. (Matthew 22:38) Kitai enda ulih ngumbai diri rinduka Jehovah enti kitai terus ngereja ulah ti tau nganu nyawa tauka ngerusak untak. Nya alai, kitai enggau naka ulih nunjukka kitai bebasaka nyawa ti diberi Iya.
23 “[Jehovah] meri pengidup enggau seput, enggau semua utai bukai, ngagai semua mensia.” (Kereja Rasul 17:24, 25) Enti kaban nuan meri nuan hadiah ti manah, kati nuan muai tauka ngerusak hadiah nya? Tentu enda. Enggau chara ti sama, nyawa nya pemeri ti berega ari Jehovah. Enti kitai ngumbai nyawa nya berega, kitai deka idup enggau chara ti ngemuliaka Iya.—Masmur 36:9
24 “Rinduka pangan nuan baka nuan ke rinduka diri empu.” (Matthew 22:39) Ulah ti enda tuchi ngenusahka kitai sereta orang ke semak enggau kitai, kelebih agi diri sebilik. Ambika chunto, seiku orang ke enda nginsap ulih kena penyakit ti balat enti seiku ari diri sebilik iya nginsap. Nya alai, enti kitai rinduka orang bukai, kitai deka badu ngereja ulah ti enda tuchi.—1 John 4:20, 21.
25 “Asuh bala nembiak nuan nunduk ngagai orang ke megai perintah enggau ngagai orang ke megai kuasa, ngasika sida.” (Titus 3:1) Ba mayuh menua, bisi tauka makai dadah ngelanggar undang-undang. Laban Jehovah ngasuh kitai ngasika piak perintah, kitai ngasika undang-undang ti baka nya.—Rome 13:1.
Lebuh kitai mengkang beresi sereta tuchi, kitai ngemuliaka Jehovah
26. (a) Nama patut digaga ngambika sembah kitai diterima Jehovah? (b) Nama kebuah kitai enggau naka ulih mengkang beresi sereta tuchi?
26 Enti kitai deka nyadi pangan Jehovah, kitai patut ngaga sekeda ubah. Endang enda senang deka badu ngereja ulah ti enda tuchi, tang kitai ulih mujur! Jehovah besemaya deka nulung kitai. Iya madah: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’ (Isaiah 48:17) Enti kitai enggau naka ulih mengkang beresi sereta tuchi, kitai tentu ulih ngemuliaka Petara!