Pesan Petara bepelasarka jaku lalau Iya. Jaku lalau tauka prinsip nya batang pemendar dalam Bup Kudus. Jaku lalau nulung kitai nemu runding sereta asai ati Jehovah pasal sesiti pekara, kelebih agi lebuh Iya nadai meri pesan ti nyemetak. Jaku lalau Bup Kudus nulung kitai ngaga pemutus ti manah sereta ngereja utai ti betul.

▸ Pelajar 1, genteran 8

Ngasika Jehovah reti iya kitai sanggup ngereja peneka Iya. Jehovah deka kitai ngasika Iya ketegal pengerindu. (1 John 5:3) Enti kitai rindu sereta arapka Iya, kitai deka seruran ngasika Iya ba pengidup, taja pan kekadang tusah ba kitai. Lebuh kitai ngasika Iya, kitai bulih mayuh penguntung. Iya ngajar kitai chara pengidup ti pemadu manah sereta besemaya deka merekatka kitai jemah ila.—Isaiah 48:17.

▸ Pelajar 1, genteran 10

Jehovah meri tiap iku orang peluang bibas milih. Iya enda ngaga kitai baka robot. (Ulang Adat 30:19; Josua 24:15) Kitai ulih ngena peluang bibas milih ngaga pemutus ti manah. Tang, enti kitai enda bejimat, kitai engka ngaga pemutus ti salah. Lebuh kitai ngena peluang bibas milih enggau manah, tu nunjukka kitai tetap ati sereta rinduka Jehovah.

▸ Pelajar 1, genteran 12

Jehovah netapka standard moral tauka iring bekaul enggau ulah kitai. Dalam Bup Kudus, kitai ulih belajar pasal standard tu lalu bulih penguntung ari nya. (Jaku Dalam 6:16-19; 1 Korint 6:9-11)  Standard tu ngajar kitai nama utai ti manah enggau utai ti jai ba mata Petara. Standard tu mega ngajar kitai chara nunjukka pengerindu, ngaga pemutus ti manah sereta begulai manah enggau orang. Taja pan standard moral dunya majak jai, standard Jehovah enda berubah. (Ulang Adat 32:4-6; Malaki 3:6) Lebuh kitai nitihka standard Petara, kitai nyeliahka diri ari mayuh macham pemedis ba pengidup.

▸ Pelajar 1, genteran 17

Penemu ati nya penau ngelala utai ti betul enggau utai ti salah. Jehovah udah meri penemu ati ngagai tiap iku orang. (Rome 2:14, 15) Penemu ati ke dilatih bepelasarka standard moral Jehovah ulih ngiring kitai enggau manah. (1 Peter 3:16) Enggau ngereja tu, penemu ati deka nulung kitai ngaga pemutus ti ngelantangka ati Petara. Penemu ati mega deka nangkan kitai sebedau kitai ngaga penyalah, tauka ngasuh kitai berasai besalah pengudah kitai bedosa. Penemu ati kitai ulih nyadi lemi, tang enggau tulung ari Jehovah, kitai ulih ngaduka iya. Penemu ati ti beresi meri kitai pengelantang sereta nyaga pemanah nama diri.

▸ Pelajar 2, genteran 3

Nangika Petara reti iya kitai rindu sereta bebasaka Iya lalu enggai ngereja utai ti ngemediska ati Iya. Nangika Petara nulung kitai ngereja utai ti manah sereta nyeliahka utai ti jai. (Masmur 111:10) Enti kitai nangika Jehovah, kitai ngasika semua pesan Iya lalu ngamatka semua semaya kitai ngagai Iya. Nangika Petara mega bisi kaul enggau chara kitai berunding, begulai enggau orang bukai sereta pemutus ti digaga ninting hari.

▸ Pelajar 2, genteran 9

Orang ke nesal ati berasai amat tusah ati ketegal udah ngereja utai ti salah. Orang ke rinduka Petara deka berasai tusah ati enti iya enda nitihka standard Jehovah. Enti kitai ngereja penyalah, kitai patut minta Jehovah ngampun dosa kitai ngena genselan tebus Jesus. (Matthew 26:28; 1 John 2:1, 2) Enti kitai bebendar nesal ati lalu badu ngereja utai ti salah, kitai ulih pechaya Jehovah deka ngampun kitai. Kitai badu agi berasai besalah ketegal penyalah ti kala digaga kitai. (Masmur 103:10-14; 1 John 1:9; 3:19-22) Kitai patut belajar ari penyalah kitai, ngubah runding ti salah lalu idup nitihka standard moral Jehovah.

▸ Pelajar 2, genteran 18

Lebuh seseiku orang ke ngereja dosa ti besai enggai nesal ati sereta enda nitihka standard Jehovah, iya ulih dibuai ari gerempung. Kitai enda begulai sereta berandau enggau iya. (1 Korint 5:11; 2 John 9-11) Atur dibuai ari gerempung nyaga nama Jehovah sereta eklisia. (1 Korint 5:6) Atur tu mega siti disiplin kena nulung orang nya nesal ati lalu pulai baru ngagai Jehovah.—Luke 15:17.

▸ Pelajar 3, genteran 19

Jehovah rinduka kitai sereta deka nulung kitai. Nya alai, Iya meri iring enggau lalau ngena Bup Kudus sereta nengah orang ke rinduka Iya. Laban kitai mensia ti enda sempurna, kitai begunaka iring ari Petara. (Jeremiah 17:9) Lebuh kitai nitihka iring ari orang ti dikena Jehovah ngiring kitai, tu nunjukka kitai bebasaka Iya sereta deka ngasika Iya.—Hebrew 13:7.

▸ Pelajar 4, genteran 2

Laban kitai enda sempurna, kitai senang berundingka diri empu sereta nyadi sumbung. Tang Jehovah dekaka kitai baruh ati. Baka ni kitai ulih belajar baruh ati? Siti chara iya nya mandingka diri empu enggau Jehovah. Enggau ngereja tu, kitai deka nemu diri amat mit sereta patut baruh ati. (Jop 38:1-4) Orang ke baruh ati deka berunding pasal orang bukai sereta ngenuluka utai ke diguna sida. Tang orang ke sumbung ngumbai diri manah agi ari orang bukai. Orang ke baruh ati meresa diri empu kena meda pengelemi sereta pengering diri. Iya enda nangi ngaku penyalah diri, minta ampun sereta nerima jaku lalau. Iya bepanggai ba Jehovah sereta nitihka iring Iya.—1 Peter 5:5.

▸ Pelajar 4, genteran 4

Ketegal Jehovah ngaga semua utai, semina Iya aja ke pemadu bekuasa ba dunya raya. Iya selalu ngena kuasa Iya ke pemanah semua utai ti digaga Iya. Jehovah meri sekeda orang kuasa baka apai indai, tuai gempuru sereta orang ke merintah kena nyaga kitai. Sida bisi hak meri kitai iring lalu Jehovah deka kitai sama gawa enggau sida. (Rome 13:1-5; 1 Timoti 5:17) Tang, enti pesan mensia enda sejalai enggau pesan Petara, kitai patut ngasika Petara, ukai mensia. (Kereja Rasul 5:29) Lebuh kitai ngasika orang ke diberi Jehovah kuasa, tu nunjukka kitai bebasaka pemutus Jehovah.

▸ Pelajar 4, genteran 7

Jehovah ngena tuai gempuru tauka menyadi lelaki ti bepeneleba kena nyaga bala nembiak Iya. (Ulang Adat 1:13; Kereja Rasul 20:28) Tuai gempuru nulung kitai bisi kaul ti tegap enggau Jehovah lalu nyembah Iya dalam pemaik sereta bisi atur. (1 Korint 14:33, 40) Sebedau dipilih nyadi tuai gempuru, sida patut nitihka  syarat ari Bup Kudus ke ditulis nengah iring roh kudus. Nya alai, kitai ulih madah sida dipilih ngena roh kudus Petara. (1 Timoti 3:1-7; Titus 1:5-9; 1 Peter 5:2, 3) Kitai andalka sereta nyukung gerempung Petara. Nya alai, kitai lantang ati sama gawa enggau bala tuai gempuru.—Masmur 138:6; Hebrew 13:17.

▸ Pelajar 4, genteran 8

Jehovah meri apai indai tangggung pengawa nyaga anak sereta ruang bilik. Tang, Bup Kudus madah apai nya tuai bilik. Enti nadai apai, indai nyadi tuai bilik. Tuai bilik bisi tanggung pengawa nyediaka pemakai, gari sereta endur diau. Tuai bilik mega patut ngiring ruang bilik iya nyembah Jehovah. Ambika chunto, iya nentuka sida datai ngagai gempuru, nginjil sereta begulai belajarka Bup Kudus enggau tetap. Tuai bilik mega bisi tangggung pengawa ngaga pemutus dalam ruang bilik sida. Iya enggau naka ulih neladan Jesus ngayanka pemanah sereta penelap, lalu enda jai tauka kasar enggau diri sebilik. Tu deka ngasuh ruang bilik bisi pemaik sereta pengelantang, lalu kaul sida enggau Jehovah majak tegap.

▸ Pelajar 4, genteran 12

Raban ti Ngiring nya seraban menyadi lelaki ke bisi pengadang idup ba serega. Petara ngena sida ngiring pengawa nembiak Iya. Ba abad keterubah, Jehovah ngena raban ti ngiring ngemataka eklisia Kristian ba pekara ti bekaul enggau sembah sereta ba pengawa nginjil. (Kereja Rasul 15:2) Kemayaharitu, Jehovah ngena Raban ti Ngiring ngemata, ngiring sereta nyaga nembiak Iya. Lebuh sida ngaga pemutus, sida bepanggai ba Bup Kudus sereta roh kudus Petara. Jesus ngumbai sida “ulun ke tetap ati sereta bepenemu-dalam.”—Matthew 24:45-47.

▸ Pelajar 4, genteran 15

Kadang-kadang, menyadi indu diasuh ngereja pengawa ba eklisia ke suah digaga menyadi lelaki. Lebuh iya ngereja tu, iya patut nudung pala kena nunjukka iya bebasaka atur Jehovah. Pia mega, iya patut nudung pala maya ngajar Bup Kudus enti laki iya tauka seiku menyadi lelaki bisi enggau iya.—1 Korint 11:11-15.

▸ Pelajar 4, genteran 17

Kitai enda nyukung pengawa politik. (John 17:16) Baka Jesus, kitai nyukung Perintah Petara lalu enda enggau ba pengawa politik dunya.

Jehovah dekaka kitai “nunduk ngagai orang ke megai perintah enggau ngagai orang ke megai kuasa.” (Titus 3:1, 2; Rome 13:1-7) Taja pia, Petara mega madahka kitai enda patut munuh orang. Nya alai, penemu ati orang Kristian enda ngasuh iya enggau orang beperang. Enti perintah ngemendarka seseiku menyadi Kristian enda enggau pengawa soldadu, tang ngasuh iya ngereja pengawa bukai ke nadai sangkut paut enggau pengawa soldadu, iya patut ngaga pemutus nitihka penemu ati iya.

Laban Jehovah ngaga kitai, kitai semina nyembah Iya aja. Taja pan kitai bebasaka lambang menua, kitai enda nabi benira tauka belaguka lagu menua. (Isaiah 43:11; Daniel 3:1-30; 1 Korint 10:14) Ketegal kitai nyukung Perintah Petara, kitai mutuska kediri empu enda ngundi parti politik tauka chalun maya bepilih.—Matthew 22:21; John 15:19; 18:36.

▸ Pelajar 5, genteran 2

Dunya tu meransang orang ngembuan runding Sitan. Orang ke ngembuan runding Sitan enda rinduka Jehovah sereta enggai  nitihka standard Iya. (1 John 5:19) Ulah sereta runding sida dikumbai roh dunya. (Epesus 2:2) Nembiak Jehovah patut nentuka sida enda dikuasa roh dunya. (Epesus 6:10-18) Sida patut rinduka chara Jehovah sereta bebendar ngayanka runding Iya.

▸ Pelajar 5, genteran 7

Orang ke limpang ari pengarap nulak pemendar ari Bup Kudus. Sida ngelaban Jehovah enggau Jesus sereta nguji mai orang bukai enggau sida. (Rome 1:25) Sida ngasuh nembiak Jehovah kakang ati sereta saru penemu. Sekeda orang Kristian ba jeman keterubah limpang ari pengarap, lalu pekara tu mega bisi nyadi kemayaharitu. (2 Tesalonika 2:3) Orang ke tetap ati ngagai Jehovah enggai bisi kaul enggau orang ke limpang ari pengarap. Kitai enggai macha tauka ninga penemu orang ke limpang ari pengarap ketegal pengingin deka nemu tauka dipejal orang bukai. Kitai tetap ati ngagai Jehovah sereta deka nyembah Iya aja.

▸ Pelajar 5, genteran 9

Di baruh Adat Moses, bansa Israel minta Jehovah ngampun dosa sida. Sida mai gandum, minyak sereta jelu ngagai Rumah Sembiang kena nyadika pemeri. Enggau ngereja tu, sida dikingatka Jehovah sedia ngampun dosa sida. Pengudah Jesus meri nyawa iya nyadika tebus, kitai enda ibuh meri pemeri kena ngulihka pengampun ari dosa. Jesus udah meri pemeri ti sempurna “sekali aja ke belama-lama iya.”—Hebrew 10:1, 4, 10.

▸ Pelajar 7, genteran 6

Di baruh Adat Moses, orang Israel ulih makai dagin jelu. Sida mega diasuh ngena jelu nyadika pemeri. (Adat Lewi 1:5, 6)  Taja pia, Jehovah enda ngemendarka sida merinsaka jelu. (Jaku Dalam 12:10) Kebendar iya, Adat Moses ngembuan pesan ti ngelindung jelu ari diperinsa. Orang Israel diasuh ngintu jelu enggau manah.—Ulang Adat 22:6, 7.

▸ Pelajar 7, genteran 6

Begian darah ke mit agi. Darah bisi empat begian, iya nya sel darah mirah, sel darah burak, platelet enggau plasma. Empat begian darah tu ulih dibagi lalu dikumbai begian darah ke mit agi. *

Orang Kristian enda nerima darah tauka empat bengkah bansa darah. Tang, baka ni enggau begian darah ke mit agi? Bup Kudus nadai madah enggau silik pasal pekara tu. Nya alai, tiap iku orang patut ngaga pemutus diri empu nitihka penemu ati ti udah dilatih ngena Bup Kudus.

Sekeda orang Kristian mutuska enda nerima semua begian darah ke mit agi. Tu ketegal sida berunding pasal Adat Petara ke ngasuh orang Israel nuangka “darah nya ngagai tanah.”—Ulang Adat 12:22-24.

Penemu ati orang Kristian ke bukai ngemendarka sida nerima begian darah ke mit agi. Sida berunding begian ke mit tu enda agi ngambarka nyawa.

Lebuh nuan ngaga pemutus pasal begian darah ke mit agi, perundingka tanya tu:

• Kati aku nemu enti aku enda nerima semua begian darah ke mit agi, tu reti iya aku mega nulak sekeda ubat ti dikena mekuka darah tauka ngelaban penyakit?

•   Baka ni aku nerangka ngagai lutur kebuah aku nerima tauka nulak sekeda bengkah darah ke mit agi?

Chara berubat. Orang Kristian enda meri darah tauka nyimpan darah beminggu-minggu sebedau beputung. Tang bisi chara berubat ti ngena darah diri empu. Ba pekara tu, tiap iku orang Kristian patut nentuka baka ni darah sida dikena maya beputung, lebuh beperesa, tauka lebuh benung berubat. Ba maya nya, darah pesakit engka dikeluarka ari tubuh iya ba siti timpuh.—Kena nemu mayuh agi penerang, peda Kerja Teokratik Kita, November 2009, lambar 5-8.

Ambika chunto, chara berubat ti nambahka ai ubat ke dalam darah (hemodilution). Pengudah darah ti dikeluarka ari tubuh pesakit diganti ngena ai ubat, orang nya deka terus diputung. Lalu, ba maya tauka pengudah tembu beputung, darah nya dipulaika baru ke dalam tubuh.

 Chara berubat ke bukai iya nya nyelamatka darah (cell salvage). Darah ke pansut maya beputung deka digumpul, diberesi sereta dipulaika baru ke dalam tubuh pesakit lebuh tauka pengudah tembu beputung.

Tiap iku lutur bisi chara diri empu bejalaika chara berubat tu. Nya alai, orang Kristian patut nemu baka ni darah iya deka dikena sebedau iya ngaga pemutus pasal chara beputung, beperesa, tauka lebuh berubat.

Lebuh nuan ngaga pemutus pasal chara berubat ke ngena darah diri empu, perundingka tanya tu:

• Enti darah aku dikeluarka ari tubuh, lalu pejalai darah aku ke dikeluarka nya engka teketu ba siti timpuh, kati aku agi ulih ngumbai darah tu sebagi ari tubuh aku, lalu enda ibuh nuangka “darah nya ngagai tanah”?—Ulang Adat 12:23, 24.

• Lebuh berubat, kati penemu ati aku ti dilatih deka dikachau enti lutur ngeluarka darah aku, ngubah lalu mulaika darah nya ngagai tubuh aku?

• Kati aku nemu enti aku nulak semua chara berubat ke ngena darah diri empu, reti nya aku nulak darah diri diperesa, nuchi buah pinggang tauka mesin jantung?

 Sebedau kitai ngaga pemutus pasal begian darah ke mit agi tauka chara berubat ke ngena darah diri empu, kitai patut besampi minta penemu ari Jehovah lalu ngaga pansik enggau silik. (James 1:5, 6) Pengudah nya, kitai ngaga pemutus nitihka penemu ati ke udah dilatih. Kitai enda patut nanya menyadi Kristian ke bukai utai ti deka digaga enti sida napi penanggul ti sama, lalu sida mega enda patut mejal kitai nitihka pemutus sida.—Rome 14:12; Galatia 6:5.

▸ Pelajar 7, genteran 11

Ulah ti tuchi reti iya ulah ti beresi ba mata Jehovah. Tu nyengkaum runding, jaku sereta ulah kitai. Jehovah ngasuh kitai nyeliahka semua bansa ulah sereta runding ti kamah. (Jaku Dalam 1:10; 3:1) Sebedau kitai diuji ngereja utai ti salah, kitai patut mutuska deka nitihka standard Jehovah ti beresi. Kitai patut terus besampi minta tulung ari Petara ngambika runding kitai tuchi, lalu kitai bebendar nulak pengingin ngereja ulah ti kamah.—1 Korint 6:9, 10, 18; Epesus 5:5.

▸ Pelajar 8, genteran 11

Ulah ti enda nemu malu nya jaku tauka ulah ti ngelanggar sereta enda bebasaka standard Jehovah. Enti orang ditemu salah, komiti pechara deka ngaduka kes tu. Ulah ti enda tuchi nyengkaum mayuh macham penyalah. Sekeda kes ke bekaul enggau ulah ti enda tuchi patut diaduka komiti pechara ba eklisia.—Galatia 5:19-21; Epesus 4:19; kena nemu penerang mayuh agi, peda “Pertanyaan Pembaca” dalam majalah Menara Pengawal, 15 Julai 2006 dalam jaku Indonesia.

▸ Pelajar 9, genteran 7; Pelajar 12, genteran 10

Pengawa besetubuh nya pemeri ari Jehovah ti dikena laki bini ngayanka pengerindu. Tang lebuh seseiku orang ngeluchu, iya megai perengka seks diri empu kena ngemuaska pengingin seks ti kamah. Ulah tu ngasuh iya bisi pengingin ti enda menuku sereta bisi runding ti salah pasal seks. (Kolosi 3:5) Tu ulih ngerusakka kaul iya enggau Jehovah. Enti nuan tusah deka ngetu ari ulah ti kamah tu, anang asa ati! (Masmur 86:5; 1 John 3:20) Besampi meh ngagai Jehovah minta tulung Iya. Seliahka ari meda pornografi ke ulih ngasuh nuan berundingka ulah seks ti kamah. Enti apai indai nuan Saksi-Saksi Jehovah, padahka sida penanggul nuan tauka ngagai seiku menyadi Kristian ke tegap ba pengarap. (Jaku Dalam 1:8, 9; 1 Tesalonika 5:14; Titus 2:3-5) Pechaya meh Jehovah lantang ati meda nuan bebendar nyeliahka diri ari ulah ti kamah.—Masmur 51:17; Isaiah 1:18.

▸ Pelajar 9, genteran 9

Jehovah nadai ngepunka pengawa belaki bebini lebih ari seiku. Ba jeman orang Israel, Iya ngemendarka lelaki bebini lebih ari seiku. Tang tu ukai tuju asal Iya. Kemayaharitu, Jehovah enda ngemendarka nembiak Iya bebini tauka belaki lebih ari seiku. Seiku laki semina ulih bisi seiku bini, lalu seiku bini semina ulih bisi seiku laki.—Matthew 19:9; 1 Timoti 3:2.

▸ Pelajar 10, genteran 12

Jehovah dekaka laki bini meruan idup begulai. (Pemungkal 2:24; Malaki 2:15, 16; Matthew 19:3-6; 1 Korint 7:39) Iya semina ngemendarka sarak enti seiku ari sida butang. Seiku ari sida ke enda besalah ulih milih deka sarak tauka enda.—Matthew 19:9.

 Kadang-kadang, orang Kristian milih deka beserara ari kaling sida taja pan enda butang. (1 Korint 7:11) Orang Kristian ulih berunding deka beserara enti utai tu bisi nyadi:

• Enggai melanja diri sebilik: Laki ke enggai melanja diri sebilik nyentukka sida nadai duit tauka pemakai.—1 Timoti 5:8.

• Balat dijamah: Kaling pengidup balat dijamah nyentukka tau nganu pengerai sereta nyawa iya.—Galatia 5:19-21.

• Enda ulih bisi kaul enggau Jehovah: Laki tauka bini balat disakal nyentukka iya enda ulih nyembah Jehovah.—Kereja Rasul 5:29.

▸ Pelajar 11, genteran 19

Semua kitai begunaka puji sereta peransang. (Jaku Dalam 12:25; 16:24) Kitai ulih meransang orang ngena jaku ti manah sereta bepengerindu. Jaku ti baka nya ulih nulung bala menyadi Kristian kitai terus betan sereta nyembah Jehovah taja pan napi pemerinsa. (Jaku Dalam 12:18; Pilipi 2:1-4) Enti seiku orang amat tusah ati, kitai patut mending enggau manah lalu nguji meretika asai ati iya ngambika kitai ulih nulung iya. (James 1:19) Nya alai, kelala meh bala menyadi Kristian enggau manah ngambika nuan ulih nemu utai ke diguna sida. Udah nya, tulung meh sida ngiga peransang sereta pengelantang ati ari Jehovah.—2 Korint 1:3, 4; 1 Tesalonika 5:11.

▸ Pelajar 12, genteran 16

Bup Kudus nadai meri pesan ti silik pasal pengerami kawin. Tiap iti menua bisi adat sereta undang-undang ti enda sebaka. (Pemungkal 24:67; Matthew 1:24; 25:10; Luke 14:8) Semaya ke digaga orang ke kawin ba mua Jehovah amat berat. Mayuh orang ke kawin milih deka nyebut semaya tu ba mua diri sebilik sereta bala  pangan sida maya cheramah tikah dikenataika seiku tuai gempuru. Orang ke kawin ulih milih sekalika deka ngatur pengerami makai tauka enda. (Luke 14:28; John 2:1-11) Enda ngira nama pemutus sida, sida patut nentuka pengerami nya meri mulia ngagai Jehovah. (Pemungkal 2:18-24; Matthew 19:5, 6) Jaku lalau ari Bup Kudus ulih nulung sida ngaga pemutus ti manah. (1 John 2:16, 17) Enti sida nyediaka ai bisa, sida patut nentuka pengerami nya dijaga enggau manah. (Jaku Dalam 20:1; Epesus 5:18) Musik tauka pemerindang ke dipilih sida mega patut meri mulia ngagai Jehovah. Ari ke kelalu ngemeratka pengerami kawin, sida patut ngemeratka kaul enggau Petara sereta pangan diri.—Jaku Dalam 18:22; kena nemu mayuh agi penerang, peda Menara Pengawal, 15 Oktober 2006, lambar 18-31 dalam jaku Indonesia.

▸ Pelajar 13, genteran 18

Kitai deka ngaga pemutus ti manah sejalai enggau jaku lalau Bup Kudus. Ambika chunto, seiku orang Kristian engka dibai kaling iya ke ukai Saksi sama makai enggau kaban belayan maya pengerami hari besai. Enti nuan napi penanggul tu, nama deka digaga nuan? Enti ati nuan ngasuh nuan datai ngagai pengerami nya, nuan patut nerangka sekeda utai dulu ngagai kaling nuan. Ambika chunto, enti pengerami nya bisi ngatur pengawa makai ke bekaul enggau pengarap pelesu, nuan enggai enggau pengawa nya. Nuan mega patut berunding sekalika pemutus nuan ngasuh orang bukai enda nyamai ati tauka enda.—1 Korint 8:9; 10:23, 24.

Enti tuke meri nuan bonus maya hari besai, kati nuan patut nulak bonus nya? Sekalika nuan nerima tauka nulak, tu bepanggai ba kebuah tuke meri bonus nya. Kati tuke nuan meri bonus ketegal deka beterima kasih ngagai orang ke gawa enggau iya? Tauka iya meri bonus ketegal hari besai nya? Nuan patut berunding pasal pekara tu sereta kebuah bukai sebedau ngaga pemutus deka nerima bonus nya tauka enda.

 Baka ni enti orang meri nuan hadiah maya hari besai lalu madah: “Aku nemu nuan enda ngintu pengerami tu, tang aku ka meri nuan hadiah tu.” Engka iya semina deka nunjukka pengerah jari. Tauka iya deka nguji pengarap nuan lalu ngiga peluang mai nuan ngintu pengerami nya? Pengudah berundingka tu, nuan patut mutus sekalika deka nerima hadiah nya tauka enda. Ingat meh, enda ngira nama pemutus kitai, kitai deka bisi ati ti beresi sereta tetap ati ngagai Jehovah.—Kereja Rasul 23:1.

▸ Pelajar 13, genteran 22

Kitai patut jampat mutarka penanggul enggau chara ti manah ngambika penanggul nya enda majak balat. (Matthew 5:23-26) Tuju kitai iya nya meri mulia ngagai Jehovah sereta nentuka eklisia beserakup.—John 13:34, 35; 1 Korint 13:4, 5.

Enti bisi menyadi Kristian enda sepenemu ba pengawa dagang, sida patut enggau naka ulih mutarka penanggul nya lalu enda mai pekara nya ngagai kot. Ba 1 Korint 6:1-8, rasul Paul madahka enti kitai mai pekara nya ngagai kot, kitai ulih ngenyaika nama Jehovah enggau eklisia. Matthew 18:15-17 bisi madahka tiga chara ke patut dititih orang Kristian kena mutarka jaku tuduh baka betenah sereta nipu: (1) Sida patut mutarka penanggul nya enggau pangan diri. (2) Enti tu enda mujur, sida ulih minta tulung ari seiku tauka dua iku menyadi ke tegap ba pengarap. (3) Enti sida agi enda mujur, sida ulih minta tulung ari bala tuai gempuru. Bala tuai gempuru deka ngena jaku lalau Bup Kudus nulung sida mutarka kelikuh nya. Enti seiku ari sida enggai nitihka jaku lalau Bup Kudus, bala tuai gempuru engka meri disiplin.

Tang sekeda pekara engka patut diputarka ngena undang-undang baka pengawa sarak, hak nyaga anak, meri duit belanja, mayar duit pampas insuran, madahka diri tengkerap tauka nulis wasiat. Kitai enda ngelanggar jaku lalau Paul enti kitai mai pekara tu ngagai kot.

 Enti penyai ti besai baka ngerugul, ngayahka anak mit, nyerang orang, ngerumpak tauka munuh nyadi, kitai enda ngelanggar jaku lalau Paul enti kitai madahka pekara tu ngagai piak bekuasa.

▸ Pelajar 14, genteran 14

Kenyau ari Kebun Eden, Sitan nguji nipu mensia. (Pemungkal 3:1-6; Pemandang 12:9) Iya nemu enti iya ngasuh kitai saru runding, kitai senang dibai ngereja utai ti jai. (2 Korint 4:4; James 1:14, 15) Nya alai, iya ngena politik, pengarap, pengawa dagang, pemerindang, pelajar sereta utai bukai ngachau runding kitai.—John 14:30; 1 John 5:19.

Sitan nemu timpuh iya nyau suntuk. Nya alai iya bebendar nipu mayuh orang, kelebih agi orang ke nyembah Jehovah. (Pemandang 12:12) Enti kitai enda bejimat, Sitan ulih belubah-lubah ngerusak runding kitai. (1 Korint 10:12) Ambika chunto, Jehovah begedika pengawa sarak. (Matthew 19:5, 6, 9) Tang mayuh orang ngasaika sida ulih sarak nitih peneka ati. Mayuh cherita sereta program TV mega meransang runding nya. Kitai patut nentuka runding dunya pasal tikah enda ngachau kitai.

Siti agi chara Sitan nipu, iya nya meransang kitai ngelaban atur ti ditetapka Jehovah. (2 Timoti 3:4) Enti kitai enda bejimat, kitai engka enda bebasaka orang ke dipilih Jehovah. Ambika chunto, seiku menyadi lelaki engka enggai nerima iring ari bala tuai gempuru. (Hebrew 12:5) Lalu seiku menyadi indu engka belabuh ngelaban atur Jehovah pasal penuduk laki ke nyadi tuai bilik.—1 Korint 11:3.

Nya alai, anang alah dibai runding Sitan. Tang kitai patut ngembuan runding Jehovah lalu “berundingka utai serega.”—Kolosi 3:2; 2 Korint 2:11.

▸ Pelajar 16, genteran 9

Semua kitai deka ngembuan pengerai ti manah. Enti kitai sakit, kitai deka ngiga chara berubat ti manah. (Isaiah 38:21; Mark 5:25, 26; Luke 10:34) Kemayaharitu, bisi mayuh bengkah chara berubat. Tang, kitai patut milih chara berubat ti enda ngelanggar jaku lalau Bup Kudus. Kitai mega patut ingat semina Perintah Petara ke ulih meri kitai pengerai ti sempurna. Kitai enggai kelalu berundingka pengerai kitai nyentukka ulih ngachau sembah kitai ngagai Jehovah.—Isaiah 33:24; 1 Timoti 4:16.

Kitai patut nyeliahka chara berubat ti ngena kuasa ari roh ti jai. (Adat Lewi 19:31; Ulang Adat 18:10-12) Nya alai, sebedau kitai nerima sesiti chara berubat tauka ubat, kitai patut mansik penatai chara berubat nya, sekalika bisi kaul enggau roh ti jai tauka enda. (Jaku Dalam 14:15) Ingat meh, Sitan selalu ngiga peluang manjuk kitai enggau pengawa ti bekaul enggau roh ti jai. Enti kitai ngasaika chara berubat engka bisi kaul enggau roh ti jai, kitai patut nyeliahka nya.—1 Peter 5:8.

▸ Pelajar 16, genteran 18