1. Nama pengirau Jesus ba malam sebedau iya dibunuh?

 JESUS kala madah ngagai bala murid iya, “Kita ukai enggi dunya.” (John 15:19) Ba malam sebedau iya dibunuh, iya amat irau pasal utai ti deka nyadi ngagai murid iya. Iya besampi ngagai Apai iya, ‘Sida ukai enggi dunya, baka aku ke ukai enggi dunya.’ (John 17:15, 16) Nama reti jaku Jesus?

2. Nama reti leka jaku “dunya” ti disebut Jesus?

² Leka jaku “dunya” ti disebut Jesus dituju ngagai orang ke enda nyembah Petara sereta di baruh kuasa Sitan. (John 14:30; Epesus 2:2; James 4:4; 1 John 5:19) Nama patut digaga kitai ngambika “ukai enggi dunya”? Ba pelajar tu, kitai deka berandauka lima iti chara: (1) tetap taluk ngagai Perintah Petara sereta enda nyukung pengawa politik, (2) nyeliahka roh dunya, (3) begari sereta ngintu diri enggau pengumbas iya, (4) ngembuan runding ti patut pasal duit, sereta (5) ngerasukka semua kereban perang ari Petara.—Peda Nota Penutup 16.

3. Nama runding Jesus pasal pengawa politik?

³ Lebuh Jesus ba dunya, iya meda orang bisi mayuh penanggul sereta idup tusah. Jesus amat ibuh sereta deka nulung sida. Kati iya nyadi ketuai politik? Enda. Iya nemu mensia begunaka Perintah Petara. Jesus deka nyadi Raja ba Perintah Petara, lalu iya madahka orang pasal perintah nya. (Daniel 7:13, 14; Luke 4:43; 17:20, 21) Jesus nadai kala enggau pengawa politik. Lebuh Jesus betemu enggau Gabenor Pontius Pilate ari menua Rome, iya madah: ‘Perintah aku ukai ari dunya tu.’ (John 18:36) Bala murid Jesus mega enda nyukung pengawa politik. Siti bup sejarah (On the Road to Civilization) madahka orang Kristian ba abad keterubah “enggai megai pengawa politik.” Kemayaharitu, orang Kristian ti bendar pan bisi runding ti sama. Kitai nyukung Perintah Petara sereta enda nyukung pengawa politik.—Matthew 24:14.

4. Baka ni orang Kristian ti bendar nyukung Perintah Petara?

⁴ Pengari ke ngarika sesiti perintah ba menua bukai, enda masuk champur enggau pengawa politik menua nya. Baka nya mega enggau orang Kristian ke dipilih merintah enggau Jesus ba serega. Paul nulis ngagai sida: “Kami nyadika pengari Kristus.” (2 Korint 5:20) Sida ngarika Perintah Petara. Nya alai, sida enda masuk champur enggau pengawa politik dunya tu. (Pilipi 3:20) Tang, sida nulung bejuta iku orang belajar pasal Perintah Petara. Sida disukung “bedus ti bukai,” iya nya orang ke bisi  peluang idup belama iya ba dunya baru. “Bedus ti bukai” mega enda masuk champur enggau pengawa politik. (John 10:16; Matthew 25:31-40) Endang terang, orang Kristian ti bendar enda enggau pengawa politik ba dunya tu.—Bacha Isaiah 2:2-4.

5. Nama siti kebuah orang Kristian enda enggau beperang?

⁵ Orang Kristian ti bendar ngumbai bala menyadi Kristian baka diri sebilik. Sida beserakup taja pan enda sama menua tauka chara pengidup. (1 Korint  1:10) Enti kitai beperang, reti iya kitai ngelaban diri sebilik, iya nya bala menyadi Kristian kitai. Jesus ngasuh kitai rinduka sida. (John 13:34, 35; 1 John 3:10-12) Indah, Jesus ngasuh bala murid iya rinduka munsuh sida.—Matthew 5:44; 26:52.

6. Nama runding nembiak Jehovah pasal perintah mensia?

⁶ Taja pan kitai enda nyukung perintah mensia, kitai enggau naka ulih nyadi rayat ti manah. Ambika chunto, kitai nitihka undang-undang menua sereta mayar chukai. Tang kitai tetap meri ‘utai Petara, ngagai Petara.’ (Mark 12:17; Rome 13:1-7; 1 Korint 6:19, 20) ‘Utai Petara’ nyengkaum pengerindu ke Iya, ulah kitai ke ngasi, sereta sembah kitai. Kitai sanggup mati ari ke enda ngasika Jehovah.—Luke 4:8; 10:27; bacha Kereja Rasul 5:29; Rome 14:8.

7, 8. Nama reti “roh dunya”, lalu baka ni tu tau ngachau orang?

⁷ Kena nyeraraka diri ari dunya Sitan, kitai patut nyeliahka “roh dunya.” Roh tu mandangka runding sereta ulah Sitan, ke nguasa orang ti enda nyembah Jehovah. Nya alai, orang Kristian patut nyeliahka roh dunya. Ku Paul, ‘kitai udah nerima, ukai roh dunya, tang roh ti datai ari Petara.’—1 Korint 2:12; Epesus 2:2, 3; peda Nota Penutup 17.

⁸ Roh dunya meransang orang berundingka diri empu, sumbung, sereta rindu ngelaban. Sitan deka orang berunding sida enda ibuh ngasika Petara sereta ulih ngereja utai sepeneka ati. Iya deka orang  pechaya “utai ti dikinginka tubuh, utai ti dikinginka mata” nya pemadu beguna ba pengidup. (1 John 2:16; 1 Timoti 6:9, 10) Sitan kelebih agi deka nipu nembiak Jehovah ngambika berunding baka iya.—John 8:44; Kereja Rasul 13:10; 1 John 3:8.

9. Baka ni roh dunya ulih ngachau kitai?

⁹ Roh dunya baka angin ti ngelingi kitai. Enti kitai enda bebendar ngelaban iya, iya deka nguasa kitai. (Bacha Jaku Dalam 4:23.) Enti kitai enda bejimat, kitai engka belubah-lubah nitihka ulah sereta runding orang ke enda nyembah Jehovah. (Jaku Dalam 13:20; 1 Korint 15:33) Kitai mega engka alah dibai orang ke udah limpang ari Jehovah, main ti bepekit tauka pornografi.—Peda Nota Penutup 18.

10. Baka ni kitai ulih nyeliahka roh dunya?

¹⁰ Baka ni kitai ulih nyeliahka roh dunya? Kitai patut semak enggau Jehovah lalu ngelakka Iya ngiring kitai. Kitai seruran besampi minta roh kudus sereta bebendar ngereja pengawa Iya. Ketegal Jehovah pemadu bekuasa ba dunya raya, Iya tentu ulih nulung kitai.—1 John 4:4.

11. Baka ni roh dunya ulih ngachau chara orang begari sereta ngintu diri?

¹¹ Kitai nunjukka diri ukai enggi dunya ari chara begari sereta ngintu diri. Mayuh orang milih gari ngambika diperatika, meransang runding ti kamah, nunjukka pengaya sereta ulah ti ngelaban. Bisi mega orang ngena gari ti enda kemas sereta kamah  laban enda ibuhka gamal diri. Kitai enggai nitihka chara begari sereta ngintu diri ari orang ba dunya tu.

12, 13. Nama jaku lalau Bup Kudus ke ulih ngiring kitai lebuh milih gari ke dikena?

¹² Nembiak Jehovah patut ngena gari ti kemas, beresi, manah dipeda, lalu betempat. Kitai begari enggau “penumbas iya sereta menyana,” kena nunjukka kitai ‘nangika Petara.’—1 Timoti 2:9, 10; Jude 21.

 ¹³ Chara kitai begari ulih nentuka runding orang pasal Jehovah sereta nembiak Iya. Kitai deka ngereja semua utai ‘ke mulia Petara.’ (1 Korint 10:31) Penumbas iya nyengkaum bebasaka runding sereta asai ati orang bukai. Nya alai, lebuh milih gari sereta chara ngintu diri, kingatka pemutus kitai bisi empas ba orang bukai.—1 Korint 4:9; 2 Korint 6:3, 4; 7:1.

14. Nama patut diperundingka kitai lebuh milih gari ke gempuru tauka pengawa nginjil?

¹⁴ Baka ni kitai patut begari lebuh ba gempuru tauka maya nginjil? Kati chara kitai begari minta diperatika tauka ngasuh orang enda nyamai ati? Kati kitai ngasaika orang bukai nadai hak madahka penemu sida pasal chara kitai begari? (Pilipi 4:5; 1 Peter 5:6) Endang amat, kitai deka manah dipeda. Tang ba Jehovah, kualiti Kristian kitai nya pemadu beguna. Kingatka, ‘pemajik kitai datai ari ati kitai ti bendar . . . , ti pemadu berega di mua Petara.’—1 Peter 3:3, 4.

15. Nama kebuah Jehovah enda meri kitai lis ti panjai pasal chara begari sereta ngintu diri?

¹⁵ Jehovah enda meri kitai lis ti panjai pasal chara begari sereta ngintu diri. Tang, Iya meri kitai jaku lalau Bup Kudus kena nulung kitai ngaga pemutus ti manah. (Hebrew 5:14) Iya deka kitai ngaga pemutus ti nunjukka kitai rinduka Iya sereta orang bukai. (Bacha Mark 12:30, 31.) Ba serata dunya, nembiak Jehovah bisi mayuh gaya begari, nitihka bansa enggau utai ti dikerinduka sida. Tu endang ngerinduka ati!

16. (a) Baka ni penemu dunya pasal duit enda sejalai enggau ajar Jesus? (b) Nama tanya ke patut diperundingka kitai?

¹⁶ Sitan deka orang berunding duit enggau reta tengkira ulih mai pengelantang ti bendar. Tang nembiak Jehovah nemu tu enda betul. Jesus madahka: “Pengidup mensia ukai bepanggai ba pemayuh reta tengkira.” (Luke 12:15) Duit enda ulih meri pengaga ati, bakih ti bendar, pengelantang ba runding tauka pengidup ti meruan. Endang amat,  kitai begunaka duit sereta deka idup lantang. Tang nitihka ajar Jesus, kitai deka bisi pengelantang ti bendar enti kitai ngenuluka sembah kitai sereta bisi kaul ti manah enggau Petara. (Matthew 5:3; 6:22) Tanya diri empu: ‘Kati aku ngembuan runding dunya pasal duit? Kati aku selalu berandau sereta berunding pasal duit?’—Luke 6:45; 21:34-36; 2 John 6.

17. Nama penguntung enti kitai nulak penemu dunya pasal duit?

¹⁷ Enti kitai ngenuluka Jehovah sereta nulak penemu dunya pasal duit, pengidup kitai deka bisi reti. Kitai deka puas ati sereta ngasaika pengelantang ba runding enggau ati kitai. (Matthew 6:31, 32; Rome 15:13) Kitai enda kelalu irau pasal reta tengkira. (Bacha 1 Timoti 6:9, 10.) Kitai deka ngasaika pengelantang ti bendar enti kitai gerah jari. (Kereja Rasul 20:35) Kitai bisi mayuh agi awak begulai enggau orang ti dikesayau sereta ulih tinduk jenak.—Pengajar 5:12.

18. Nama deka digaga Sitan ngagai kitai?

¹⁸ Sitan deka ngerusakka kaul kitai enggau Jehovah. Nya alai, kitai enggau naka ulih nyaga kaul nya. Kitai patut “ngelaban kuasa roh ti jai.” (Epesus 6:12) Sitan enggau bala melikat ti jai enggai kitai gaga ati tauka idup meruan. (1 Peter 5:8) Taja pan sida amat kering, tang Jehovah ulih nulung kitai ngalahka sida!

19. Baka ni Epesus 6:14-18 ngambarka “kereban perang” orang Kristian?

 ¹⁹ Ba jeman kelia, bala soldadu ngena semua perengka perang kena ngelindung diri lebuh beperang. Enggau chara ti sama, kitai patut ngena “kereban perang ari Petara.” (Epesus 6:13, NWT) Kereban tu ulih ngelindung kitai. Bup Kudus madahka: “Nya alai bediri tegap kita, lalu tanchangka pemendar nyadika belulang ba punggung kita, enggau pengelurus nyadika terabai dada kita, sereta ati ti seruran sedia deka nusui Berita Manah pasal pemaik, nyadika kasut kita. Nambahka nya, ambi pengarap nyadika terabai ti besai kena kita madamka semua laja ti beapi-api ti ditimbakka Sitan. Lalu ambi mega pengelepas nyadika selapuk besi kita, enggau jaku Petara nyadika pedang ti diberi roh kudus Petara. Besampi di baruh iring roh kudus tiap kali kita besampi, ngena semua macham sampi enggau peminta.”—Epesus 6:14-18, NWT.

20. Nama patut digaga kitai ngambika “kereban perang” ulih ngelindung kitai?

²⁰ Enti seiku soldadu enda ngena siti ari kereban perang, munsuh iya deka nyerang begian tubuh ti enda dilindung. Nya alai, kitai patut ngena semua “kereban perang” ba sebarang maya lalu nentuka iya dijaga enggau manah. Kitai deka terus beperang seagi-agi Sitan, dunya iya, enggau bala melikat ti jai agi bisi. (Pemandang 12:17; 20:1-3) Nyadi, enti kitai benung beperang ngelaban pengingin ti bedosa sereta pengelemi diri, anang meh ngalahka diri!—1 Korint 9:27.

21. Baka ni kitai ulih ngalahka Sitan?

 ²¹ Kitai enda ulih ngelaban Sitan enti nadai tulung ari Jehovah. Nya alai, kitai patut besampi ngagai Jehovah, belajarka Bup Kudus, sereta begulai enggau bala menyadi Kristian kitai. (Hebrew 10:24, 25) Enggau ngereja tu, kitai ulih mengkang taluk ngagai Petara sereta sedia ngetanka pengarap kitai.

22, 23. (a) Baka ni kitai ulih seruran besedia ngetanka pengarap kitai? (b) Nama deka dikerandauka kitai ba Pelajar 6?

²² Saksi-Saksi Jehovah bisi penemu ti enda sebaka enggau pengarap bukai ba sekeda pekara. Nya alai, kitai patut seruran besedia ngetanka pengarap kitai. (John 15:19) Tanya diri empu: ‘Kati aku meretika kebuah Saksi-Saksi Jehovah ngaga pemutus tu? Kati aku andalka utai ti dipadah Bup Kudus sereta ulun ke tetap ati sereta bepenemu-dalam? (Matthew 24:45; John 17:17) Kati aku temegah ati nyadi seiku ari Saksi-Saksi Jehovah? (Masmur 34:2; Matthew 10:32, 33) Ulih aku nerangka pengarap aku ngagai orang bukai?’—Bacha 1 Peter 3:15, 16.

²³ Kesuah agi, kitai nemu nama patut digaga ngambika enda nitihka roh dunya. Sitan nguji nipu kitai ngena mayuh chara. Siti chara ke dikena iya nya pemerindang. Nya alai, baka ni kitai ulih milih pemerindang enggau manah? Tu deka dikerandauka kitai ba Pelajar 6.