1-3. (a) Nama siti pemeri ti diberi Jehovah ngagai kitai? Baka ni kitai engka ngena pemeri nya enggau chara ti salah? (b) Baka ni kitai patut ngena pemeri nya?

 SEIKU apai gaga ati meri anak iya basikal. Tang anak iya enda bejimat ngena basikal lalu ngemediska orang bukai. Nama asai ati apai nya?

² “Semua pemeri ti menyana, ti pemadu badas” datai ari Jehovah. (James 1:17) Siti pemeri ari Jehovah nya penau bejaku. Kitai ngena pemeri tu madahka runding sereta asai ati kitai, mansutka jaku ti meransang sereta ngelantangka ati orang. Tang utai ke disebut kitai mega ulih ngemediska ati orang.

³ Jehovah ngajar kitai chara ngena pemeri tu enggau manah. Iya madah ngagai kitai: “Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga.” (Epesus 4:29) Aram kitai  berandau baka ni kitai ulih ngena pemeri tu enggau chara ti ngelantangka ati Petara sereta meransang orang bukai.

4, 5. Nitihka bup Jaku Dalam, nama kebuah kitai patut bejimat lebuh bejaku?

⁴ Jaku bisi kuasa. Nya alai, kitai patut bejimat enggau chara kitai bejaku. Jaku Dalam 15:4 madah: “Jaku ti siru mai pengidup, tang jaku ti jai ngelemika semengat.” Jaku ti siru ulih ngelantangka ati orang ke ninga. Tang, jaku ti jai ngemediska ati orang sereta ngasuh sida lemi semengat.—Jaku Dalam 18:21.

⁵ Jaku Dalam 12:18, madah: “Leka jaku ti disebut enggau enda berunding, ngasuh ati balat telih baka [‘diachuk,’ NWT ] pedang, tang jaku ti disebut enggau bejimat, ulih nyuman.” Kala nuan pedis ati maya orang jai jaku enggau nuan? Amat, jaku ti kasar ulih ngemediska ati sereta ngerusakka kaul. Tang jaku ti disebut enggau bejimat ulih nyuman ati ti pedis sereta ngemanahka kaul. (Bacha Jaku Dalam 16:24.) Jaku kitai ulih ngasuh orang gaga tauka tusah ati. Nya alai, kitai patut bejimat lebuh bejaku.

6. Nama kebuah enda senang nyaga jaku kitai?

⁶ Siti agi kebuah kitai patut bejimat enggau jaku kitai, iya nya kitai enda sempurna. Runding mensia “endang jai,” lalu utai ke disebut kitai mandangka utai dalam ati kitai. (Pemungkal 8:21; Luke  6:45) Nya alai, enda senang nyaga jaku kitai. (Bacha James 3:2-4.) Taja pia, kitai patut bebendar ngemanahka chara kitai bejaku.

7, 8. Baka ni jaku kitai ulih ngachau kaul kitai enggau Jehovah?

⁷ Kitai mega patut bejimat enggau jaku kitai laban tu ulih ngachau kaul kitai enggau Jehovah. James 1:26 madah: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.” Nya alai, enti kitai enda bejimat enggau jaku kitai, tu ulih ngerusak kaul kitai enggau Jehovah.—James 3:8-10.

⁸ Endang terang, kitai bisi kebuah ti manah patut bejimat enggau chara kitai bejaku. Kena nulung  kitai bejaku enggau chara ti ngelantangka ati Jehovah, kitai patut nemu gaya jaku ti patut diseliahka.

9, 10. (a) Nama gaya jaku ti selalu dikena orang kemayaharitu? (b) Nama kebuah kitai enda ngena jaku ti kamah?

⁹ Mayuh orang ngena jaku ti kamah tauka enda senunuh kemayaharitu. Sida nyumpah orang sereta ngena jaku ti kamah kena madahka asai ati. Bisi mega orang ngena jaku tundi ti kamah ngasuh orang ketawa. Tang rasul Paul madah: “Buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah.” (Kolosi 3:8) Iya mega madah orang Kristian ti bendar “enda patut” nyebut jaku ti “enda senunuh.”—Epesus 5:3, 4.

¹⁰ Jehovah enggau nembiak Iya begedika jaku ti enda senunuh. Gaya jaku tu kamah lalu siti ari pengawa ti bedosa. Ba Bup Kudus, leka jaku “kamah” nyengkaum bemacham bengkah dosa. (Galatia 5:19-21) Enti seiku orang berengkah bisi ulah ti enda tuchi, tu tau ngujungka iya ngereja mayuh agi ulah ti enda tuchi. Orang ke selalu ngena jaku ti kamah lalu enggai berubah deka dibuai ari gerempung.—2 Korint 12:21; Epesus 4:19; peda Nota Penutup 23.

11, 12. (a) Nama reti bejakuka orang? (b) Nama kebuah kitai enda patut betenahka orang bukai?

¹¹ Kitai mega enda patut bejakuka orang. Enda salah kitai ibuhka orang bukai lalu bekunsi rita pasal kaban sereta diri sebilik. Orang Kristian ba  kurun ti keterubah mega bisi ngereja pengawa nya. (Epesus 6:21, 22; Kolosi 4:8, 9) Taja pia, randau baka nya ulih ngujungka kitai bejakuka orang. Kitai engka madah utai ti enda betul tauka utai ti ngemaluka orang nya. Enti kitai enda bejimat, tu ulih ngujungka kitai betenahka orang. Orang Parasi betenahka Jesus lebuh sida ngaga tuduh ti pelesu pasal iya. (Matthew 9:32-34; 12:22-24) Jaku petenah ngenyaika nama orang, ngujungka laya sereta ngerusakka kaul.—Jaku Dalam 26:20.

¹² Jehovah deka kitai meransang sereta nulung orang ngena jaku kitai. Jehovah begedika orang ti “nyungkak pengachau nyadi entara pangan.” (Jaku Dalam 6:16-19) Sitan ngepun pengawa betenah lebuh iya betenahka Petara. (Pemandang 12:9, 10) Kemayaharitu, orang selalu betenahka pangan diri. Tang orang Kristian enda patut ngereja nya. (Galatia 5:19-21) Nya alai, kitai patut bejimat enggau jaku kitai lalu seruran berunding sebedau bejaku. Sebedau nampung cherita pasal orang bukai, tanya diri empu: ‘Kati nya manah, meransang tauka amat? Kati aku berani madahka cherita tu enti orang nya bisi ditu? Nama asai ati aku enti orang nusui utai ti sama pasal aku?’—Bacha 1 Tesalonika 4:11.

13, 14. (a) Nama nyadi ngagai orang ke ninga jaku ransi? (b) Nama reti jaku ti bejai orang? Nama kebuah orang Kristian enda patut ngena gaya jaku nya?

¹³ Semua orang kala nyebut utai ti enda manah pasal orang bukai. Tang kitai patut muai tebiat  tu. Kitai enggai sekali-kali ngena jaku ransi. Paul madah: “Buai semua dengki, tebiat ngeransi, pengeringat, jaku laya, tebiat bejakuka orang.” (Epesus 4:31) Jaku ransi ulih mai reti “jaku ti jai,” “jaku ti ngemediska,” sereta “jaku ti ngemaluka.” Gaya jaku tu ngemaruhka orang bukai sereta ngasuh sida berasai nadai guna. Ketegal anak mit senang agi pedis ati, kitai patut bejimat lebuh bejaku ngambika sida enda lemi semengat.—Kolosi 3:21.

¹⁴ Bup Kudus ngasuh kitai nyeliahka jaku ti bejai orang. Seseiku orang ke ngena gaya jaku tu enda ngetu ngemaruhka sereta ngemediska ati orang bukai. Enti iya enggai berubah, iya deka dibuai ari gerempung. (1 Korint 5:11-13; 6:9, 10) Nitihka utai ke udah dipelajar, enti kitai ngena jaku ti kamah, bula tauka jai, kitai ulih ngerusak kaul enggau Jehovah sereta orang bukai.

15. Nama gaya jaku ti negapka kaul?

¹⁵ Baka ni kitai ulih ngena pemeri bejaku nitihka peneka Jehovah? Bup Kudus enda madah enggau silik utai ti patut tauka utai ti enda patut disebut. Tang kitai diperansang “semina nyebut jaku ti manah kena ngemansangka.” (Epesus 4:29) Jaku ti dikena ngemansangka nya jaku ti beresi, nelap sereta amat. Jehovah deka kitai meransang sereta nulung orang ngena jaku kitai. Tang tu enda senang, laban kitai suah agi mansutka jaku ti jai ari jaku ti  ngemansangka. (Titus 2:8) Nya alai, aram kitai berandauka sekeda chara kitai ulih ngena jaku meransang orang bukai.

16, 17. (a) Nama kebuah kitai patut muji orang bukai? (b) Sapa ke tau dipuji kitai?

¹⁶ Jehovah enggau Jesus selalu meri jaku puji. Ulih kitai nunda teladan seduai iya? (Matthew 3:17; 25:19-23; John 1:47) Ngambika ulih muji orang ari ati, kitai patut ibuhka sida sereta berunding dulu sebedau bejaku. Jaku Dalam 15:23 madah: “Naka meh pengaga tetemuka leka jaku ba maya ti ngena.” Endang amat, kitai amat diperansang maya orang bukai muji sereta beterima kasih enggau pengawa kitai.—Bacha Matthew 7:12; peda Nota Penutup 27.

¹⁷ Enti nuan selalu meda pemanah orang bukai, nuan senang agi muji sida. Sapa ke tau dipuji nuan? Ambika chunto, nuan ulih muji nembiak Kristian ti ngetanka pengarap ba sekula, menyadi Kristian ke tuai ti selalu enggau pengawa nginjil, sereta menyadi Kristian ti bebendar nyediaka cheramah tauka meri saut ba gempuru. Laki ulih madahka diri rinduka bini sereta beterima kasihka pengawa bini iya. (Jaku Dalam 31:10, 28) Baka utai tumbuh ti begunaka ai enggau panchar mata panas, orang mega begunaka jaku puji, kelebih agi anak mit. Giga meh peluang muji pemanah enggau pengawa sida. Jaku puji ulih meransang sida nyadi berani, andal agi enggau diri empu, sereta bebendar agi ngereja utai ti betul.

18, 19. Nama kebuah kitai enggau naka ulih meransang sereta ngelantangka ati orang bukai? Baka ni kitai ulih ngereja nya?

 ¹⁸ Lebuh kitai meransang sereta ngelantangka ati orang bukai, kitai nunda teladan Jehovah. Iya amat ibuhka “orang ke tusah ati.” (Masmur 147:3) Jehovah deka kitai meransang pangan diri sereta “meransang orang ke takut [tauka, ‘balat tusah ati,’ NWT].” (1 Tesalonika 5:11, 14) Iya meda sereta beterima kasih lebuh kitai enggau naka ulih meransang orang bukai.

¹⁹ Kati nuan nemu menyadi Kristian ke benung tusah ati? Baka ni nuan ulih ngelantangka ati iya?  Taja pan nuan enda ulih mutarka penanggul iya, nuan ulih nunjukka diri ibuhka iya. Ulih nuan nyediaka awak begulai enggau iya? Nuan mega ulih macha ayat Bup Kudus ti meransang tauka besampi enggau iya. (Masmur 34:18; Matthew 10:29-31) Padah ngagai iya, bala menyadi Kristian amat sayauka iya. (1 Korint 12:12-26; James 5:14, 15) Lalu tentuka jaku nuan endang amat sereta ari ati.—Bacha Jaku Dalam 12:25.

20, 21. Baka ni kitai ulih meri jaku lalau ke senang diterima orang bukai?

²⁰ Kitai ulih ngemansangka orang bukai lebuh  meri jaku lalau ti manah. Semua kitai enda sempurna lalu begunaka jaku lalau. Ku Jaku Dalam 19:20: “Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila.” Kati semina tuai gempuru aja ke ulih meri jaku lalau? Enda. Apai indai bisi tanggung pengawa ngiring anak sida. (Epesus 6:4) Lalu menyadi Kristian ke indu ulih meri jaku lalau ngagai pangan diri. (Titus 2:3-5) Tang baka ni kitai ulih meri jaku lalau ke senang diterima?

²¹ Kala nuan diberi jaku lalau ke senang diterima? Nama kebuah orang ke meri jaku lalau nya mujur? Laban nuan ulih ngasaika iya ibuhka nuan. Iya meri jaku lalau ngena Bup Kudus lalu iya bejaku enggau chara ti nelap sereta bepengerindu. (Kolosi 4:6; 2 Timoti 3:16) Kingatka, jaku lalau ke diberi kitai patut sejalai enggau ajar Bup Kudus. Kitai enda mejal orang nerima penemu kitai, tauka sengaja ngelimpangka ajar Bup Kudus kena nyukung penemu diri empu. Enti kitai nitihka chara tu, kitai ulih meri jaku lalau ti manah.

22. Baka ni nuan deka ngena penau bejaku ke diberi Petara?

²² Penau bejaku nya pemeri ari Petara. Ketegal kitai rinduka Iya, kitai deka ngena pemeri nya enggau manah. Kingatka, jaku kitai bisi kuasa ngemansangka tauka ngelemika semengat orang. Nya alai, kena meh jaku ti ulih meransang sereta negapka pangan diri.