PELAJAR 10
Pengawa Melaki-Bini—Pemeri ari Petara
“Tali begembar tiga, mar diputuska.”—PENGAJAR 4:12.
1, 2. (a) Nama dikearapka orang ke baru jadi melaki-bini? (b) Nama tanya ti deka dikerandauka kitai ba pelajar tu?
GAMBARKA sepasang laki bini ke baru jadi. Seduai amat gagit ati. Seduai ngarapka ulih idup begulai belama-lama iya.
2 Tang, mayuh laki bini enda meruan begulai. Ngambika ulih idup begulai enggau gaga ati, sida begunaka iring Petara. Nya alai, kitai deka berandauka saut Bup Kudus ngagai tanya tu: Nama penguntung iya enti kawin? Baka ni nuan ulih milih kaling pengidup enggau manah? Baka ni nuan ulih nyadi laki tauka bini ti manah? Nama ulih nulung laki bini meruan begulai?—Bacha Jaku Dalam 3:5, 6.
PATUT AKU KAWIN?
3. Kati seseiku orang patut kawin ngambika ulih gaga ati? Terangka.
3 Sekeda orang ngumbai sida semina ulih gaga ati enti sida kawin. Tang tu enda betul. Jesus madahka pengidup bujang dara nya siti pemeri. (Matthew 19:11, 12) Lalu rasul Paul bisi madahka sekeda penguntung enti enda kawin. (1 Korint 7:32-38) Nya alai, sekalika nuan deka kawin tauka enda, tu pemutus nuan. Nuan enda patut nejuka bala bakih, diri sebilik tauka adat ba endur nuan diau nekan nuan kawin.
4. Nama penguntung iya enti bisi tikah ti manah?
4 Bup Kudus madahka pengawa melaki-bini mega pemeri ari Petara lalu bisi penguntung. Ku Jehovah madah pasal mensia keterubah, Adam: “Enda manah orang tu diau kediri. Aku deka ngaga siku penulung ke iya, nyadika tawing kaling iya.” (Pemungkal 2:18) Jehovah ngaga Awa nyadika bini Adam. Seduai iya nyadi ruang bilik mensia ti keterubah. Enti laki bini bisi anak, tikah seduai patut tegap ngambika ulih ngemesaika anak ba endur ti likun. Tang tuju deka kawin ukai semina deka bisi anak.—Masmur 127:3; Epesus 6:1-4.
5, 6. Baka ni tikah ulih disemaka baka “tali begembar tiga”?
5 Raja Solomon nulis: “Dua iku manah agi ari siku, laban enti seduai iya begulai, seduai iya bulih agi gawa. Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya. . . . Tali begembar tiga, mar diputuska.”—Pengajar 4:9-12.
6 Laki bini ke bisi tikah ti manah nya kaling ti pemadu rapat. Seduai iya nulung, meransang sereta nyaga pangan diri. Pengerindu ulih negapka kaul seduai iya, tang kaul tu nyadi kering agi enti laki bini nyembah Jehovah. Enti seduai ngenuluka Jehovah, tikah sida deka nyadi baka “tali begembar tiga.” Tali ke begembar tiga teguh agi ari tali ke begembar dua. Nya alai, kaul laki bini deka nyadi teguh agi enti seduai ngenuluka Jehovah.
7, 8. Nama jaku lalau ke diberi Paul pasal tikah?
7 Pengudah kawin, laki bini ulih lantang ati ari pengawa besetubuh. (Jaku Dalam 5:18) Tang, enti seseiku orang milih deka kawin ketegal deka ngemuaska pengingin seks, iya engka tusah deka milih kaling pengidup enggau manah. Nya alai Bup Kudus madahka, manah agi enti orang kawin pengudah “chukup umur,” iya nya maya pengingin seks nyau kurang. (1 Korint 7:36, NWT) Enti iya nganti dulu, iya ulih berunding lalu ngaga pemutus ti manah. —1 Korint 7:9; James 1:15.
8 Enti nuan deka kawin, kingatka tiap iti tikah bisi penanggul kediri empu. Paul madahka, orang ke kawin “deka dituntung penusah.” (1 Korint 7:28) Indah tikah ti pemadu manah deka napi penusah. Nya alai, enti nuan deka kawin, pilih meh kaling pengidup nuan enggau manah.
SAPA KE ULIH NYADI KALING PENGIDUP AKU?
9, 10. Nama nyadi enti kitai kawin enggau orang ke enda nyembah Jehovah?
9 Lebuh milih kaling pengidup, kingatka jaku lalau Bup Kudus: “Anang besulu enggau orang ke enda arap.” (2 Korint 6:14) Maya rasul Paul nulis jaku lalau nya, iya berundingka pasal pengawa nangkun dua iku jelu ti dikena bumai. Pekebun enda ngena dua iku jelu ke enda sama pemesai tauka pengering laban tu ulih ngasuh jelu nya merinsa. Pia mega, enti nembiak Jehovah jadi enggau orang ke enda nyembah Jehovah, tu deka mai penusah. Nya alai, Bup Kudus ngasuh kitai semina kawin enggau ‘nembiak Tuan.’—1 Korint 7:39.
10 Kekadang, bisi sekeda orang Kristian ngumbai manah agi jadi enggau orang ke enda nyembah Jehovah ari ke idup kediri. Tang enti kitai enda nitihka jaku lalau Bup Kudus, asil iya kitai deka majak tusah sereta enda gaga ati. Sembah kitai ke Jehovah nya utai ti pemadu beguna ba pengidup kitai. Baka ni asai ati nuan enti enda ulih ngereja utai ti pemadu beguna tu enggau kaling pengidup? Nya alai, mayuh bala menyadi mutuska enda kawin ari ke jadi enggau orang ti enda rindu sereta enda nyembah Jehovah.—Bacha Masmur 32:8.
11. Baka ni nuan ulih milih kaling pengidup enggau manah?
11 Tang ukai semua ke nyembah Jehovah ulih nyadi ke laki tauka bini. Enti nuan deka kawin, giga meh orang ti amat dikerinduka nuan sereta nyamai enggau begulai. Giga meh orang ke bisi juluk ati ti sebaka sereta ngenuluka Petara. Bacha sereta belematika jaku lalau pasal pengawa melaki-bini ti disediaka ulun ke tetap ati ba litaricha.—Bacha Masmur 119:105.
12. Nama ulih dipelajarka kitai pasal Abraham lebuh iya milih bini ke anak iya?
12 Ba sekeda menua, apai indai milih kaling pengidup ke anak sida. Adat tu mega biasa nyadi ba jeman Bup Kudus. Enti diri sebilik nuan nitihka adat tu, Bup Kudus ulih ngiring apai indai ngaga pemutus ti manah. Ambika chunto, lebuh Abraham milih bini ke anak iya Isak, iya ngiga indu ti rinduka Jehovah, ukai indu ti kaya tauka bepangkat tinggi.—Pemungkal 24:3, 67; peda Nota Penutup 25.
BAKA NI AKU NYEDIAKA DIRI DEKA KAWIN?
13-15. (a) Baka ni seiku lelaki nyediaka diri nyadi laki ti manah? (b) Baka ni seiku indu nyediaka diri nyadi bini ti manah?
13 Enti nuan deka kawin, perundingka tanya tu, “Kati aku amat udah sedia?” Aram kitai ngiga saut ke tanya tu.
Nyediaka awak macha sereta belematika jaku lalau Bup Kudus pasal tikah
14 Bup Kudus madahka lelaki enggau indu bisi tanggung pengawa ti enda sebaka. Enti nuan seiku lelaki, nuan patut nentuka diri udah sedia nyadi tuai bilik. Jehovah deka laki nyediaka utai ti diguna bini enggau bala anak sereta nyaga emosi sida. Tang beguna agi, laki enda tau enda ngiring diri sebilik nyembah Jehovah. Bup Kudus nerangka lelaki ti enda nyaga ruang bilik iya, “jai agi ari orang ke enda arap.” (1 Timoti 5:8) Nya alai, enti nuan deka kawin, perundingka jaku lalau Bup Kudus tu: “Sediaka pengawa nuan di luar, sediaka umai nuan; udah nya baru nuan nirika rumah.” Reti iya, sebedau nuan kawin, tentuka nuan ulih megai tanggung pengawa ti diberi Jehovah.—Jaku Dalam 24:27.
15 Enti nuan seiku indu, nuan patut nentuka diri udah sedia megai tanggung pengawa nyadi bini sereta indai. Bup Kudus bisi nerangka baka ni bini ti manah nyaga laki sereta anak iya. (Jaku Dalam 31:10-31) Kemayaharitu, mayuh orang semina berundingka utai ke dikingin ari kaling sida. Tang Jehovah deka kitai berundingka utai ke ulih diberi kitai ngagai kaling pengidup.
16, 17. Nama patut dibelematika nuan enti nuan deka kawin?
16 Sebedau nuan kawin, belematika utai ke dipadah Jehovah pasal laki enggau bini. Taja pan laki tuai bilik, iya enda ulih ngemediska bini ba tubuh tauka emosi. Laki ti manah nunda Jesus ke seruran ngayanka pengerindu sereta pemanah ngagai eklisia. (Epesus 5:23) Bini patut nyukung pemutus laki iya sereta besaup enggau iya. (Rome 7:2) Indu ke deka kawin patut berunding sekalika iya ulih gaga ati nunduk ngagai lelaki ti enda sempurna. Enti iya ngasaika diri enda ulih naka ke diatu, manah agi iya anang guai kawin.
17 Laki enggau bini patut ngenuluka pengelantang pangan diri. (Bacha Pilipi 2:4.) Ku Paul: “Genap iku kita patut rinduka bini diri, baka kita ke rinduka diri empu, lalu bini patut masa laki.” (Epesus 5:21-33) Semua orang deka dikerindu sereta dipebasa. Nya alai, enti deka tikah ti lantang, laki patut ngasaika bini iya bebasaka iya, lalu bini patut nemu laki iya rinduka iya.
18. Nama kebuah kitai patut bejimat lebuh bepangan?
18 Lebuh bepangan, nya meh maya lelaki enggau indu ulih ngelala pangan diri enggau manah agi, sekalika seduai iya patut kawin tauka enda. Sida belajar chara bejaku enggau pangan diri sereta nemu asai ati pangan diri. Lebuh kaul sida nyau rapat, penyayau seduai majak dalam, lalu pengingin deka semak ngagai pangan diri mega majak balat. Tang seduai patut nagang diri ngambika enda ngereja ulah ti kamah sebedau kawin. Pengerindu ti bendar nulung sida nyeliahka ulah ti ulih ngerusak kaul enggau pangan diri sereta enggau Jehovah.—1 Tesalonika 4:6.
Lebuh bepangan, seiku lelaki enggau seiku indu belajar chara bejaku enggau pangan diri
BAKA NI TIKAH AKU ULIH MERUAN?
19, 20. Nama runding orang Kristian pasal tikah?
19 Mayuh bup enggau cherita mandangka laki bini ti gaga ati ba hari seduai jadi. Tang kebendar iya, pengawa melaki-bini semina pun aja. Jehovah deka laki bini meruan begulai.—Pemungkal 2:24.
20 Kemayaharitu, mayuh orang ngumbai tikah sida ukai utai ti tetap. Lebuh napi penanggul, sida mutuska diri deka sarak. Tang kingatka sempama ke dikena Bup Kudus pasal tikah. Tikah nya baka tali begembar tiga. Taja pan napi mayuh penanggul, tang tali nya enda putus. Enti kitai minta iring Jehovah, tikah kitai ulih tan. Ku Jesus: ‘Nadai orang tau nyeraraka utai ti udah ditampilka Petara.’—Matthew 19:6.
21. Nama ulih nulung laki bini rinduka pangan diri?
21 Semua kitai bisi pemanah sereta pengelemi. Kitai senang meda pengelemi orang bukai, kelebih agi pengelemi kaling pengidup. Tang enti kitai ngereja nya, kitai tusah deka gaga ati. Kitai patut betatika pemanah kaling kitai. Nya baru kitai bisi tikah ti lantang. Tang kati laki bini ulih bisi runding ti manah taja pan sama enda sempurna? Au. Jehovah nemu kitai enda sempurna, tang Iya milih meda pemanah kitai. Seiku pemasmur madahka: ‘Enti Nuan, O Jehovah nuliska dosa kami, sapa tan?’ (Masmur 130:3) Lebuh laki bini milih meda pemanah kaling sida sereta sedia ngampun pangan diri, tu nunjukka sida nunda Jehovah.—Bacha Kolosi 3:13.
22, 23. Baka ni Abraham enggau Sarah netapka teladan ti manah ke laki bini?
22 Nyau kelama, kaul laki bini ulih nyadi majak teguh. Abraham enggau Sarah bisi tikah ti lantang. Lebuh Jehovah ngasuh Abraham ninggalka menua Ur, umur Sarah engka lebih ari 60 taun. Tentu enda senang ba Sarah ninggalka rumah lalu diau ba langkau kain. Tang iya bini ti manah, lalu amat bebasaka laki iya. Nya alai, iya nyukung pemutus Abraham enggau pengabis ati.—Pemungkal 18:12; 1 Peter 3:6.
23 Taja pia, tu ukai reti iya Abraham seduai Sarah selalu sepenemu. Bisi sekali, Abraham enda sepenemu enggau Sarah. Tang Jehovah madahka Abraham: “Kereja aja sebarang utai ti diasuh Sarah.” Abraham ningaka Jehovah lalu bulih asil ti manah. (Pemungkal 21:9-13) Kekadang, nuan enggau kaling nuan engka enda sepenemu. Lebuh nya nyadi, anang asa ati. Enggau naka ulih mandangka pengerindu sereta basa taja pan enda sepenemu.
Bepanggai meh ba Bup Kudus kena ngiring tikah seduai
24. Baka ni tikah kitai ulih ngemuliaka Jehovah?
24 Ba gerempung Saksi-Saksi Jehovah, bisi beribu pasang laki bini ti lantang. Enti nuan deka kawin, pilih meh kaling pengidup enggau manah. Tu pemutus ti berat. Nya alai, giga meh iring ari Jehovah. Enti nuan ngereja nya, nuan ulih milih kaling pengidup enggau manah, nentuka diri udah sedia deka kawin sereta ngemansangka pengerindu enggau pangan diri ngambika ulih ngemuliaka Jehovah.
^ 1 Korint 7:36 (NWT): “Tang enti orang ke bedau kawin ngasaika diri enda ulih tetagangka pengingin seks, lalu iya udah chukup umur, manah agi iya kawin. Utai tu nadai pulai ke dosa.”