PELAJAR 1
Pengerindu entara Petara enggau Kitai Tan Belama Iya
‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 JOHN 5:3.
1, 2. Nama kebuah nuan rinduka Petara Jehovah?
KATI nuan rinduka Petara? Nuan engka amat rinduka Iya lalu nyerahka diri ngagai Iya. Nuan engka ngumbai Iya Pangan ti pemadu manah. Tang sebedau nuan berengkah rinduka Jehovah, Iya udah rinduka nuan. Ku Bup Kudus: ‘Kitai rindu laban Petara udah dulu rinduka kitai.’—1 John 4:19.
2 Baka ni kitai nemu Jehovah rinduka kitai? Iya udah meri dunya ti manah endur kitai diau. Iya mega meri utai bukai kena kitai idup lantang. (Matthew 5:43-48; Pemandang 4:11) Jehovah udah muka jalai ngambika kitai ulih belajar pasal Iya, lalu bisi kaul ti manah enggau Iya. Lebuh kitai macha Bup Kudus, tu sempama kitai mendingka Iya. Lalu lebuh kitai besampi, Iya bisi ninga kitai. (Masmur 65:2) Iya ngiring sereta ngeringka kitai nengah roh kudus Iya. (Luke 11:13) Iya indah nganjung Anak ti dikesayau ke dunya ngambika ulih ngelepaska kitai ari dosa enggau pemati.—Bacha John 3:16; Rome 5:8.
3. Baka ni kitai ulih ngembuan kaul ti rapat enggau Jehovah?
3 Kati nuan bisi pangan tauka bakih ke seruran enggau nuan, enda ngira maya senang tauka tusah? Seduai enggau naka ulih ngetanka kaul nya ngambika terus rapat. Jehovah nya Pangan kitai ti pemadu rapat. Nya alai, Bup Kudus meransang kitai: ‘Meruan dalam pengerindu Petara.’ (Jude 21) Au, kitai tau ngembuan kaul ti meruan enggau Iya. Tang, nama patut digaga kitai? Ku Bup Kudus: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’—1 John 5:3.
“RETI RINDUKA PETARA”
4, 5. Baka ni pengerindu nuan ke Jehovah berengkah?
4 Nama meransang nuan “rinduka Petara”? Kati nuan agi ingat maya nuan berengkah rinduka Jehovah?
Lebuh nuan nyerahka diri ngagai Jehovah lalu dibaptisa, nuan nunjukka diri rindu sereta deka ngasika Jehovah belama iya
5 Kingatka baru asai ati nuan lebuh nemu Jehovah deka nuan idup belama iya ba dunya baru. Nuan belajar pasal semua utai ke digaga Iya ngambika tuju Iya ulih dikeamatka. Lalu nuan berasai beterima kasih laban Iya sanggup meri Anak Tunggal Iya mati ke nuan. (Matthew 20:28; John 8:29; Rome 5:12, 18) Lebuh nuan nemu Jehovah amat sayauka nuan, tu negu ati nuan. Nuan mega berengkah rinduka Iya.—Bacha 1 John 4:9, 10.
6. Nama digaga nuan enti nuan rinduka seseiku orang? Pengerindu nuan ke Jehovah meransang nuan ngereja nama?
6 Taja pia, pengerindu ke diasaika nuan semina pun aja. Ambika chunto, enti nuan rinduka seseiku orang, nuan ukai semina nyebut “Aku sayauka nuan.” Tang, pengerindu meransang nuan ngereja pengawa ti ulih ngagaka ati orang nya. Baka nya mega, pengerindu nuan ke Jehovah meransang nuan idup enggau chara ti ulih ngagaka ati Iya. Lebuh pengerindu nuan majak nambah, nuan mutuska deka nyerahka diri ngagai Iya lalu dibaptisa. Nuan besemaya deka nyembah Iya belama iya. (Bacha Rome 14:7, 8.) Baka ni nuan ulih ngamatka semaya nya?
“KITAI NGASIKA PESAN IYA”
7. Nama deka digaga kitai enti kitai rinduka Jehovah? Nama sekeda ari pesan Iya?
7 Laban kitai rinduka Jehovah, “kitai ngasika pesan Iya.” Nengah Bup Kudus, Jehovah madahka pesan Iya. Jehovah madah kitai enda tau mabuk, ngenchuri, bula, ngereja ulah seks ti kamah, tauka nyembah petara bukai.—1 Korint 5:11; 6:18; 10:14; Epesus 4:28; Kolosi 3:9.
8, 9. Baka ni kitai nemu runding Jehovah pasal sekeda pekara, kelebih agi enti nadai pesan ti silik ba Bup Kudus? Beri siti chunto.
8 Tang enti kitai deka ngerinduka ati Jehovah, semina ngasika pesan Iya enda chukup. Nama kebuah? Laban Jehovah enda meri lis pesan ti silik bekaul enggau gaya pengidup kitai. Kekadang, kitai enda tetemuka pesan ti nyemetak dalam Bup Kudus pasal sesiti pekara. Nama ulih nulung kitai ngaga pemutus ti manah? (Epesus 5:17) Bup Kudus ngembuan jaku lalau tauka prinsip ke ngajar kitai pasal runding Jehovah. Lebuh kitai macha Bup Kudus, kitai ulih nemu runding Iya. Tu nyengkaum utai ti dikerinduka Iya sereta utai ti dipegedika Iya.—Bacha Masmur 97:10; Jaku Dalam 6:16-19; peda Nota Penutup 1.
9 Ambika chunto, mayuh pemerindang kemayaharitu mandangka pengawa ti kasar sereta ulah seks. Baka ni kitai ulih milih pemerindang ti manah lebuh meda TV, tauka lebuh ngena Internet? Taja pan Jehovah enda madah enggau nyemetak utai ti patut digaga kitai, tang Iya meri kitai jaku lalau ngambika ulih ngaga pemutus ti manah. Ba Bup Kudus, Jehovah madahka “Iya begedika orang ke mangah” sereta ‘deka ngakim orang ke ngereja ulah [“seks,” NWT] ti kamah.’ (Masmur 11:5; Hebrew 13:4) Baka ni jaku lalau tu nulung kitai ngaga pemutus ti manah? Enti kitai nemu Jehovah begedika ulah nya, kitai patut nyeliahka nya.
10, 11. Nama kebuah kitai ngasika Jehovah?
10 Nama kebuah kitai ngasika Jehovah? Kitai ngasika Iya ukai ketegal kitai takut diukum tauka ditinggang penusah. (Galatia 6:7) Tang kitai ngasika Jehovah laban kitai rinduka Iya. Baka anak mit ke deka apai sida gaga ati, kitai mega deka Apai kitai Jehovah gaga ati. Endaka tu ngerinduka ati, lebuh nemu Jehovah gaga ati enggau kitai?—Masmur 5:12; Jaku Dalam 12:2; peda Nota Penutup 2.
11 Enda ngira senang tauka tusah, kitai deka ngasika semua pesan Jehovah. (Ulang Adat 12:32) Seiku pemasmur madahka: “Aku gaga ati ke pesan Nuan ti dikerinduka aku.” (Masmur 119:47; Rome 6:17) Kitai deka nitihka teladan Noah. Laban iya rinduka Jehovah, Bup Kudus madahka iya ‘ngereja semua utai nitihka asuh Petara.’ (Pemungkal 6:22) Nuan tentu deka Jehovah madahka utai ti sama pasal nuan!
12. Baka ni kitai ulih ngagaka ati Jehovah?
12 Baka ni asai ati Jehovah enti kitai ngasika Iya? Iya deka “lantang ati.” (Jaku Dalam 11:20; 27:11) Perundingka! Kitai ulih ngasuh Penempa dunya raya gaga ati enti kitai ngasika Iya. Tang Iya enda mejal kitai. Iya meri kitai peluang bibas milih. Kitai ulih milih ngereja utai ti betul tauka salah. Enti kitai rinduka Jehovah, kitai deka ngaga pemutus ti manah. Asil iya, pengidup kitai deka lantang.—Ulang Adat 30:15, 16, 19, 20; peda Nota Penutup 3.
“PESAN IYA UKAI UTAI TI MAR DITITIHKA”
13, 14. Baka ni kitai nemu pesan Jehovah enda tusah dititihka? Beri siti chunto.
13 Kati pesan Jehovah tusah dititihka tauka ngasuh kitai enda bibas milih? Bup Kudus enggau terang madahka: “Pesan Iya ukai utai ti mar dititihka.” (1 John 5:3) Leka jaku Gerika ke disalin “mar” mai reti “berat.” Ba ayat Bup Kudus ke bukai, leka jaku tu ngambarka adat ti kelalu terit, tauka orang ti nguasa sereta merinsaka orang bukai. (Matthew 23:4; Kereja Rasul 20:29, 30) Tang, kitai ulih nitihka pesan Jehovah, laban pesan Iya enda “berat.” Jehovah nemu utai ti ulih sereta ke enda ulih digaga kitai.
14 Ambika chunto, nuan nulung bakih nuan pindah rumah. Iya udah nyimpan barang iya dalam kutak. Sekeda kutak nya lempung lalu senang diangkat. Tang ke bukai nya berat lalu patut diangkat dua iku orang. Kati bakih nuan sanggup ngasuh nuan ngangkat kutak ke berat nya kediri aja? Tentu enda! Nama kebuah? Laban iya nemu tu ulih ngemediska nuan. Baka bakih nya, Jehovah mega enda ngasuh kitai ngereja pengawa ti kelalu tusah ba kitai. (Ulang Adat 30:11-14) Ku Bup Kudus: ‘Jehovah nemu utai ti udah dikena ngaga kitai. Iya ingatka kitai tu endang amau.’—Masmur 103:14.
15. Nama kebuah kitai nemu pesan Jehovah ke pemanah kitai?
15 Moses madah ngagai bansa Israel, pesan Jehovah nya ke pemanah sida. Enti sida ngasi, sida deka terus idup. (Ulang Adat 5:28-33; 6:24) Pia mega kemayaharitu, semua pesan ari Jehovah ke pemanah kitai. (Bacha Isaiah 48:17.) Apai kitai Jehovah nemu utai ti pemadu manah ke kitai. (Rome 11:33) Bup Kudus madahka: ‘Petara endang pengerindu.’ (1 John 4:8) Nya alai, semua jaku sereta pengawa Iya bepelasarka pengerindu.
16. Nama kebuah kitai ulih ngasika Petara taja pan kitai enda sempurna sereta diau ba dunya ti diperintah Sitan?
16 Ketegal kitai diau ba dunya ti diperintah Sitan, kekadang kitai tusah deka ngasika Petara. Sitan seruran deka orang ngereja utai ti jai. (1 John 5: 19) Kitai mega patut ngelaban runding sereta asai ati ke enda sempurna, ti tau ngujungka kitai enda ngasika Petara. (Rome 7:21-25) Tang pengerindu kitai ke Jehovah ulih meransang kitai ngereja utai ti betul. Jehovah nemu lebuh kitai bebendar ngasika Iya. Lalu Iya meri roh kudus kena nulung kitai. (1 Samuel 15:22, 23; Kereja Rasul 5:32) Roh kudus ulih nulung kitai ngemansangka pemanah ngambika kitai ulih ngasika Jehovah.—Galatia 5:22, 23.
17, 18. (a) Nama deka dipelajarka kitai ba bup tu? (b) Nama deka dikerandauka kitai ba Pelajar 2?
17 Dalam bup tu, kitai deka belajar chara idup ti ngelantangka ati Petara. Kitai mega belajar chara ulih ngena jaku lalau sereta standard moral Iya ba pengidup kitai. Kingatka meh, Jehovah enda mejal kitai ngasika Iya. Lebuh kitai milih deka ngasi, pengidup kitai ke diatu sereta jemah ila deka manah agi. Tang keberat agi, enti kitai ngasika Jehovah, tu nunjukka kitai amat rinduka Iya.—Peda Nota Penutup 4.
18 Kena nulung kitai nemu utai ti betul enggau utai ti salah, Jehovah udah meri tiap iku kitai penemu ati. Enti kitai ngelatih penemu ati, nya ulih nulung kitai “ngasika pesan Iya.” Tang, nama reti penemu ati, lalu baka ni kitai ngelatih iya? Kitai ulih belajarka nya dalam Pelajar 2.