1, 2. Enti laki bini napi penanggul, kati tu reti iya tikah seduai udah puntan? Terangka.

 TIKAH nya pemeri ari Jehovah, lalu ulih ngagaka ati. Taja pia, tiap tikah deka napi penanggul. Kekadang, penanggul tu baka ke enda nemu abis, nyentukka laki bini ngasaika kaul sida enda rapat baka suba.

² Anang tekenyit enti nuan napi penanggul ba tikah. Taja pan bisi penanggul, tu ukai reti iya tikah nuan udah puntan. Indah laki bini ke napi penanggul ti besai ulih ngemanahka kaul sereta ngeringka tikah sida. Baka ni chara iya?

3, 4. Nama ulih nyadi enggau kaul laki bini?

³ Tikah nyerakupka dua iku orang ti enda sebaka runding, chara ngereja sesiti utai sereta utai ti dikerinduka. Pia mega, laki bini engka enda sama bansa sereta ngembuan gaya pengidup ti enda sebaka. Nya alai, seduai iya begunaka awak kena ngelala sereta meretika pangan diri enggau manah.

 ⁴ Nyau kelama, laki bini engka enda entu rapat agi ketegal kelalu ibuhka pengawa diri empu. Nyadi, baka ni seduai iya ulih semak baru enggau pangan diri?

5. (a) Nama ulih nulung orang Kristian semak enggau kaling pengidup iya? (b) Nitihka Hebrew 13:4, nama runding kitai pasal tikah?

⁵ Jehovah nyediaka jaku lalau ti pemadu manah ngagai laki bini ngambika ulih semak enggau Iya sereta pangan diri. (Masmur 25:4; Isaiah 48:17, 18) Ku Iya madah: “Awakka adat melaki-bini dibasa semua orang.” (Hebrew 13:4) Jehovah dekaka kitai ngumbai tikah nya utai ti pemadu berega, ke patut dijaga sereta dibasa.

6. Nitihka Matthew 19:4-6, nama runding Jehovah pasal tikah?

⁶ Jehovah ngepunka pengawa tikah ti keterubah. Anak Iya, Jesus, madah: ‘Kati kita nadai udah kala macha pasal Petara ti ngaga mensia lelaki enggau indu kenyau ari pun kelia? Ku Iya bejaku, “Ketegal nya, lelaki deka ninggalka apai enggau indai iya, lalu begulai enggau bini iya, lalu seduai iya deka nyadi setubuh?” Seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Petara.’ (Matthew 19:4-6) Kenyau ari pun, Jehovah dekaka tikah nya meruan. Iya deka diri sebilik bisi kaul ti manah sereta lantang ati begulai enggau pangan diri.

7. Baka ni laki bini ulih negapka tikah sida?

⁷ Kemayaharitu, laki bini napi mayuh penanggul nyentukka sida asa ati enggau pangan diri lalu ngasaika diri enda ulih begulai agi. Tang enti sida nemu runding Jehovah pasal tikah, sida ulih negapka tikah sida.—1 John 5:3.

8, 9. (a) Ni maya kitai nitihka jaku lalau ari Jehovah pasal tikah? (b) Baka ni kitai nunjukka tikah nya amat berega ba kitai?

⁸ Jaku lalau Jehovah seruran manah ke kitai. Baka ke udah disebut, Iya meri lalau ngagai kitai: “Awakka adat melaki-bini dibasa semua orang.” (Hebrew 13:4; Pengajar 5:4) Enda ngira ba maya senang tauka tusah, enti kitai enggau naka ulih nitihka jaku lalau nya, kitai deka bulih penguntung.—1 Tesalonika 1:3; Hebrew 6:10.

 ⁹ Ketegal tikah nya amat berega ba kitai, kitai patut bejimat enggau jaku sereta ulah ti tau ngerusak tikah nya. Kitai bebendar deka negapka kaul enggau kaling kitai. Baka ni chara iya?

10, 11. (a) Nama penanggul besai ke nyadi ba sekeda tikah? (b) Nama kebuah kitai patut bejimat lebuh bejaku enggau kaling kitai?

¹⁰ Seseiku orang ulih ngemediska kaling iya ngena mayuh chara. Kitai nemu orang Kristian enda ulih malu tauka ngemediska kaling sida. Taja pia, sida engka ngemediska pangan diri ngena jaku. Seiku indu madah: “Laki aku selalu ngena jaku ti tajam. Taja pan telih nya enda ulih dipeda, tang ati aku amat pedis lebuh iya mansutka jaku baka, ‘Nuan nadai guna!’ tauka ‘Nuan ngenusahka aku aja.’” Seiku laki mega madahka bini iya selalu ngemaruhka iya. Ku iya: “Jaku bini aku amat kasar. Deka nyebut baru utai ke disebut iya pan aku enda sanggup. Nya alai, aku enda bejaku enggau iya lalu selalu laun pulai ari kereja.” Endang amat, jaku ti tajam sereta kasar ulih ngemediska ati kaling nuan.

¹¹ Laki tauka bini ke selalu bejaku kasar, ngemediska ati kaling sida. Ati ti pedis begunaka awak ti lama deka suman. Nya alai Jehovah enggai laki bini ngemediska ati pangan diri ngena jaku sida. Tang kekadang, nuan engka enda sengaja ngemediska ati kaling nuan. Nuan engka ngasaika diri manah enggau iya, tang nama runding iya? Enti  chara nuan bejaku ngemediska ati iya, ulih nuan ngaga ubah?—Galatia 5:15; bacha Epesus 4:31.

12. Nama ulih ngachau kaul laki bini enggau Jehovah?

¹² Chara nuan bejaku enggau kaling nuan ba rumah tauka ba mua orang mayuh ulih ngachau kaul nuan enggau Jehovah. (Bacha 1 Peter 3:7.) James 1:26 ngingatka kitai: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.”

13. Nama siti agi chara laki bini ulih ngemediska ati pangan diri?

¹³ Orang ti udah kawin patut nemu asai ati  pangan diri. Ambika chunto, kati nuan ngena mayuh awak enggau orang bukai kelimpah ari kaling nuan? Taja pan tuju nuan nya manah, baka nginjil tauka meri bantu, kati kaling nuan ngasaika diri enda dikeibuhka? Seiku menyadi indu madah, “Lebuh laki aku ngena mayuh awak ibuhka menyadi indu ke bukai ba eklisia, aku pedis ati. Aku ngasai diri enda dikeibuhka.”

14. (a) Nama ulih dipelajarka kitai ari Pemungkal 2:24? (b) Nama tanya ke patut ditanya diri empu?

¹⁴ Kitai bisi tanggung pengawa ngagai apai indai sereta bala menyadi Kristian ba eklisia. Tang pengudah kitai kawin, tanggung pengawa ke patut dikemeratka kitai iya nya ngagai kaling kitai. Jehovah madah laki deka “begulai enggau bini iya.” (Pemungkal 2:24) Kitai patut ngemeratka asai ati kaling kitai. Tanya diri empu: ‘Kati aku meri awak, nunjukka pengibuh sereta penyayau ti chukup ngagai kaling aku?’

15. Nama kebuah orang Kristian ke udah kawin enda patut kelalu rapat enggau orang ke ukai kaling sida?

¹⁵ Enti nuan kelalu ibuhka orang bukai kelimpah ari kaling nuan, tu tau ngerusak tikah nuan. Nuan engka kelalu rapat enggau orang nya nyentukka nuan bisi ati ke iya. (Matthew 5:28) Tu tau ngujung nuan ngereja ulah ti enda bebasaka tikah nuan.

16. Nama pesan Bup Kudus pasal adat melaki-bini?

¹⁶ Bup Kudus madah, ‘Awakka adat melaki-bini  dibasa semua orang, lalu awakka laki enggau bini meruan tetap ati ngagai pangan diri, laban Petara deka ngakim orang ke ngereja ulah ti kamah, enggau orang ke butang.’ (Hebrew 13:4; Jaku Dalam 5:18) Baka ni kitai bebasaka adat melaki-bini lalu enda ngerusak iya?

17. (a) Nama penemu mayuh orang pasal pengawa butang? (b) Nama penemu orang Kristian pasal pengawa butang?

¹⁷ Bisi orang ngumbai pengawa butang nya enda salah. Tang kitai patut bejimat ngambika enda nitihka penemu tu. Jehovah begedika ulah seks ti kamah sereta pengawa butang. (Bacha Rome 12:9; Hebrew 10:31; 12:29) Enti kitai ngereja ulah ti kamah enggau orang ke ukai kaling kitai, tu reti kitai enda bebasaka standard Jehovah. Kaul kitai enggau Jehovah mega deka rusak. Nya alai, kitai patut nyeliahka utai ti tau ngasuh kitai butang. Tu nyengkaum nyeliahka runding ti kamah pasal orang bukai.—Jop 31:1.

18. (a) Nama utai ke sama entara pengawa butang enggau nyembah petara pelesu? (b) Nama penemu Jehovah pasal pengawa butang?

¹⁸ Ba Adat Moses, pengawa butang nya dosa ti besai, sama besai enggau nyembah petara pelesu. Orang ke butang tauka nyembah petara pelesu deka diukum mati. (Adat Lewi 20:2, 10) Nama utai ke sama entara pengawa butang enggau nyembah petara pelesu? Seseiku orang ke nyembah petara pelesu enda tetap ati ngagai Jehovah. Enti iya butang, iya enda tetap ati ngagai kaling iya. (Pemansut 19:5, 6; Ulang Adat 5:9; bacha Malaki 2:14.)  Endang terang, Jehovah ngumbai pengawa butang nya dosa ti besai.

19. Nama kebuah kitai enggai butang?

¹⁹ Kemayaharitu, taja pan kitai ukai di baruh Adat Moses, penemu Jehovah pasal pengawa butang enda berubah. Baka kitai ke enggai nyembah petara pelesu, kitai mega enggai butang. (Masmur 51:1, 4; Kolosi 3:5) Enti kitai butang, tu reti iya kitai enda bebasaka adat melaki-bini sereta Petara Jehovah.—Peda Nota Penutup 26.

20. Baka ni penemu-dalam ulih negapka tikah nuan?

²⁰ Baka ni nuan ulih negapka tikah nuan? Ku Bup Kudus: “Ulih penemu-dalam, rumah digaga, lalu ulih pemereti ati, rumah didirika.” (Jaku Dalam 24:3) Tikah ulih disema baka sebuah rumah. Bisi rumah ti puang sereta sunyi. Bisi mega rumah ke nyamai endur diau, diias enggau manah sereta likun. Pia mega, orang ti bepenemu-dalam deka nentuka tikah sida likun, tegap sereta lantang.

21. Baka ni penemu ulih negapka tikah nuan?

²¹ Ku Bup Kudus nampung pasal rumah nya: “Ulih penemu, bilik diisi enggau utai ti manah sereta berega.” (Jaku Dalam 24:4) Utai ke dipelajar nuan ari Bup Kudus ulih negapka tikah nuan. (Rome 12:2; Pilipi 1:9) Lebuh nuan macha Bup Kudus sereta litaricha enggau kaling nuan, kena jaku lalau ke ditemu ba tikah seduai. Giga meh chara kena nunjukka pengerindu sereta basa ngagai  kaling nuan. Ayanka penelap sereta pengibuh. Minta Jehovah nulung nuan ngemansangka pemanah ngambika senang agi dikerinduka kaling nuan sereta ulih negapka tikah nuan.—Jaku Dalam 15:16, 17; 1 Peter 1:7.

22. Nama kebuah kitai nunjukka pengerindu sereta basa ngagai kaling pengidup kitai?

²² Nya alai, enggau naka ulih nunjukka pengerindu sereta basa ngagai kaling pengidup nuan. Enti nuan ngereja tu, nya baru tikah nuan deka nyadi tegap. Keberat agi, nuan deka ngelantangka ati Jehovah.—Masmur 147:11; Rome 12:10.