1, 2. Baka ni Balaam ngumpan nembiak Jehovah?

 SEIKU orang ngena umpan ti manah kena nginti ikan, lalu iya nganti enggau sabar. Lebuh ikan makai umpan nya, iya lalu narit ginti iya.

² Baka ikan nya, mensia mega ulih diumpan. Ambika chunto, raja orang Moap ngasuh Balaam ngumpan orang Israel lebuh sida nirika kem ba emperan menua Moap, semak Menua ti Udah Disemaya. Balaam milih umpan ti manah, iya nya ngena bala indu orang Moab nguntik lelaki orang Israel.—Penyampau 22:1-7; 31:15, 16; Pemandang 2:14.

3. Kati umpan Balaam mujur?

³ Kati umpan Balaam mujur? Ya. Beribu iku lelaki Israel “beleman enggau indu bansa Moap.” Sida mega belabuh nyembah petara pelesu, nyengkaum petara seks ti dikumbai Baal di Peor. Ketegal  nya, 24,000 iku orang Israel mati ba adan Menua ti Udah Disemaya.—Penyampau 25:1-9.

4. Nama kebuah beribu iku orang Israel ngereja ulah seks ti kamah?

⁴ Nama kebuah orang Israel ulih ditipu Balaam? Laban sida semina berundingka pengingin ati lalu enda ingatka semua utai ti digaga Jehovah ke sida. Sida bisi mayuh kebuah ngasika Iya. Iya udah ngelepaska sida ari menua Ejip, meri sida pemakai ba menua puang sereta ngiring sida ngagai adan Menua ti Udah Disemaya enggau selamat. (Hebrew 3:12) Taja pia, sida alah diumbuk lalu ngereja ulah seks ti kamah. Nya alai, Paul nulis: “Kitai enda tau ngereja pengawa ti kamah, baka sekeda sida.”—1 Korint 10:8.

5, 6. Nama ulih dipelajarka kitai ari utai ke nyadi ba emperan menua Moap?

⁵ Baka orang Israel ke ba adan Menua ti Udah Disemaya, kitai mega ba adan dunya baru. (1 Korint 10:11) Kemayaharitu, orang balat gila seks enti dibanding enggau orang Moab jeman kelia. Nya alai, kitai patut bejimat laban ulah seks ti kamah nya umpan Sitan ti pemadu mujur.—Penyampau 25:6, 14; 2 Korint 2:11; Jude 4.

⁶ Tanya diri empu, ‘Kati aku idup nitihka chara dunya ti deka dirusak enda lama da agi? Tauka aku deka milih pengidup ti meruan ba dunya baru?’ Enti nuan milih ti kedua, nuan patut enggau naka ulih ngasika pesan Jehovah: “Seliahka ulah [‘seks,’ NWT] ti kamah.”—1 Korint 6:18.

7, 8. Nama reti ulah seks ti kamah? Nama kebuah kitai patut nyeliahka iya?

⁷ Kemayaharitu, mayuh orang enda malu sereta enda bebasaka adat Petara pasal seks. Ba Bup Kudus, ulah seks ti kamah ulih mai reti ulah seks entara orang ke bedau jadi melaki-bini. Tu nyengkaum beleman lelaki sama lelaki, indu sama indu tauka entara mensia enggau jelu, seks ngena mulut tauka burit, tauka megai perengka seks orang bukai enggau chara ti kamah.—Peda Nota Penutup 23.

⁸ Orang ke terus ngereja ulah seks ti kamah deka dibuai ari gerempung. (1 Korint 6:9; Pemandang 22:15) Kelimpah ari nya, iya ngemaluka diri lalu enda ulih dikearapka orang bukai. Iya mega napi penanggul ba tikah, ngandung ngampang, asai besalah, kena penyakit tauka mati. (Bacha Galatia 6:7, 8.) Sayau amat, lebuh orang ngereja ulah seks ti kamah, sida semina berundingka pengingin ati lalu enda berundingka utai ke ulih nyadi ketegal ulah ke digaga sida. Diatu, aram kitai berandauka utai keterubah ti meransang ulah seks ti kamah.

9. Nama kebuah pornografi tau ngenusah?

⁹ Pornografi digaga kena meransang pengingin seks. Kemayaharitu, pornografi bisi ba majalah, bup, lagu, program TV tauka ba Internet. Mayuh orang ngasaika pornografi tu enda mai penusah. Tang tu enda amat! Pornografi ulih ngasuh orang  gian enggau seks, ngeluchu, sereta bisi pengingin ti salah. Pornografi mega ulih meri penanggul ngagai tikah, lalu ngujungka sarak.—Rome 1:24-27; Epesus 4:19; peda Nota Penutup 24.

10. Baka ni jaku lalau ba James 1:14, 15 ulih nulung kitai nyeliahka ulah seks ti kamah?

¹⁰ Nama utai ti ngasuh seseiku orang deka ngereja ulah seks ti kamah? James 1:14, 15 madahka: “Kitai diuji pengingin kitai empu, ti ngumpan lalu manjuk kitai; udah nya, lebuh pengingin nya udah ngandung, iya ngadaka dosa, lalu dosa, lebuh iya udah chukup tuai, ngadaka pemati.” Nya alai, enti pengingin ti salah tama ngagai runding nuan, buai iya enggau lengkas! Enti tepedaka gambar ti enda menyana, kuing ke bukai enggau jampat! Padamka komputer, tauka ngalihka cherita TV. Anang ngelakka pengingin ti salah tama ngagai ati nuan. Enti nuan enda mutarka tu, pengingin nya deka majak nyadi, lalu tusah deka ditagang.—Bacha Matthew 5:29, 30.

11. Baka ni Jehovah ulih nulung kitai lebuh kitai bisi runding ti kamah?

¹¹ Jehovah nemu kitai ulih nyeliahka pengingin ti salah taja pan kitai enda sempurna. Iya madahka kitai: “Nya alai, bunuh semua pengingin dunya ti dalam tubuh kita, baka ulah seks ti kamah, ulah ti enda tuchi, ulah ti kanji, pengingin ti jai, enggau pengamu, iya nya nyembah engkeramba.” (Kolosi 3:5, NWT) Taja pan tu enda senang dikereja, Jehovah sabar sereta deka nulung kitai. (Masmur  68:19) Seiku menyadi lelaki Kristian ke biak gian meda pornografi sereta ngeluchu. Taja pan bala kaban iya ba sekula ngumbai ulah tu enda salah, iya madah: “Ati aku dikachau. Aku mega belabuh ngereja ulah seks ti kamah.” Iya nyau nemu diri patut nagang pengingin ti salah. Enggau tulung ari Jehovah, iya mujur ngelepaska diri ari ulah ti kamah. Enti nuan bisi runding ti kamah, pinta meh “kuasa ti besai” ari Jehovah kena ngetanka runding ti beresi.—2 Korint 4:7; 1 Korint 9:27.

12. Nama kebuah kitai patut ‘nyaga ati kitai’?

¹² Solomon nulis: “Ari semua utai ti patut dijaga, jaga meh ati nuan. Laban ati nentuka idup mati nuan.” (Jaku Dalam 4:23, NWT) Reti “ati” nya sapa kitai kebendar ba mata Jehovah. Utai  ti dipeda kitai tau meransang kitai ngereja sesiti ulah. Jop ke tetap ati madah: “Aku udah besumpah madahka diri enggai merening ngagai indu enggau ati ti kanji.” (Jop 31:1) Kitai patut nunda Jop ke bejimat enggau utai ti dipeda sereta diperunding. Baka pemasmur, kitai besampi: “Anang ngasuh mata aku merening ngagai utai ti nadai guna.”—Masmur 119:37, NWT.

13. Sapa ke dipilih Dinah nyadika pangan?

¹³ Pangan kitai ulih ngasuh kitai nyadi manah tauka jai. Enti kitai milih pangan ti nitihka standard Petara, sida deka nulung kitai ngereja nya mega. (Jaku Dalam 13:20; bacha 1 Korint 15:33.) Peratika chunto Dinah. Iya seiku anak indu Jakop lalu dibesaika ba ruang bilik ti nyembah Jehovah. Dinah enda ngereja ulah ti kamah. Tang iya begulai rapat enggau indu orang Kanaan ke enda nyembah Jehovah. Orang Israel ngembuan standard moral ti manah, tang orang Kanaan balat ngereja ulah seks ti kamah. (Adat Lewi 18:6-25) Lebuh Dinah begulai enggau bala pangan iya, iya betemu enggau Sekem, seiku lelaki Kanaan. Sekem bisi ati ke Dinah. Sekem dikumbai “orang ke pemadu dibasa” dalam ruang bilik iya, tang iya enda rinduka Jehovah.—Pemungkal 34:18, 19.

14. Nama nyadi ngagai Dinah?

¹⁴ Laban iya bisi ati ke Dinah, Sekem “masung  iya.” Ba Sekem, ulah iya enda salah laban utai nya biasa digaga orang Kanaan. (Bacha Pemungkal 34:1-4.) Pengawa jai tu ngujungka mayuh penusah nyadi ngagai Dinah sebilik.—Pemungkal 34:7, 25-31; Galatia 6:7, 8.

15, 16. Baka ni kitai ulih nyadi bepenemu-dalam?

¹⁵ Kita enda ibuh ngereja penyalah baka Dinah kena nemu standard moral Jehovah nya manah ke kitai. Bup Kudus madahka: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” (Jaku Dalam 13:20) Nya alai, bebendar meh belajar “utai ti patut dikereja nuan,” lalu nuan deka nyeliahka mayuh penusah sereta pemedis.—Jaku Dalam 2:6-9; Masmur 1:1-3.

¹⁶ Kitai ulih nyadi bepenemu-dalam enti kitai belajarka Bup Kudus, besampi sebedau ngaga pemutus, sereta nitihka jaku lalau ti diberi ulun ke tetap ati sereta bepenemu-dalam. (Matthew 24:45; James 1:5) Kitai nemu diri lemi sereta enda sempurna. (Jeremiah 17:9) Tang nama digaga nuan enti bisi orang nangkan nuan enggaika nuan ngereja penyalah? Kati nuan ringat, tauka nerima jaku tangkan nya enggau baruh ati?—2 Raja 22:18, 19.

17. Baka ni jaku lalau ari menyadi Kristian ulih nulung kitai? Beri siti chunto.

¹⁷ Ambika chunto, ba endur seiku menyadi indu gawa, bisi seiku lelaki mai iya pansut makai. Lelaki nya enda nyembah Jehovah, tang iya baka orang ti  manah sereta nelap. Tang seiku agi menyadi indu tepedaka seduai iya begulai, lalu udah nya nguji nangkan menyadi indu nya. Nama deka digaga menyadi indu nya? Kati iya ngumbai diri enda salah, tauka iya deka nerima jaku tangkan nya? Menyadi indu nya rinduka Jehovah sereta deka ngereja utai ti betul. Pemutus ke digaga iya deka nunjukka sekalika iya ‘nyeliahka ulah seks ti kamah’ tauka iya “nitihka penemu diri.”—Jaku Dalam 22:3; 28:26; Matthew 6:13; 26:41.

18, 19. Baka ni Josep ulih nulak ulah ti kamah?

¹⁸ Josep dijual nyadika ulun ngagai Potipar ba menua Ejip. Ninting hari, bini Potipar mai iya beleman. Tang Josep nemu tu salah. Iya rinduka Jehovah  sereta deka ngelantangka ati Jehovah. Nya alai, tiap kali bini Potipar ngumbuk iya beleman, Josep nulak. Laban Josep nya seiku ulun, iya enda ulih ninggalka tuan iya pia aja. Bisi sekali, lebuh bini Potipar mejal iya beleman, Josep “belanda ke luar.”—Bacha Pemungkal 39:7-12.

¹⁹ Enti Josep selalu berundingka pasal bini tuan iya tauka pasal ulah ti kamah, iya tentu tusah mutarka penguji nya. Tang ba Josep, kaul iya enggau Jehovah utai ti pemadu berega. Ku Josep madah ngagai bini Potipar: ‘Laki nuan . . . nadai nagang aku ngena semua utai dalam rumah tu, kelimpah ari nuan empu. Nya alai, baka ni ku aku tau ngereja utai ti kamah tu, lalu bedosa ngelaban Petara?’—Pemungkal 39:8, 9.

20. Baka ni kitai nemu Jehovah gaga ati enggau Josep?

²⁰ Taja pan Josep jauh ari diri sebilik, iya mengkang tetap ati ngagai Petara. Ketegal nya, Jehovah merekatka iya. (Pemungkal 41:39-49) Jehovah gaga ati laban Josep tetap ati. (Jaku Dalam 27:11) Endang enda senang deka nulak ulah ti kamah, tang kingatka jaku tu: ‘Jehovah rinduka orang ke begedika penyai. Iya nyaga seput bala nembiak Iya. Iya ngelepaska sida ari kuasa orang ke jai.’—Masmur 97:10.

21. Baka ni seiku menyadi lelaki ke biak nunda Josep?

²¹ Tiap hari, nembiak Jehovah enggau berani nunjukka sida “begedika utai ti jai” sereta “rinduka utai ti ngena.” (Amos 5:15) Enda ngira nuan  tuai tauka biak, nuan ulih tetap ati ngagai Jehovah. Pengarap seiku menyadi lelaki ke biak diuji ba sekula. Seiku indu besemaya deka beleman enggau iya, enti iya nulung indu nya maya peresa matematik. Nama digaga menyadi lelaki tu? Iya nunda Josep. Ku iya: “Aku nulak peminta iya tekala nya. Lebuh aku nunjukka diri tetap ati ngagai Jehovah, aku ulih nyaga pemanah nama diri.” Sebarang ulah ti “ngelantangka diri,” baka ulah ti kamah, meri pengelantang ti enda lama, tang ngujungka mayuh pemedis. (Hebrew 11:25) Enti kitai ngasika Jehovah, kitai deka seruran lantang ati.—Jaku Dalam 10:22.

22, 23. Baka ni Jehovah nulung kitai enti kitai udah ngereja penyalah ti besai?

²² Sitan manjuk kitai ngena ulah seks ti kamah. Laban kitai enda sempurna, kekadang kitai engka bisi runding ti salah. (Rome 7:21-25) Jehovah nemu tu lalu ingat “kitai tu endang amau.” (Masmur 103:14) Tang, baka ni enti seiku orang Kristian udah ngereja ulah ti kamah? Kati Petara deka ngampun iya? Au, enti iya bebendar nesal ati. Jehovah sedia “ngampun” sereta nulung iya.—Masmur 86:5; James 5:16; Bacha Jaku Dalam 28:13.

²³ Jehovah meri tuai gempuru ti bepengerindu nyadika “pemeri.” (Epesus 4:8, 12; James 5:14, 15) Jehovah ngena bala tuai gempuru ngemanahka kaul kitai enggau Iya.—Jaku Dalam 15:32.

24, 25. Baka ni “nemu berunding” nulung kitai nyeliahka ulah ti kamah?

²⁴ Kena ngaga pemutus ti manah, kitai patut nemu pesan Jehovah ulih meri penguntung ngagai kitai. Kitai enggai nyadi baka orang bujang ke disebut ba Jaku Dalam 7:6-23. Iya “beli” lalu dipanjuk ngereja ulah seks ti kamah. Orang ke nemu berunding bebendar ngulihka runding Petara sereta idup sejalai enggau runding Iya. Kingatka jaku tu: “Orang ke nemu berunding, rinduka diri empu. Orang ke beberatka penau berunding, deka mujur.”—Jaku Dalam 19:8, NWT.

²⁵ Kati nuan andal standard Petara nya betul? Kati nuan pechaya nitihka pesan Petara mai pengelantang? (Masmur 19:7-10; Isaiah 48:17, 18) Enti nuan kakang ati, ingat meh utai manah ke udah digaga Jehovah ke nuan. Ku pemasmur: ‘Awakka kita empu ngasaika pemadas Jehovah.’ (Masmur 34:8) Enti nuan terus belematika nya, nuan deka majak rinduka Jehovah. Rinduka utai ti dikerinduka Iya, lalu begedika utai ti dipegedika Iya. Isi meh runding nuan enggau utai ti manah, utai ti bendar, ti lurus, ti tuchi, ti badas sereta ti pemadu menyana. (Pilipi 4:8, 9) Tunda meh Josep, ke bulih penguntung ari penemu-dalam Jehovah.—Isaiah 64:8.

26. Nama deka dikerandauka kitai pengudah tu?

²⁶ Enda ngira nuan agi bujang dara tauka udah kawin, Jehovah deka nuan idup lantang. Dua iti pelajar ti nangkanka tu deka berandauka chara kitai ulih mujur ba tikah.