Nuju orang ke rinduka Jehovah sereta Jaku Iya, Bup Kudus:

Jesus madah: “Kita deka nemu pemendar, lalu pemendar deka ngelepaska kita.” (John 8:32) Perundingka asai ati maya nuan baru nemu pasal pemendar Bup Kudus. Nuan tentu amat temegah ati ulih tetemuka pemendar taja pan dunya tu penuh enggau pemula.—2 Timoti 3:1.

Petara Jehovah deka kitai nemu pemendar. Lalu ketegal kitai rinduka orang, kitai madahka pemendar ngagai sida. Pia mega, laban kitai amat bebasaka jaku lalau Jehovah, kitai enggau naka ulih idup nitihka chara orang Kristian. Jesus madahka chara kitai ulih nunjukka pengerindu ngagai Petara. Iya madah: ‘Enti kita ngasika pesan aku, kita deka meruan dalam pengerindu aku, baka aku ke udah ngasika pesan Apai, lalu meruan dalam pengerindu Iya.’—John 15:10.

Jesus amat rinduka Apai iya, lalu ngereja semua utai ti diasuh Iya. Enti kitai nitihka chara idup Jesus, Jehovah deka rinduka kitai lalu kitai deka idup enggau lantang ati. Ku Jesus madah: “Enti kita nemu utai tu, kita bulih berekat enti kita ngereja sida.”—John 13:17.

Kami arapka bup tu ulih nulung nuan belajar pasal pemendar Bup Kudus, idup nitihka pemendar nya lalu nyadi pangan Petara. Kami besampi ngambika pengerindu nuan ke Petara majak tegap, lalu nuan ‘meruan dalam pengerindu Petara,’ sereta bulih pengidup ti meruan belama iya!—Jude 21.