Darah amat beguna. Semua kitai begunaka darah ngambika terus idup. Ketegal Petara nempa kitai, Iya bisi hak nentuka chara darah patut dikena. Nama runding Petara pasal darah? Ulih kitai makai darah tauka nerima darah? Lalu baka ni kitai ulih ngaga pemutus ti manah pasal darah?

1. Nama runding Jehovah pasal darah?

Jehovah madah ngagai nembiak Iya maya jeman kelia: “Seput semua utai ti idup nya dalam darah sida.” (Adat Lewi 17:14) Nyadi, ba Jehovah, darah ngambarka nyawa sesiku orang. Nyawa nya pemeri ti berega ari Petara. Nya alai, darah mega amat berega.

2. Nama pesan Petara pasal darah?

Jehovah ngasuh nembiak Iya enda makai darah. (Bacha Pemungkal 9:4 enggau Adat Lewi 17:10.) Jehovah sekali agi nekanka utai tu lebuh Iya ngena raban ti ngiring maya nya meri pesan ngagai orang Kristian ngambika “anang makai . . . darah.”—Bacha Surat Kereja Rasul 15:28, 29.

Nama reti anang makai darah? Pikirka chunto tu. Lutur ngasuh nuan nyeliah ari ai bisa. Nuan tentu enda ngirup nya. Tang kati nuan deka makai pemakai ke ngundan ai bisa tauka ngejik nya ke dalam tubuh nuan? Tentu enda. Pia mega kitai enda makai tauka ngirup darah tauka makai pemakai ke dichampur enggau darah. Kitai mega enda makai dagin jelu ke enda dibuai darah.

Baka ni enggau pengawa berubat? Sekeda chara berubat enggau terang ngelanggar pesan Petara pasal darah. Tu nyengkaum meri tauka nerima darah tauka begian darah, iya nya sel darah mirah, sel darah burak, platelet enggau plasma. Sekeda chara berubat nya baka ke enda ngelanggar pesan Petara. Ambika chunto, chara berubat ke ngena begian darah ti mit agi ari empat iti begian darah nya tauka darah orang nya empu. Ba pengawa berubat ke baka tu, tiap iku kitai patut ngaga pemutus kediri empu. a—Galatia 6:5.

 BELAJAR MAYUH AGI

3. Ngaga pemutus ti ngagaka ati Jehovah

Baka ni kitai ulih ngaga pemutus pasal chara berubat ti sejalai enggau runding Petara? Mainka VIDEO, lalu kerandauka kebuah chara tu amat beguna.

• Sampi minta penemu-dalam.—James 1:5.

• Pansik prinsip Bup Kudus sereta chara ngena prinsip nya.—Jaku Dalam 13:16.

• Giga chara berubat ke bisi ba endur nuan.

• Tentuka chara berubat ti enda diterima nuan.

• Tentuka pemutus nuan enda ngachau asai ati nuan.—Surat Kereja Rasul 24:16. b

• Kingatka meh, enti pemutus nya bekaul enggau penemu ati nuan, orang bukai nadai hak ngaga pemutus ke nuan—tu nyengkaum kaling pengidup, tuai gempuru, tauka pengajar Bup Kudus.—Rome 14:12.

• Tuliska pemutus nuan.

4. Saksi-Saksi Jehovah dekaka chara berubat ti pemadu manah

Kitai agi ulih nerima chara berubat ti manah taja pan kitai nitihka pesan Jehovah bekaul enggau darah. Mainka VIDEO.

Bacha Titus 3:2, lalu kerandauka tanya tu:

• Nama kebuah kitai patut bejaku enggau nelap sereta bekerejasama enggau bala lutur?

 5. Chara berubat ti ngena begian darah ti mit agi

Darah bisi empat begian, iya nya—sel darah mirah, sel darah burak, platelet enggau plasma. Tiap iti begian tu dibagi ngagai begian darah ti mit agi. c Begian darah ke mit engka dikena dalam ubat kena ngelaban penyakit tauka ngasuh ngetu bedarah.

Bekaul enggau begian darah ke mit agi, tiap iku orang Kristian patut ngaga pemutus bepelasarka penemu ati sida ke dilatih Bup Kudus. Bisi nya nerima chara berubat ke baka tu tang bisi mega enggai nerima.

Pikirka tanya tu lebuh ngaga pemutus:

• Baka ni aku deka nerangka ngagai lutur kebuah aku nulak tauka nerima begian darah ke mit agi?

 LANSA

Jehovah enggai kitai salah ngena darah.

Ulang Kaji

• Nama kebuah Jehovah ngumbai darah nya kudus?

• Baka ni kitai nemu pesan Petara ke bekaul enggau darah mega dituju ngagai pengawa meri tauka nerima darah?

• Baka ni nuan ulih ngaga pemutus ti manah bekaul enggau chara berubat ti ngena darah?