Ba serata dunya, mayuh orang ngembuan runding ti bebida pasal ai bisa. Bisi orang rindu ngirup enggau bala kaban. Bisi nya enggai ngirup. Tang bisi nya mega ngirup nyentukka mabuk. Nama runding Bup Kudus pasal ai bisa?

1. Kati Bup Kudus nagang kitai ngirup ai bisa?

Enda. Bup Kudus madahka, “Wain kena [mensia] ngelantangka diri.” (Masmur 104:14, 15) Nya meh siti ari pemeri ke diberi Petara ngagai mensia. Bup Kudus mega bisi nyebut pasal sekeda nembiak Petara ti tetap ati ke ngirup ai bisa.—1 Timoti 5:23.

2. Nama jaku ajar ari Bup Kudus ngagai orang ke deka ngirup ai bisa?

Jehovah begedika pengawa balat ngirup enggau mabuk. (Galatia 5:21) Bup Kudus madahka: “Anang begulai enggau orang ke pengirup.” (Jaku Dalam 23:20) Enda ngira kitai ngirup enggau orang bukai tauka kediri, kitai patut nentuka penyampau ai bisa ke diirup kitai enda kelalu mayuh nyentukka nya ulih ngachau runding sereta pengerai kitai, tauka ngasuh jaku sereta ulah kitai nyadi enda manah. Enti kitai enda ulih tetagangka diri ngirup, manah agi enti enda ngirup.

3. Baka ni kitai ulih ngayanka basa ngagai pemutus orang bukai bekaul enggau ai bisa?

Tiap iku orang patut ngaga pemutus sekalika deka ngirup ai bisa tauka enda. Kitai enda patut ngakim orang ke deka ngirup ai bisa, lalu kitai mega enda patut ngansak orang bukai ngirup enti sida enggai. (Rome 14:10) Kelimpah ari nya, kitai ulih milih enda ngirup enti kitai nemu utai nya ulih ngachau penemu ati orang bukai. (Bacha Rome 14:21.) Kitai patut bebendar nitihka jaku lalau ari Bup Kudus ke madahka: “Anang berundingka diri empu aja, tang berunding ke orang bukai.”—Bacha 1 Korint 10:23, 24.

 BELAJAR MAYUH AGI

4. Ngirup tauka enda

Aram kitai meda kereja ajih Jesus ti keterubah kena nemu runding iya pasal ai bisa. Bacha John 2:1-11, lalu kerandauka tanya tu:

• Nama runding Jesus pasal ai bisa enggau orang ke ngirup ai bisa?

• Ketegal Jesus enda nagang kitai ngirup ai bisa, nama runding ke patut dikembuan kitai ngagai orang ke ngirup ai bisa?

Taja pan orang Kristian dikemendarka ngirup ai bisa, tang kitai patut milih maya ti engkeman kena ngirup. Bacha Jaku Dalam 22:3, lalu perundingka sekalika nuan patut ngirup tauka enda lebuh:

• Nuan deka deriba tauka gawa ngena mesin.

• Nuan betubuh bisi.

• Lutur ngasuh nuan enda ngirup ai bisa.

• Nuan tusah deka nagang penyampau ai bisa ke diirup nuan.

• Undang-undang nagang nuan ari ngirup ai bisa.

• Nuan begulai enggau orang ke bisi penanggul ngirup ai bisa sereta deka nyeliahka diri ari ai bisa.

Patut nuan nyediaka ai bisa lebuh bisi pengawa tikah tauka ba siti-siti pengerami? Mainka VIDEO kena nemu prinsip Bup Kudus ke ulih nulung nuan ngaga pemutus.

Bacha Rome 13:13 enggau 1 Korint 10:31, 32. Pengudah macha tiap iti ayat, kerandauka tanya tu:

• Baka ni prinsip ba ayat tu nulung nuan ngaga pemutus ti deka ngerinduka ati Jehovah?

 5. Tentuka penyampau ai bisa ke ulih diirup nuan

Enti nuan deka ngirup ai bisa, kingatka meh: Taja pan Jehovah enda nagang kitai ari ngirup ai bisa, tang Iya begedika pengawa kelalu balat ngirup. Nama kebuah? Bacha Hosea 4:11, 18, lalu kerandauka tanya tu:

• Nama ulih nyadi enti seseiku orang kelalu mayuh ngirup ai bisa?

Kena nyeliahka diri ari kelalu mayuh ngirup ai bisa, kitai patut nemu tatak diri. Bacha Jaku Dalam 11:2, lalu kerandauka tanya tu:

• Nama kebuah nya manah lebuh nuan netapka penyampau ai bisa ke deka diirup nuan?

6. Nama ulih nulung orang badu ngirup kelalu mayuh?

 LANSA

Ai bisa nya pemeri ari Jehovah, tang Iya begedika orang ke ngirup kelalu mayuh ai bisa sereta mabuk.

Ulang Kaji

• Nama runding Bup Kudus pasal ai bisa?

• Nama penanggul ke ulih nyadi enti orang ngirup kelalu mayuh ai bisa?

• Baka ni kitai ulih nunjukka basa ngagai pemutus orang bukai bekaul enggau ai bisa?