1.  Sapa Babilon ti Besai

2.  Kemaya Messiah deka pegari?

3.  Chara Berubat ti Bekaul enggau Darah

4.  Beserara

5.  Pengerami enggau Hari Besai

6.  Penyakit Berampit

7.  Pengawa Dagang enggau Undang-Undang

 1. Sapa Babilon ti Besai

Baka ni kitai nemu “Babilon ti Besai” ngambarka semua pengarap ti pelesu? (Pemandang 17:5) Peratika sekeda utai tu:

• Pengawa iya ba serata dunya. Babilon ti Besai digambarka baka benung duduk atas “mayuh bengkah menua, mensia” enggau “bansa.” Iya mega bisi “nengeri ti besai ti merintah bala raja di dunya tu.”—Pemandang 17:15, 18.

• Iya ukai kuasa politik tauka kuasa pengawa dagang. “Bala raja dunya” enggau “bala orang sedagar” enda dirusak sekali enggau iya.—Pemandang 18:9, 15.

• Iya ukai ngarika Petara. Iya dikumbai indu sundal laban iya setanah enggau bala perintah ngambika tau bulih duit tauka utai bukai ari sida. (Pemandang 17:1, 2) Iya nesatka orang ari semua bansa. Lalu iya mega ngasuh mayuh pemati nyadi.—Pemandang 18:23, 24.

Pulai baru ngagai pelajar 13 poin 6

 2. Kemaya Messiah deka pegari?

Bup Kudus madahka bisi 7 kali 69 taun (62 taun + 7 taun) deka abis sebedau Messiah datai.—Bacha Daniel 9:25.

• Kemaya timpuh 7 kali 69 taun tu berengkah? Ba taun 455 S.M. Maya nya, Gabenor Nehemiah datai ba Jerusalem, lalu kuta nya “deka digaga baru.”—Daniel 9:25; Nehemiah 2:1, 5-8.

• Kemaya timpuh 7 kali 69 taun tu abis? Enti diitung 483 (69 x 7) taun ari taun 455 S.M., tu deka mai kitai ngagai taun 29 M. a Tu meh taun lebuh Jesus dibaptisa lalu nyadi Messiah!—Luke 3:1, 2, 21, 22.

Pulai baru ngagai pelajar 15 poin 5

3. Chara Berubat ti Bekaul enggau Darah

 Bisi sekeda chara berubat ke bekaul enggau darah diri empu. Tang bisi sekeda chara berubat nya enda ulih dikena orang Kristian. Ambika chunto, kitai enda derma darah tauka nyimpan darah diri empu ngambika ulih dikena maya berubat dudi hari ila.—Ulang Adat 15:23.

Taja pia, bisi sekeda chara berubat ti ulih diterima orang Kristian. Ambika chunto peresa darah, nuchi buah pinggang (hemodialysis), nambahka ai ubat ke dalam darah (hemodilution), proses nyelamatka darah (cell salvage), tauka chara berubat ke ngena mesin jantung enggau paru-paru (heart-lung bypass). Orang Kristian patut ngaga pemutus kediri empu pasal chara darah iya deka dikena lebuh beputung, lebuh beperesa, tauka lebuh berubat. Tiap iku lutur bisi chara ti enda sama. Nya alai, orang Kristian patut nemu baka ni darah iya deka dikena sebedau iya ngaga pemutus pasal chara beputung, beperesa, tauka lebuh berubat. Perundingka sekeda tanya tu:

• Enti darah aku dikeluarka ari tubuh, lalu pejalai darah aku ke dikeluarka nya engka teketu ba siti timpuh, kati aku agi ulih ngumbai darah tu sebagi ari tubuh aku, lalu enda ibuh nuangka “darah nya ngagai tanah”?—Ulang Adat 12:23, 24.

• Lebuh berubat, baka ni enti lutur ngeluarka darah aku, ngubah darah nya lalu mulaika iya baru ngagai tubuh aku? Kati nya deka ngachau ati aku ti udah dilatih Bup Kudus, tauka kati aku ulih nerima chara berubat ti baka nya?

Pulai baru ngagai pelajar 39 poin 3

4. Beserara

 Bup Kudus madahka laki bini enda patut beserara. Enti seduai iya milih deka beserara, Bup Kudus enggau terang madahka, seduai iya enda ulih kawin baru enggau orang bukai. (1 Korint 7:10, 11) Nama sekeda situasi ke ulih nyadi kebuah orang Kristian milih deka beserara enggau kaling pengidup sida?

• Enggai melanja diri sebilik: Laki enggai melanja diri sebilik nyentukka sida nadai duit tauka pemakai.—1 Timoti 5:8.

• Balat dijamah: Kaling pengidup balat dijamah nyentukka ulih ngachau pengerai sereta nganu nyawa.—Galatia 5:19-21.

• Langsung enda ulih bisi kaul enggau Jehovah: Laki tauka bini langsung enda ulih nyembah Jehovah ketegal balat ditagang kaling diri.—Surat Kereja Rasul 5:29.

Pulai baru ngagai pelajar 42 poin 3

 5. Pengerami enggau Hari Besai

 Orang Kristian enda ngintu pengerami ke enda dikerinduka Jehovah. Tang ba sekeda situasi, kitai engka patut ngena penemu ati ke dilatih prinsip Bup Kudus ngambika ulih ngaga pemutus. Peratika sekeda chunto tu:

• Lebuh orang madahka, “Selamat Hari Krismas.” Nuan ulih madah, “Terima kasih.” Enti orang nya deka nemu mayuh agi, nuan ulih nerangka kebuah nuan enda ngintu pengerami nya tauka pengerami bukai.

• Kaling pengidup nuan ke ukai Saksi Jehovah mai nuan makai begulai enggau kaban belayan maya bisi pengerami. Enti ati nuan enda ngachau nuan, nuan engka ulih enggau sida makai begulai. Tang nuan ulih madah dulu ngagai kaling nuan, enti sema maya makai, sida bisi ngereja utai ke bekaul enggau pengarap pelesu, nuan enda ulih enggau sida ngereja nya.

• Tuke nuan meri bonus maya musin pengerami. Kati nuan patut nulak bonus nya? Sekalika nuan nerima tauka enda, tu bepanggai ba kebuah tuke meri bonus nya. Kati tuke nuan meri bonus ketegal deka beterima kasih ngagai bala pekereja iya? Tauka iya meri bonus ketegal hari besai nya?

• Bisi orang meri nuan hadiah maya musin pengerami. Baka ni enti orang meri nuan hadiah maya hari besai lalu madah: “Aku nemu nuan enda ngintu pengerami tu, tang aku ka meri nuan hadiah tu.” Kati nya ketegal iya semina deka ngayanka pengerah jari, tauka iya deka nguji pengarap nuan lalu ngiga peluang mai nuan ngintu pengerami nya? Pengudah berundingka tu, nuan patut mutus sekalika deka nerima hadiah nya tauka enda. Ingat meh, enda ngira nama pemutus kitai, kitai deka nentuka diri bisi ati ti beresi sereta tetap ati ngagai Jehovah.—Surat Kereja Rasul 23:1.

Pulai baru ngagai pelajar 44 poin 1

6. Penyakit Berampit

 Kitai rinduka orang. Nya alai, enti kitai bisi penyakit ti ulih ngerampit, tauka engka udah kena rampit penyakit ke baka nya, kitai patut bejimat ngambika penyakit nya enda ngerampit orang bukai. Nama kebuah? Laban kitai deka nitihka jaku lalau ari Bup Kudus: “Rinduka pangan diri baka nuan ke rinduka diri empu.”—Rome 13:8-10.

Nama sekeda pekara ke patut dikingatka kitai? Orang ke bisi penyakit ti ulih ngerampit enda patut ngereja sebarang utai ke ulih ngasuh iya negu orang bukai. Tu baka betabi jari, merap, tauka nyium orang bukai. Iya mega enda patut berasai enda nyamai ati enti orang enda mai iya ke rumah ketegal sida deka nyaga diri tauka diri sebilik. Sebedau dibaptisa, iya deka madah ngagai tuai ti ngatur raban tuai gempuru pasal penyakit iya ngambika atur bukai ulih digaga kena nyaga chalun baptisa ke bukai. Sebedau bepangan, orang ke engka bisi kena penyakit berampit patut sanggup peresa darah. Enggau nya, iya nunjukka diri enda “berundingka diri empu aja, tang berunding mega ke orang bukai.”—Pilipi 2:4.

Pulai baru ngagai pelajar 56 poin 2

7. Pengawa Dagang enggau Undang-Undang

 Kitai ulih nyeliahka mayuh penanggul enti kitai nentuka semua pengawa dagang sereta pengawa bukai ti bekaul enggau duit ditulis enggau terang, taja pan pengawa nya digaga enggau bala menyadi Kristian kitai. (Jeremiah 32:9-12) Taja pia, kadang-kadang bisi penanggul ti mit bekaul enggau duit tauka utai bukai engka nyadi entara orang Kristian. Enti tu nyadi, orang ke bisi kaul enggau pekara nya patut mutarka penanggul nya entara sida empu aja. Sida patut ngereja tu enggau jampat sereta manah.

Baka ni kitai ulih mutarka penanggul ti balat agi baka nipu tauka betenah? (Bacha Matthew 18:15-17.) Jesus meransang kitai nitihka 3 chara tu:

1. Uji mutarka penanggul nya enggau pangan diri.—Peda ayat 15.

2. nti tu enda mujur, minta bantu ari seiku tauka dua iku menyadi Kristian ba eklisia ke tegap ba pengarap.—Peda ayat 16.

3. Enti agi enda ulih diputarka, pinta meh bantu ari tuai gempuru.—Peda ayat 17.

Ba mayuh ari situasi nya, kitai enda patut mai bala menyadi Kristian kitai ngagai kot mahkamah laban nya deka ngenyaika nama Jehovah sereta eklisia. (1 Korint 6:1-8) Taja pia, bisi sekeda utai patut diputarka nengah kot baka proses sarak, hak nyaga anak, alimoni (bayaran nafkah), utai ti bekaul enggau insurans, bankrap, tauka wasiat. Ba situasi tu, enti kitai mutarka penanggul nya nengah kot mahkamah enggau manah, kitai enda ngelanggar jaku lalau ari Bup Kudus.

Enti pekara tu bekaul enggau jenayah baka masung, mendera anak mit ngena sebarang chara (fizikal, emosi, enggau seksual), diserang, ngenchuri, tauka munuh, kitai enda ngelanggar jaku lalau ari Bup Kudus enti kitai ngeriput nya ngagai piak bekuasa.

Pulai baru ngagai pelajar 56 poin 3