PELAJAR 53
Pilih Pemerindang ti Ngelantangka Ati Jehovah
Ketegal Jehovah nya “Petara ti gaga ati,” Iya mega deka kitai gaga ati sereta ngasaika pengidup ti lantang. (1 Timoti 1:11, NWT) Taja pan bagas gawa nya manah, tang kitai mega begunaka awak belelak. Nya alai, baka ni kitai ulih ngena awak belelak enggau chara ti ngagaka ati kitai sereta ngelantangka ati Jehovah? Aram kitai berandauka nya.
1. Nama patut diperundingka kitai lebuh milih pemerindang?
Nama utai ti rindu digaga nuan lebuh nuan belelak? Sekeda orang rindu ngereja utai kediri baka macha bup, ninga musik, meda cherita wayang, tauka meda internet. Bisi mega rindu ngena awak begulai enggau bala bakih sereta ngaga aktiviti baka hiking, nyemerai, tauka main game. Enda ngira nama utai ti dikerinduka kitai, kitai deka nentuka utai ke dipilih kitai nya ‘ngerinduka ati Tuan.’ (Epesus 5:10) Utai tu amat beguna laban mayuh pemerindang kemayaharitu ngundan utai ti dipegedika Jehovah, baka pengawa ti kasar, ulah seks ti enda bemoral, tauka pengawa bemanang. (Bacha Masmur 11:5.) Nama utai ke ulih nulung kitai milih pemerindang enggau manah?
Enti kitai milih bakih ke rinduka Jehovah, nya deka meransang kitai milih pemerindang ti manah. Baka ke udah dipelajarka kitai ba pelajar sebedau tu, Bup Kudus madahka: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida.” Pia mega, enti kitai suah begulai enggau orang ke enda rinduka Jehovah, sida deka ngasuh kitai ngaga pemutus ti enda manah.—Jaku Dalam 13:20.
2. Nama kebuah nya beguna netapka penyampau jam ke dikena ba pemerindang?
Taja pan pemerindang ke dipilih kitai enda salah, tang kitai patut bejimat ngambika enda ngena kelalu mayuh awak ba pemerindang nyentukka kitai nadai awak ba pekara ti beguna agi. Bup Kudus meransang kitai ngambika ngena “semua [jam] kitai enggau badas.”—Bacha Epesus 5:15, 16, nota kaki.
BELAJAR MAYUH AGI
Belajarka chara milih pemerindang enggau manah.
3. Seliahka pemerindang ti enda manah
Nama kebuah kitai patut milih pemerindang enggau bejimat? Mainka VIDEO, lalu kerandauka tanya tu.
-
Nama utai ti sama ba pemerindang kemayaharitu enggau bala gladiator ke belaban ba jeman kelia?
-
Ba video tu, nama utai ti dipelajarka Danny pasal pemerindang?
Bacha Rome 12:9, lalu kerandauka tanya tu:
-
Baka ni ayat Bup Kudus tu nulung nuan milih pemerindang enggau manah?
Nama sekeda pekara ke dipegedika Jehovah? Bacha Jaku Dalam 6:16, 17 enggau Galatia 5:19-21. Pengudah macha tiap iti ayat, kerandauka tanya tu:
-
Nitihka ayat tu, nama utai ke suah dipeda ba pemerindang kemayaharitu?
Chara milih pemerindang enggau manah
Tanya diri empu:
-
Nama? Kati pemerindang tu bisi utai ke dipegedika Jehovah?
-
Kemaya? Kati pemerindang tu ngachau awak ke patut dikena aku ba utai ti beguna agi?
-
Sapa? Kati pemerindang tu ngasuh aku semak enggau orang ke enda rinduka Jehovah?
Manah agi enti kitai ngenyauhka diri ari utai ti tau ngenusahka kitai. Nya alai, kitai patut nyeliahka pemerindang ti ngasuh kitai jauh ari Jehovah
4. Kena meh awak nuan enggau manah
Mainka VIDEO, lalu kerandauka tanya tu.
-
Taja pan menyadi dalam video tu enda milih pemerindang ti enda manah, tang nama penguji ke ditapi iya?
Bacha Pilipi 1:10, lalu kerandauka tanya tu:
-
Baka ni ayat tu nulung kitai nentuka penyampau jam ti dikena ba pemerindang?
5. Pilih meh pemerindang ti manah
Taja pan bisi mayuh pemerindang ti enda ngelantangka ati Jehovah, tang agi bisi mayuh pemerindang ke ulih diterima kitai. Bacha Pengajar 8:15 enggau Pilipi 4:8, lalu kerandauka tanya tu:
-
Nama pemerindang ti dikerinduka nuan?
Jehovah deka kitai milih pemerindang ti manah sereta ngelantangka ati Iya
BISI ORANG MADAH: “Aku nadai ngereja pengawa ti kasar, ulah ti kamah, tauka pengawa bemanang. Aku semina meda aja.”
-
Nama saut nuan?
LANSA
Jehovah deka kitai berasai lantang ati enggau pemerindang ti manah ke dipilih kitai.
Ulang Kaji
-
Nama pemerindang ke patut diseliahka orang Kristian ti bendar?
-
Nama kebuah kitai patut bejimat enggau penyampau jam ke dikena kitai ba pemerindang?
-
Nama kebuah nuan deka milih pemerindang ti ngelantangka ati Jehovah?
ARAM BELAJAR
Sapa ulih nentuka bansa pemerindang ke ulih diterima nuan?
Peratika chara nuan ulih ngaga pemutus ti manah lebuh milih pemerindang.
“Kati Pemerindang ke Dipilih Nuan Nya Manah?” (Menara Jaga, 15 Oktober 2011)
Ba cherita pengidup “Aku Mujur Muai Ulah ti Bepilih Mata,” peratika baka ni seiku lelaki milih pemerindang ti manah.
Peratika baka ni seiku indai bebendar nyeliahka pemerindang ke mandangka utai ti bekaul enggau pengawa bemanang.
Seliahka Pemerindang ti Bekaul enggau Pengawa Bemanang (2:02)
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
