Pengudah 40 hari ba menua puang, lalu sebedau iya pulai ke Galili, Jesus betemu baru enggau John Pemaptisa. Lebuh John meda Jesus, iya madahka: “Peda, Anak Bedus Petara ke muai dosa dunya! Iya meh orang ke disebut aku lebuh aku madahka: ‘Orang ke datai pengudah aku udah dulu ari aku. Laban iya udah bisi sebedau aku.’” (John 1:29, 30) Taja pan John tuai agi ari Jesus, tang iya nemu Jesus kala idup ba serega.

Beberapa minggu sebedau nya, Jesus betemu enggau John ngambika ulih maptisa iya. Tang maya nya John enda entu nemu, sekalika Jesus nya endang Messiah tauka enda. Ku iya, “Indah aku pan enda ngelala iya. Tang aku datai maptisa ngena ai, ngambika Israel ulih ngelala iya.”—John 1:31.

Lalu John terus madahka utai ke nyadi lebuh iya maptisa Jesus: “Aku meda kuasa kudus Petara, ke baka burung achang, nurun ari langit lalu mengkang ba atas iya. Aku pan enda ngelala iya, tang Petara ke nganjung aku ngambika maptisa ngena ai udah bejaku ngagai aku: ‘Lebuh nuan meda kuasa kudus Petara nurun ngagai sesiku orang lalu mengkang ba atas iya, iya meh orang ke deka maptisa ngena kuasa kudus Petara.’ Aku udah meda semua nya, lalu aku udah besaksi, iya meh Anak Petara.”—John 1:32-34.

Ba hari siti, John sekali agi meda Jesus. Lalu John bejaku ngagai dua iku murid iya. Ku John madah: “Peda, Anak Bedus Petara!” (John 1:36) Udah nya, dua iku murid nya nitihka Jesus. Siku ari sida benama Andrew. Lalu engka siku agi benama John ke nulis pasal utai ke nyadi tu. John nya petunggal Jesus, anak Salomi. Lalu Salomi nya menyadi Maria, sereta laki Salomi nya Sebedi.

Jesus nguing lalu meda Andrew enggau John nitihka iya. Ku Jesus nanya seduai iya: “Nama utai ke digiga seduai?”

Ku seduai nyaut: “Rabbi, dini nuan diau?”

Jesus nyaut: “Enti seduai deka meda, aram nitihka aku.”—John 1:37-39.

Maya nya kira-kira pukul empat lemai, lalu sepemanjai hari nya Andrew enggau John diau enggau Jesus. Andrew amat gagit ati nyentukka iya mupuk ngiga menyadi iya Simon, ke mega dikangauka Peter. Andrew lalu madah ngagai Simon: “Kami udah tetemuka Messiah.” (John 1:41) Andrew mai Peter ngagai Jesus. John mega ngiga menyadi iya empu ke benama James lalu mai James ngagai Jesus. Tang, John enda nulis pasal utai ke nyadi tu.

Lebuh hari siti, Jesus betemu enggau Philip, ke datai ari Betsaida. Betsaida nya semak begian utara Tasik Galili sereta menua asal Andrew enggau Peter. Jesus mai Philip, ku iya: “Nyadi murid aku.”—John 1:43.

 Udah nya Philip ngiga Natanel, ke mega dikumbai Bartolomew. Ku Philip madah: “Kami udah tetemuka orang ke disebut dalam Adat Moses enggau Ajar Sida Nabi. Orang nya Jesus anak Josep, ke datai ari Nasaret.” Tang Natanel berasai kakang ati lalu nanya Philip: “Kati ulih utai ti badas datai ari Nasaret?”

Philip meransang iya: “Aram meh, ngambika nuan empu ulih meda.” Lebuh Jesus meda Natanel mansang ngagai iya, iya lalu madah: “Peda, iya tu orang Israel ti bendar. Iya nadai nemu ngelakar.”

Ku Natanel nanya iya: “Baka ni ku nuan ngelala aku?”

Ku Jesus nyaut: “Aku endang udah meda nuan ba baruh pun kayu ara nya tadi, sebedau Philip ngangauka nuan.”

Natanel amat alit ati lalu madahka: “Rabbi, nuan amat Anak Petara, nuan Raja orang Israel.”

Jesus lalu nanya iya: “Kati nuan arap laban aku udah madahka, aku udah meda nuan ba baruh pun kayu ara nya tadi? Nuan deka meda utai ti besai agi ari nya.” Lalu Jesus besemaya: “Enggau bendar aku madah ngagai semua kita: Kita deka meda langit tebuka sereta meda bala melikat Petara nurun-niki ari serega ngagai Anak Mensia.”—John 1:45-51.

Pengudah nya, Jesus enggau bala murid iya ke baru, mupuk ari Lebak Jordan ngagai Galili.