Pengudah John maptisa Jesus, kuasa kudus Petara ngiring Jesus ngagai menua puang ba Judea. Iya patut berundingka mayuh utai. Lebuh Jesus dibaptisa, “langit lalu tebuka.” (Matthew 3:16) Nya alai iya ulih ingatka baru utai ti dipelajarka sereta dikereja iya ba serega. Jesus tentu bisi mayuh utai ke patut diperundingka iya enggau dalam!

Jesus ba menua puang pengelama 40 hari enggau 40 malam. Sekumbang maya nya, iya nadai makai nama-nama utai. Nya kebuah, iya amat lapar. Maya nya Sitan pan datai lalu nguji Jesus. Ku iya madahka: “Enti nuan amat anak Petara, asuh batu tu nyadi roti.” (Matthew 4:3) Jesus nulak penguji nya, laban iya nemu iya enda patut ngena kuasa Petara ngemuaska pengingin diri empu aja.

Sitan enda badu nguji Jesus. Iya ngena chara bukai. Sitan mai Jesus ngagai endur ti pemadu tinggi ba Rumah Sembiang lalu iya ngasuh Jesus terejun ari endur nya ngambika bala melikat ulih nyelamatka iya. Tang Jesus enggai ngereja nya. Ku Jesus nyaut Sitan: “Endang udah ditulis: ‘Nuan enda tau nguji Petara nuan, Jehovah.’”—Matthew 4:7.

Udah nya, Sitan nguji Jesus kali ketiga. Lalu Sitan “mandangka semua perintah ba dunya enggau mulia perintah nya ngagai Jesus.” Ku Sitan bejaku: “Semua tu deka diberi aku ngagai nuan, enti nuan besugang lalu nyembah aku sekali aja.” Sekali agi Jesus terus nulak penguji ari Sitan nya, ku Jesus nyaut iya: “Rari nuan Sitan!” (Matthew 4:8-10) Jesus ngelaban penguji ari Sitan laban iya nemu sembah patut diberi ngagai Jehovah siku aja. Nyadi, Jesus milih deka tetap ati ngagai Jehovah.

Kitai ulih belajar ari penguji nya sereta chara Jesus napi penguji nya. Kitai belajar Sitan endang amat bisi, tang iya enda ulih dipeda. Pia mega, iya ukai pengingin ti jai ba sesiku orang aja. Jesus sigi diuji, tu nunjukka Sitan endang amat bisi. Kitai mega belajar semua perintah ba dunya tu dikuasa Sitan, nya kebuah iya ulih ngena nya nyadika penguji ngagai Jesus.

Kelimpah ari nya, Sitan sanggup meri semua perintah ari dunya tu ngagai Jesus enti Jesus nyembah iya sekali aja. Enggau chara ti sama, Sitan pan deka nguji kitai maya iya meri peluang ke kitai bulih pengaya, kuasa, tauka pangkat ti tinggi ba dunya tu. Enti kitai neladan Jesus ke tetap ati ngagai Jehovah enda ngira nama penguji, kitai nunjukka diri bepenemu-dalam. Ingat meh pengudah Sitan ninggalka Jesus, iya agi “nganti maya ti ngena alai nguji Jesus baru.” (Luke 4:13) Sitan pan deka terus ngiga peluang kena nguji kitai. Nya alai kitai patut seruran bejaga.