Pengudah Jesus meri beribu iku orang makai, orang mayuh ngumbai “iya endang Nabi ti disemaya ke deka datai ke dunya,” iya nya Messiah. Nya alai sida yakin Jesus tentu deka nyadi siku raja ti manah. (John 6:14; Ulang Adat 18:18) Nyadi orang mayuh ngaga pelan nangkap Jesus lalu deka ngansak iya nyadi raja.

Tang, Jesus nemu utai ke dipelan sida. Nyadi Jesus ngasuh orang mayuh pulai. Pia mega, iya ngasuh bala murid iya nepan perau ngagai Betsaida. Udah nya sida terus ngagai Kapernaum. Taja pia, Jesus niki ngagai bukit kediri laban iya deka besampi.

Maya tumu pagi, Jesus tepedaka perau ke ditepan bala murid iya ari jauh. Lebuh maya nya, ribut amat balat lalu ai ba danau begelumbang. Ketegal nya, bala rasul Jesus “bebendar amat bekayuh nanjak ribut.” (Mark 6:48) Udah nya, Jesus nurun ari bukit lalu bejalai atas ai mansang ngagai sida. Maya nya “sida udah bekayuh kira-kira lima tauka enam kilometer.” (John 6:19) Bala murid Jesus tepedaka iya bejalai mansa sida. Ketegal nya, sida nyadi takut lalu nyerauh: “Bisi ayas utai!”—Mark 6:49.

Jesus madah ngagai sida: “Anang takut! Anang irau! Aku tu.” Tang Peter madahka: “Tuan, enti nya amat nuan, asuh aku bejalai ba atas ai ngagai nuan.” Ku Jesus: “Kitu ke nuan!” Tekala nya, Peter angkat ari perau lalu bejalai ba atas ai mansang ngagai Jesus. Taja pia, Peter tepedaka ribut ti balat. Nyadi Peter takut lalu belabuh tengelam. Peter lalu nyerauh: “Tuan, selamatka aku!” Jesus jampat nangkap jari Peter lalu madah: “Mit amat pengarap nuan. Nama kebuah nuan kakang?”—Matthew 14:27-31.

Pengudah Peter enggau Jesus nepan perau nya, ribut pan teduh. Bala murid Jesus balat alit ati enggau utai ke baru udah nyadi. Tang kati sida patut berasai baka nya? Beberapa jam sebedau utai tu nyadi, Jesus udah ngereja pengawa ti luar biasa lebuh iya meri beribu iku orang makai. Enti bala murid Jesus mereti “pasal tuku roti” nya, sida enda patut berasai tekenyit lebuh meda Jesus bejalai ba atas ai sereta neduhka ribut. Pengudah nya, bala murid Jesus ke dalam perau nya besugang ngagai iya, sida madahka: “Nuan endang amat Anak Petara.”—Mark 6:52; Matthew 14:33.

Enda lama pengudah nya, sida datai ba Genesaret ke bisi ba selatan Kapernaum. Sida nanchangka perau nya ba dia, lalu nurun ngagai darat. Maya nya mayuh orang ngelala Jesus. Nya alai sida ke diau ba endur ke semak dia mai orang ke sakit ngagai Jesus. Lebuh sida ke sakit negu gari luar Jesus, sida nyadi gerai.

Lebuh maya nya, orang mayuh nemu Jesus udah mupuk ari endur nya. Sida udah meda Jesus meri makai beribu iku orang. Nyadi lebuh perau ari Tiberias datai, sida nepan perau nya ngagai Kapernaum ngiga Jesus. Lebuh sida tetemuka iya, sida nanya: “Rabbi, kemaya nuan datai ba ditu?” (John 6:25) Ketegal nya, Jesus ngerara sida. Nama kebuah? Aram meh kitai meda ba pelajar pengudah tu.