Lebuh Jesus ngajar orang ba Kaisaria Pilipi, iya nya kira-kira 25 kilometer ari Bukit Hermon, iya madahka utai tu ngagai bala rasul iya: “Enggau bendar aku madah ngagai kita: Sekeda orang ke bediri ditu, enda mati seagi-agi sida bedau meda Anak Mensia datai dalam Perintah iya.”—Matthew 16:28.

Bala murid Jesus enda meretika utai ke dipadah iya. Kira-kira seminggu pengudah nya, iya mai tiga iku rasul, iya nya Peter, James enggau John, niki ngagai siti bukit ti tinggi. Sida engka ngereja nya maya malam hari, laban tiga iku rasul nya ngantuk. Lebuh Jesus benung besampi, iya berubah gamal ba mua sida tiga. Tiga iku rasul Jesus meda mua iya manchar baka mata panas, lalu gari iya bebali beperenching burak.

Udah nya, “Moses enggau Elijah” ayan. Seduai iya bejaku enggau Jesus pasal Jesus ke “deka mupuk ari dunya tu. Lalu utai tu deka nyadi ba Jerusalem.” (Luke 9:30, 31) Nama reti Jesus deka mupuk? Reti iya, iya deka mati lalu pengudah nya diangkatka idup baru. (Matthew 16:21) Sebedau tu, Peter madahka Jesus enda ibuh diperinsa sereta dibunuh. Tang utai ke disebut Jesus, Moses, sereta Elijah maya nya enda sejalai enggau runding Peter, laban pemati Jesus enda ulih diseliahka.

Tiga iku rasul nya enda agi ngantuk, sida balat alit ati enggau utai ke dipeda sereta didinga sida. Taja pan sida benung meda genera, tang Peter ngasaika utai nya amat-amat nyadi. Ketegal nya, iya madah ngagai Jesus: “Rabbi, kami gaga ati ulih ba ditu. Awakka kami nirika tiga iti langkau kain, siti ke nuan, siti ke Moses, lalu siti da agi ke Elijah.” (Mark 9:5) Nama kebuah Peter deka nirika langkau kain? Iya engka deka meda genera nya diayanka lama agi.

Lebuh Peter benung bejaku, siti remang ti terang mungkur sida lalu bisi nyawa ari remang nya bejaku: “Tu Anak ti dikesayauka Aku. Aku gaga ati ke iya. Pendingka iya.” Lebuh bala rasul ninga nyawa Petara, sida amat takut nyentukka sida ningkapka diri ke tanah, tang Jesus madah ngagai sida: “Angkat. Anang takut.” (Matthew 17:5-7) Lebuh sida tiga angkat, sida nadai agi meda orang bukai ba dia, semina Jesus aja. Lebuh hari nyau siang, sida empat nurun ari bukit nya, lalu Jesus madah ngagai tiga iku bala rasul iya: “Anang madahka pasal genera nya ngagai orang, nyentuk ngagai maya Anak Mensia udah diidupka baru ari mati.”—Matthew 17:9.

Nama kebuah Elijah ayan ba genera nya? Nyadi bala rasul nanya Jesus, “Nama kebuah bala penulis Adat madahka Elijah patut dulu datai?” Jesus nyaut: “Elijah endang amat dulu datai, tang orang enda ngelala iya.” (Matthew 17:10-12) Kebendar iya, Jesus benung bejaku pasal John Pemaptisa, ke bisi peranan ti sama enggau Elijah. Suba Elijah nyediaka jalai ke Elisa, lalu John udah nyediaka jalai ke Kristus.

Genera tu tentu udah ngeringka Jesus enggau bala rasul. Genera tu nunjukka mulia Jesus ba Perintah Petara. Nya alai bala murid udah meda “Anak Mensia datai dalam Perintah iya,” baka ke udah disemayaka Jesus. (Matthew 16:28) Ba bukit nya, bala rasul udah ‘meda mulia iya ngena mata sida empu.’ Taja pan orang Parisi minta Jesus ngayanka siti tanda kena nunjukka iya raja ti udah dipilih Petara, tang iya enggai ngereja nya. Taja pia, bala murid ke rapat enggau Jesus bisi peluang meda iya berubah gamal. Tu nulung sida yakin semua jaku benabi pasal Perintah Petara deka dikeamatka. Nya kebuah Peter ulih madah munyi tu: “Kami majak andalka jaku benabi.”—2 Peter 1:16-19.