Bala rasul Jesus bejalai nginjil ba Galili. Ba maya ti sama, John Pemaptisa agi dikurung dalam rumah jil. Lalu udah nyauka dua taun iya dijil.

Raja Herod Antipas udah jadi enggau Herodias, iya nya bini menyadi iya Philip. Herod udah nyarakka bini iya ti keterubah laban iya deka jadi enggau Herodias. John enggau terang madahka utai ti digaga Herod nya salah. Herod ngumbai diri nitihka Adat Moses. Tang nitihka Adat Moses, Herod butang lalu tikah nya enda sah. Nya alai John ngerara Herod. Lalu ketegal nya, Herod ngurung John dalam jil. Engka Herodias ke ngasuh Herod ngereja nya.

Herod enda nemu nama patut digaga iya ngagai John, laban orang mayuh “ngumbai John nabi.” (Matthew 14:5) Tang, Herodias enda sama. Iya “bedendam ngagai John” lalu ngiga peluang deka munuh John. (Mark 6:19) Ba pengujung iya, Herodias bisi peluang ngereja nya.

Enda lama sebedau Pengerami Paska kena taun 32 M., Herod ngatur pengerami makai besai kena ngintu hari pengada iya. Herod mai semua bala pemesai, bala tuai soldadu iya, sereta orang ke besai pangkat ba menua Galili, sama ngintu hari pengada iya. Maya pengerami nya, anak indu Herodias ke benama Salomi, datai lalu betanda ba mua bala temuai. Iya anak indu Herodias enggau laki iya ke suba, Philip. Herod enggau bala temuai iya rindu ati meda Salomi betanda.

Ketegal Herod berasai amat gaga ati, iya madah ngagai Salomi: “Pinta meh sebarang utai ti dikedekaka nuan ari aku, lalu aku deka meri utai nya ngagai nuan.” Herod indah besumpah ngagai iya: “Aku deka meri ngagai nuan sebarang utai ti dipinta nuan. Indah setengah ari menua ti dipegai aku deh, deka aku beri ngagai nuan.” Sebedau Salomi nyaut Herod, iya ngiga indai iya lalu nanya: “Nama utai ti patut dipinta aku?”—Mark 6:22-24.

Peluang ke dianti Herodias udah datai! Iya nyaut Salomi: “Pala John Pemaptisa.” Tekala nya, Salomi beguai-guai betemu enggau Herod lalu madah: “Aku minta nuan meri ngagai aku diatu pala John Pemaptisa ba atas talam.”—Mark 6:24, 25.

Utai ti dipinta Salomi ngasuh Herod balat tusah ati. Tang ketegal semua bala temuai Herod udah ninga iya besumpah ngagai Salomi, iya deka berasai malu enti iya nulak peminta Salomi. Herod sanggup ngereja nya, taja pan iya patut munuh orang ke enda besalah. Nya alai, iya ngasuh siku jejaga mumpung pala John dalam rumah jil. Udah nya, jejaga nya mai pala John ba atas talam lalu meri pala nya ngagai Salomi. Lalu Salomi meri pala nya ngagai Herodias, indai iya.

Lebuh bala murid John ninga utai ke nyadi, sida datai ngambi bangkai John lalu nguburka iya. Udah nya, sida mupuk lalu madah ngagai Jesus semua utai ke udah nyadi.

Udah nya, lebuh Herod ninga pasal Jesus ngeraika orang ke sakit sereta muru bala melikat ti jai, iya berasai takut. Herod takut enggaika Jesus nya John Pemaptisa ke udah “diidupka baru ari mati.” (Luke 9:7) Nya alai, Herod Antipas keran deka betemu enggau Jesus. Tang, ukai ketegal iya deka ninga ajar Jesus, iya semina deka nemu sekalika Jesus nya endang amat John tauka enda.