John Pemaptisa udah dijil kira-kira setaun. Taja pia, iya bisi ninga pasal kereja ajih ke digaga Jesus. Uji perundingka asai ati John lebuh bala murid iya madah pasal Jesus udah ngidupka baru anak siku indu balu ba Nain. Tang, John deka ninga ari Jesus empu kena nemu sekalika iya endang amat Messiah tauka enda. Nya alai, John nganjung dua iku murid iya ngagai Jesus. Lalu John ngasuh seduai iya nanya munyi tu: “Kati nuan tu Kristus ke dianjung Petara, tauka kami patut nganti orang bukai?”—Luke 7:19.

Ketegal John nyembah Petara enggau ati ti enda bebagi, nya alai utai ke ditanya iya baka ke nyelai. Pia mega, kira-kira dua taun sebedau utai tu nyadi, John udah maptisa Jesus. Maya nya, John empu bisi meda kuasa kudus Petara nurun ngagai Jesus, lalu iya mega ninga nyawa Petara madahka diri gaga ati enggau Jesus. Ketegal nya, kitai nadai kebuah ngumbai pengarap John udah nyadi lemi. Enti nya meh utai ke udah nyadi, Jesus tentu enda muji John baka ke deka digaga iya pengudah tu. Tang enti John enda kakang ati, nama kebuah iya nanya Jesus munyi nya?

John deka nemu ari Jesus empu sekalika iya amat Messiah tauka enda. Tu deka ngeringka John laban iya merinsa ba jil. John mega bisi kebuah bukai nanya Jesus munyi nya. John nemu pasal jaku benabi Bup Kudus ke madah, orang ke dipilih Petara deka nyadi raja sereta penyelamat. Tang bebulan-bulan pengudah Jesus dibaptisa, John agi dikurung ba jil. Nya alai, John nanya enti bisi orang bukai ke deka datai nganti Jesus, ngambika ulih ngamatka semua jaku benabi pasal Messiah.

Ari ke madah ngagai bala murid John, ‘Aku meh orang ke deka datai,’ Jesus nunjukka bukti ti terang ke nunjukka iya endang amat dianjung Petara. Iya ngereja nya enggau ngeraika orang mayuh ari mayuh macham penyakit. Udah nya Jesus madah ngagai seduai iya: “Mupuk meh seduai lalu padahka ngagai John utai ke didinga enggau dipeda seduai: Orang ke buta ulih meda, orang ke pinchat ulih bejalai, orang ke sakit lan ulih gerai, orang ke bengal ulih ninga, orang ke mati diangkatka idup baru, lalu Berita Manah ditusui ngagai orang ke seranta.”—Matthew 11:4, 5.

Tanya John engka nunjukka iya ngarapka Jesus ngereja mayuh agi pengawa. John mega engka deka Jesus ngelepaska iya ari jil. Tang, saut Jesus nunjukka John enda patut ngarapka lebih kelimpah ari kereja ajih ke digaga Jesus.

Pengudah dua iku murid John mupuk, Jesus madah ngagai orang mayuh, John nya besai agi ari siku nabi. John meh “orang ke mai pesan” ari Jehovah baka ke dipadah dalam jaku benabi ba Malaki 3:1. John mega nabi Elijah, baka ke dipadah Malaki 4:5, 6. Ku Jesus nerangka: “Enggau bendar aku madah ngagai kita: Ari semua orang ke udah diadaka, nadai siku ke besai agi ari John Pemaptisa. Tang orang ke megai penuduk ti pemadu mit dalam  Perintah serega, besai agi ari iya.”—Matthew 11:11.

Jesus madahka orang ke megai penuduk ti pemadu mit dalam Perintah serega besai agi ari John. Reti iya, John nadai peluang nyadi sebagi ari Perintah serega. John udah nyediaka jalai ke Jesus. Taja pia, iya mati sebedau Jesus muka jalai ngambika orang ulih tama ngagai Perintah serega. (Hebrew 10:19, 20) Tang John nya siku nabi ti tetap ati, lalu iya deka nyadi rayat Perintah Petara ba bumi.