Lebuh bala rasul datai ba seberai danau nya, utai ti nyadi ba dia ngasuh sida amat tekenyit. Dua iku lelaki ke dirasuk melikat ti jai datai ari pendam, lalu mansang ngagai Jesus! Bup Kudus lebih fokus ba siku entara seduai, engka iya mangah agi sereta lama agi dirasuk bala melikat ti jai.

Lelaki nya lama udah enda bebaju. “Siang malam, iya rauh-rauh ba sebelah pendam enggau ba sebelah bukit, lalu ngurik diri ngena batu.” (Mark 5:5) Iya amat mangah nyentukka orang enda berani nengah jalai nya. Orang suah nguji ngerantai jari enggau kaki iya tang iya ulih mutuska enggau mechahka rantai nya. Nadai orang chukup kering deka masung iya.

Lelaki nya belanda lalu besugang ba mua Jesus. Bala melikat ti jai ke ngerasuk lelaki nya ngasuh iya nyerauh: “Jesus, Anak Petara ti Pemadu Tinggi, nama kebuah nuan kitu? Besumpah meh dalam nama Petara, nuan enda merinsaka aku!” Jesus mandangka iya bekuasa agi ari melikat ti jai nya lalu madah: “Melikat ti jai, pansut nuan ari lelaki tu!”—Mark 5:7, 8.

Kebendar iya, bisi mayuh melikat ti jai ngerasuk lelaki nya. Lebuh Jesus nanya: ‘Sapa nama nuan?’ Melikat ti jai nya nyaut: “Nama aku Legiun, laban kami mayuh!” (Mark 5:9) Dalam raban soldadu Rome, siti legiun bisi beribu-ribu iku soldadu. Reti iya, bisi amat mayuh bala melikat ti jai ngerasuk iya, lalu sida gaga ati ngasuh iya merinsa. “Bala melikat ti jai nya bebendar minta Jesus ngambika enda muru sida ngagai lubang ti amat dalam.” Sida engka udah nemu utai ti deka nyadi ngagai sida enggau Sitan, ketuai sida.—Luke 8:31.

Maya nya, bisi kira-kira 2,000 iku babi benung makai ba sebelah bukit. Nitihka Adat Moses, babi dikumbai enda tuchi, lalu orang Judah enda patut nupi babi. Bala melikat ti jai minta Jesus: “Asuh kami tama ngagai raban babi nya.” (Mark 5:12) Jesus lalu ngemendarka sida ngereja nya. Udah nya, semua kira-kira 2,000 iku babi  belanda terejun nurun tingkah ngagai danau lalu lemas.

Lebuh orang ke ngibun raban babi nya meda semua utai ke nyadi, sida rari lalu nusui pasal utai ke udah nyadi nya ba nengeri enggau ba menua pesisir. Nya alai, orang mayuh pan datai deka meda utai ke udah nyadi nya. Sida datai ngagai Jesus lalu meda lelaki nya duduk semak kaki Jesus. Iya udah begari sereta enda agi gila!

Orang mayuh berasai takut laban sida enda meretika utai ke nyadi. Nya alai sida minta Jesus mupuk ari menua sida. Lebuh Jesus benung nepan perau, lelaki ke udah dirasuk melikat ti jai nya lalu bebendar minta Jesus mai iya. Tang Jesus enggai mai iya lalu bejaku ngagai iya: “Pulai ke rumah ngagai kaban belayan nuan, lalu padahka ngagai sida semua utai ti udah dikereja Jehovah ke nuan, enggau pengasih ke diayanka Iya ngagai nuan.”—Mark 5:19.

Kesuah iya, Jesus enda ngasuh orang ke digeraika iya madah ngagai orang bukai pasal utai ti udah digaga iya. Tang kali tu, iya ngasuh lelaki nya madah pasal pekara tu. Lelaki nya ulih meri saksi ngagai orang ke nadai peluang betemu enggau Jesus. Lebuh orang ninga pasal raban babi ke mati lemas nya, sida engka bisi runding ti enda manah pasal Jesus. Nya alai, saksi ke diberi lelaki nya engka ulih ngubah runding sida. Nyadi, lelaki nya mupuk lalu madah ngagai orang ba serata Dekapolis pasal semua utai ke udah digaga Jesus ke iya.