Chara tiap iku orang nerima utai ke disebut sereta digaga Jesus enda sama, laban tu bepanggai ba ati sida empu. Utai tu nyata dipeda ba siti rumah di Galili. Siku orang Parisi ke benama Simon mai Jesus makai enggau iya. Iya engka deka ngelala Jesus ke udah ngereja mayuh pengawa ti luar biasa. Jesus setuju deka makai enggau iya, laban Jesus ngumbai tu siti peluang alai iya ulih nginjil, baka ke kala digaga iya lebuh iya makai begulai enggau bala pengumpul chukai sereta orang ke bedosa.

Taja pan Jesus nya siku temuai, tang iya enda disambut enggau manah maya nya. Suba, jalai ba Palestin amat bedebu. Ketegal nya, kaki orang ke udah bejalai ba luar deka berasai angat sereta kamah. Nya alai, orang ke bempu rumah ba jeman nya suah nyediaka ai ngambika ulih masu kaki bala temuai sida. Sida mega suah nyium temuai ke datai, lalu nuangka minyak ba pala temuai ngambika ulih nunjukka pemanah ati sereta pengerah jari. Tang Simon enda ngereja semua nya ngagai Jesus.

Lebuh bala temuai berengkah makai, siku indu tama ngagai rumah nya. Tang iya ke amat, indu nya enda dibai datai. Pia mega, “mayuh orang nemu iya idup dalam dosa.” (Luke 7:37) Endang amat, semua mensia ti enda sempurna udah bedosa. Taja pia, indu tu idup enggau chara ti enda bemoral. Iya engka siku pelacur. Tang iya engka bisi ninga pasal ajar Jesus, nyengkaum maya Jesus mai orang ‘ke lelak ngema utai ti berat’ datai ngagai iya ngambika ‘bulih pengering baru.’ (Matthew 11:28, 29) Utai ke disebut sereta digaga Jesus engka meransang indu nya ngiga iya.

Indu nya besugang semak kaki Jesus. Iya nyabak lalu ngemasahka kaki Jesus ngena ai mata iya. Udah nya, iya ngendas kaki Jesus ngena buk iya. Iya mega nyium kaki Jesus lalu nuangka minyak wangi ke dibai iya ba kaki Jesus. Simon enda rindu enggau utai ke dipeda iya, lalu bejaku dalam ati diri: “Enti lelaki tu amat nabi, tentu iya nemu sapa ke negu iya. Kati iya enda nemu indu tu idup dalam dosa?”—Luke 7:39.

Jesus nemu utai ke diperundingka Simon. Nya alai, ku Jesus bejaku ngagai iya: “Simon, bisi utai ka dipadah aku ngagai nuan.” Ku Simon nyaut: “Nama utai ke deka dipadahka nuan, Pengajar?” Jesus lalu madahka: “Bisi dua iku orang nginjau duit ari siku lelaki. Siku berutang 500 denari, lalu siku da agi berutang 50 denari. Lebuh seduai iya enda tebayarka utang diri, lelaki nya muai utang seduai iya. Nyadi, sapa ari seduai tu deka lebih agi rinduka iya?” Tang maya nya Simon enda entu beminat enggau utai ke dipadah Jesus. Nya alai iya semina madah ngagai Jesus: “Ba runding aku, lelaki ke mayuh agi utang.”—Luke 7:40-43.

Jesus setuju enggau utai ke disaut Simon. Udah nya, Jesus malik ngagai indu nya lalu bejaku ngagai Simon: “Bisi nuan meda indu tu? Maya aku tama ngagai rumah nuan, nuan enda meri ai kena aku masu kaki. Tang, indu tu masahka kaki aku ngena ai mata iya, lalu ngendas kaki aku ngena buk iya. Maya ngelaluka aku, nuan enda nyium aku. Tang, indu tu enda ngetu-ngetu nyium kaki aku kenyau ari aku tama kitu. Nuan enda nuangka minyak ba pala aku. Tang, indu tu nuangka minyak wangi ba kaki aku.” Jesus nemu indu nya amat-amat nesal ati ke pengidup iya ti enda bemoral. Nya alai Jesus madah: “Aku madah ngagai nuan: Taja pan dosa indu tu mayuh, dosa iya udah diampun, laban iya ngayanka mayuh agi pengerindu. Tang lebuh orang ke ngereja mimit aja dosa diampun, sida kurang agi ngayanka pengerindu.”—Luke 7:44-47.

 Tang tu ukai reti iya, Jesus nerima pengawa ti enda bemoral. Taja pia, Jesus ngayanka pengasih ngagai orang ke amat-amat nesal ati ketegal udah ngereja dosa ti besai, lalu bebendar ngiga Jesus ngambika bulih pengelantang ba ati. Udah nya Jesus madah ngagai indu nya: “Dosa nuan udah diampun. . . . Pengarap nuan udah nyelamatka nuan. Mupuk meh nuan. Anang irau.” Indu nya tentu berasai lantang amat ati pengudah dinga Jesus bejaku munyi nya ngagai iya.—Luke 7:48, 50.