Lebuh Jesus, Peter, James enggau John nurun ari bukit nya, sida betemu enggau orang mayuh. Maya nya, bala penulis Adat benung bekelikuh enggau bala murid Jesus. Lebuh orang mayuh meda Jesus, sida tekenyit. Sida belanda ngagai iya lalu nyambut penatai iya. Nyadi Jesus nanya: “Nama utai ke dikelikuhka kita enggau sida?”—Mark 9:16.

Maya nya bisi siku lelaki ari bala orang mayuh nya besugang ba mua Jesus lalu madah: “Pengajar, aku mai anak lelaki aku ngagai nuan. Iya bisu laban iya dirasuk melikat ti jai. Tiap kali melikat ti jai nya nyerang iya, melikat ti jai nya ngempaska iya ke tanah, nyawa iya bepupu, ngeli iya kerik-kerik, lalu tubuh iya nyadi lemi. Aku minta bala murid nuan muru melikat ti jai nya, tang sida enda ulih ngereja nya.”—Mark 9:17, 18.

Bala penulis Adat ngutuk bala murid Jesus laban sida enda ulih ngeraika nembiak lelaki nya. Nyadi Jesus madahka utai tu ngagai bala orang mayuh: “Kita tu rebak ke enda arap sereta jai! Ni pengelama aku patut begulai enggau kita? Ni pengelama aku patut sabar enggau kita?” Jaku Jesus dituju ngagai bala penulis Adat ke ngachau bala murid Jesus lebuh iya nadai enggau sida. Nya alai Jesus madah ngagai apai nembiak nya: “Bai iya kitu ngagai aku.”—Matthew 17:17.

Lebuh nembiak lelaki nya mansang ngagai Jesus, melikat ti jai nya ngempaska iya ke tanah lalu ngusak iya. Nembiak nya maringka diri lalu nyawa iya bepupu. Ku Jesus nanya apai nembiak nya: “Ni pengelama iya udah baka tu?” Apai nembiak nya nyaut: “Kenyau ari iya agi mit. Melikat ti jai nya suah udah nikauka  iya ngagai api, enggau ngagai ai, deka munuh iya. Tang enti nuan ulih ngeraika iya, kasihka kami, lalu tulung meh kami.”—Mark 9:21, 22.

Apai nembiak nya nyauka putus asa, laban bala murid Jesus enda ulih ngeraika anak iya. Ketegal nya, Jesus meransang apai nembiak nya lalu madahka: “Nama kebuah nuan nyebut, ‘Enti nuan ulih?’ Semua utai ulih magang ke orang ti arap.” Tekala nya, apai nembiak nya lalu bejaku enggau nyawa ti inggar: “Aku arap! Tulung aku ngambika pengarap aku besai agi!”—Mark 9:23, 24.

Jesus meda orang mayuh belanda mansang ngagai iya. Udah nya, Jesus ngerara melikat ti jai nya: “Nuan melikat ti bengal enggau bisu. Aku ngasuh nuan pansut ari nembiak tu, lalu anang agi tama ngagai iya!” Lebuh melikat ti jai nya deka pansut ari nembiak nya, melikat ti jai nya nyerauh lalu balat amat ngusak nembiak nya. Pengudah nya, nembiak nya enda engkebut. Nyadi, orang mayuh madahka: “Iya udah mati!” (Mark 9:25, 26) Tang lebuh Jesus megai jari nembiak nya, iya angkat lalu “gerai tekala nya.” (Matthew 17:18) Orang mayuh alit ati enggau utai ke digaga Jesus.

Sebedau tu, bala murid Jesus ulih muru bala melikat ti jai. Nya alai lebuh sida ba siti rumah, bala murid iya nanya: “Nama kebuah kami enda ulih muru melikat ti jai nya?” Jesus madahka nya ketegal sida kurang pengarap. Iya madahka: “Melikat ti jai ke baka nya semina ulih diburu ngena sampi.” (Mark 9:28, 29) Pengarap ti kering enggau sampi minta tulung ari Petara amat beguna kena muru melikat ti jai ke bekuasa nya.

Kepenudi iya, Jesus madahka: “Enti kita bisi pengarap ngemesai igi mustard, kita ulih bejaku ngagai bukit tu, ‘Mindah kin,’ lalu bukit tu deka mindah. Nadai utai ke enda ulih dikereja kita.” (Matthew 17:20) Naka meh pemesai kuasa pengarap!

Penanggul sereta penusah ulih ngachau pemansang kitai gawa ke Jehovah. Semua nya tau disemaka enggau siti bukit. Tang, enti kitai ngemansangka pengarap, kitai ulih mutarka penanggul ke baka bukit.