Pengawa nginjil Jesus ba Galili udah mujur. Tang Jesus madahka, “Aku mega patut nusui Berita Manah pasal Perintah Petara ba endur bukai.” Reti iya, Jesus deka nginjil ngagai endur bukai, ukai semina ba Galili aja. Nya alai, iya “mupuk nusui Berita Manah dalam balai gempuru ba serata menua Judea.” (Luke 4:43, 44) Tu maya ti ngena laban diatu nya musin bungai lalu pengerami orang Judah nyau semak.

Bup Injil mayuh nyeritaka pasal pengawa nginjil Jesus ba Galili, tang enda nyebut mayuh pasal pengawa nginjil Jesus ba Judea. Ba Judea, orang enda entu nerima Jesus. Taja pia, iya terus ransing nginjil sereta ngereja pengawa ti manah enda ngira kini tunga iya bejalai.

Enda lama udah nya, Jesus ngagai Jerusalem laban deka nyambut Pengerami Paska kena taun 31 M. Ba dia, semak enggau Pintu Bedus, bisi siti kulam ti besai ti dikumbai Betsata. Endur nya selalu bisi mayuh orang. Mayuh orang ke sakit, ke buta, enggau ke pinchat datai ngagai kulam nya. Nama kebuah? Orang mayuh pechaya, enti orang ke sakit tama ngagai ai kulam nya lebuh ai ba dalam nya beumbak, orang nya deka gerai.

Maya nya Hari Sabat, lalu Jesus meda siku lelaki ke sakit gali semak kulam nya. Lelaki nya udah sakit pengelama 38 taun. Jesus nanya lelaki nya: “Nuan ka gerai?” Lalu lelaki nya nyaut: “Tuan, nadai orang nanggung aku ngagai kulam nya, lebuh ai kulam nya beumbak. Tiap kali aku ka kin, orang bukai udah dulu agi ari aku.”—John 5:6, 7.

Utai ke disebut Jesus tentu ngasuh lelaki nya enggau orang bukai ba dia tekenyit. Ku Jesus madah ngagai lelaki nya: “Angkat! Bai tikai nuan lalu bejalai.” (John 5:8) Tekala nya lelaki nya gerai. Iya mai tikai nya lalu bejalai!

Ari ke gaga ati ketegal lelaki nya udah gerai, orang Judah ngakim iya lalu madah: “Seharitu, Hari Sabat. Nuan ngelanggar Adat laban nuan mai tikai nya.” Lelaki nya nyaut sida: “Orang ke ngeraika aku ke madah ngagai aku, ‘Bai tikai nuan lalu bejalai.’” (John 5:10, 11) Sida orang Judah tu ringat laban bisi orang udah ngeraika lelaki nya maya Hari Sabat.

Sida nanya, “Sapa orang ke madah ngagai nuan, ‘Bai tikai nuan lalu bejalai’?” Nama kebuah sida nanya iya baka nya? Laban Jesus “udah nyelitka diri ba entara orang mayuh,” lalu lelaki nya enda nemu nama Jesus. (John 5:12, 13) Enda lama udah nya, ba Rumah Sembiang, lelaki nya betemu baru enggau Jesus. Nya baru iya nemu Jesus meh ke udah ngeraika iya.

Udah nya, lelaki nya ngiga orang Judah ke nanya iya pasal sapa ke udah ngeraika iya. Lalu, iya madahka sida Jesus ke udah ngeraika iya. Pengudah sida nemu nya, sida ngiga Jesus. Kati sida ngiga iya ketegal deka nemu baka ni Jesus ulih ngereja pengawa ti luar biasa nya? Enda. Sida deka nyalahka Jesus ketegal iya udah ngereja pengawa ti manah maya Hari Sabat. Sida indah berengkah ngelaban Jesus!