Jesus udah mai empat iku murid iya, iya nya Peter, Andrew, James, sereta John, nginjil enggau iya penuh jam. Maya nya ba hari Sabat, sida ngagai balai gempuru ba Kapernaum. Jesus berengkah ngajar ba balai gempuru, lalu orang ba dia alit ati enggau chara iya ngajar. Tu ketegal utai ke diajar iya datai ari Petara. Iya enda ngajar orang baka bala penulis Adat.

Maya nya ba balai gempuru bisi siku lelaki ke dirasuk melikat ti jai. Iya merakka nyawa bejaku: “Jesus orang Nasaret, nama kebuah nuan kitu? Kati nuan datai deka ngemunaska kami? Aku nemu sapa nuan ke bendar. Nuan nya Nembiak ti Kudus ke dianjung Petara!” Jesus lalu ngerara melikat ti jai nya: “Anang bejaku. Pansut ari iya!”—Mark 1:24, 25.

Melikat ti jai nya ngempaska lelaki nya, lalu ngasuh iya getar-getar sereta kejut-kejut. Udah nya melikat ti jai nya nyerauh enggau balat inggar lalu pansut ari lelaki nya, tang “enda ngemediska [iya].” (Luke 4:35) Semua orang ba balai gempuru balat alit ati, lalu sida belabuh betanya ngagai pangan diri: “Nama utai tu?” Sida madahka: “Iya bisi kuasa ngerara melikat ti jai, lalu sida ngasika iya.” (Mark 1:27) Nya alai, berita pasal utai ke nyadi tu ngelekai enggau jampat ngagai serata menua Galili.

Udah nya, Jesus enggau bala murid iya mupuk ngagai rumah Simon Peter. Maya nya, mentua indu Peter balat sakit ketegal chelap angat. Sida minta Jesus nulung iya. Nyadi Jesus mansang ngagai iya, megai jari iya, lalu nulung iya angkat. Tekala nya, iya gerai lalu nyediaka pemakai ke Jesus enggau bala murid iya.

Lemai nya lebuh mata panas padam, orang ari serata endur mai sida ke sakit ngagai rumah Peter. Nama kebuah? Laban sida deka minta Jesus ngeraika sida. Kebendar iya, ‘semua sida ke sakit laban mayuh macham pemedis dibai ngagai Jesus. Lalu Jesus ngengkahka jari iya ba atas tiap iku sida lalu ngeraika sida.’ (Luke 4:40) Jesus ngeraika sida enda ngira nama penyakit sida. Utai ti digaga Jesus ngamatka jaku benabi. (Isaiah 53:4) Jesus mega ngeraika sida ke dirasuk melikat ti jai. Lebuh bala melikat ti jai pansut ari orang, sida nyerauh lalu bejaku: “Nuan tu Anak Petara.” (Luke 4:41) Tang Jesus ngerara sida, lalu enda ngasuh sida bejaku laban sida nemu Jesus nya Kristus. Jesus enggai bala melikat ti jai ngasuh orang saru, lalu ngumbai sida mega nyembah Petara ti bendar.