Jesus udah meri beribu iku orang makai, lalu iya ngerarika diri laban sida deka ngasuh iya nyadi raja. Ba malam nya, Jesus bejalai ba atas ai sereta nyelamatka Peter ke belabuh tengelam, laban pengarap iya nyadi lemi. Jesus mega neduhka ribut, nyelamatka bala murid iya ngambika perau sida enda karam.

Diatu Jesus udah pulai baru ngagai Kapernaum. Orang ke kala diberi iya makai ngiga iya lalu nanya: “Kemaya nuan datai ba ditu?” Jesus ngerara sida laban sida ngarapka Jesus ulih meri sida makai baru. Ku Jesus madah ngagai sida: “Anang bekereja ngulihka pemakai ti nemu jai, tang bekereja meh ke pemakai ti ulih tan sereta meri pengidup ti meruan belama iya.” Nyadi sida nanya: “Nama patut dikereja kami ngambika ulih ngereja pengawa ke diberi Petara?”—John 6:25-28.

Sida engka berunding pasal pengawa ke ditulis dalam Adat, tang Jesus nyebut pasal pengawa ke berega agi. Ku iya: “Kena ngereja pengawa ke diberi Petara, kita patut arapka iya ke dikirumka Petara.” Tang sida, nadai arapka Jesus taja pan iya udah mayuh ngereja pengawa ajih ba mua sida. Sida minta Jesus meri siti tanda ngambika sida ulih arapka iya. Nyadi sida nanya iya: “Nama deka digaga nuan? Aki ini kami makai manna ba menua puang, baka ke udah ditulis: ‘Iya meri sida roti ari serega ke diempa sida.’”—John 6:29-31; Masmur 78:24.

Bekaul enggau sida ke minta tanda, Jesus madahka sida pasal sapa ke meri kuasa ngambika ulih ngereja pengawa ajih: “Enggau bendar aku madahka: Ukai Moses ke meri kita roti ti bendar ari serega, tang Apai aku. Laban roti ke diberi Petara nya, iya ke nurun ari serega lalu meri pengidup ngagai dunya.” Tang sida agi enda meretika utai ke dipadahka Jesus, nyadi sida madah: “Tuan, beri meh kami nya selalu.” (John 6:32-34) Taja pia, nama reti “roti” ke dipadahka Jesus?

Jesus nerangka: “Aku meh roti ke meri pengidup. Barang sapa ke datai ngagai aku enda agi lapar, lalu barang sapa ke arapka aku enda agi aus. Tang baka ke udah dipadah aku ngagai kita, kita udah meda aku tang kita agi enda arap. . . . Laban aku nurun ari serega ukai deka ngereja peneka aku empu, tang ngereja peneka Iya ke ngirumka aku. Tu meh peneka Iya ke ngirumka aku, iya nya aku enda tau lenyau siku pan ari semua orang ke udah diberi Iya ngagai aku. Tang aku patut ngangkatka semua sida idup baru jemah ila. Laban tu meh peneka Apai aku, iya nya genap iku orang ke nerima Anak lalu arapka iya deka bulih pengidup ti meruan belama iya, lalu aku deka ngangkatka iya idup baru jemah ila.”—John 6:35-40.

Utai ke disebut Jesus ngasuh orang ringat, lalu orang Judah berengkah mutap pasal iya. Baka ni iya tau ulih ngumbai diri “roti ke nurun ari serega?” (John 6:41) Ba sida, Jesus semina anak ari sepasang laki bini ke datai ari nengeri Galili ba Nasaret. Sida nanya: “Endaka iya tu Jesus anak Josep? Kitai ngelala apai indai iya.”—John 6:42.

Ku Jesus madah ngagai sida: “Badu agi kita mutap. Nadai orang ulih datai ngagai aku enti Apai ke ngirumka aku enda mai iya ngagai aku. Lalu aku deka ngangkatka iya idup baru jemah ila. Ba Ajar Sida Nabi, endang udah ditulis: ‘Semua sida deka diajar Jehovah.’ Genap iku orang ke udah ningaka Apai lalu belajar ari Iya, datai ngagai aku. Tu ukai reti iya bisi orang  kala meda Apai. Semina iya ke datai ari Petara kala meda Apai. Enggau bendar aku madah ngagai kita: Orang ke arap deka idup belama iya.”—John 6:43-47; Isaiah 54:13.

Sebedau tu, Jesus kala madah ngagai Nikodimus, barang sapa ke arapka Jesus deka bulih pengidup ti meruan belama iya. Ku Jesus: “Genap iku orang ke arapka [Anak Tunggal Petara] enda dipunaska tang bulih pengidup ti meruan belama iya.” (John 3:15, 16) Tang diatu iya madah ngagai mayuh agi orang pasal peranan iya ngambika sida ulih idup meruan belama iya. Manna tauka roti ari Galili enda ulih meri sida pengidup ti meruan. Tang baka ni orang ulih idup belama iya? Jesus ngulang baru jaku iya: “Aku meh roti ke meri pengidup.”—John 6:48.

Randau pasal roti ke nurun ari serega diteruska nyentuk ngagai maya Jesus ngajar ba balai gempuru di Kapernaum.