Ba begian timur Bukit Kana, bisi siti genturung pendiau ke dikumbai Betani. Endur nya kira-kira tiga kilometer ari Jerusalem. (John 11:18) Jesus kin lalu datai ngagai rumah dua iku diri menyadi, iya nya Marta sereta Maria. Seduai iya bisi siku da agi menyadi lelaki, ke benama Lasarus. Sida tiga kaban rapat Jesus, lalu sida nyambut penatai Jesus enggau manah.

Tiga iku menyadi tu bisi basa ti besai laban Messiah deka datai nemuai rumah sida. Marta amat gagit ati. Nya alai, iya deka nyediaka mayuh macham pemakai ti manah ke Jesus. Lebuh Marta benung kiruh ngereja mayuh macham pengawa, Maria duduk semak kaki Jesus lalu ningaka ajar Jesus. Ketegal nya, Marta madah ngagai Jesus: “Tuan, peda nuan. Menyadi aku ngelakka aku ngereja utai kediri. Asuh iya nulung aku.”—Luke 10:40.

Ari ke ngerara Maria, Jesus meri jaku lalau ngagai Marta laban iya kelalu irau enggau pemakai. Ku Jesus: “Marta, Marta, nuan kelalu irau sereta kiruhka mayuh utai. Kebendar iya, enda mayuh utai ke diguna kitai tauka semina siti aja pan chukup. Maria udah milih utai ti pemadu manah lalu utai nya enda diambi ari iya.” (Luke 10:41, 42) Nyadi, Jesus madahka sida enda ibuh ngena kelalu mayuh awak nyediaka mayuh macham pemakai. Semina siti aja pan udah chukup.

Iya ke amat, Marta bisi tuju ati ti manah laban iya deka nyambut temuai iya enggau manah. Tang ketegal iya kelalu irau enggau pengawa nyediaka pemakai, iya lenyau peluang ti berega ulih ninga ajar ari Anak Petara! Jesus madahka Maria milih utai ti pemadu manah. Utai ke dipelajar Maria ari Jesus deka mulaika penguntung ngagai iya empu sepemanjai pengidup iya. Pia mega, kitai ulih belajarka utai ti berega ari cherita tu.

Ba maya bukai, Jesus ngajar pasal chara besampi. Maya nya, siku murid datai ngagai iya lalu nanya: “Tuan, ajar kami chara besampi, baka John ke ngajar bala murid iya besampi.” (Luke 11:1) Kebendar iya, kira-kira setaun setengah sebedau nya, Jesus udah ngajar chara besampi lebuh iya meri Jaku Ajar ba Atas Bukit. (Matthew 6:9-13) Taja pia, murid nya engka nadai enggau lebuh Jesus meri jaku ajar nya. Nya alai Jesus ngulang baru poin ti penting pasal chara besampi. Pengudah nya, Jesus madahka siti jaku sempama kena nunjukka kebuah patut terus besampi.

“Enti sema siku ari kita bisi siku kaban, lalu kita ngagai rumah iya ba urung tengah malam lalu bejaku ngagai iya, ‘Unggal, beri aku tiga iti tuku roti, laban siku ari kaban aku baru datai ngagai rumah aku ari endur ti jauh. Lalu aku nadai utai ke ulih disediaka aku ke iya.’ Tang kaban kita nya nyaut ari dalam: ‘Anang ngachau aku. Pintu udah dikunchi, lalu bala anak aku benung tinduk enggau aku ditu. Aku enda ulih angkat meri nuan utai.’ Aku madah ngagai kita: Iya enggai angkat meri kita utai taja pan kita kaban iya. Tang ketegal kita enda ngetu minta, iya tentu angkat lalu meri kita nama-nama utai ke diguna kita.”—Luke 11:5-8.

Jesus ukai madahka Jehovah baka kaban dalam jaku sempama nya ke enggai nulung. Tang kaban ke enda sanggup nulung nya pan angkat lebuh kaban iya enda ngetu minta. Nyadi Jesus nunjukka, Jehovah, Apai kitai ti bepengerindu ba serega tentu deka nulung bala nembiak Iya ti setia ke enda ngetu minta ngagai Iya. Ku Jesus: “Aku madah ngagai kita: Anang badu minta, lalu kita deka nerima; anang badu ngiga, lalu kita deka tetemuka iya; anang badu nekung, lalu pintu deka dibuka ke kita. Laban genap iku orang ke minta, deka nerima; lalu genap iku orang ke ngiga, deka tetemuka iya; lalu genap iku orang ke nekung, pintu deka dibuka ke sida.”—Luke 11:9, 10.

 Pengudah nya Jesus mandingka Jehovah enggau bala apai ke bukai. Ku iya madah: “Ni bagi kita ke apai meri anak kita ular enti iya minta ikan? Tauka meri iya kala enti iya minta telu? Nya alai, enti kita orang ke bedosa nemu meri utai ti manah ngagai anak kita, Apai ti ba serega tentu deka meri kuasa kudus ngagai orang ke minta ari Iya!” (Luke 11:11-13) Endaka jaku Jesus nya ngasuh kitai yakin, Jehovah tentu ningaka kitai sereta sanggup meri tulung ke diguna kitai?