Ba hari ti ketujuh, iya nya hari ke penudi orang ngintu Pengerami Belangkau, Jesus benung ngajar orang semak “tabung duit” ba Rumah Sembiang. (John 8:20; Luke 21:1) Endur nya bisi ba dalam Laman Orang Indu, alai orang datai nepuka duit pemeri sida.

Sepemanjai pengerami nya lebuh malam hari, endur nya terang agi ari ke biasa. Bisi empat iti penuduk lampu ti tinggi diengkah ba dia. Tiap iti penuduk lampu nya bisi besin ti besai ke penuh enggau minyak. Penampak ari empat iti lampu nya manchar enggau terang nyentukka orang ari jauh ulih meda endur nya. Maya nya, utai ke dipadahka Jesus engka ngingatka bala peninga pasal empat iti lampu nya. Ku iya: “Aku tu meh penampak dunya. Barang sapa ke nitihka aku enda bejalai dalam pemetang, tang deka bulih penampak ke meri pengidup.”—John 8:12.

Orang Parisi enda nerima jaku Jesus, lalu sida madahka: “Nuan meri saksi pasal diri empu. Nya alai, saksi nuan nya bula.” Ku Jesus nyaut sida: “Taja pan aku meri saksi pasal diri empu, saksi ke diberi aku nya amat, laban aku nemu ari ni penatai aku sereta kini ke penunga aku. Tang kita enda nemu ari ni penatai aku sereta kini ke penunga aku. . . . endang udah ditulis ba Adat kita: ‘Enti dua iku orang meri saksi, saksi nya amat.’ Aku meri saksi pasal diri empu, lalu Apai ke ngirumka aku mega meri saksi pasal aku.”—John 8:13-18.

Orang Parisi enda setuju enggau Jesus, lalu nanya: “Dini Apai nuan?” Jesus nyaut: “Kita enda ngelala aku tauka Apai aku. Enti kita ngelala aku, kita mega tentu ngelala Apai aku.” (John 8:19) Taja pan orang Parisi deka Jesus ditangkap, tang nadai orang ngereja nya.

Jesus madah baru jaku iya: “Aku deka mupuk, lalu kita deka ngiga aku. Tang kita deka mati dalam dosa kita. Kita enda ulih datai ngagai endur ke dituju aku.” Orang Judah enda meretika jaku Jesus, lalu sida madah: “Kati  iya deka munuh diri? Laban iya madahka, ‘Kita enda ulih datai ngagai endur ke dituju aku.’” Sida enda ulih meretika jaku Jesus ketegal sida enda nemu ari ni penatai Jesus. Iya nerangka: “Kita datai ari baruh, tang aku datai ari atas. Kita datai ari dunya tu, tang aku ukai datai ari dunya tu.”—John 8:21-23.

Jesus madahka iya kala idup ba serega, lalu iya Messiah ti Disemaya, tauka Kristus ke patut dianti sida. Taja pia, sida agi enda setuju enggau iya lalu nanya: “Sapa nuan?”—John 8:25.

Ketegal sida agi nulak sereta ngelaban Jesus, nya alai Jesus nyaut sida: “Nama meh aku bejaku enggau kita?” Tang Jesus agi meri mulia ngagai Apai iya, lalu nerangka nama kebuah orang Judah patut ngasika Anak Petara: “Nama-nama utai ke disebut aku nya didinga aku ari Iya ke ngirumka aku ke dunya. Lalu Iya seruran nyebut utai ti bendar.”—John 8:25, 26.

Enda baka orang Judah ba dia, Jesus nunjukka diri amat arapka Apai iya. Jesus madahka: “Pengudah kita nuatka Anak Mensia, kita deka nemu aku meh iya, lalu aku enda ngereja nama-nama utai nitihka peneka aku empu. Nama-nama utai ke diajar Apai ngagai aku, nya meh utai ke disebut aku. Iya ke ngirumka aku bisi enggau aku. Iya enda ninggalka aku kediri, laban aku seruran ngereja utai ke ngelantangka ati Iya.”—John 8:28, 29.

Tang bisi sekeda orang Judah arapka Jesus lalu iya madah ngagai sida: “Enti kita seruran nitihka ajar aku, kita amat murid aku. Kita deka nemu pemendar, lalu pemendar deka ngelepaska kita.”—John 8:31, 32.

Sekeda orang ngumbai jaku Jesus nya nyelai. Sida mantah, lalu madah: “Kami peturun Abraham. Kami enda kala nyadi ulun sapa-sapa. Nya alai, baka ni ku nuan tau madahka, ‘Kita deka dilepaska’?” Suba, orang Judah kala diperintah orang bansa bukai tang sida agi enggai dikumbai ulun. Taja pia, Jesus agi madahka sida nya ulun, ku iya: “Enggau bendar aku madah ngagai kita: Tiap iku orang ke ngereja dosa deka nyadi ulun dosa.”—John 8:33, 34.

Orang Judah enda sedar sida nya ulun dosa. Nya alai, Jesus nerangka penusah ke deka nyadi ngagai sida. Ku iya: “Ulun enda diau ba rumah tuan iya belama iya. Tang anak deka diau ba rumah nya belama iya.” (John 8:35) Ambika chunto, siku ulun gawa ke siti ruang bilik, tang iya nadai hak bulih pesaka, lalu iya ulih diburu ba sebarang maya. Semina anak ke ada ba ruang bilik nya tauka anak angkat, ulih diau ba rumah nya “belama iya,” reti iya sepemanjai pengidup iya.

Nya alai, semina pemendar pasal Anak Petara ulih ngelepaska orang ari dosa. Nya kebuah Jesus madahka: “Enti Anak ngelepaska kita, kita amat-amat lepas.”—John 8:36.