Jesus engka agi ba Samaria tauka ba Galili lebuh orang Parisi nanya iya pasal penatai Perintah Petara. Sida ngumbai penatai Perintah Petara deka disambut enggau pengerami ti besai. Taja pia, Jesus madahka: “Perintah Petara enda datai enggau chara ti ditemu semua orang. Orang mega enda madahka, ‘Peda kita ditu!’ tauka, ‘Peda kita din!’ laban Perintah Petara bisi ba entara kita.”—Luke 17:20, 21.

Sekeda orang engka ngumbai Jesus madah, Perintah Petara merintah ba dalam ati bala nembiak Petara. Tang nya ukai reti ku Jesus laban Perintah Petara nadai ba ati orang Parisi. Tang Perintah Petara bisi ba entara sida, laban raja ke dipilih merintah Perintah Petara, iya nya Jesus bisi enggau sida.—Matthew 21:5.

Pengudah orang Parisi mupuk, Jesus madahka penerang ke bukai ngagai bala murid iya pasal penatai Perintah Petara. Ku Jesus meri amaran ngagai bala murid iya: “Hari deka datai alai kita ngarapka diri deka meda maya Anak Mensia bisi enggau kita, tang kita enda ulih meda nya.” (Luke 17:22) Sekeda murid Jesus engka bebendar nganti penatai Perintah Petara. Lalu sida mega nganti maya Anak Mensia merintah ba Perintah Petara. Tang Jesus madahka utai nya enda nyadi ba jeman sida. Nya alai, sida patut nganti nyentuk ngagai maya ti dipilih Petara alai Anak Mensia deka merintah ba Perintah Petara.

Jesus madahka: “Orang deka madah ngagai kita, ‘Peda, iya bisi ba din!’ tauka, ‘Peda, iya bisi ba ditu!’ Anang kita pansut tauka nitihka sida. Baka kilat ti nyelar ari ujung langit siti ngagai ujung langit ke bukai, baka nya meh maya Anak Mensia bisi enggau kita.” (Luke 17:23, 24) Baka ni Jesus deka nyaga bala murid iya ngambika sida enda nitihka orang ke nipu lalu ngumbai diri messiah? Jesus madahka penatai Messiah ti bendar ulih dipeda enggau terang baka kilat ti nyelar. Lebuh maya nya, orang ke bejaga tentu ulih meda penatai Jesus ba Perintah Petara.

Pengudah nya, Jesus mandingka utai ke kala nyadi suba enggau ulah mensia maya Anak Mensia datai: “Baka maya jeman Noah kelia, baka nya meh gaya maya Anak Mensia bisi enggau kita . . . Pia mega, maya jeman Lot kelia. Orang majak makai ngirup, bebeli enggau bejualka utai, betanamka utai, sereta begagaka rumah. Tang ba hari Lot pansut ari Sodom, api enggau merirang nurun ari langit ngemunaska semua orang ba dia. Baka nya meh gaya utai ke deka nyadi ba hari Anak Mensia mandangka diri.”—Luke 17:26-30.

 Kati Jesus madahka orang ba jeman Noah enggau jeman Lot dipunaska laban sida makai ngirup, bebeli enggau bejualka utai, betanamka utai, sereta begagaka rumah? Enda, laban Noah enggau Lot sereta ruang bilik sida mega ngereja sekeda ari pengawa nya. Lalu taja pan orang bukai bisi ngereja pengawa nya, tang sida enda ngemeratka peneka Petara. Pia mega, sida idup ba jeman alai sida patut bejaga tang sida enda bebendar ngereja nya. Enggau tu, Jesus nunjukka chara orang ulih nyelamatka nyawa diri lebuh Petara ngemunaska orang ke jai ba jemah ila.

Bala murid patut bejimat ngambika sida enda dilimpangka enggau utai ke bisi ba dunya tu, tauka ‘utai ke udah ditinggalka.’ Ku Jesus: “Maya nya ila, orang ke ba atas perabung enda patut nurun ngambi utai ke ba dalam rumah iya. Pia mega, orang ke ba ladang enda patut nikal ngambi utai ke tinggal. Kingatka bini Lot.” (Luke 17:31, 32) Bini Lot nyadi tiang garam.

Jesus lalu madahka utai ke deka nyadi maya Anak Mensia merintah nyadi raja. Ku iya madah ngagai bala murid: “Malam nya enti bisi dua iku orang ba siti katil, siku deka ditabanka, lalu siku deka ditinggalka.” (Luke 17:34) Nyadi, sekeda orang deka diselamatka lalu sekeda orang deka ditinggalka sereta lenyau nyawa.

Bala murid nanya Jesus: “Tuan, dini alai utai nya deka nyadi?” Ku Jesus nyaut: “Dia alai bangkai, dia meh alai burung menaul deka begelumu.” (Luke 17:37) Nya alai, sekeda orang deka nyadi baka burung menaul ke bisi mata ti lansik. Bala murid deka ngelala sapa Kristus ti bendar, iya nya Anak Mensia lalu begelumu nitihka iya. Maya nya, Jesus deka ngajar bala murid iya pasal pemendar ke ulih nyelamatka nyawa orang ke arapka iya.