Jesus engka agi ba Perea, timur Sungai Jordan lebuh iya madahka jaku sempama pasal bedus ke lenyau enggau duit seling ke lenyau. Nengah dua iti sempama nya, Jesus ngajar kitai patut gaga ati lebuh orang ke bedosa nesal ati. Orang Parisi enggau bala penulis Adat ngutuk Jesus laban iya begulai enggau orang ke bedosa. Tang kati sida bisi ngubah runding sida pengudah ninga dua iti sempama ari Jesus? Kati sida udah mereti asai ati Apai kitai ti ba serega ngagai orang ke nesal ati? Diatu, Jesus meri siti da agi jaku sempama ti negu ati, kena nekanka ajar ti penting nya.

Jaku sempama tu madahka pasal siku apai ke bisi dua iku anak lelaki, lalu anak ke biak nyadi watak utama ba sempama nya. Orang Parisi enggau bala penulis Adat, sereta orang bukai ke ningaka Jesus ulih belajar ari utai ke nyadi ngagai anak ke biak dalam sempama nya. Taja pia, ulah apai enggau anak ke tuai nya mega patut diperatika kitai. Nya alai, kitai ulih belajar ari tiga iku sida seraya kitai beratika jaku sempama tu:

Jesus madahka: “Siku lelaki bisi dua iku anak lelaki. Anak ke biak madah ngagai apai iya, ‘Apai, beri ngagai aku ungkup aku ari reta tengkira nuan.’ Apai nya lalu magi reta tengkira iya ngagai dua iku anak iya.” (Luke 15:11, 12) Peratika, anak ke biak nya minta ungkup reta tengkira iya taja pan apai iya agi idup. Iya deka bulih reta nya tekala nya, ngambika iya ulih idup bibas. Nama digaga iya udah nya?

Jesus madah baru: “Beberapa hari udah nya, anak ke biak nya ngumpul semua reta iya lalu mupuk ngagai menua ti jauh. Ba din, iya masau reta iya lalu idup ngena chara ti enda menuku.” (Luke 15:13) Ari ke terus diau enggau apai ke sayauka iya sereta nyaga utai ke diguna iya, anak ke biak nya milih mupuk ari rumah iya ngagai menua bukai. Lalu iya masau semua reta iya, ngemuaska pengingin diri empu. Tang pengudah reta iya abis, pengidup iya nyadi tusah.

Ku Jesus: “Pengudah semua reta iya abis, lapar pungkang ti balat nyadi ba serata menua  nya lalu iya nyadi seranta. Iya indah bekuli ba siku orang ke diau ba menua nya, lalu iya diasuh nyaga raban babi orang nya ba padang. Iya kelalu lapar nyentukka iya deka makai utai ke diempa babi. Tang nadai ga orang meri iya utai diempa.”—Luke 15:14-16.

Nitihka Adat Petara, babi dikumbai enda tuchi. Tang anak nya gawa nyaga raban babi ba padang. Ketegal iya kelalu lapar, iya deka makai utai ke diempa babi. Nyau kelama, “iya sedarka pemeli diri.” Lalu iya madahka diri: “Apai aku ngaji mayuh orang lalu semua sida bisi mayuh pemakai. Tang aku ba ditu nyauka mati lapar! Aku deka mupuk lalu pulai ngagai apai aku. Aku deka madah ngagai iya: ‘Apai, aku udah bedosa ngagai nuan enggau Petara ke ba serega. Aku enda layak agi dikumbai anak nuan. Awakka aku nyadi orang gaji nuan.’” Udah nya, iya mupuk lalu pulai ngagai apai iya.—Luke 15:17-20.

Nama reaksi apai iya? Kati iya ringat ngagai anak iya, lalu nganu anak iya laban udah ninggalka rumah? Kati apai iya deka muru iya? Enti nuan nyadi apai nya, nama deka digaga nuan?

Jesus madahka reaksi apai nya: “Lebuh apai iya meda iya ari jauh, apai iya kasihka iya lalu belanda ngagai iya, merap iya, lalu nyium iya.” (Luke 15:20) Apai nya engka udah nemu anak iya idup enggau chara ti enda menuku, tang iya agi nyambut pemulai anak iya. Baka nya mega, Apai kitai ti ba serega deka nerima orang ke nesal ati. Taja pan bala ketuai orang Judah ngumbai diri bisi kaul ti manah enggau Jehovah, tang kati sida meretika asai ati Iya ngagai orang ke nesal ati? Kati sida nemu Jesus benung nitihka teladan Apai iya?

Lebuh apai nya meda anak iya balat tusah ati, iya tentu nemu anak iya amat nesal ati. Lalu apai nya belanda sereta nyambut anak nya enggau gaga ati. Reaksi apai nya tentu nulung anak iya berasai senang agi deka ngaku dosa diri. Ku Jesus madah: “Udah nya, anak nya madah ngagai apai iya, ‘Apai, aku udah bedosa ngagai nuan enggau Petara ke ba serega. Aku enda layak agi dikumbai anak nuan.’”—Luke 15:21.

Apai nya lalu madah ngagai bala ulun iya: “Jampat, bai baju jubah ke pemadu manah lalu pasukka baju nya ba iya. Rasukka tinchin ba jari iya sereta kasut ba kaki iya. Sayat anak sapi ti gemu. Kitai deka rami makai lalu nyambut anak aku ke udah pulai. Laban anak aku udah mati, tang diatu iya idup baru. Iya udah lenyau, tang diatu iya udah ditemu.” Lalu, sida pan “rami gaga ati.”—Luke 15:22-24.

Maya nya, anak ke tuai benung ba umai. Ku Jesus madah pasal iya: “Lebuh iya pulai lalu nyauka datai ba rumah, iya ninga munyi musik enggau munyi orang ke betanda. Nya alai, iya ngangauka siku ari ulun iya lalu nanya nama utai ke benung nyadi. Ulun nya madah ngagai iya, ‘Menyadi nuan udah pulai. Apai nuan udah nyayat anak sapi ti gemu laban menyadi nuan udah pulai enggau selamat.’ Tang lebuh iya ninga nya, iya ringat lalu enggai tama ke rumah.  Apai iya pansut lalu ngumbuk iya tama ke rumah. Ku iya madah ngagai apai iya, ‘Dinga nuan. Betaun-taun aku udah gawa ke nuan baka ulun lalu aku nadai kala enda ngasika nuan. Taja pia, sekali pan enda meh nuan meri aku anak kambin kena aku rami makai enggau bala kaban aku. Tang lebuh anak nuan nya pulai, anak nuan nya ke masau reta nuan enggau bala indu sundal, nuan indah nyayat anak sapi ti gemu ke iya.’”—Luke 15:25-30.

Bala penulis Adat enggau orang Parisi baka anak ke tuai nya. Sida ngutuk Jesus laban iya kasihka orang biasa sereta orang ke bedosa. Nya kebuah Jesus meri jaku sempama nya kena ngemetulka runding sida. Barang sapa ke ngutuk pengasih Petara patut belajar ari jaku sempama tu.

Jesus ngujungka jaku sempama nya enggau utai ti dipadah apai nya ngagai anak ke tuai iya: “Anak, nuan endang seruran enggau aku, lalu semua utai ti dikemisi aku endang enggi nuan magang. Tang kitai patut rami gaga ati, laban menyadi nuan udah mati, tang diatu iya idup baru. Iya udah lenyau, tang diatu iya udah ditemu.”—Luke 15:31, 32.

Jesus enda nyebut pasal utai ke digaga anak ke tuai nya. Taja pia, pengudah Jesus mati sereta diangkatka idup baru, ‘mayuh bala imam arap.’ (Surat Kereja Rasul 6:7) Sekeda ari sida engka bisi ninga jaku sempama Jesus pasal anak lelaki ke lenyau. Tu terang nunjukka, bala tuai pengarap orang Judah mega ulih ngubah runding sida, nesal ati lalu pulai baru ngagai Petara.

Semua murid Jesus ulih belajar mayuh utai ari jaku sempama tu. Keterubah iya, kitai enggai alah laban pengingin ke ulih ngelimpangka kitai ngagai menua ti jauh. Endaka manah agi enti kitai terus begulai enggau nembiak Petara, ngambika kitai ulih dijaga Apai kitai ti penuh enggau pengerindu? Iya tentu deka meri kitai semua utai ti diguna kitai.

Kedua, enti kitai limpang ari jalai Petara, kitai patut baruh ati pulai baru ngagai Iya ngambika ulih diterima Iya baru.

Ketiga, kitai ulih belajar ari utai ke nyadi lebuh anak lelaki nya pulai baru. Apai iya deka nerima iya lalu ngampunka iya, tang menyadi tuai iya enggai. Nya alai, bala nembiak Jehovah patut ngampun sereta nyambut orang ke udah nesal ati lalu pulai baru ngagai Jehovah. Kitai mega patut gaga ati enti menyadi kitai ke ‘udah mati diatu idup baru’ sereta ke ‘udah lenyau, tang diatu udah ditemu.’