Pengudah Jesus ngeraika siku lelaki ke sakit, iya agi ba rumah ketuai orang Parisi. Ba dia, iya beratika orang milih endur ti pemadu badas ke diri empu. Nya kebuah Jesus ngena peluang tu ngajar pasal pemaruh ati.

Jesus madahka: “Lebuh orang mai kita ngagai pengerami tikah, anang duduk ba endur ti pemadu badas, laban engka orang ke tinggi agi pangkat ari kita mega bisi dikangau datai. Udah nya, orang ke mai kita ngagai pengerami tikah nya deka datai lalu bejaku ngagai kita, ‘Awakka iya duduk ba endur tu.’ Kita tentu berasai malu lalu mindah ngagai endur ti pemadu belakang.”—Luke 14:8, 9.

Udah nya, Jesus madahka: “Lebuh kita dibai ngagai pengerami tikah, duduk meh ba endur ti pemadu belakang. Lebuh orang ke mai kita ngagai pengerami tikah nya datai, iya deka bejaku ngagai kita, ‘Unggal, aram duduk ba endur ke manah agi.’ Maya nya, kita deka dipebasa ba mua semua temuai.” Jesus ukai semina ngajar pasal chara nunjukka basa. Iya nerangka: “Laban barang sapa ke ngeninggika diri, deka dikemaruhka. Lalu barang sapa ke ngemaruhka diri, deka ditinggika.” (Luke 14:10, 11) Nyadi kebendar iya, Jesus deka meransang orang ngayanka pemaruh ati.

Jesus lalu ngajar siti da agi utai ngagai orang Parisi ke udah mai iya makai, iya nya pasal chara nyediaka pengerami makai ke ngelantangka ati Petara. Ku iya: “Lebuh nuan nyediaka pengerami makai besai maya tengah hari tauka maya malam hari, anang mai bala kaban, bala menyadi, bala kaban belayan, tauka orang ke diau semak nuan ke kaya. Laban ila, sida mega engka mai nuan datai makai. Enti pia, nuan udah nerima upah nuan. Tang lebuh nuan nyediaka pengerami makai besai, bai meh orang ke seranta, ke tachat, ke pinchat, enggau ke buta. Nya baru nuan deka gaga ati, laban sida nadai nama-nama utai kena malas pemanah nuan.”—Luke 14:12-14.

Kitai rindu mai kaban, kaban belayan enggau orang ke diau semak enggau kitai sama makai. Jesus nadai madahka utai tu salah. Tang Jesus meransang orang mai sida ke enda dikeibuhka, baka orang ke miskin, ke tachat, ke buta ngagai pengerami makai besai. Enggau nya, Petara deka merekatka orang nya. Jesus madah ngagai orang Parisi nya: “Nuan deka nerima upah nuan lebuh orang ke lurus diidupka baru.” Siku ari temuai ba dia setuju lalu madahka: “Gaga ati meh orang ke makai ba Perintah Petara.” (Luke 14:15) Temuai nya ngumbai makai ba Perintah Petara siti basa ti besai. Tang ukai semua orang bisi runding ti sama baka temuai nya.

Nyadi Jesus meri jaku sempama tu: “Siku lelaki nyediaka pengerami makai besai, lalu iya mai mayuh temuai datai. . . . Iya ngasuh ulun iya madah ngagai bala temuai ke udah dibai iya datai, ‘Datai meh, laban semua utai udah sedia.’ Tang semua sida ngiga tegal ngambika enda datai. Siku ari sida madahka, ‘Aku baru udah meli tanah lalu aku deka meda tanah nya. Minta ampun, aku enda ulih datai.’ Siku da agi madahka, ‘Aku baru udah meli 10 iku sapi lalu aku deka meresa sida. Minta ampun, aku enda ulih datai.’ Ku siku agi madahka, ‘Aku baru udah kawin, nya alai aku enda ulih datai.’”—Luke 14:16-20.

Semua tegal ke diberi sida nya enda masuk akal! Kesuah iya, orang deka meda tanah tauka meresa sapi sebedau sida meli utai nya. Nya alai, sida enda ibuh beguai meda utai ke dibeli sida. Orang ti ketiga nya udah kawin. Iya ukai patut nyediaka diri deka kawin. Nyadi, iya ulih enggau pengerami makai nya.

Lebuh tuan nya ninga tegal ke diberi sida, iya ringat lalu madah ngagai ulun iya: “Alai, jampat nuan ngagai jalai besai enggau jalai mit ba nengeri,  lalu bai kitu orang ke seranta, ke tachat, ke buta, enggau ke pinchat.’ Pengudah ulun nya pulai, iya madahka, ‘Tuan, utai ke diasuh nuan udah digaga aku. Tang kitai agi bisi endur ke orang ke datai.’ Nya alai tuan nya madahka ngagai ulun iya, ‘Alai nuan mupuk ngagai jalai bukai ba luar nengeri, lalu bebendar meh ngasuh orang datai ngambika rumah aku penuh laban orang. Aku madah ngagai nuan: Nadai siku pan ari bala temuai ke dulu dibai datai nya deka makai ba pengerami makai besai ke disediaka aku.’”—Luke 14:21-24.

Nama reti jaku sempama Jesus nya? Sempama nya ngambarka Petara Jehovah ke udah ngasuh Jesus Kristus ngelaluka orang tama ngagai Perintah serega. Bala temuai keterubah ke dibai nya orang Judah, kelebih agi bala tuai pengarap sida. Sepemanjai pengawa nginjil Jesus, mayuh ari sida nulak peluang ke diberi iya. Nya alai, peluang tu deka diberi ngagai orang bukai. Jesus nunjukka peluang tu deka diberi ngagai sida ke megai pengarap Judah sereta orang Judah ke enda dikeibuhka tuai pengarap. Kepenudi iya, peluang tu deka diberi ngagai sida ke dikumbai orang Judah enda layak diterima Petara.—Surat Kereja Rasul 10:28-48.

Nya alai, utai ke dipadah siku temuai nya endang amat: “Gaga ati meh orang ke makai ba Perintah Petara.”