Jesus kala madah ngagai bala murid iya sempama pasal kebuah patut besampi. (Luke 11:5-13) Diatu iya engka ba Samaria tauka ba Galili, lalu iya agi ngajar kebuah patut terus besampi. Nya alai, iya madahka siti jaku sempama.

Ku iya: “Ba siti nengeri bisi siku hakim ke enda nangika Petara sereta enda bebasaka orang. Ba nengeri nya mega bisi siku indu balu ke suah betemu enggau iya lalu madahka, ‘Tentuka aku diakim enggau lurus lebuh orang ngelaban aku ba kot.’ Lama hakim nya enggai nulung indu balu nya. Tang udah nya, ku iya bejaku dalam ati diri, ‘Taja pan aku enda nangika Petara sereta enda bebasaka orang, aku deka nentuka iya diakim enggau lurus, laban iya enda badu ngiruhka aku. Enti enda, iya tentu majak datai ngachau aku nyentukka aku nyau enda ulih tan agi.’”—Luke 18:2-5.

Jesus lalu nerangka: “Dinga meh utai ke disebut hakim nya, taja pan iya ukai orang ke lurus! Pia mega, taja pan Petara nya sabar, endaka Iya deka nentuka nembiak ke dipilih Iya, ke ngangauka Iya siang enggau malam, diakim enggau lurus?” (Luke 18:6, 7) Nama utai ke diajar Jesus pasal Apai iya?

Jesus tentu enda madah Petara Jehovah sebaka enggau hakim ti enda lurus nya. Jesus ngajar, enti hakim ke enda lurus nulung indu nya ketegal iya enda ngetu minta, Petara lebih agi deka nulung orang. Ketegal Petara lurus sereta manah ati, Iya deka nulung bala nembiak Iya ke enda ngetu besampi. Ku Jesus agi: “Aku madah ngagai kita: Petara deka jampat ngakim sida enggau lurus.”—Luke 18:8.

Orang ke miskin suah agi enda diintu enggau lurus, lalu orang kaya dikerinduka orang mayuh. Tang nya enda sejalai enggau peneka Petara. Ba maya ti ngena, Iya deka ngukum orang ke jai sereta meri pengidup ti meruan ngagai bala nembiak Iya.

Nya meh utai ke diajar Jesus pasal kebuah patut terus besampi. Tang sapa ke ngembuan pengarap baka indu balu nya, lalu pechaya Petara deka “jampat ngakim sida enggau lurus”? Pengudah nya, Jesus ngajar pasal kebuah patut arapka kuasa sampi: “Lebuh Anak Mensia datai, kati iya ulih tetemuka orang ke arap baka nya ba dunya tu?” (Luke 18:8) Jaku Jesus nunjukka mimit aja orang deka ngayanka pengarap ti besai lebuh iya datai baru.

Sekeda orang ke ningaka Jesus ngumbai diri alim sereta lurus, tang sida ngemaruhka orang bukai. Nya alai, Jesus madahka jaku sempama tu ngagai sida.

Ku iya: “Dua iku lelaki ngagai Rumah Sembiang deka besampi. Siku nya orang Parisi lalu siku da agi pengumpul chukai. Orang Parisi nya bediri lalu besampi dalam ati diri, ‘O Petara, aku beterima kasih ngagai Nuan laban aku enda baka pengumpul chukai tu, tauka orang ke ngerampas utai orang bukai, ngereja penyalah, sereta butang. Aku bepasa dua kali seminggu, lalu sebagi ari utai ke diulih aku diberi aku nyadika pemeri.’”—Luke 18:10-12.

 Orang Parisi rindu nunjukka diri lurus ba mua orang mayuh sereta minta dipuji orang. Sida mega rindu bepasa ba hari satu enggau hari empat, laban maya nya mayuh orang ngagai pasar lalu meda utai ke digaga sida. Sida kelalu ngemeratka pemeri sepuluh peratus, nyentukka tumbuhan ti mit pan dikira sida. (Luke 11:42) Beberapa bulan sebedau tu, sida ngemaruhka orang biasa lalu madahka: “Petara enda lantang ati enggau orang mayuh tu ke enda nemu pasal Adat.”—John 7:49.

Ku Jesus madah baru: “Tang pengumpul chukai nya bediri ari jauh, enda berani engkadah ke langit. Iya majak mandam dada diri lalu madahka, ‘O Petara, kasih meh ke aku laban aku orang ke bedosa.’ Aku madah ngagai kita: Maya orang tu pulai, ba mata Petara, iya jauh lurus agi ari orang Parisi nya. Laban tiap iku orang ke ngeninggika diri deka dikemaluka, tang barang sapa ke ngemaruhka diri deka ditinggika.”—Luke 18:13, 14.

Nyadi, Jesus nunjukka pemaruh ati amat beguna. Jaku lalau tu ulih nulung bala murid Jesus laban ba jeman sida, orang Parisi seruran ngemeratka pangkat. Jaku lalau tu pan mai penguntung ngagai kitai kemayaharitu.