Bala munsuh Jesus ringat laban iya udah ngena beberapa iti jaku sempama kena mantaika penyai sida. Bala orang Parisi baum laban sida deka manjuk Jesus ngena jaku iya empu ngambika sida ulih nangkap iya, lalu nyerahka iya ngagai gabenor Rome. Nya alai, orang Parisi ngupah sekeda murid sida ngereja nya.—Luke 6:7.

Sida madahka: “Pengajar, kami nemu nuan nyebut sereta ngajar utai ti betul. Nuan enda bechiping, tang ngajar jalai Petara beduduk ba utai ti bendar: Kati tau kitai mayar chukai ngagai raja Rome?” (Luke 20:21, 22) Jesus nemu sida pintar nipu lalu jaku puji sida pura-pura aja. Enti Jesus madah: ‘Enda tau mayar chukai,’ orang ulih nuduh Jesus ngelaban perintah Rome. Tang enti iya madah: ‘Patut mayar chukai,’ sida ulih salah faham laban mayuh orang ba dia enda rindu dibaruh kuasa perintah Rome, lalu sida deka ngelaban Jesus. Nyadi baka ni Jesus deka nyaut sida?

Jesus madah: “Kita tu orang ke pura-pura ngapa! Nama kebuah kita nguji aku? Pandangka ngagai aku duit seling kena mayar chukai.” Lebuh sida mai sesingkap duit seling denari ngagai Jesus, iya nanya sida: “Gambar sapa enggau gelar sapa tu?” Sida lalu nyaut, “Raja Rome.” Pengudah nya, Jesus enggau pintar nyaut sida: “Enti pia, utai ke enggi raja Rome, beri ngagai raja Rome, tang utai ke enggi Petara, beri ngagai Petara.”—Matthew 22:18-21.

Saut Jesus ngasuh sida balat alit ati. Nya alai, sida enda bemunyi lalu mupuk ari endur nya. Orang Parisi enda mujur manjuk Jesus.  Tang udah nya, sekeda orang Saduki datai ngagai iya.

Orang Saduki enda pechayaka harapan pengangkat ari mati. Nya alai, sida deka nguji Jesus lalu nanya iya: “Pengajar, Moses madahka: ‘Enti siku lelaki mati sebedau iya bisi anak, menyadi lelaki iya patut jadi enggau balu nya, ngambika lelaki ke udah mati nya bisi peturun.’ Nyadi sekali, ba bala kami bisi tujuh iku orang diri menyadi. Iya ke tuai bebini, lalu mati sebedau iya bisi anak. Udah nya, menyadi iya jadi enggau balu iya nya. Utai ti sama mega nyadi ba menyadi iya ti kedua, ti ketiga, nyentuk ngagai menyadi iya ti ketujuh. Pengujung iya, indu nya mega mati. Lebuh orang ke mati diangkatka idup baru ila, sapa ari sida tujuh iku nya ke bempu bini nya? Laban semua sida kala jadi enggau iya.”—Matthew 22:24-28.

Ketegal Jesus nemu orang Saduki pechaya utai ti ditulis Moses, iya madah ngagai sida: “Salah penemu kita nya, laban kita enda nemu Bup Kudus, tauka kuasa Petara. Laban lebuh orang ke mati diidupka baru ila, sida nadai jadi melaki-bini tauka nikah, tang nyadi baka melikat ti ba serega. Tang bekaul enggau orang ke mati ti diidupka baru, kati kita nadai kala macha dalam bup Moses, pasal babas ti diempa api? Petara bejaku ngagai Moses: ‘Aku tu Petara Abraham, Isak, enggau Jakop.’ Iya ukai Petara ke orang ti mati, tang Petara ke orang ti idup. Penemu kita amat salah.” (Mark 12:24-27; Pemansut 3:1-6) Orang mayuh kagum ninga saut Jesus.

Jesus udah nyaut orang Parisi enggau orang Saduki nyentukka sida enda bemunyi agi. Nya alai, sida bepekat kena nguji Jesus. Pengudah nya, siku ari penulis Adat nanya Jesus: “Pengajar, ni bagi pesan ti pemadu besai dalam Adat?”—Matthew 22:36.

Jesus lalu nyaut: “Pesan ti pemadu besai nya, ‘Pendingka tu, O kita orang Israel! Jehovah nya Petara kitai, lalu semina siku Iya aja ti Jehovah. Kita patut rinduka Jehovah Petara kita, enggau pengabis ati kita, enggau pengabis pengidup kita, enggau pengabis runding kita, sereta enggau pengabis pengering kita.’ Pesan ti kedua nya, ‘Kita patut rinduka orang bukai baka kita ke rinduka diri empu.’ Nadai pesan bukai ke besai agi ari dua iti pesan tu.”—Mark 12:29-31.

Pengudah iya ninga saut Jesus, penulis Adat nya madah: “Pengajar, manah utai ku nuan nya, lalu sejalai enggau utai ti betul. ‘Semina siku aja Petara, lalu nadai Petara bukai, kelimpah ari Iya.’ Mensia patut rinduka Iya enggau pengabis ati, enggau pengabis runding, sereta enggau pengabis pengering. Mensia mega patut rinduka orang bukai baka sida ke rinduka diri empu. Tu beguna agi ari semua pemeri tunu enggau semua pemeri ke bukai.” Lebuh Jesus meda penulis Adat nya udah nyaut enggau betul, Jesus madah: “Nuan enda jauh ari Perintah Petara.”—Mark 12:32-34.

Jesus udah ngajar ba Rumah Sembiang pengelama tiga hari, iya nya ba 9, 10 enggau 11 Nisan. Sekeda orang baka penulis Adat nya rindu ninga ajar Jesus. Tang bala tuai pengarap begedika Jesus. Taja pia, sida enda “berani nanyaka utai ngagai iya.”