Maya nya, engka udah dini hari lebuh Peter nyangkal Jesus. Lalu, pengawa pechara ke diatur Raban Kunsil Orang Judah udah tembu. Ba tumu pagi Hari Lima, sida baum baru. Sida engka deka madahka baru pemutus ke udah digaga sida ba malam sebedau nya. Tu ketegal, sida deka ngelalaika penyalah sida ke udah baum maya malam Pengerami Paska. Nya alai, Jesus sekali agi dibai betemu enggau sida.

Ku sida madah baru: “Padahka ngagai kami enti nuan tu Kristus.” Disaut Jesus: “Taja pan aku madah ngagai kita, kita tentu enda pechaya. Pia mega, enti aku nanya kita, kita tentu enggai nyaut.” Tang Jesus enggau berani madahka ayat ba Daniel 7:13 ke nyebut pasal iya. Ku iya madah: “Berengkah ari diatu, Anak Mensia deka duduk ba sepiak kanan Petara ti bekuasa.”—Luke 22:67-69; Matthew 26:63.

Udah nya, sida nanya iya baru: “Enti pia, kati nuan tu Anak Petara?” Disaut Jesus: “Kita empu ke ngumbai aku Anak Petara.” Nya alai, sida ngumbai Jesus bejaku ngelaban Petara lalu deka iya diukum bunuh. Ku sida: “Enti pia, nama kebuah kitai begunaka saksi bukai?” (Luke 22:70, 71; Mark 14:64) Nyadi, sida nanchang Jesus lalu mai iya ngagai Gabenor Rome, iya nya Pontius Pilate.

Judas Iskariot engka nemu Jesus dibai ngagai Pilate. Lebuh Judas nemu Jesus deka diukum bunuh, iya berasai tusah ati. Tang ari ke nguing baru ngagai Petara lalu bebendar nesal ati, Judas mulaika baru 30 singkap duit pirak ke udah diulih iya. Ku Judas madah ngagai bala tuai imam: “Aku udah bedosa laban nyerahka orang ke nadai penyalah ngagai kita.” Taja pia, sida enda ibuhka Judas. Ku sida: “Pekara nya nadai kaul enggau kami. Nya pekara nuan empu!”—Matthew 27:4.

Nya alai, Judas muai duit nya ba Rumah Sembiang. Ke balat agi, iya mega nguji deka munuh diri. Lebuh Judas deka munuh diri, dan ke dikena iya nanchangka tali nya patah. Ketegal nya, iya labuh ke baruh lalu perut iya pechah. Semua perengka dalam perut iya tepambur pansut.—Surat Kereja Rasul 1:17, 18.

 Maya hari agi tumu pagi, Jesus dibai ngagai istana Pontius Pilate. Tang orang Judah ke mai iya enggai tama ngagai istana nya. Sida ngumbai diri deka nyadi enda tuchi enti sida betemu enggau orang ari bansa bukai. Enti sida enda tuchi, sida enda ulih enggau makai maya 15 Nisan, iya nya hari keterubah Pengerami Roti ti Enda Beragi. Kebendar iya, pengerami nya sebagi ari Pengerami Paska.

Pilate lalu nanya sida: “Nama jaku tuduh kita ngagai lelaki tu?” Ku sida: “Enti lelaki tu enda ngereja penyalah, enda kami nyerahka iya ngagai nuan.” Pilate engka ngasaika orang Judah deka nekan iya. Nyadi iya madah: “Bai iya pansut lalu akim iya nitihka adat kita.” Tang sida madah: “Kami nadai kuasa munuh orang.” (John 18:29-31) Jaku sida nunjukka sida deka Jesus dibunuh. Nya meh kebuah sida mai iya ngagai Pilate.

Iya ke amat, enti sida munuh Jesus maya Pengerami Paska, orang mayuh deka begau. Taja pia ba senentang tu, pemerintah Rome bisi kuasa ngukum bunuh orang ketegal jenayah ngelaban perintah Rome. Nyadi, bala tuai pengarap deka ngasuh orang Rome ngumbai Jesus besalah ketegal ngelaban perintah Rome, lalu iya patut diukum bunuh. Enti sida mujur ngereja nya, sida ngarapka orang Judah ke bukai enda nyalahka sida lebuh Jesus diukum bunuh.

Bala tuai pengarap nya enda madah ngagai Pilate pasal sida nuduh Jesus ngelaban Petara. Tang sida madahka utai bukai. Ku sida: “Lelaki tu ditemu kami [1] nesatka bansa kami. [2] Iya nagang orang mayar chukai ngagai raja Rome lalu [3] ngumbai diri Kristus sereta raja.”—Luke 23:2.

Ketegal Pilate pengari perintah Rome, iya irau laban bala tuai pengarap nuduh Jesus ngumbai diri raja. Pilate tama baru ngagai istana iya, ngangauka Jesus lalu nanya: “Kati nuan Raja orang Judah?” Nama reti iya nanya Jesus munyi nya? Reti iya: ‘Kati nuan udah ngelanggar undang-undang perintah Rome enggau madahka diri raja, lalu angkat ngelaban raja Rome?’ Nyadi, Jesus deka nemu berapa mayuh utai ke udah didinga Pilate pasal iya. Nya alai, Jesus nanya: “Kati nuan nanya munyi nya ari runding nuan empu, tauka bisi orang bukai ke madah ngagai nuan pasal aku?”—John 18:33, 34.

Kebendar iya, Pilate bedau nemu nama-nama utai pasal Jesus. Tang maya nya, iya deka nemu mayuh agi. Ku iya bejaku ngagai Jesus: “Aku ukai orang Judah. Bansa nuan empu enggau bala tuai imam ke nyerahka nuan ngagai aku. Nama utai ke udah digaga nuan?”—John 18:35.

Lebuh Jesus nyaut Pilate, iya enda belalai nyebut pasal Perintah. Lalu, utai ke disebut Jesus tentu ngasuh Gabenor Pilate tekenyit.